Arufudahani tídangiñe Lererun Bungiu

Kaba san asusereda lun sun relihión?

Lidan arütíkulu le, gayarabei hadariruni tidan hibibülian guánarügü óunabagülei lun álügüdahani le adüga humaalibei húniwagua. Ánhadün busén gayarabei hakutihani gefentiña luagu Heowá óunabagülei úara huma.

1. Buiti san sun relihión?

Lidan sun relihión añahein gürigia buítiña ha busenbaña hadügüni lugundan Bungiu. Bereseti Bungiu hau ani gebegitiña lun, gama lumoun, adügǘwaali saragu katei wuribati lidan liri relihión. Lidan dan le sügühalibei, furundetiña meha fiú lábutigu relihión houn ha ámubaña hafiñen hawéi (2 Korintuna 4:3, 4; 11:13-15). Uguñe weyu, aganbatiwa lidan ñunsu hawagu lílana relihión ha ínchahabalin anarimeni le anufudedagüdübaniñu gürigia, ídehatiña lidan wuribu o óuseragua hamutiña irahüñü, gámari hamutiña irahüñü, luma katei líbeina lira. (Aliiha huméi Matéu 24:3-5, 11, 12.)

Arufudahatu Bíbülia, ábanrügüñein lan relihión inarüniti ani sun le líbiri relihión mama inarüniti. Arufudahati relihíon mama inarüniti iyeeni luagu Heowá Bungiu. Gama lumoun, busenti Bungiu lun hasubudiruni gürigia inarüni luagu. (Aliiha huméi 1 Timotéu 2:3-5.)

2. Kaba asusereda lun sun relihión?

Lun Bungiu mínsiñeti relihión le ñein lubéi hariñaga lílana hínsiñe lan houn, gama lumoun amañounra hamutiña gürigia lau harufudahan iyeeni luagu. Hínsiñeti ubóu le lábugiñebei lubafu Satanási le Mafia houn fiú hádangiñe lílana relihión burí le (Santiagu 4:4; 1 Huan 5:19). Tidan Bíbülia arufudúati sun relihión le mámabei inarüniti —le úaraguabei houn gumadimatiña ubouaguna lubaragiñe hamuga úaragua lan lun Bungiu— kei aban horu to gíriboun “Babilónia to Wéiriboun”. Iri le, haritaguagüda lumutiwa luagun binadu uburugu le ñein lubéi lagumesera relihión mama inarüniti lárigiñe Guran. Yarafa madise, sódinibei lagünrinchaguni Bungiu relihión le eyeehabaliña gürigia ani barǘ ligía turóbuli houn. (Aliiha huméi Arufudúni 17:1, 2, 5, 17 luma 18:8, 23, 24.)

 3. Ídaba hagundaara gürigia ha awinwandubaña lidan sun Ubóu?

Lanügüba Heowá awalidaguni houn sun gürigia danme le lagumuchun lau sun relihión le mama inarüniti. Meyeehan hamaañame gürigia ani manügün hañame fánreinguaü. Ábame háhuduragun sun gürigia lun Bungiu le inarünibei. Ma buiti ñunsu le? (Aliiha huméi Isaíasi 11:9; Arufudúni 18:20, 21 luma 21:3, 4.)

4. Ka lunbei hadügüni gürigia ha harumabaña anigi?

Mabuleidun lumutiña Heowá sun gürigia haruma tanigi ha lídanbaña amuñegueinarügü relihión mama inarüniti lidan sun ubóu. Layusuruñein inarüni le tídanbei Bíbülia lun lóundaruniña gürigia ha lidan aban. (Aliiha huméi Mikeasi 4:2, 5.)

Resibi lumutiña Heowá hadan lumutuniña lau sun lugundan ha busenbaña heseriwidun lun. Íbini mínsiñe lan houn wamadagu o waduheñu desidírü wamá weseriwidun lun Heowá, gíbebei abiniruni weresibirun: wamadagua luma Bungiu, hínsiñehabu iseri waduheñu lidan afiñeni, luma emenigini lun wawinwandun lun súnwandan. (Aliiha huméi Márükosu 10:29, 30 luma 2 Korintuna 6:17, 18.)

Hadeiruba lanwoun ariñahani lidan kapitulu 15 luma 16 tidan líburu to Kátima san tarufudahabei Bíbülia?, hadügün gefentiña luagu Heowá.

[Eteingiruni tuagu iyawaü lidan páhina 26]

The Complete Encyclopedia of Illustration/J. G. Heck