Ka lunbei hadügüni kristiánugu uguñe weyu?

UGUÑE weyu sigí hamuti kristiánugu inarünitiña lani Hesusu hénpulu lau mádaragun hamá houngua lidoun polítika. Furanguti meha Hesusu dan le lariñagunbei ‘mama lan lánigu ubóu’ ligía. Ani ariñagati houn lánigu disipulu ‘mama hamá lánigu ubóu’ (Huan 15:19; 17:14). Akutiha wamá fiú resun ka lan uéigiñe mádaragun habéi kristiánugu houngua lidoun polítika.

1. Gébehati habafu gürigia. Afuranguagüdatu Bíbülia luagu mabafu lan wügüri ani maricha ligía lun lagumadiragun lungua. Abürühati profeta Heremíasi “mama lan wügüri laburemebei libagari,” ani mabafu lan lun labuguruni lupasun (Heremíasi 10:23).

Ítara kei madügǘn hamá gürigia lun háhamahan kei aban dunuru, madügǘntiña giñe lun hagumadiragun houngua buidu. Abürühati David Fromkin, aban abürühati luagu dan le sügühalibei, luagu lébeha hagumadihan gürigia: “Kei gürigia lubéi agumadihabaña ani charatiña, ligía machourun lubéi anhein buídubei lubéi lidin houn o wuribabei lan. Gabafutiña, gama lumoun gébehati” (The Question of Government [Turóbuli lánina gumadi]). Ligíati teweridihanbei Bíbülia lun míchugun wamani wafiñen hawagu gürigia (Sálumu 146:3).

2. Nadagimeintiña sífirigu wuribatiña lidan luburiga. Dan le lariñagunbei Satanási lun Hesusu líchugubei lan sun arúeihani le ubouagubei lun, mariñagunti meha Hesusu mabafu lan Mafia lun líchuguni sun arúeihani ligía lun. Lidan amu ókaasion, ariñagati Hesusu luagu Mafia lan “agumadihabei lidan ubóu le”. Dan lárigiñe, ariñagati Pábulu luagu Satanási lan ‘lubungiutebei ubóu le’ (Huan 14:30; 2 Korintuna 4:4). Abürühati giñe apostolu Pábulu houn líbirigu: “Lugundun [...] hama burí sífirigu gabafutiña ha lánina wuribani yágüta iñu wageindagua, luma  hama gumadi, lúrudugu luma ubafu lánina luburiga” (Éfesuna 6:12). Ligíati, sífirigu wuribatiña hagíatima agumadihabaña lidan ubóu le ani hawadigimariduña lidan luburiga. Ka efekütu lunbei gani lan katei le lidan ligaburi harihini kristiánugu polítika?

Aban hénpulu: ítara kei labugurunu fuludu aban ugunei to ñǘraütu, ítara liña giñe habugurunu sífirigu wuribatiña óundaruni gabafutu to lánina polítika. Ani ítara kei siñá lan hararamuni áfayahatiña lanügüniña fuludu, siñá hamuti giñe gürigia ha lídanbaña polítika herederuni habuguruniña sífirigu wuribatiña. Héretiña sífirigu wuribatiña ha hawagu gürigia ani busentiña hagadeiruniña sunsuinagubei, adüga hameime sun damichi le hayaraabei houn (Arufudúni 12:12). Ligíati, ábanrügüñein gürigia le gabafutimati luéi Satanási hama lumafianu gayara lasansiruni sun katei, Heowá Bungiu (Sálumu 83:18; Heremíasi 10:7, 10).

3. Luéigiñerügüñein lóubadina Larúeihan Bungiu houdin kristiánugu inarünitiña. Subuditi meha lun Hesusu hama lánigu disipulu luagu líchuguba lan Bungiu aban arúeihani sielu le lunbei lagumadihani sun Ubóu. Tidan Bíbülia wáwati lun gumadi le Larúeihan Bungiu, ani ariñagatu Hesukrístu lan lanúadirubei Bungiu lun Urúei lan lidan (Arufudúni 11:15). Kei subudi lan meha lun Hesusu buídubei lan lani Larúeihan Bungiu efekütu hawagu sun gürigia, ligía lapurichihanbalin “uganu le luáguti larúeihan Bungiu” (Lúkasi 4:43). Arufudahati giñe houn lani disipulugu lun hafurieidun: “Ñǘbuinla barúeihan”. Ka uagu? Lugundun lábugiñe Arúeihani le, chóuruti ladügǘba lan lugundan Bungiu ubouagu kei ladügǘniwa sielu (Matéu 6:9, 10).

Kábati asusereda houn urúeigu ubouaguna? Óunabatu Bíbülia luagu hagünrinchawaguba lan “sun urúeigu ha ubouagubaña” (Arufudúni 16:14; 19:19-21). Ligíati, anhein afiñe lubéi aban gürigia luagu lagumuchuba lan Larúeihan Bungiu lau sun arúeihani ubouaguna, míchugun lubéi lafiñen tuagu óundaruni lánina polítika. Ani anhein hamuga líchiga lídehan lun furumiñeguarügü hádangiñe urúeigu ubouaguna ha siádiwaañabaña lun lagumuchún hau, le linarün katei, lídinña hamuga luéigiñe hóubadina láganiñu Bungiu.

Kei mádaragun habéi kristiánugu inarünitiña houngua lidoun polítika, mini lan san lira mabusenrun hamá hídehan lidan burí fulasu le ñein lubéi heredera? Lounabúba álügüdahani le lidan le aban arütíkulu.

[Ariñahani lidan létüra wéinamuti lidan páhina 6]

Mawanseragüdün hamuti gefentiña luagu Heowá luadigimari polítika ladüga luéigiñeñanu lóubadina Larúeihan Bungiu