‘Hínsiñeguatiña hámagua’
‘Hínsiñeguatiña hámagua’
“Níchigaali iseri gumadi le hun: Lun hínsiñegua humá húmagua. Ítara kei hínsiñe nun, lunti giñe hínsiñegua humá húmagua. Anhaün hínsiñegua húmagua, hasubudirubei sun gürigia luagu nani humá disipulugu.” (HUAN 13:34, 35)
Ka mini lubéi: Ariñagati Kristu houn lani disipulugu lunti lan hínsiñegua hamá hámagua ítara kei hínsiñe lun. Gama lumoun, ida liña meha hínsiñe lun? Móuserun lumutiña meha amu rasa o würiña kei meha hóuseruniña gürigia (Huan 4:7-10). Yúsuti giñe saragu dan luma erei íderagua amu gürigia, meberesenga anhein mosu lubéi ladügün sákürifisiu (Márükosu 6:30-34). Gama lumoun líchuguni libagari ligía manera wéiritimati le ídanbei larufudei línsiñehabu. Kei aubei lariñagei: “Au hóuniribei mudún buiti, aban hóuniri mudún buiti ru lumuti libagari hawagu mudún” (Huan 10:11).
Hénpulu le híchugubei furumiñetiña kristiánugu: Wátiña meha kristiánugu ‘iduhei luéigiñe Kristu’ o íbiri houn ha híbiri kristiánu (Filemón 1, 2). Lau sun hagundan resibi hamutiña meha gürigia ha lílana amu néchani lidan damuriguaü. Afiñetiña meha kristiánugu ‘aban lan habu huríu hama ha mámabaña huríu; lugundun ábanmeme Haburemebei súngubei’ (Rómana 10:11, 12). Lidan irumu 33 danbei le lagumuchun fedu le gíribei Pentekosutesi, aba halugurahani kristiánugu ha herusalénna “hafulasun luma le hámati, aba hafanreinhani lebegi según lemegeirun kada aban”. Adüga hamuti le, lun gayara lan herederun ha málügili lúmagiñe habadiseirun lidan uburugu lun hasigirun aganbei harufudahan apostolugu (Adügaü 2:41-45). Ariñaga lumuti Tertuliano aban abürühati, ka lan uagu hadügei, kéiburi bián-san irumu lárigiñe hóunwegun apostolugu, águyuguagüda lumuti le hariñagubei amu gürigia hawagu kristiánugu: “Arihabá [...] ma lanarime hínsiñegua hámagua [...] aranseñu haña lun lounwen aban luagu aban”.
Ka adügübalin ligiaméme uguñe?: Tidan líburu Historia de la decadencia y ruina del Imperio romano arufudúati, luagu lan saragu sígulu, ha ariñagubaña kristiánugu hamá “wéiritimati damichi le hadügübei hóuniwagua sügǘ hau ha asufurirubaña háhaburugu ha mámabaña kristiánu”. Ma meme binarü, lidan aban aturiahani le adügǘbei Meriga, arihúati luagu gíbetimati lan iyereehabuni houn gürigia ha lídangiñetiña amu rasa haganagua ha gánibaña relihión, ani hibe-agei hádangiñe kristiánugu. Gürigia ha lílana ámuñegueinarügü ageiraü ha lídangiñetiña ábanmeme relihión úati gamadagua hamá. Ligía míderagun habaliña amu gürigia ha ábanmemebei hafiñen hama, dan le mégeiwa lan hadügüni.
Lidan irumu 2004 dagati gádürü herigini Florida (Meriga) lídanrügü bián hati. Lau lásügürün dan, busenti meha gürigia le arihibei lau sétanu le adügübei aransehani lubá liñawan dan, lasubudiruni ida liña lan lafanreinhóun éigini. Danti le líchugun fe gefentiña lan luagu Heowá aransetimabaña, füramaseti houn líchugubei lan sun le hemegeirun. Fiú irumu lubaragiñe, lidan irumu 1997, ñǘdünti aban sétanu gefentiña luagu Heowá lidan ageiraü le gíribei República Democrática del Congo lun híchugun árani, éigini tuma daüguaü houn híbirigu lidan afiñeni ha emegeirubalin. Chülüti lebegi sun le óunahoubei —híchugun amu gefentiña luagu Heowá yuropana— darí aban míñunu haseinsun merigein.