Lidan arütíkulu le, gayarabei hadariruni tidan hibibülian guánarügü óunabagülei lun álügüdahani le adüga humaalibei húniwagua. Ánhadün busén gayarabei hakutihani gefentiña luagu Heowá óunabagülei úara huma.

1. Ka san uagu desidírü lubéi Bungiu lun gíribei lan?

Sun wagía hínsiñeti woun lun lagúahoun woun luagu wiri, mama ligiaméme laguahóuniwa woun lau dimurei kéiburi “wügüri” o “würi”, adügati wiri lun wasubudirúniwa hawéi amu gürigia. Aguahóuati lun Bungiu lau títulu kéiburi “Nabureme”, “Suntigabafu” luma “Bungiu” (Agumesehani 15:2; 17:1; Apurichihati 12:1). Gama lumoun ruti Bungiu aban iri luougua lun líderaguniwa asubudirei buidu luma lun wadügün aban umadaguaü luma. Lidan garifuna Heowá líribei Bungiu. (Aliiha huméi Isaíasi 42:8, NM.)

Lau sun yusu hamá saragu ásügüragüdütiña Bíbülia títulu kéiburi “Bungiu” o “Aburemei” lubaragiñe hamuga hayusuruni liri Bungiu, dariwati iri le tidan Bíbülia kéiburi 7,000 wéiyaasu lidan binadu abürüdǘni ebüréu tídangiñe Lererun Bungiu. Furanguti luagu busén lan Bungiu lun wasubudiruni liri. (Aliiha huméi Isaíasi 12:4, NM.)

2. Ka uagu súdini lubéi wasubudiruni liri Bungiu?

Úati buídurügü lan lun wasubudiruni ka lan líribei Bungiu mosu giñe gamadagua wamá luma. “Adüga lumuti sun le labusenrubei” ligía mini lubéi iri Heowá, aban ichouruni luagu gayara lan ladügüni sun le mégeiwabei lun gayarabei lan lagunfulirun lisuuni. Ligíati wasubudiruni liri Bungiu mini lan, wafiñerun luagu lagunfulirubei lan súnwandan le füramase lubéi (Sálumu 9:10). Ha asubudirubalin liri Bungiu ani yusu haméi, afiñetiña luagu ani adügati katei le lun híchuguni lidan furumiñeti lúgaaru lidan habagari. Ligía füramase lubéi Heowá lóunigirubaña lan. (Aliiha huméi Sálumu 91:14.)

 3. Ka uagu busén lubéi Bungiu lasubudirúniwa liri?

Busenti Bungiu lun hasubudiruni sun gürigia liri ladüga barüti katei le buiti houn. Ida? Adügati lun gamadagua hamá luma, hemenigi hagíame hawinwandun lun súnwandan. Ligíati, moun lumuti lubéi taweiridun wanigi ladüga busén lan Bungiu lun wasubudiruni liri. (Aliiha huméi Huan 17:3 luma Rómana 10:13, 14.)

Subudigüda lumuti meha Hesusu liri Bungiu houn gürigia lau layanuhan houn luagu ligaburi lisaminan luma lóuserun Bungiu, lilurudun luma lani füramasei. Uguñe weyu, lidan sun ubóu ligiaméme wadagimanu hadügübei ha afalarubalin Hesusu. Súngubei hagía ‘anúadira laaña Bungiu lánigume’ lun hanügüni liri. (Aliiha huméi Adügaü 15:14 luma Huan 17:26, NM.)

4. Ida luba san larumadahani Bungiu liri?

Busenti Heowá larumadahani liri ladüga wíyeda hamaali lan gürigia. Gíbetiña gürigia ariñagutiña mama lan Bungiu adügübalin ubóu, ligía mébuna lubéi gaganbadiwa lan lun. Añahein amu ariñagutiña meberesen lan wau ani ladüga lan gaturobulin wabéi. Gama lumoun, sun gürigia ha anabagubalin Bungiu masigirunbaña adügei luagu saragu dan, ladüga lagünrinchagubaña sun ha awiyedubalin liri. (Aliiha huméi Sálumu 83:17, 18.)

Danme le lagünrinchaguni Larúeihan Bungiu arúeihani ubouaguna ani barǘ ligíame darangilaü luma ichouruni ubouagun, ligíaba ladügüni Bungiu liri sándume o larumadahani (Danieli 2:44). Yarafa madise hasubudirubei sun gürigia luagu Heowárügüñein lan Bungiu le inarüniti. (Aliiha huméi Esekiéli 36:23 luma Matéu 6:9.)

Ka lunbei hadügüni? Hayarafadun lun Bungiu lau haturiahanu Lererun luma lau hóundaragun hama gürigia ha asandirubaña ínsiñeni luagu. Chóuruti laritaguba lan Heowá hawagun lubúeingu ha úaragubaña lun danme le ladügüni liri sándume (Malakíasi 3:16).

Hadariruba lanwoun ariñahani lidan kapítulu 1 tidan líburu to Kátima san tarufudahabei Bíbülia?, hadügün gefentiña luagu Heowá.

[Iyawaü to lídanboun páhina 10]

Liri Bungiu lidan aban binadu abürüdǘni ebüréu