Yarafa humá lun Bungiu
“Ábame télemuchagun buani nuagun”
KA GÜRIGIA unbei mínsiñe hamá gürigia ǘnabugutiña? Híruti agumuchagueina liña lan ǘnabuguni inarüniti uguñe weyu, hádantima gürigia ha gabafubaña hawagu amu. Agia san Heowá, létima gabafubei ligibuagu sun ubóu? Ǘnabuguti san? Akutiha waméi le lariñagubei profeta Heremíasi lidan Ayahuni 3:20, 21: “Chóuruti baritaguba lan nuagun, ábame télemuchagun buani nuagun. Luágunba katei le naritagua. Ligía, nemenigiduba lubéi buagu” (NM).
Abahüdaguatu líburu Ayahuni to labürüdüboun Heremíasi luagu sügǘ hírutimati le hásügürübei ísüraelina. Ariha lumuti Heremíasi danbei le hagünrinchaguni babilóniana Herusalén ageiraü le hínsiñebei lun. Íbini subudi lani Heowá lan adügübei lun lagünrinchawagun ladüga hafigoun ísüraelina nidiheriti meha luagu le asuseredubei. Kaba meha san asusereda lun lageira? Saminati san Heremíasi hanarime lan liñun Heowá darí lun úabei lan feruduna lániña lubúeingu ha asakürihabaña? Ariha waméi ka lan lariñagubei Heremíasi lun Bungiu luagu hafulesein ísüraelina.
Íbini hiru lan Heremíasi, arufudati buin liña lan meha lau emenigini, ladüga aba layumuragun lun Heowá: “Chóuruti baritaguba lan nuagun, ábame télemuchagun buani nuagun” (bérusu 20). * Chouru lumuti meha Heremíasi tídangiñe sun lanigi mabulieidun lubéi lan Heowá ani mabulieidun lubaña lan giñe lubúeingu ha asakürihabaña. Gama lumoun, kaba ladüga Bungiu Suntigabafu? (Arufudúni 15:3.)
Chouru lumuti Heremíasi luagu ‘lélemuchaguba’ lan buga Heowá hawagun ha asakürihabaña. Adügati dimurei le lun warihini Heowá kei aban gürigia hínsiñehabuti. Aranseñu liña “Le Íñugutimabei ligibuagu sun ubóu” lun lélemuchagun, o lǘnabudaguagüdün lungua, lun líderaguniña lubúeingu asansirei gádantiña lun harandarun luma (Sálumu 83:18). Ruti emenigini le dǘgüdaguaü lun Heremíasi le meha hírubei lasandirunu lanigi. Ligía desidírü lubéi lagurabahan lau gurasu darí desidírü lan Heowá líchuguni lúhabu lun lesefuruniña lumutuniña ha asakürihabaña (bérusu 21).
Arufudati bérusu burí le bián igaburi le luágubei Heowá woun. Le furumiñeti, ǘnabuguti lan (Sálumu 18:35). Íbini ‘wéiriti lan lere’, gayarati wariñagun aranseñu liña lan Heowá lun lǘnabudaguagüdün lungua lun líderaguniwa dántima le wemegeiruni (Hobu 37:23; Sálumu 113:5-7). Ma lueirin dǘgüdaguaü le líchugubei katei le woun! Libiaman, ‘gíchigadi lan ferudun’ ani aranseñu liña lan lun fulesei lániña ha asakürihabaña luagu katei wuribati le hadügübei (Sálumu 86:5). Biángubei igaburi le, ǘnabuguni luma gudemehabu nadagimeinti úara.
Seremei mítaran lan Heowá kei gumadimatiña ubouaguna ha barüguabaña houngua ani deré tugía hanigi. Ma hínsiñeti hamuga hun hasubudiruni Bungiu ǘnabuguti le, le élemuchubei lun líchugun dǘgüdaguaü luma emenigini houn lubúeingu?
Le gayarabei haliihan tídangiñe Bíbülia lidan hati le:
▪ Heremíasi 51 darí Esekiéli 5
[Abürüdǘni]
^ par. 5 Sansi hamuti meha binadu arufudahatiña lilurudun Moisesi bérusu le, ábati habürüdün “nuani” kamá hamuga layanuhaña luagu Heremíasi. Genegeti saminatiña lan harufuduña lan hamuga minebeni lau hayusuruni dimurei uani lun hadimurehan luagu Bungiu, lugundun yúsuati dimurei le tidan Bíbülia lun layanuhóun hawagu gürigia. Lidan bérusu le dimurei “buani” mini lan “buguya”, lidan amu dimurei, Heowá, ladüga libagari somu gürigia mini lubéi dimurei uani.
[Ariñahani lidan létüra wéinamuti lidan páhina 32]
Gayarati wariñagun aranseñu liña lan Heowá lun lǘnabudaguagüdün lungua lun líderaguniwa dántima le wemegeiruni
