‘Lébuna ibagari magumuchaditi’

“Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei.” (HUAN 17:3)

LASUBUDIRÚNIWA luagu aban katei gayarati lasalbaruni ibagari. Lidan ageiraü Niheria danbei le lasandirun aban irahü gíriti Nouhou le gúnfulihalibei 10 hati, kei meha le nadagimein tan lúguchu tidan aban luban agaranihani, subudi taali meha kaba lan tadüga. Aba tadügün aban árani mígisiwati lau súgara, salu, luma lau duna harumati lun tíchuguni lun tisaani. Según le tariñagubei óundaruni UNICEF, “areidaguati lisandi tiráü seremei tóufudahan adüga árani lun luma ladüga añahein lan surusiagu ñein”.

Ídehati subudi tídangiñeti Bíbülia lun lasalbarúniwa ibagari. Ariñagati Moisesi, le furumiñeti abürühati Bíbülia, ‘mama katei le lunti hanügüni kei ni kata subudi; ibagari lúrudu le hun, ladügaba habagarida saragu dan’ (2 Lúrudu 32:47). Inarüni san gayara lan ladügün subudi le lun lamigifedun hibagari? Ani ka uagu lariñawagúa ‘lébuna lan ibagari’?

Seingü arütíkulu le akütihóuaalibei arufudati luagu úatu lan amu líburu kei Bíbülia ladüga ámuñegueinarügü resun: profesía burí le gúnfulihalibei, abahüdaguni inarüniti le tídanbei, tariñaguni inarüni lidan katei lánina siensiasi, lúaragun saminaü le tídanbei luma luagu tahuudun íbini lidan wadaani. Kei ua tubéi amu líburu kei Bíbülia, ani ariñagatéi le lunbei wadügüni lun migife lan wabagari, lidan amu dimurei lun wibihin aban ibagari le magumuchaditi, ma buiti hamuga lun wakutihanu?

Anhein busén hubéi darangilu humá uguñe luma lun hawinwandun lau ugundani le gumuti ámuñegü, amisuraha wamutün ibihei subudi tídangiñeti Bíbülia. Lau sun hagundan harufudubei gefentiña luagu Heowá hun ida luba lan hibihini subudi le.

[Rekuáduru tuma iyawaü to lídanboun páhina 9]

Bíbüliarügüñoun giñe íchiga óunabagülei le aubei gufuruma wamá lun álügüdahani le súdinitimabei kéiburi:

• Ka uagu awahán lubéi ya?

• Ka uagu gibe lubéi asufuriruni?

• Warihayabaña funa san waduheñu ha hilaguaañabaña?

Anihein óunabagülei le tíchugubei Bíbülia tidan líburu to Kátima san tarufudahabei Bíbülia?, hadügün gefentiña luagu Heowá.