Abahüdaguni inarüniti

“Álügüdahaadina giñe buidu buidu libügürü sun katei le asuseredubei lúmagiñe lagumeserun.” (LÚKASI 1:3)

KA UAGU AMU TUBÉI BÍBÜLIA TUÉI TÍBIRI LÍBURU? Úraga le buíduburiti labahüdawagún mariñagun lumuti weyu, liri fulasu ni hiri gürigia ha uágubaña labahüdagua. Ánheinti tidan Bíbülia anihein saragu ariñahani le meha lüha labürüdǘn le arufudubalin luagu “inarüni [lan] lébunabei dimurei” le tídanbei (Sálumu 119:160, Traducción en lenguaje actual).

ABAN HÉNPULU: Según tabahüdaguni Bíbülia, “barǘ lumuti [...] Nabukodonosoru [le lurúeite Babilónia] Hoakimü [le lurúeite Hudá] adaüra”, ani aba lanügüni “Herusaléngiñe lun Babilónioun”. Dan lárigiñe, aba “lagumeserun Ewili-merodákü arúeiha Babilónia, [...] aba lasagaruni [Hoakimü] furisunrugúgiñe”, ani “lidan sun libagari Hoakimü resibiti [...] fáyeiti sagü weyu lúmagiñe lurúeite Babilónia” (2 Urúeigu 24:11, 15; 25:27-30).

KA TARUFUDUBEI SIENSIASI TO ATURIAHABALIN BINADU KATEI? Dariwaaru dugumedu lídangiñetu lidaani Nabukodonosoru biama, lidan le erederubei lídangiñe binadu Babilónia. Anuhein burí lísüta tidan fiú tídangiñe dugumedu tuguya ayanuhatu luagu fáyeiti le líchugubei urúei houn somu gürigia ha anügǘbaña adaürǘwa luma houn lubúeingu, ani dariwati liri “Yaukin [Hoakimü] le lurúeite Yahud [Hudá]” hama tílana luban tidan lísüta tuguya. Ka gayarabei wariñagun luagu le arúeihabei leweñegua Nabukodonosoru? Dariwati aban ágeidinaü lidan uburugu Susa le ídanbei bürüwañu lan dimurei burí le: “Lani Amil-Marduk [Ewili- merodákü] palasiu, le lurúeite Babilónia, le liráü Nabukodonosoru, le lurúeite Babilónia”.

IDA LIÑA HARIHIN LUN? Subuditu san amu líburu hun to lánina relihión to lüha tabürüdǘn, ani to meyeehantu dan le tabahüdagun? Odi Bíbüliarügüñoun?

[Ariñahani lidan létüra wéinamuti lidan páhina 5]

“Ariñahani le tíchugubei Bíbülia luagu dan luma fulasu le ídanbei lasusereda katei inarüniti ani chóurutimati sügǘ lau ariñahani le tíchugubei amu dugumedu to binadu.” (A SCIENTIFIC INVESTIGATION OF THE OLD TESTAMENT [AKUTIHANI LÁNINA SIENSIASI LÁNINA BINADU DARADU], LABÜRÜDÜN ROBERT D. WILSON)

[Iyawaü to lídanboun páhina 5]

DOGUMEDU BABILÓNIANA LE ÑEIN LUBÉI LÁFUACHA LIRI URÚEI HOAKIMÜ LE LURÚEITE HUDÁ

[Eteingiruni le ichugúbei 5]

© bpk, Berlin/Vorderasiatisches Museum, SMB/Olaf M. Tessmer/Art Resource, NY