Ka uagu lunti lubéi wíchuguni weseriwidun lun Heowá furumiñe?
Ka uagu lunti lubéi wíchuguni weseriwidun lun Heowá furumiñe?
“Sun weyu nadimurehaba luagu sefu báadiwa lan adüga buguya irichaü woun.” (SAL. 71:15)
KABA HAMUGA HÓUNABA?
Ka uagu líchigei Noé, Moisesi, Heremíasi, luma Pábulu Heowá lidan furumiñeti lúgaaru lidan habagari?
Kaba álügüdahani íderaguaü arihei ida liña lan hayusuruni hibagari?
Ka uagu lunti lubéi híchuguni heseriwidun lun Heowá lidan furumiñeti lúgaaru lidan hibagari?
1, 2. a) Ka lunbei hadügüni ha ederegeragubaña houngua lun Heowá? b) Ida luba lahuudun wakutihani lani Noé, Moisesi, Heremíasi luma lani Pábulu hénpulu woun?
DAN le wederegeragun woungua lun Bungiu ani badisei wagía lun aban wamá hádangiñe lani Hesusu disipulugu, desidírü wamuti katei súdinitimati le gayarabei wadügüni lidan wabagari. Ítara liña hamuga kamá wariñaguña: “Heowá, lúmagiñe oura le buguyaba nabureme lidan sun le nadügübei. Nígiruba lun buguya lan desidírü ida luba lan nayusuruni nidaani, númati luma niyara, luma ka lan katei lunbei súdinitima lan lidan nibagari”.
2 Anhein badiseihadün lubéi, ligía füramasei hubéi lun Heowá. Wéiriti lubuidun le desidírü hubéi. Guentó, kei ánharadiwa lubéi lun Heowá lan Wabureme, ida luba wayusuruni wadaani? Hénpulu le líchugubei Noé, Moisesi, Heremíasi luma apostolu Pábulu líderagubadiwa óunabei álügüdahani le. Kei meha súngubei lan hagía seriwitiña lun Heowá tau sun hanigi, ani genegeguati gádantiwa hama, buídubei lun wakutihani le meha desidírü habéi luagu katei le súdinitimabei lidan habagari. Línchahabadiwa wadügüni katei le, lun warihini ida liña lan wayusuruni wadaani (Mat. 28:19, 20; 2 Tim. 3:1).
LUBARAGIÑE GURAN
3. Ida liña genegegua lan wadaani luma lidaani Noé?
3 Konpararü lumuti Hesusu wadaani luma lidaani Noé. Ariñagati: “Ítara kei meha lasuseredun lidan meha lidaani Noé, ítara luba giñe danme le niabin, au le Wügüri Garaüwarügüti. Lidan meha dan ligía, lubaragiñe ladibirun ubóu, heredera meha gürigia eiga, ata, amarieidagua, íchaahaña hasaanigu lun maríei, darí weyu le lebelurunbei Noé tidoun ugunei. Mefentiña, darí ladibirun ubóu, aba hañaradagun súngubei” (Mat. 24:37-39). Hibe-agei gürigia uguñe weyu mabahüdün hamuti eweridihani le híchugubei lubúeingu Bungiu, ani meberesentiña lau dan le ídanbei wawinwanda. Ítara kei meha gürigia ha awinwandubaña lidaaniwagu Noé gíbetiña gürigia uguñe weyu mafiñentiña lagünrinchagubei lan Bungiu lagübüri ubóu le, ani adügatiña bula lau saminaü le (2 Fe. 3:3-7). Gama lumoun, ka meha idan layusurei Noé lidaani íbini winwan lan meha haganagua gürigia ha maganbadibaña lun eweridihani?
4. Ida liña meha layusuruni Noé lidaani dan le leresibirubalin lidasin lúmagiñe Heowá, ani ka uagu?
4 Danbei le lariñaguni Bungiu le lasaminarubei ladügün ani ariñagaléi lun Noé kaba lan lidasin, aba ladügünu Noé árüka lun lesefuruni habagari gürigia luma habagari animaalugu (Agu. 6:13, 14, 22). Ariñaga lumuti giñe houn gürigia kaba lan ladüga Bungiu. Ariñagati apostolu Féduru luagu Noé: “Le apurichihabei houn gafigountiña lun hasakürihan”, ítara liña larufuduni luagu áfaagua lan Noé lun líderaguniña amu gürigia lun gunfuranda hamani seriu lan gádantiña (aliihoualá 2 Féduru 2:5). Afiñetün san arufudati lan hamuga Noé hama lufamilian lichú aau anhein hamuga yusu hamuti hadaani lun hagumeserun bísinisi, hásügüragun hama amu, o hagamadun saragu umegeguni? Uá! Subuditi meha houn lagumucha lan buga Heowá lau ubóu ligía, ligía maha habéi lun ni kata le adügübei lun metenirun hamá lun hadasin.
LE LANÚADIRUBEI LIRÁÜ URÚEI EHIPTUNA
5, 6. a) Háfuga ka un meha lafurendeirei Moisesi lichú hau Ehiptuna? b) Ka uagu maha lubéi meha Moisesi lawinwandun kei aban liráü urúei Ehiptu?
5 Guentó akutiha waméi lani Moisesi hénpulu, aba tanügüni liráü faraón tiraüme ani güriawati kei liráü urúei, “ligía lafurendeirubalin Moisesi lichú hau Ehiptuna” (Adü. 7:22; Afu. 2:9, 10). Másiñati aranselani sun le lafurendeirubei lubá wadagimanu súdini keisi urúei. Gayarati meha aban lan gürigia súdiniti lidan arúeihani le wéirigutimabei lidan dan ligía ani gayarati meha gama lan irisini, ubaraü súdiniti luma ugundani le lanügübei luadigimari keisi urúei. Gama lumoun, ligía meha san súdinibei lun Moisesi?
6 Dan meha le ñǘraügili ayanuhatiña lagübürigu lun luagu Heowá. Mosu meha subudi lani füramasei le ladügübei lun Abüraámü, Isaakü luma Hakobu ha meha lagüchagu ani afiñeti meha luagu füramasei burí le. Chóuruti saminati lan meha luagun libagari luma ida luba lan úaragua lan lun Heowá. Kati desidírü lubéi dan le lachülürün dan lun lanúadirun anhein ábanbei lubéi urúei ehiptuna o ábanbei lan idamuni ísüraelina? “Himei lumuti lasufurirun hama lumutuniña Bungiu lubaragiñe laganóun buidu tidan luban urúei” (aliihoualá Ebüréu 11:24-26). Lárigiñe, falá lumuti adundehani le líchugubei Heowá lun luagu ka lan lunbei ladügüni lau libagari (Afu. 3:2, 6-10). Ka uagu ladügei Moisesi katei le? Ladüga afiñe lan meha luagu füramasei le ladügübei Heowá ábati lasaminarun madurabei lan meha furumiñeguarügü katei buiti le lunbei hamuga leresibiruni Ehiptugiñe. Ani linarün, ladüga murusun dan lárigiñe óunahati Bungiu diisi íñanaü lidoun ageiraü le. Sun lubúeingu Bungiu gayarati wafurendeirun lídangiñe lani Moisesi hénpulu. Lunti súdinitima lan Heowá luma weseriwidun lun woun, mama wagamadun umegeguni o wawanserun lidan ubóu le.
SUBUDI LUMUTI MEHA HEREMÍASI LE LUNBEI LASUSEREDUN
7. Ida liña meha genegegua lan le gádanbalin Heremíasi luma le gádanbaliwa uguñe weyu?
7 Profeta Heremíasi, ligía ábanya wügüri le íchugubalin leseriwidun lun Heowá lidan furumiñeti lúgaaru. Anúadira lumuti Heowá lun profeta lan ani óunaha lumuti apurichihei uganu lánina aguseragüdüni houn gürigia ha Herusalénbaña luma Hudá, ladüga háhuduragun houn búngiugu mama inarünitiña. Genegeguati le meha gádanbalin Heremíasi luma le gádanbaliwa ladüga wínwanti lidan “lagumuhóun burí dan ligía” (Her. 23:19, 20, NM). Chouru lumuti meha madurabei lan ubóu le ídanbei lawinwanda.
8, 9. a) Ka meha uagu mosu lubéi lasansiruni Baruku ligaburi lisaminan? b) Ka lunbei waritaguni dan le waransehan lubá ámuñegü?
8 Ka katei madügün lubéi Heremíasi ladüga le lafiñerubei? Málugunti lawanserun lidan ubóu ligía, ladüga subudi lani lagünrinchawaguba lan ani aban lan hamuga libidiounigan au ladügüni. Gama lumoun, ñeinñein aban dan úati furangu lan larihini Baruku le lani Heremíasi sekretariu katei. Ligía layusurunbalin Heowá Heremíasi lun lariñagun lun: “Günringua numuti le nábunagubei, hulaguanéi le nábunubei. Ani ligiamémeba nadüga lau sun ubóu [o ageiraü]. Busentibu san bamuriahan somu katei bungua le hanarimeguti? Málugagubeibei lugundun nóunaha lamiselu hawagun sun gürigia [...] mígirunbadina lun bounwen le ñeinhin lumuti bidin” (Her. 45:4, 5).
9 Machourun wamuti katei lan burí ‘katei le hanarimeguti’ labusenrubei Baruku. * Gama lumoun, subudi wamuti madurati lan meha katei ligía. Günrinwaguati danbei le hárügüdüni babilóniana Herusalén lidan irumu 607 lubaragiñe lidaani Hesusu. Ka wafurendeirubei lídangiñe? Lun wibihini le wemegeirubei lunti wasaminarun luagun weyu le úagilibei (Ari. 6:6-11). Gama lumoun, warufuduña hamuga san lichú aau ánhawa ayusurei wadaani luma were lun wibihin katei le lunbei madurabei lan saragu? Inarüni anuhán lan lóundarun Heowá adüga aransehani lun tábunawagun Luban Hadamuridagun Gefentiña luagu Heowá, Beteli tuma amu burí muna. Gama lumoun sun muna to tahuuduba lubá ámuñegü, ladüga tawanseragüdüni luáguti Larúeihan Bungiu tisuunibei. Sun lubúeingu Bungiu lunti hadügüni ligiaméme dan le hasaminarun luagu ámuñegü. Gayarati san hariñagun tídangiñe sun hanigi háluahañein lan “larúeihan luma liricha Bungiu furumiñe”? (Mat. 6:33.)
“BARǗ NUMUTI SÚNGUBEI KEI IFEI”
10, 11. a) Ka meha súdinitimabei lun Pábulu lubaragiñe ladügün ábame kristiánu? b) Ka katei adügübei lun lasansiruni Pábulu le meha laritagubei ladügün?
10 Guentó, akutiha waméi lani Pábulu hénpulu. Lubaragiñe ladügün kristiánume genegeti meha gayarati lan lawanserun lidan ubóu. Aturiaha lumuti meha halurudun huríu luma aban hádangiñe máisturugu ha famosutimabaña lidan lidaani, resibi haali meha ubafu lúmagiñe fádiri íñutimati. Awanseeli meha lidan hafiñen huríu sügǘ hau gürigia ha nasiruabaña lidan lidaani (Adü. 9:1, 2; 22:3; 26:10; Gal. 1:13, 14). Gama lumoun, sánsiti libagari dan le gunfuranda lani mámaali lan meha hani huríu néchani labinira Heowá.
11 Ligíati, subuditi meha lun Pábulu le meha fariséubei luagu aban dan, lun lan hamuga ni kata láluga lawanserun hadan huríu, ani mebegiti lan katei le lun Heowá (Mat. 24:2). Gunfuranda lumuti Pábulu ka lan lisuunibei Bungiu ani aban lan wadagimanu buiti apurichihani. Konpararü lumuti katei le súdinibei meha lun luma “ifei”. Ligíati, aba láfuridun Pábulu lídangiñe hani huríu relihión ani yusu lumuti libagari apurichihei uganu buiti (aliihoualá Filipuna 3:4-8, 15; Adü. 9:15).
AKUTIHA HUMÉI KA LAN SÚDINITIMABEI HUN
12. Ka meha katei súdinitimabei lun Hesusu lárigiñe labadiseirún?
12 Noé, Moisesi, Heremíasi, Pábulu hama amu gürigia ha ítarabaña kei hagía yusu hamuti meha hadaani luma here lidan heseriwidun lun Heowá, ligía lunti lubéi wáyeihaniña. Hádangiñe sun lubúeingu Bungiu Hesusu íchugubalin hénpulu le buídutimabei (1 Fe. 2:21). Lárigiñe labadiseirún, yusu lumuti meha libagari lun lapurichihani uganu buiti luma lun líchugun uéiriguni lun Heowá ya ubouagu. Sun kristiánugu ha ánhabaña lun Bungiu lan Habureme, lunti heseriwidun lan lun anügei furumiñeti lúgaaru lidan habagari. Ligía san hadügübei? Ida lubati haganwoundagüdüni heseriwidun lun Heowá lidan aünha lan etenira lun burí amu buligasion? (Aliihoualá Sálumu 71:15 luma 145:2.)
13, 14. a) Ka amisurahani adügǘbei houn sun kristiánugu ha badiseihañabaña? b) Kaba adüga lun gunda hamá lumutuniña Bungiu?
13 Luagu saragu irumu, amisuraha tumutiña lóundarun Heowá kristiánugu lun haríagun houngua anhein gayara lubéi prekursorugu hamá. Adügati le gádanbaliña somu lubúeingu Bungiu lun siñá lan hapurichihan ǘrüwa-wein-diisi oura sagü hati, ani moun lumuti hasandiragun houngua wuriba luagu katei le (1 Tim. 5:8). Agia huguya? Gayarati san prekursoru humá?
14 Haritagua humagili san ugundani le hasandirubei saragu lubúeingu Bungiu lidan lidaani Aritaguagülei luagu lounwen Hesusu lidan irumu le? Lidan ǘrüwa-hati, rúati aban chansi espechaliti lun hanúadirun íbirigu hapurichihan darandi o dimí-san oura lun heseriwidun kei prekursoru ídehati (Sal. 110:3). Seriwitiña saragu míñunu íbirigu kei prekursorugu ídehatiña. Wéiriti ugundani le asandirúbei lidan burí damuriguaü. Gayarati san hadügün aransehani lun yarafagua lan heseriwidun kei prekursoru ídehati? Dan le leseriwidun aban kristiánu le badiseihali ítara, dan le lagumuchun weyu sanditi aban óunwenbu ugundani ani gayarati lariñagun lun Heowá: “Adüga numuti sun le niyaraati uguñe lidan neseriwidun bun”.
15. Ka lunbei labusenrun aban nibureinti kristiánu ladügün lidan anihagua lan aturiaha?
15 Anhein nibureingidibu lubéi ani gumeméli baturiahan, másiñati buiti lan bátuadi ani míbeti bani buligasion. Saminaadibu san beseriwidun kei prekursoru le adügübei ǘrüwa-wein-diisi oura? Chóuruti, samina hamá máisturugu luagu buítimabei lan lidin bun ánhabu ibiha liñun furendei ladüga ru hamuti hafiñen luagu óundaruni le hani wügüriña luma luagu seinsu. Ani madurabei sun le. Ánhabu desidírü beseriwidun lidan dan dayarüti, bayusurubei bidaani buidu ani buídubei lidin bun. Ítarati, báyeihabei giñe lani Hesusu hénpulu, ani lanügüba ugundani bun. Lugundun ladouraguba bau luéi saragu peliguru ani larufudubei luagu mígirunbadibu lan lun ñein lan araramutibu luéi bagunfuliruni füramasei le badügübei lun beseriwidun lun Heowá (Mat. 6:19-21; 1 Tim. 6:9-12).
16, 17. Ka lunbei hálügüdagun kristiánugu houngua luagu heseriwidun lun Heowá?
16 Nadagimeintiña saragu lubúeingu Bungiu saragu dan lun híchuguni le hemegeirubei hafamilian houn. Gama lumoun, másiñati añahein lan fiú nadagimeintiña lóugiñe le hemegeirubei (1 Tim. 6:8). Adüga tumuti bísinisi to ubouaguboun sun tiyaraati lun wasaminarun megei wamuti lan katei burí le iseribei ani siñati lan wawinwandun sin ligía. Gama lumoun, keisi kristiánugu inarünitiña mabusenruntiwa lun ubóu lan le lábugiñebei lubafu Satanási desidírei le lunbei súdinitima lan woun (1 Huan 2:15-17). Íbirigu ha mawadigimaridunhaña ladüga harumudiri, ka idan gayara lan hayusuruni hadaani? Heseriwidun lidan dan dayarüti ligía manera buídutimabei lun hayusuruni hadaani, ítarati, híchuguñein heseriwidun lun Heowá lidan furumiñeti lúgaaru.
17 Sun lubúeingu Heowá ha derege hamaalibei habagari lun, lunti hálügüdagun houngua: “Ka súdinitimabei lidan nibagari? Ru numuti san neseriwidun lun Heowá lidan furumiñeti lúgaaru? Áyeiha numuti san Hesusu ani arufuda nuguya busén nan nayusuruni nidaani luma nere lun neseriwidun lun Bungiu? Gaganbaditina san lun Hesusu ani falá numuti? Gayarati san nadügün aransehani lun gíbetima lan dan napurichihan o lun netenirun lun amu dasi lidan neseriwidun lun Bungiu? Íbini siñá lan naganwoundagüdüni neseriwidun guentó, áluahatina san amu burí manera lun nayusuruni nidaani luma nere lun neseriwidun lun Heowá?”.
“ÍDERAGUALAÜN LUN HADÜGÜNI KEI HABUSENRUNI”
18, 19. Ka katei le uágubei gayara lubéi hafurieidun ni ka uagu hínsiñebei lubéi lun Heowá?
18 Ruti saragu ugundani woun warihini ubebeni le harufudubei lumutuniña Bungiu. Gama lumoun, másiñati añahein lan fiú íbirigu ha mabusenrunbaña heseriwidun kei prekursoru o ha asaminarubaña siñá habéi lan agunfulira, íbini buidu lan gádantiña lun hadügüni (Afu. 4:10; Her. 1:6). Anhein ítara liña lubéi, ka gayarabei hadügüni? Buídubei lun hafurieidun luagu katei le. Abürühati Pábulu houn kristiánugu ha awinwandubaña Filipu: ‘Heowá íchugubalin lubuidun aritaguni hun lun héibugun luma, íderagualaün lun hadügüni kei habusenruni’ (Fili. 2:13). Anhein mayumahan hubéi laganwoundun heseriwidun, amuriaha humá luma Heowá lun líchuguni ayumahani tidoun hanigi luma iarani le hemegeirubei lun hibihini (2 Fe. 3:9, 11).
19 Dandu Noé, Moisesi, Heremíasi, Pábulu luma Hesusu wügüriña meha ha úaraguatiña. Yusu hamuti meha hadaani luma here asubudiragüdei leweridihan Heowá. Mígiruntiña lun ladügün ni kata lun metenirun hamá lun hawadigimari. Chülümémeeli lagumuchagüle ubóu, ligíati, sun wagía le derege wamaalibei wabagari lun Heowá lunti wadügüni sun wayaraati lun wáyeihani hénpulu le híchugubei woun (Mat. 24:42; 2 Tim. 2:15). Ánhawa afalarei hani hénpulu wagundaaragüdübei Heowá ani labinirubadiwa saragu (aliihoualá Malakíasi 3:10).
[Abürüduni]
^ par. 9 Ariha humoun líburu Dios nos habla mediante Jeremías, páhina 104 darí 106.
[Álügüdahani lánina aturiahani]
[Iyawaü to lídanboun páhina 22]
Madügüntiña gürigia gasu lun eweridihani le líchugubei Noé
[Iyawaü to lídanboun páhina 25]
Saminaadün san heseriwidun kei prekursoru ha apurichihabaña ǘrüwa-wein-diisi oura sagü hati?
