“Lapurichihóuba uganu buiti le luáguti larúeihan Bungiu”
“Lapurichihóuba uganu buiti le luáguti larúeihan Bungiu”
“Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu.” (MATÉU 24:14)
Ka mini lubéi: Según Ewanhéliu le labürüdübei Lúkasi: “Ñǘdünti Hesusu lidoun saragu uburugu luma burí lirahüñü fulasu íchigei uganu buiti luagu larúeihan Bungiu” (Lúkasi 8:1). Ani ariñagati: “Gasu giñe níchuguni uganu le luáguti larúeihan Bungiu houn lílana líbiri fulasu, ladüga lun lira nounahóua.” (Lúkasi 4:43.) Furumiñe, aba lóunahaniña Hesusu lani disipulugu apurichihei uganu buiti lidan uburugu luma lirahüñü fulasu le yarafabei, gama lumoun lárigiñe aba lariñagun houn: “Hibihuba ubafu lun gefén humá nuagu [...] chülǘ lumoun lidise-agei fulasu ubouagu” (Adügaü 1:8; Lúkasi 10:1).
Hénpulu le híchugubei furumiñetiña kristiánugu: Lau lóufudagun aba hadügüni lani Hesusu disipulugu le lariñagubei houn. Lidan Adügaü 5:42 abahüdawagúati: “Meredetiti harufudahan ténpulurugu luma tidan burí muna sagü weyu, ariñaga hagía luagu Hesusu lan Krístubei”. Súngubei hagía adüga hamuti wadagimanu le, mámarügü fiú hádangiñe. Abürühati August Neander luagu “éherahati meha Celso, aban hágani furumiñetiña kristiánugu, ladüga íbini meha gürigia hamá ha nadagimeinbaña luagu liyu mudún, aransehatiña sabadu, nadagimeintiña gueru, gürigia meha ha maleskuelantiña, súngubei hagía apurichihatiña lau ubebeni”. Afuranguagüdati Jean Bernardi, le abürüdübarun líburu to gíriboun Les premiers siècles de L’Église (Furumiñeti burí sígulu tani Ligilisi), luagu mosu lan meha “hayanuhan [kristiánugu] lidan sun fulasu houn sun gürigia. Lidan burí üma, uburugu, párükerügü, luma hábiñe gürigia. Lidan yebe lénrengunga o dan le buiduga lan”. Ariñagati giñe abürühati le, mosu meha hachülürün “darí lumoun lidise-agei fulasu ubouagu”.
Kátaña adügübalin ligiaméme uguñe?: Afiñeti fádiri lánina relihión anglikanu David Watson, luagu “mabusenrun habéi lan gürigia heseriwidun lun Bungiu uguñe weyu ladüga mapurichihan
hamá tílana Ligilisi ani marufudahan hagía”. Tidan líburu ¿Por qué se van los católicos?, to labürüdüboun José Luis Pérez Guadalupe afuranguagüdati hawagu gefentiña luagu Heowá “ñǘdüntiña apurichiha muna tuagu muna”, amu hagía hawéi banheliu, adwentista hama lílana amu relihión.Súdiniti inarüni le lariñagubei Jonathan Turley lidan aban ariñahani ladügün tun Cato Institute: “Buídurügüti lun lariñawagún gefentiña luagu Heowá lun hasaminarun hibe-agei gürigia hawagu apurichihatiña ha adaünhabaña luagu tubenari haban gürigia dan le magurabahan hamaniña. Ariha hamuti apurichihani muna tuagu muna mámarügü kei aban manera lun hasubudiragüdüni houn amu le furendei hamaali tídangiñe Bíbülia lubaragiñe lira, adüga hamuti ladüga hafiñen” (Cato Supreme Court Review, 2001-2002).
[Rekuáduru le lídanbei páhina 9]
Subudi humaali san kátaña lan?
Según le akutiha wamaalibei tídangiñe Bíbülia, lidan burí arütíkulu le lubaragiñebei le, subudi humaali san kátaña lan kristiánugu ha inarünitiña? Anuhein saragu milu relihión to ariñaguboun kristiánu tan. Gama lumoun, haritagua humá luagu le lariñagubei Hesusu houn ha afalarubalin: “Mama sun ha ariñagutiña nun: ‘Nabureme, Nabureme’, lun hebeluruba lan lidoun arúeihani le siélubei [...] hárügübaña adügübalin lugundan Núguchi Bungiu le siélubei ebelura” (Matéu 7:21). Lun gayara lan hagundaarun lau abiniruni magumuchaditi le lunbei lanügüni Larúeihan Bungiu, lunti hasubudiruni kátaña lan adügübalin lugundan Wáguchi le siélubei —kristiánugu ha inarünitiña— ani lunti giñe aban humá hádangiñe. Busentün hamuga lanwoun ariñahani luagu Larúeihan Bungiu luma luagu sun abiniruni le lunbei lanügüni? (Lúkasi 4:43.) Amisuraha wamutün lun hayanuhan hama ha íchugubarun garüdia to hun: gefentiña luagu Heowá.