Kaba hamuga san lóunaba Hesusu?

Buiti san lamigisirun relihión luma polítika? Saminatiña saragu gürigia ha inebehabubaña lun Bungiu gayara lan. Afiñetiña mosu lan lamigisirun relihión luma polítika lun laransehani haturobulin gürigia. Gama lumoun, añahein amu afiñetiña buídutima lan lun mamigisirúniwa lan relihión luma polítika. Agia huguya, ka san hisaminanbei? Lunti san lúaradun relihión luma polítika?

GÍBETIÑA gürigia ariha hamuti Hesukrístu kei “gürigia létima súdinibei lidan relihión [...] hádangiñe sun ha wínwanhañabaña lidan sun dan”. Samina humá, kaba hamuga san lóunaba Hesusu anhein álügüdüwa luagu lamigisirúniwa relihión luma polítika? Dan meha le ubouagu lubéi, óunaba lumuti álügüdahani le lau le ladügübei luma lau le lariñagubei. Aban hénpulu, lidan Serumu luagu Wübü, ruti meha saragu adundehani le meha íderagubaliña ha afalarubalin asubudirei halíaba lan lébeda hádaragun houngua lidoun le asuseredubei lidan fulasu le ñein lubéi heredera. Akutiha wamá fiu lídangiñe adundehani ligía.

Mosu gani hamá efekütu lidan habagari amu

Afuranguagüdati meha Hesusu houn gürigia ha afalarubalin ida luba lan ligaburi hóuserun lidan katei le lánina ubóu dan le lariñagunbei: “Ítara hiña kei salu houn lílana ubóu le; gama lumoun anhein leferidira salu lubasuan, kábagia un hu lan? Úaalime hu lan ni ka un luéidigia lun lagurúniwa, ábame hadügüraguni gürigia. Ítara hiña kei lanpu houn lílana ubóu le. [...] Ítara humá giñe, durunguagüda huméi hilanpun hadan gürigia, lun danme lan harihini buiti le hadügübei, ábame giñe hadimurehan buiti luagu Wáguchi Bungiu le siélubei” (Matéu 5:13-16). Ka uagu konpararü lubaliña Hesusu lánigu disipulu luma salu luma lanpu?

Mariñagunti meha Hesusu ítara haña lan ha afalarubalin kei salu luma kei lanpu hóunrügü fiú gürigia. Lubaragiñe lira, le mini lubéi le lariñagubei Hesusu, mosu lan meha ítara hamá kei salu houn sun gürigia luma lun haduranguagüdüni halanpun houn sun ha busenbaña hasubudiruni Bungiu. Ítarati, furanguti larihíniwa mabusenrun lan meha Hesusu lun hadisedun ha afalarubalin hawéi ha híbiri gürigia.

Ida luba hamugagia labasuadagüdüni salu éigini anhein mama lubéi lídanñein? O ida luba hamugagia larugoungadágüdün aban lanpu aban rumu anhein ua lubéi tidan? Ligíati, mariñagun lubéi Hesusu houn lani disipulugu lunti lan hawinwandun dise hawéi gürigia ha ámubaña afiñe hawéi. Ítara kei mégeiwa lan lamigisirúniwa salu luma éigini ani mégeiwa ligía aban lanpu lun larugoungadágüdün, lunti giñe hawinwandun kristiánugu haganagua amu gürigia lun gani hamá aban buiti efekütu lidan habagari.

‘Mama lani ubóu hagía’

Gama lumoun, adügati le lariñagubei Hesusu lun hálügüdagun fiú gürigia houngua ida luba lan hóuserun kristiánugu lidan katei luáguti polítika. Ka uagu? Lugundun, murusun dan lubaragiñe lounwen Hesusu dan le meha aniha lan afurieida hawagu lani disipulugu, aba lamuriahan luma Bungiu: “Mamuriahantina buma lun basagaruniña ubouagugiñe, namuriahan buma lun bóunigiruniña luéi wuribani. Ítara kei mama nan lani ubóu, mama giñe lani ubóu hagía” (Huan 17:15, 16). Ida lubati meha gani hamá kristiánugu efekütu buiti lidan habagari amu ani lun mama hamá lánigu ubóu? Lun wasubudiruni óunabagülei, furumiñe akutiha wamá ǘrüwa álügüdahani:

• Ka meha lisaminanbei Hesusu luagu polítika?

• Ka lunbei hadügüni kristiánugu ha awinwandubaña uguñe weyu?

• Ka efekütu lánibei hawagu gürigia le harufudahabei kristiánugu?