Ka meha lisaminanbei Hesusu luagu polítika?

LIDAN burí Ewanhéliu abahüdawagúati luagu fiú sügǘ lidan meha lani Hesusu ministeriu le afuranguagüdübei ka lan lisaminanbei luagu polítika. Aban hénpulu, dan le meha 30 lubéi irumu lau, murusun dan lárigiñe labadiseirún, ariñagati Mafia lun líchugubei lan gumadimatime lidan sun ubóu. Murusun dan lárigiñe, hóuchatiña saragu gürigia hadügüni urúeime. Ani lárigiñe lira, álugatiña hadügüni ábanme gürigia le gádanbei lidan polítika. Ka meha ladügübei Hesusu lidan kada kesi?

Gumadimati lidan sun Ubóu. Según le abahüdawagúabei lidan Ewanhéliu, busenti yebe Mafia líchuguni “sun arúeihani le ubouagubei” lun Hesusu. Saminatün san luagu sun le liyaraabei hamuga Hesusu adüga hawagu gürigia lun hamuga anha lan lun ubaraü ligía? Leferidiruñein hamuga san Hesusu chansi ligía anhein hamuga afiñe lubéi gayara lan laransehani polítika turóbuli? Gama lumoun, máhati lun chansi ligía (Matéu 4:8-11).

Urúei. Lidan meha lidaani Hesusu, gíbetiña meha gürigia busentiña hadeirun aban gürigia le gabafuti lun laransehani turóbuli lánina polítika luma turóbuli lánina seinsu. Wéiritu meha hanigi lau sun le liyaraabei Hesusu adüga, ligíati busén habéi meha lun ládaragun lungua lidoun polítika. Kati ladügübei? Abürühati Huan: “Keiti lasubudiruni Hesusu luagu busén hamá hanügüni lau erei lun hadügüni urúeime, aba lidin lábugua luagun wübü” (Huan 6:10-15). Furanguti, ábanya wéiyaasu máhati lan Hesusu ládaragun lungua lidoun polítika.

Aban gürigia le gádanbei lidan polítika. Ariha huméi ka lan meha asuseredubei fiú weyu lubaragiñe lounwen Hesusu. Aba hayarafadun fiú fariséugu hama fiú hádangiñe lánigu Erodesi lumoun Hesusu, lídanñanu meha polítika. Ha furumiñetiña kóntüratiña meha lun lurúeite Roma, ánheinti ha híbiri lúmagiñeñanu meha. Aba hálügüdüni anhein lunti lubéi lafayeirúniwa seinsu lun urúei Rómana, lun hafosuruni lun lidin luégiñe lóubadina aban hádangiñe.

Ariñaga lumuti Márükosu lóunabagüle Kristu: “‘Kame san híchaaha sádara nubá? Barǘ humá aban lídangiñe seinsu ligía nun, ariha náamugei’. Aba hanügüni lun. Dan le larihini, aba lálügüdüniña: ‘Kagia iyawa luma iri le luágubei?’ Aba hariñagun lun: ‘Liyawa luma liri urúei Rómana’. Aba  lariñagun houn: ‘Ru humeiti lani urúei lun urúei, ru humeime lani Bungiu lun Bungiu’” (Márükosu 12:13-17). Libügürü óunabagülei le, ariñagatu líburu Teología Moral: “Ligía meha Mesíasibei, gama lumoun mama meha aban Mesíasi le gádanbei lidan polítika kei hasaminarun [huríu]. [...] fánreingua lumuti le larufudahabei Hesusu relihión luéi polítika”.

Marufudunti meha Hesusu lau lira meberesen lan lau gudemei, wuribani luma asufuriruni. Lubaragiñe lira, ariñagatu Bíbülia gáriti lan meha lun larihini le gádanbaliña gürigia (Márükosu 6:33, 34). Íbini ítara, madügünti aban wadagimanu lun lagumuchun lau marichaü ubouagugiñe, ni dan le héredunbei luagu lun gadan lani sun burí turóbuli le lánina polítika.

Arufudati ǘrüwa hénpulu le, súnwandan lan meha lamaharun Hesusu ládaragun lungua lidoun polítika. Agia kristiánugu ha awinwandubaña uguñe weyu? Ka lunbei hadügüni?