Heowá “afuranguagüdübalin katei aramudaguati”

“Hubungiute ligía wéirigutimabei hádangiñe sun búngiugu; ligía Haburemebei urúeigu, ligía giñe afuranguagüdübalin katei aramudaguati.” (DAN. 2:47)

KABA HAMUGA HÓUNABA?

Ka ariñahani luagu le lunbei lasuseredun lasubudiragüdübei Heowá woun?

Ka mini lubéi furumiñeti sisi lichügü mónsturu?

Ka idan genegegua lan mónsturu luma guáriua le larihibei Nabukodonosoru lidan luénedü?

1, 2. Ka lafuranguagüdübei Heowá woun ani ka uagu?

KABA arúeihani gabafuti agumadiha ubouagu danme le lagumuchun Larúeihan Bungiu lau sun arúeihani ubouaguna? Seremei lun Heowá, Bungiu le “afuranguagüdübalin katei aramudaguati”, gayarati wóunabuni álügüdahani le. Lun gayara lan wadügüni, mosu wakutihanu líburu tídangiñetu Bíbülia to labürüdüboun Danieli tuma to labürüdüboun apostolu Huan.

² Adügati Heowá lun harihin wügüriña ha fiú arufudúni luáguti hachülaagun fiú mónsturu. Afuranguagüda lumuti giñe lun Danieli ka lan mini lubéi aban uénedü lánina profesía luáguti aban óunwenbu guáriua lauti metali. Lun wabuidun guánarügü, adügati Heowá lun labürüdǘn ariñahani le tidan Bíbülia (Rom. 15:4). Ítara liña lederebugudun wafiñen luagu málühali lan Larúeihan Bungiu agumucha lau sun arúeihani ubouaguna (Dan. 2:44).

3. Lun gunfuranda wamani profesía tídangiñe Bíbülia, ka lunbei gufuranda wamani furumiñe ani ka uagu?

³ Dandu abahüdaguni le lídanbei Danieli kei le lídanbei Huan, mama ariñagarügü hamuti kátaña lan buga widü ‘urúeigu’, o arúeihani gabafuti achülaagua, ariñaga hamuti giñe kaba lan achülaagua furumiñe luma lárigiñe. Lun gunfuranda wamani buidu le mini lubéi abahüdaguni burí ligía, furumiñe lunti gunfuranda wamani furumiñeti profesía le tídanbei Bíbülia. Ka uagu? Lugundun sun le tariñagubei Bíbülia gániti luma lagunfulirun profesía le. Gayarati wariñagun, lagunfulirun lan profesía le, ligía katei méinitimati le uágubei ladimureha le líbiri profesía tidan Bíbülia.

TADÜGAWAGUN HEWE LUMA MÓNSTURU

4. Kátaña tadügawagunbaña würi ani kaba hadüga?

⁴ Fiú dan lárigiñe ebedaaguni lidan Edén, ariñagati Heowá lidan aban profesía luagu ‘gadügawagunboun  lan würi’ (aliihoualá Agumesehani 3:15). * Ariñagati giñe lachuinragubei lan tadügawagun würi tichügü hewe, Satanási. Dan lárigiñe, afuranguagüdati Heowá hádangiñeba lan lufamilian Abüraámü, lídangiñe néchani Ísüraeli, lídangiñe lani Hudá türibu luma hádangiñe liduheñu urúei Dawidi liabin tadügawagun würi (Agu. 22:15-18; 49:10; Sal. 89:3, 4; Luk. 1:30-33). Hesukrístu ligía fánreinti méinitimabei lídangiñe tadügawagun würi (Gal. 3:16). Lílana damuriguaü kristiánu ha anuadirúaañabaña lau sífiri sandu, hagía libiaman fánreinti lídangiñe tadügawagun würi (Gal. 3:26-29). Hesusu úara hama ha anuadirúaañabaña lau sífiri hagíaba agumadiha lidan Larúeihan Bungiu, hagíaba layusura Heowá lun lachuinraguni Satanási (Luk. 12:32; Rom. 16:20).

5, 6. a) Átiriñein arúeihani gabafuti achülaagua lidan arufudúni le larihibei Danieli luma Huan? b) Ka mini lubéi lichügü burí mónsturu le lídanbei Arufudúni?

⁵ Según le furumiñeti profesía le tídanbei Bíbülia, ‘gadügawagunbei’ giñe Satanási ani gáganiguabaña buga hama tadügawagun würi. Kátaña tadügawagunbaña hewe? Sun ha iyereehabúbaña lun Bungiu kei Satanási ani ábürüha hagía hawagun lumutuniña. Lidan sun dan le sügühalibei, óundaraguagüda lumutiña Mafia ladügawagun lidan ámuñegueinarügü “arúeihani” lidan amu dimurei, agumadihani lánina polítika (Luk. 4:5, 6). Lídangiñe arúeihani le, fiúrügüñein gani hama lumutuniña Heowá, hama lan yebe binadu ísüraelina, o hama lan kristiánugu ha anuadirúaaña. Súdiniti katei le, lugundun afuranguagüda lumuti ka lan uagu wídürügüñein lubéi arúeihani gabafuti achülaagua lidan arufudúni le larihubei Danieli luma lidan le larihubei Huan.

⁶ Hesusu le meha águyuguaalibei lídangiñe óunweni, arufudati fiú arufudúni lun apostolu Huan kéiburi lidan irumu 96 (Aruf. 1:1). Lidan aban lídangiñe, arihati Huan aban düragón —aban sínbolu lani Mafia— lara laru barana (aliihoualá Arufudúni 12:17-13:1, 2). Ábati láfuridun aban mónsturu ámuti larihín baranahagiñe, aba líchugun Mafia saragu ubafu lun. Dan lárigiñe, afuranguagüda lumuti aban ánheli lun Huan “sedü [lan] urúeigu” o sedü arúeihani gabafuti ubouagu mini lubéi sedü lichügü mónsturu funati, aban “liyawa” mónsturu le uágubei layanuha Arufudúni 13:1 (Aruf. 13:14, 15; 17:3, 9 10). Danbei le tabürüdünbei líburu Arufudúni, seingü hádangiñe urúeigu hagía, gumuhali harúeihan, le lisisin larúeihaña  dan ligía, le lisedün, ‘miábingili meha’. Katei burí san arúeihani gabafuti ligía? Wakutihaali kada aban lídangiñe lichügü mónsturu. Wakutihabei giñe ariñahani le líchugubei Danieli hawagu urúeigu ha, lidan somu burí kesi saragu sígulu lubaragiñe hagumeserun arúeiha.

EHIPTU LUMA ASIRIA: BIÁN FURUMIÑETIÑA ICHÜGÜ

7. Ka furumiñetibei lichügü mónsturu ani ka uagu?

⁷ Furumiñeti lichügü mónsturu mini lan Ehiptu. Ka uagu? Lugundun ligía furumiñeti arúeihani gabafuti le furundebei houn lumutuniña Bungiu. Gumeseti ábürüha hawagun ladügawagun Abüraámü —hádangiñeba buga láfurida tadügawagun würi le füramasewabei— danbei le hagibedagun lidan ageiraü ligía. Lun yebe leredehani lachülaagun tadügawagun würi, hóuchati Satanási lagumuchun hau lumutuniña Bungiu. Ida? Adügati lun lóunahan Faraón áfaraguaña sun wügüriña irahüñü ha ísüraelina. Gama lumoun, adügati Heowá lun masali lan le labusenrubei Faraón ladügün ani aba lesefuruniña lubúeingu Ehiptugiñe (Afu. 1:15-20; 14:13). Lau lásügürün dan, aba lanügüniña aganawa lidan Fulasu Füramasewati.

8. Ka libiamanbei lichügü mónsturu ani ka yebe lálugubei ladügün?

⁸ Asiria mini lubéi libiaman lichügü mónsturu, aban meha arúeihani gabafuti le giñe álugubei lagumuchun hau lumutuniña Bungiu. Inarüni yusu lani Heowá arúeihani gabafuti le lun labeichuniña diisi türibu ladüga háhuduragun houn guáriua luma ladüga hebedaagun. Gama lumoun, dan lárigiñe aba giñe hábürühan asiriana luagun Herusalén. Másiñati busén lan meha Satanási lagumuchun hau familia hani urúeigu ha ñéingiñeba lubéi buga liabin Hesusu. Gama lumoun mama meha lisuuni Bungiu katei le. Ligía lóunahanbei Heowá aban ánheli lun lagünrinchaguniña áganiñu lun lesefuruniña lumutuniña ha úaraguabaña (2 Uru. 19:32-35; Isa. 10:5, 6, 12-15).

BABILÓNIA: LǗRÜWAN ICHÜGÜ

9, 10. a) Ka katei lígirubei Heowá lun hadügün babilóniana? b) Lun lagunfulirun profesía, ka meha mégeiwabei lun lasuseredun?

⁹ Lǘrüwan lichügü mónsturu le larihibei Huan, mini lan aban arúeihani le meha ídanbei Babilónia lan uburugu ichügüdinaü. Ígirati meha Heowá lun hárügüdüni babilóniana Herusalén luma lun hanügüniña lílana adaürǘwa. Ariñaga laali meha Bungiu houn ísüraelina ha ebedaagubaña luagu hǘnabudagüdüwaba lan (2 Uru. 20:16-18). Ariñagati lidan aban profesía luagu lagidarúba lan arúeihani hawéi urúeigu ha meha agumadihabaña Herusalén (1 Kro. 29:23). Gama lumoun, füramaseti giñe ñeinbei lan aban ladügawagun urúei Dawidi garichati lun larúeihan (Isa. 11:1).

¹⁰ Según amu profesía, añaheinguabaña buga ísüraelina áhuduragua lun Bungiu tidan ténpulu Herusalén danme buga le liabin Mesíasi, le lanúadirubei Heowá (Dan. 9:24-27). Ariñagati ábanya profesía le abürüdǘbei lubaragiñe hanügǘniwa ísüraelina Babilónioun, Belenba lan nasirua lan Mesíasi (Mik. 5:2). Lun lagunfulirun profesía burí le mosu buga halibürerúniwa huríu, hagiribudun hageiroun luma lun hábunagununya ténpulu. Gama lumoun, méchuntiña meha babilóniana ígiragüdaña gürigia ha hadaürǘbaña. Ida luba buga laranserun turóbuli le? Yusu lumutiña Heowá lánigu profeta lun lafuranguagüdüni (Amos 3:7).

11. Ka burí ámuñegueinarügü manera ídanbei ladimurehóua luagu Arúeihani Babilóniana? (Ariha huméi abürüdǘni.)

¹¹ Danieli meha aban hádangiñe ísüraelina ha anügǘbaña adaürǘwa (Dan. 1:1-6). Yusu lumuti Heowá profeta le lun lasubudiragüdüni ka burí lan buga arúeihani gabafuti ñübuin lárigiñe Babilónia. Aban hénpulu, adügati lun gewenedü lan urúei Nabukodonosoru aban óunwenbu guáriua le  ámuñeguinarügübei metali lubuña (aliihoualá Danieli 2:1, 19, 31-38). Yusu lumuti Bungiu Danieli lun lafuranguagüdüni arúeihani lan lani Babilóniana mini lubéi ábulugu le golu. * Laniguagu guáriua luma larüna le lauti pülata mini lan arúeihani gabafuti le lunbei liabin lárigiñe Babilónia. Katei funa san arúeihani le, ani ida luba meha lóuseruniña lumutuniña Bungiu?

MEDIA LUMA PÉRÜSIA: LIGADÜRÜN ICHÜGÜ

12, 13. a) Ka lasubudiragüdübei Heowá luagu larügüdǘn Babilónia? b) Ka uagu gayara lubéi wariñagun Media lan luma Pérüsia ligadürün lichügü mónsturu?

¹² Lóugiñe aban sígulu lubaragiñe lidaani Danieli, yusu lumuti Heowá profeta Isaíasi lun lasubudiragüdüni somu burí katei luagu arúeihani gabafuti le meha lunbei lábürügüdüni Babilónia. Mámarügüñein ida luba lan labürügüdǘniwa lariñaga, ariñaga lumuti giñe kaba lan liri urúei le meha lunbei lárügüdüni: Siru le Pérüsiana (Isa. 44:28-45:2). Arihati giñe Danieli bián arufudúni luagu arúeihani gabafuti lani Media luma Pérüsia. Lidan aban lídangiñe arufudúni ligía, ariha lumuti arúeihani le kei aban osu le íñuti aban louba luéi le aban, le unbei lariñawagúa “houbei sun wiñaadu le biyaraati” (Dan. 7:5). Lidan le aban arufudúni, ariha lumuti kei aban mudún le biánguabei iganchun (Dan. 8:3, 20).

¹³ Gúnfuli lumuti Heowá lani profesía lau ladügün lun lárügüdüni Media luma Pérüsia Babilónia ani ru hagía üma houn ísüraelina lun hagiribudun hageiroun (2 Kro. 36:22, 23). Gama lumoun, dan lárigiñe, ítagaraüyebe lagumuchun arúeihani le hau lumutuniña Bungiu. Tidan líburu to gíriboun Esütérü abahüdawagúati luagu leledegun Amán le lábuti gumadi Pérüsia lun hagumuchaguagüdüniwa huríu ha awinwandubaña lidan sun fulasu le lábugiñebei arúeihani, darí lun líchugun weyu lun háfarawagun. Seremei líchuguni Heowá lúhabu, ábanya hesefurun lumutuniña hawéi ladügawagun Satanási (Esü. 1:1-3; 3:8, 9; 8:3, 9-14). Ligía gayara lubéi wariñagun Media lan luma Pérüsia mini lubéi ligadürün lichügü mónsturu le lídanbei Arufudúni.

GÜRESIA: LISEINGÜN ICHÜGÜ

14, 15. Ka katei lariñagubei Heowá luagu Arúeihani güresiana?

¹⁴ Güresia ligía liseingün lichügü mónsturu le áfuridubei lidan Arufudúni. Dan le lariñaguni lanichigu luénedü Nabukodonosoru ariñagaali meha Danieli Güresia lan giñe mini lubéi laniguagu guáriua luma liyada le laubei buronse. Resibiti giñe profeta le bián arufudúni le íchugubei ariñahani, le arufudubalin ida luba lan buga arúeihani le luma luagu lurúeite, le wéirigutimabei.

¹⁵ Lidan aban arufudúni, ariha lumuti Danieli Güresia kei aban leoparüdu, lau gádürü arünaü, mini lan lira furesebei lan buga lagañeirun (Dan. 7:6). Lidan le aban arufudúni, ariha lumuti Danieli ida liña lan layusuruni aban gábara óunwenbu ganchu le luágubei lun láfarun lau lóufudagun aban mudún le gawagubei bián ganchu, mini lan lurúeitegu Media luma Pérüsia. Ariñagati Heowá lun Danieli Güresia lan mini lubéi gábara, ani óunwenbu ganchu le luágubei mini lan aban hádangiñe lurúeitegu Güresia. Lárigiñe, ariñagati Danieli láhalachawaguba lan óunwenbu liganchun Mudún ani láfuridayaba lan gádürü ganchu le ñǘraütimati leweñegua. Íbini bürüwa lan profesía le saragu san irumu lubaragiñe aban lan arúeihani gabafuti Güresia, gúnfuliti íbini lagumuhóun dimurei. Alehánduru Magno urúei le súdinitimabei lidan binadu Güresia alidihabalin lábürühoun luagun Media luma Pérüsia. Gama lumoun hálaguati ‘ganchu’ ligía, danbei le lounwen lau 32 irumu, dan le  buídutima lan lidin lun larúeihan. Lárigiñe, aba lafanreinragun arúeihani hadan gádürü hádangiñe hábutigu lisudaranigu (aliihoualá Danieli 8:20-22).

16. Ka ladügübei Antíoco gádürü?

¹⁶ Lárigiñe larügüdǘn Pérüsia, Güresia agumadihabei lidan fulasu le líchugubei Bungiu houn lubúeingu. Lidoun dan ligía giribuhaña huríu lidoun Fulasu Füramasewati ani aranseya hamaaru ténpulu to Herusalénboun. Lumutuniñagiña meha Bungiu, ani ténpulugiru meha fulasu méiniti le ñein lubéi ladügǘwa áhuduraguni inarüniti. Gama lumoun, lidan libiaman sígulu lubaragiñe lidaani Hesusu, ábürühati liseingün lichügü mónsturu hawagun, lidan amu dimurei Güresia. Adügati Antíoco gádürü, aban hádangiñe wügüriña ha galagantebalin arúeihani fánreinguali le lani Alehánduru aban latarü lun aban bungiu mama inarüniti tidan ténpulu to Herusalénboun, ani ruti gumadi lun háfarawagun sun ha lídanbaña hani huríu relihión. Ma lanarime hayereehabu ladügawagun Satanási! Gama lumoun, murusun dan lárigiñe, ábürühati Güresia lábugiñoun lubafu arúeihani le ñǘbuinbei lárigiñe. Katei funa san lisisinbei lichügü mónsturu?

ROMA: LISISIN ICHÜGÜ, “HANARIMETI [ANI] HANUFUNATI”

17. Ka gárada súdinitu láhureruboun lisisin ichügü lidan lagunfulirun Agumesehani 3:15?

¹⁷ Danbei le larihini apostolu Huan arufudúni, Roma ligía arúeihani gabafuti agumadihabei (Aruf. 17:10). Súdinitu ligaradan lisisin ichügü lidan lagunfulirun profesía le lídanbei Agumesehani 3:15. Yusu lumutiña Satanási gumadimatiña rómana lun lágürüni ‘lihilin lugudi’ tadügawagun würi luagu murusun dan. Ida? Adügati lun lasiadirún Hesusu, afarúa ligía luagu duru iyeeniti lánina ebedaaguni (Mat. 27:26). Gama lumoun, málüti lubá lareidagun gürüti ligía, lugundun águyuguagüda lumuti Heowá Hesusu.

18. a) Ka iseri néchani lanúadirubei Heowá ani ka uagu? b) Ida liña hasigirun tadügawagun hewe ananiha houn tadügawagun würi?

¹⁸ Aba húaradun alidihatiña relihión ha huríu luma Roma lun háfaruni Hesusu, ani hibe-agei lílana néchani ligía máhatiña heresibiruni. Ligía lígirunbaliña Heowá ísüraelina (Mat. 23:38; Adü. 2:22, 23). Lidan halugaarun aban lanúadirun aban iseri néchani “Ísüraeli le lani Bungiu” (Gal. 3:26-29; 6:16, NM). Iseri néchani le ligía damuriguaü hani kristiánugu ha anuadirúbaña lau sífiri, dandu huríu kei mama huríu (Efe. 2:11-18). Lárigiñe láguyugun Hesusu, sigitiña tadügawagun hewe ananiha houn tadügawagun würi, lugundun hóuchati Roma saragu wéiyaasu lun lagumuchun lau damuriguaü kristiánu, libiaman fánreinti hádangiñe tadügawagun würi. *

19. a) Ka lariñagubei Danieli luagu lisisin arúeihani gabafuti? b) Kaba wakutiha lidan le aban arütíkulu?

¹⁹ Lidan uénedü le lafuranguagüdübei profeta Danieli lun Nabukodonosoru, Roma mini lubéi iyadaü lauti gürabu (Dan. 2:33). Arihati profeta le ábanya arufudúni, le arufudubalin buidu ida luba lan arúeihani rómana luma giñe arúeihani gabafuti le áfuridubei lídangiñe (aliihoualá Danieli 7:7, 8). Luagu saragu sígulu, ariha hamuti láganiñu Roma kei aban arúeihani le “hanarimeti [ani] hanufunati lau aban lanarime erei”. Gama lumoun, arufudati meha profesía luagu lachülaaguba lan buga ‘diisi ganchu’ lídangiñe arúeihani le, ani lídangiñe diisi ganchu le lachülaaguba aban ganchu ñǘraütimati le wéiribei luéirigun. Kátaña san diisi ganchu? Ka mini lubéi ganchu le nǘraütimabei? Ka fánreinti lídangiñe lúgubu óunwenbu guáriua le larihibei Nabukodonosoru mini lubéi ganchu le nǘraütimabei? Wadeirubei óunabagülei lun álügüdahani burí le lidan arütíkulu le lídanbei páhina 14.

[Abürüdǘni burí]

[Álügüdahani lánina aturiahani]