Huutu Bíbülia íbini lidan wadaani

“Igemeri bererun lun nugudi, larugounga ligía lun némeri.” (SÁLUMU 119:105)

KA UAGU AMU TUBÉI BÍBÜLIA TUÉI TÍBIRI LÍBURU? Anuhein líburu to arihúatu kei líburu buitu, gama lumoun míchuguntu adundehani huuti lun habagari gürigia uguñe weyu. Íbini burí líburu to adügǘboun lun lariñawagún ida luba lan layusurúniwa somu katei, mégeiwatu taransehóuniwa sagü dan. Gama lumoun masuseredunti ligiaméme tau Bíbülia, ani ariñagatu: “Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua” (Rómana 15:4).

FIÚ HÉNPULU: Lau sun mama tan aban líburu to ayanuhatu luagu átuadi, rutu Bíbülia saragu adundehani huuti lun buidu lan hasandiragun gürigia houngua luma lun buidu lan hátuadi. Afuranguagüdatu aban lan “ichügü darangilati ibagaribei lun úgubu” (Ariñawagúni 14:30). Eweridihatu giñe “gürigia [lan] le adisedubei hawéi amu luouguounrügüñein laritagua; máhati giñe laganbun eweridihani buiti” (Ariñawagúni 18:1, NM). Ariñagatu giñe ‘gúndaatimati lan le íchugubei sügǘ lau le eresibirubei’ (Adügaü 20:35, Lererun Bungiu to lánina Iseri Daradu [LBID]).

KA LARUFUDUBEI ATURIAHANI LE ADÜGǗWAALIBEI? Buídutimati lan látuadi gürigia le darangilati, gamadounti ani areida ligía. Ariñagatu giñe aban garüdia gíritu JAMA, to tani Asociación Médica Americana luagu “ménrenguntimati lan ladagarun éigiri (ataque cerebral) luagu aban gürigia dan le gañi gañi lan luéi aban gürigia le arügüdagúbei lungua luéi igañi”. Aban aturiahani le adügǘbei luagu 10 irumu Australia arufudati gíbetima lan irumu hawinwandun gürigia wéiyaaña dan le “óundaragua hamá hama saragu gürigia adüga hagía umadaguaü hama”. Ani lidan irumu 2008, furendeitiña fiú akutihatiña kanadana hama merigein luagu “gúndaatimati lan le agastarubei seinsu hawagu amu sügǘ lau le agastarubei seinsu luougua”.

IDA LIÑA HARIHIN LUN? Anuhein funa san amu líburu to barümémeeru 2000 irumu lúmagiñe lagumuchun tabürüdǘn, to rutu adundehani luagu katei lánina átuadi? Odi Bíbüliarügüñoun?

[Ariñahani lidan létüra wéinamuti lidan páhina 8]

“Hínsiñetu Bíbülia nun [...] ladüga anihein lan lubuidun adundehani luáguti átuadi tidan.” (DR. HOWARD KELLY, ABAN HÁDANGIÑE HA AGUMESERUBARUN SEKSIÓUN LÁNINA AGARANIHANI TIDAN LUBAN FURENDEI ÍÑUTI JOHNS HOPKINS)