Úarati sun abahüdaguni le tídanbei
“Lugundun madimurehantiña meha wügüriña hagía lau hani houngua [...] dimurei burí lúmagiñeti Bungiu hadimurehabei lugundun [s]ífiri [s]andu lan adundehabaliña.” (2 FÉDURU 1:21)
KA UAGU AMU TUBÉI BÍBÜLIA TUÉI TÍBIRI LÍBURU? Saragu tídangiñe binadu abürühani múaranti saminaü le tídanbei íbini dan le lidan lan ligiaméme dan tabürüdǘwa. Hénrenguti lun úaraguabei lan saminaü le tídanbei líburu to habürüdüboun ámuñegueinarügü gürigia ha lídangiñetiña ámuñegueinarügü fulasu ani winwan hagía lidan ámuñegueinarügü dan. Gama lumoun, ariñagatu Bíbülia ábanrügüñein lan abürüdagüdoun, ligíati, úarati uganu le tídanbei 66 líburu to tídanboun (2 Timotéu 3:16).
ABAN HÉNPULU: Lidan meha sígulu disisi lubaragiñe lidaani Hesusu, lidan aban profesía ariñagati Moisesi, aban hóuniri mudún le abürüdübarun furumiñetu líburu tídangiñe Bíbülia luagu lachülürüba lan ‘tadügawagun würi’ le lunbei meha lasalbaruniña gürigia. Dan lárigiñe, ariñagati giñe hádangiñeba lan lufamilian Abüraámü, Isaakü luma Hakobu láfurida (Agumesehani 3:15; 22:17, 18; 26:24; 28:14). Kéiburi 500 irumu lárigiñe, afuranguagüda lumuti profeta Natán liábinba lan hádangiñe lufamilian urúei Dawidi (2 Samueli 7:12). Afuranguagüdati meha apostolu Pábulu, milu irumu lárigiñe, luagu Hesusu lan luma aban sétanu le lanúadirubei hádangiñe ha afalarubalin tadügawagunbaña würi (Rómana 1:1-4; Galasiana 3:16, 29). Lagumuhóun, lidan lagumuchun sígulu aban lárigiñe lidaani Hesusu, arufudatu tagumuhóun líburu tidan Bíbülia hapurichihaba lan anuadirútiña ha luagu Hesusu ya ubouagu, houdiba lan sielun ani arúeiha hagíame úara luma Hesusu luagu milu irumu. Súngubei hagía hagünrinchagubei Mafia ani hasalbarubaña gürigia (Arufudúni 12:17; 20:6-10).
KA SAN HARIÑAGUBEI AYANUHATIÑA TUAGU BÍBÜLIA? Lárigiñe ladügün aban abürühati gíriti Louis Gaussen aban akutihani huliliti tídangiñe 66 líburu to tídanboun Bíbülia, ariñagati wéiritu lan lanigi ladüga “úarani le tídanbei aban líburu to habürüdüboun saragu wügüriña lidan 1500 irumu [...] ha asigirubalin ligiaméme saminaü, kamá hamuga gunfuranda hamutu, darí lun habihini hasuuni: habahüdagun luagu layusurúniwa Liráü Bungiu lun hasalbarúniwa gürigia” (Théopneustie ou Inspiration Plénière des Saintes Écritures [Theopneustia: labürüdǘn lisaminan Bungiu tidan Lererun to sagüráüboun]).
IDA LIÑA HARIHIN LUN? Saminatün san gayara lan úaragua tan sunsuinagubei aban líburu to habürüdüboun kéiburi 40 wügüriña lidan 1500 irumu? Odi Bíbüliarügüñoun?
“Túmagiñe Agumesehani darí Arufudúni ábanmeme líburu [...]. Úatu ni aban líburu tídangiñe sun to bürüwaaruboun ítaratu kei Bíbülia.” (THE PROBLEM OF THE OLD TESTAMENT [TURÓBULI LE TÍDANBEI BINADU DARADU], LABÜRÜDÜN JAMES ORR)
