‘Kaba uei nanufudeda?’
‘Kaba uei nanufudeda?’
“Íbini hegeyedagun saragu súdara nau, manufudedunboun nanigi.”(SAL. 27:3)
SEGÚN BURÍ BÉRUSU LE, KABA ÍCHIGA GANIGI HUN?
Sálumu 27:1
Sálumu 27:4
Sálumu 27:11
1. Kaba burí álügüdahani gayara wóunabun lárigiñe wakutihani Sálumu 27?
KA UAGU lawanseruña lubéi wawadigimari lánina apurichihani lau sun aribadeinatima liña lan le asuseredubei ubouagu? Ka uagu wíchiga lídangiñe were luma wadaani lidan apurichihani lau sun gibe lan turóbuli sériuti lánina seinsu ubouagu? Ida luba ganigi wamá lun wasigirun wabaruaguóun íbini hanufude hamá saragu gürigia luéi le lunbei lasuseredun ámuñegü? Ounabúati álügüdahani burí le lidan Sálumu 27 uremu le labürühabei Dawidi lau lídehan Bungiu.
2. Ka lánibei anufudei efekütu hawagu gürigia, ani ka afiñeni wawagubei?
2 Gumese lumuti Dawidi sálumu le lau dimurei burí le: “Nabureme Bungiu, nilanpunbei ligía giñe nesefuragülebei, kábagia uei nanufudeda? Sefu lumuti Aburemei nibagari, kaba uei nanufudeda?” (Sal. 27:1). Dan le hanufude lan aban gürigia gayarati lasandirun siñati lan ladügün ni kata. Gama lumoun gürigia ha afiñebaña luagu Heowá ganigitiña ani manufudetiña (1 Fe. 3:14). Sun ha arihibalin Heowá kei hesefuragüle “habagariduba darangilu, ani manufudeuga luéi denchaü” (Ari. 1:33; 3:25). Ariha waméi ka lan uagu.
“NABUREME BUNGIU NILANPUNBEI, LIGÍA GIÑE NESEFURAGÜLEBEI”
3. Ida liña walanpun lan Heowá, ani ka lunbei wadügüni?
3 Dan le tariñagun Bíbülia “Nabureme Bungiu, nilanpunbei” arufudatu Heowá lan éfegechubalin wagu lun wasubudiruni katei lau larufudahani inarüni woun (Sal. 27:1). Gayarati larufuduni aban lanpu somu peliguru le lídanbei wémeri woun. Gama lumoun, magida lumuti peliguru ligía, mósuti duari wamá luéi. Ítarameme, arufuda lumuti Heowá woun ka lan mini lubéi le asuseredubei ubouagu, wéridilawa luéi peliguru le lídanbei ubóu le ani ruti adundehani woun le huuti súnwandan, gama lumoun mosu wawinwanduni le wafurendeirubei. Ítarati wóuseruba lau lichú aau le inarüniti kei aubei lariñagei abürühati Sálumu: “Chúgüdaali [bugumadin] nau hawéi náganiñu. Gunfurandatina sügǘ hau sun numaisturungu ladüga saminatina saragu luagu bugumadin” (Sal. 119:98, 99, 130).
4. a) Ka uagu lariñaga Dawidi lau ichouruni “Nabureme Bungiu [...] nesefuragülebei”? b) Ídabatima ábanbei lan esefuragülei Heowá woun?
4 Arufudati Dimurei le meha lariñagubei Dawidi lidan Sálumu 27:1 mosu lan meha laritaguñein lan ligaburi lesefuruni Heowá lidan binadu dan. Aban hénpulu, sefu lumuti meha “luéi liñún luma luéi osu”. Adügati giñe lun lagañeiruni Dawidi Goliadi. Ani dan lárigiñe daruguati lau sagü lálugun urúei Saulu láhuduruni lau aban arufun (1 Sam. 17:37, 49, 50; 18:11, 12; 19:10). Ligía lariñagunbei Dawidi lau sun lafiñen: “Nabureme Bungiu [...] nesefuragülebei”! Lídanme “óunwenbu asufuriruni” le yarafaalibei, lesefurubaña Heowá lubúeingu, ítara kei meha lesefuruni Dawidi (Aruf. 7:14; 2 Fe. 2:9).
HARITAGUA WAMÉI SUN LESEFUHAN
5, 6. a) Ka gayarabei ladügün waritagun luagun le susereelibei woun? b) Ka uagu ru lubéi anigi woun wakutihani le adüga láalibei Heowá hawagu lubúeingu?
5 Arufudúati ka lan katei súdiniti wemegeirubei lun ganigi wamá lidan Sálumu 27:2, 3 (aliihoualá). Haritaguati meha Dawidi luagu burí ókaasion le ídanbei lesefurei Heowá lídangiñe ámuñegueinarügü peliguru (1 Sam. 17:34-37). Adügati lasaminarun luagun katei le lun ganigitima lan lun lagagibudagun luma sügǘ le hénrengutimabei lidan libagari. Agia san huguya? Haritagua humagili san ida liña lan líderagunün Heowá lidan dan le sügühalibei? Adügati san katei ligía lun ganigi humá? Aban hénpulu, furíeitün san lun Heowá lau erei luagu somu turóbuli ani lárigiñe aba harihini ida liña lan líchugun lichú aau hun o erei le hemegeirubei lun hawanduni? O haritagua humagili ida liña lan lagumuchagun lénrengunga le adügübei meha lun meseriwidun humá lun Bungiu lau ugundani, o haritagua humagili ida liña lan ‘ladaarúniwa aban bena hubá’ lun laganwoundun heseriwidun? (1 Ko. 16:9.) Ida liña hasandiragun hungua dan le hasaminarun luagun katei le? Ma adügati sügǘ burí ligía lun hachoururuni gayara lan líderagunün Heowá áfurida o awanda lénrengunga o turóbuli le hanarimetimabei? (Rom. 5:3-5.)
6 Kaba hamuga san asusereda anhein hamuga áluga aban arúeihani gabafuti lagumuchun hau sun gefentiña luagu Heowá? Uguñe weyu álugaaña saragu wügüriña hadügüni katei le, gama lumoun masaliti houn. Ánhawa asaminara luagun katei le adüga láalibei Heowá lidan dan le sügühalibei hawagu lumutuniña, gayarabei ganigi wamá lun wagagibudagun luma le lunbei lasuseredun ámuñegü (Dan. 3:28).
GEBEGILÁ ÁHUDURAGUNI INARÜNITI HUN
7, 8. a) Según Sálumu 27:4, ka lamuriahabei Dawidi luma Heowá? b) Katei san aransehani lánina áhuduraguni le ladügübei Heowá ani ida liña wáhuduragun lun ñein?
7 Ínsiñeni luagu áhuduraguni inarüniti ligía ámuya katei súdiniti le wemegeirubei lun ganigi wamá (aliihoualá Sálumu 27:4). Tabernákulu meha ‘lúbanboun Heowá’ lidaaniwagu Dawidi. Gama lumoun Dawidi adügübalin aransehani lun tábunawagun ténpulu, óunwenbu muna to lábunaguboun Salomón le liráü dan lárigiñe. Ariñagati Hesusu lachülürüba lan buga aban dan lun mámaali lan mosu láhudurawaguniwa lun Bungiu tidan aban óunwenbu muna (Huan 4:21-23). Lidan kapítulu 8 darí 10 tidan líburu Ebüréu, ariñagati apostolu Pábulu luagu adüga lan Bungiu aban aransehani lun láhudurawaguniwa lun ani gumeseti aransehani le lidan irumu 29 lárigiñe lidaani Hesusu, dan le labadiseirunbei Hesusu ani rúgua ligía lungua lun ladügüni lugundan Heowá (Ebü. 10:10). Aransehani le, ligía sun katei le ladügübei Heowá lun wayarafadun lun seremei wafiñen luagu sákürifisiu le ladügübei Hesusu lun ferudunawa lan wafigoun. Ida liñati wáhuduragun lun Heowá lidan aransehani le? Lau wafurieidun lun “lau taruman wanigi, luma lau sun wafiñen”, lau wariñaguni wemenigin sin anufudei hagibugiñe amu ani lau wíchugun gurasu houn amu lubúeingu Bungiu lidan adamuridaguni luma lidan wáhuduragun kei familia (Ebü. 10:22-25). Dan le gebegi lan áhuduraguni inarüniti woun ruti iderebugu woun lidan lagumuhóun dan hénrenguti le.
8 Lidan sun Ubóu añahein lubúeingu Heowá ha gánwoungüda hamaali heseriwidun lun. Aban hénpulu, añahein furendeitiña amu iñeñein o águyatiña lidoun fulasu le ídanbei mégeiwatima hamá apurichihatiña. Luagu le hadügübei arufudatiña busén hamá ítara kei abürühati Sálumu lun hagundaarun lau lufulesein Bungiu luma lun heseriwidun lun meberesenga kaba lan asusereda (aliihoualá Sálumu 27:6).
AFIÑE WAMÁ LUAGU LÍDEHAN BUNGIU
9, 10. Ka san mini lubéi le ariñawagúbei lidan Sálumu 27:10?
9 Arufudati Dawidi weiri lan lemenigin luagu Heowá dan le lariñagunbei: “Íbini yebe lágurunina núguchi tuma núguchu, lau sun lira labudubadina Nabureme [Heowá]” (Sal. 27:10). Sügǘ le uágubei labahüdawagúa lidan kapítulu 22 tani furumiñetu liliburun Samueli adügati lun wasaminarun mágurun hamuti lan lagübürigu Dawidi. Gama lumoun, añahein amu lubúeingu Bungiu ha ru hamaali haduheñu hanagan hawagun, ani resibihaña ídemuei lau ínsiñeni hámagiñe lílana damuriguaü kristiánu.
10 Kei le aranseñu liña lubéi Heowá lun líderaguniña ha úaraguabaña lun dan le híchuguni amu hanagan hawagun, gayarati wachoururuni líderagubaña lan lidan furumiñeguarügü lénrengunga. Aban hénpulu, anhein nidiheri wabéi luagu ida luba lan wíchuguni le hemegeirubei wafamilian houn, gayarati wachoururuni líderagubadiwa lan Heowá (Ebü. 13:5, 6). Gunfuranda lumuti gádantiwa luma le wemegeirubei sun wagía ha eseriwidubaña lun lau úaraguni.
11. Ka efekütu lánibei wafiñen luagu Heowá hawagu amu gürigia? Ru humá aban hénpulu.
11 Akutiha waméi tásügürün Victoria, aban aturiahatu Bíbülia to awinwanduboun Liberia. Lidan anuhán lan awansera lidan taturiahan lubá tabadiseirun, aba lígirunu wügüri le úmabei tawinwanda hau ǘrüwa tisaanigu. Lau sun maban tan ani mawadigimari tuguya mígirun tumuti taturiahan darí lun tabadiseirun. Fiú dan lárigiñe aba tadeirun tiráü to 13 irumu tau aban posu buin lau seinsu. Luéi lawamadun houn mabahüdüngubéi hamuti átiriñein lan, lubaragiñe lira lau lóufudagun aba háluahani súdara le laburemebei seinsu. Ábati lariñagun houn anhein lan hamuga ítaratiña sun gürigia kei gefentiña luagu Heowá, buídutimati lan hamuga ubóu ani darangilatimati lan hamuga giñe. Tau Bíbülia aba tarufuduni Victoria lun fürameseti lan Heowá lanügün aban iseri ubóu. Le tueirin lanigi ladüga úaragua tan Victoria aba líchugun saragu lídangiñe seinsu ligía tun kei afayeiruahaü. Lidan sun ubóu añahein gürigia ariha hamutiña gefentiña luagu Heowá kei gürigia úaraguatiña, ladüga afiñetiña tídangiñe sun hanigi líchugubei lan Heowá le hemegeirubei houn.
12. Ka warufudubei dan le wasigirun eseriwida lun Heowá íbini anhein weferidira waseinsun o wemegen? Ru humá aban hénpulu.
12 Samina humá giñe ida liña lan lasandiragun aban apurichihati le awinwandubei Sierra Leona gíriti Thomas lungua, danbei le lagumeserun awadigimarida tidan aban kolehiu, ani meresibirunti fáyeiti darí lárigiñe aban irumu awadigimarida, dan le aranseeru sun ligaradan. Ka lagumuhóunbei katei amuriahóuti luma lun gayara lan laguburahani liseinsun? Mosu buga lidin arihei aban fádiri le arihubei tau kolehiu lun ladügün aban entrewista lun. Aba lariñagun fádiri le lun, máhawati lan lun ligaburi hasaminan gefentiña luagu Heowá tidan kolehiu tuguya, ábati lafosuruni lun lanúadirun anhein lerederuba lubéi lau luadigimari o lau lafiñen le gébunabei tidan Bíbülia. Lárigiñe desidírü lan lígiruni luadigimari luma fáyeiti le yebe lunbei leresibiruni aba ladeirun aban wadagimanu lánina taransehóun radiu luma gágamuru. Arufudati hénpulu le luma burí amu, ánhawa lan íchigei sun wemenigin luagu Heowá manufudebadiwa luéi werederun sin le wemegeirubei. Kei Heowá lubéi adügübalin sun katei ani súnwandan lóunigiruniña lumutuniña, subuditi woun lóunigirubadiwa lan.
13. Ida liña lawanserun apurichihani lidan burí ageiraü le ñein lubéi gudemeuga lan?
13 Lidan saragu ageiraü le ñein lubéi deré lan ibagari, arufudatiña apurichihatiña saragu ubebeni. Ka uagu? Abürühóuati tídangiñe aban Beteli: “Saragu hádangiñe gürigia ha ánhabaña haturiahanu Bíbülia úati wadagimanu hama, kei le mawadigimari habéi gayarati haturiahan. Gíbeti giñe dan hama íbirigu lun hapurichihan. Gürigiatima ha awinwandubaña lidan fulasu le ñein lubéi gudemei, ariha hamuti houngua luagu sun le geyegubei hau wawinwanduña lan lidan lagumuhóun dan”. nihein fiú ageiraü le ídanbei líchiga kada apurichihati kéiburi ǘrüwa aturiahani. Abürühati aban misioneru le barühali lóugiñe duusu irumu ñein: “Kei le sensiyu lubéi hanügüni saragu apurichihatiña habagari ani míbeti katei agidaruti hadaani, gíbetimati dan le gayarabei hayusurun lun hapurichihan luma lun híchugun aturiahani tídangiñeti Bíbülia”.
14. Ida luba ladouragun Heowá hau saragu gürigia?
14 Füramase haali Heowá líderaguniña, lóunigiruniña luma lasalbaruniña lumutuniña keisi sétanu, ani afiñetiwa lagunfulirubei lan (Sal. 37:28; 91:1-3). Hanarimebei hibe “saragu gürigia” ha lúnbaña herederun wínwanñu lárigiñe “óunwenbu asufuriruni” (Aruf. 7:9, 14). Ligía subudi wabalin magumuchúnwabei lan hau saragu gürigia ha lidan lagumuhóun dan le ídanbei wawinwanda. Lichugúba sun le hemegeirubei houn lun hawandun luma lun meferidirun hamani hamadagua luma Bungiu. Ani lóunigirubaña Heowá lumutuniña lidan Arümahedón.
“NABUREME ARUFUDABÉI BÉMERI NUN”
15, 16. Ida liña lanügün buiti woun wafalaruni adundehani le líchugubei Bungiu woun? Ru humá aban hénpulu.
15 Lun meferidirun wamani ganigi le wawagubei, mosu weresibiruni larufudahan Bungiu estodi, ítara liña larufuduni furíei le ladügübei Dawidi: “Nabureme arufudabéi bémeri nun, alidihabana lidoun üma le surubei hawéi náganiñu” (Sal. 27:11). Lun wafalaruni le amuriahóubei lidan furíei le, mosu gaganbadi wamá lau lóufudagun lun adundehani le tíchugubei lani Heowá óundaruni woun. Aban hénpulu, falá hamaali saragu íbirigu adundehani lánina hanügün aban ibagari sensiyuti. Fayei hamaali hadueihan luagu katei le memegeirun hamuti. Lidan dan hénrenguti le manarimeeli hadiheridun luagu turóbuli lánina seinsu. Mámaali mosu hawadigimaridun lau lidere lun hagañeihan katei le siñá hamuti afayeira. Gadaanitimahaña lun haganwoundagüdüni hani ministeriu. Buiti lun wálügüdagun woungua: “Adüga numuti san sun le naliihabei tidan Bíbülia luma tidan agumeiraguagüdüni to lafanreinhaboun musu úaraguati ani gunfuranda ligía lau lóufudagun, íbini dan le mosu lan nadügün sákürifisiu?” (Mat. 24:45).
16 Ánhawa ígira lun ladundehaniwa Heowá luéigiñe üma le surubei mébunabei wanufudedun. Amuriahati aban prekursoru le awinwandubei Meriga aban wadagimanu le adügüti lun gayara lan leseriwidun hama sun lufamilian lidan dan dayarüti. Gama lumoun ariñagati ábuti lun maweiyasunbei lan ibihei wadagimanu ligía ladüga maturiahan lan tidan luban furendei íñuti. Anhein hamuga hun lan lasusereda, hasakürihañein hamuga san meresibirun humá aban furendei ítarati ladüga hagumeserun eseriwida lidan dan dayarüti? Bián dimaasu lárigiñe aba labugúniwa ábuti ligía, ábati lálügüdüni ámuya ábuti íbiri le, ka lan hamuga luwuyeri wadagimanu labusenra. Aba lóunabuni íbiri le dandu lan ligía tuma lani weiriou gefentiña lan luagu Heowá ani heseriwiduña lan lidan dan dayarüti ani busentiña lan hasigirun eseriwida ítara. Lubaragiñe lariñagun íbiri amu dimurei, aba lariñagun ábuti le lun: “Subudi numuti anihein lan aban katei huagu le adügübei lun amu humá hawéi ha híbiri. Dan meha le hilamémeeli núguchi, ñǘbuintiña meha bián gefentiña luagu Heowá aliihoun Bíbülia lun. Ligía aba lubéi füramase nan núniwagua danme lan nadarirun chansi lun níderagun somu gefenti luagu Heowá nadügübei lan”. Larugan aba lichugún wadagimanu le meha aubei lamahada furumiñeti ábuti líchuguni lun íbiri. Dan le wíchuguni Larúeihan Bungiu furumiñe, gúnfuli lumuti Heowá füramasei le ladügübei: líchuguni sun le wemegeirubei woun (Mat. 6:33).
SÚDINITI AFIÑENI LUMA EMENIGINI
17. Kaba íderaguawa lun wagagibudagun luma le lunbei lasuseredun ámuñegü lau emenigini?
17 Arufuda lumuti Dawidi súdini lan afiñeni luma emenigini dan le lariñagunbei: “Gama lumoun chóuruguatina nungua luagu lachülürüba lan dan lun narihini lugundan Nabureme lidan limigifen ibagari le” (Sal. 27:13). Ráramagua humá asaminara: “Kaba hamuga asusereda lun wabagari anhein hamuga míchugunti Bungiu emenigini woun ani marufudun wagía gebegi lan katei buiti le iridúbei lidan Sálumu 27 woun? Ligíati, sigí wamá amuriaha erei luma Heowá lau sun wemenigin amuriaha wagíame lun lóunigiruniwa danme le wagagibudagun luma sügǘ le lunbei lagumuchun lidan Arümahedón (aliihoualá Sálumu 27:14).
[Álügüdahani lánina aturiahani]
[Iyawaü to lídanboun páhina 23
Sanditi Dawidi iderebugu dan le lasaminarun luagun sun le ladügübei Heowá lun lesefuruni
[Iyawaü to lídanboun páhina 25]
Ariha wamuti san lénrengunga ladüga maseinsuni kei aban chansi lun waganwoundagüdüni wani ministeriu?
