Ruti Heowá alibüreruni inarüniti woun

‘Aturiahei lúrudu o Lererun Bungiu to úabei mégeiti tidan, ani furigüda tawa lídangiñe figóu.’ (SANT. 1:25)

KABA HAMUGA HÓUNABA?

Ka lúrudu aranserubadiwa lun wibihin alibüreruni inarüniti, ani kátaña asagarubaña buiti lídangiñe?

Ka lunbei wadügüni lun wabihin alibüreruni inarüniti?

Kaba luwuyeri alibüreruni heresibira ha gaganbadibaña?

1, 2. a) Ka asuseredubei lun líbürei le hámabei gürigia, ani ka uagu? b) Ka alibüreruni hagurabahabei lubúeingu Heowá?

WÍNWANTIWA lidan aban ubóu le ídanbei güridítimahaña lan gürigia, hanarimetimahaña ani minebentimahali lúrudu houn (2 Tim. 3:1-5). Ligíati híchugunbei gumadimatiña saragu lúrudu, adügaaña lun ñein hamá saragu súdaragu, ani yúsutiña kámara lun harihini ka lan hadügübei gürigia. Lidan saragu ageiraü yúsutiña gürigia somu katei le awisarubaliña luéi somu peliguru, geléin chóuruti luma lánbara le barüti elekütrisida geyegu tau haban. Besafu gürigia máfuriduntiña hábiñegiñe guñoun ani mígirun hamutiña harahüñü lun háhurerun hábuguarügü bóugudi ni íbini wéyuagu. Kei resultóu heferidiruñein gürigia líbürei, ani genegeti luagu masansiragunbei lan katei.

² Ida lubati wabihin alibüreruni inarüniti? Lidan fuluri-agei Edén, ariñagati meha Satanási habihiba lan gürigia alibüreruni inarüniti ánhaña adiseda luéi Heowá. Ma lueirin marasualugu! Le linarün katei, dántima le hadügüni gürigia le habusenrubei lubaragiñe hamuga hadügüni le lariñagubei Bungiu hanarimetimati hasufurirun. Ani gániti katei le efekütu íbini wawagu wagía lubúeingu Heowá. Gama lumoun, seremei lun Heowá anihein lubéi emenigini wawagu luagu lesefurubadiwa lan lídangiñe figóu luma agadeiruni le gádanbaliwa lun líbüre wamá “lidan haweirigun lirahüñü Bungiu” (Rom. 8:21). Le linarün katei, gumeseeli Heowá aranserawa lubá alibüreruni le. Ida liña ladügüni?

3. Ka lúrudu líchugubei Heowá houn kristiánugu ani kaba álügüdahani wóunaba?

³ Lun laransehaniwa lubá esefuruni le lunbei wibihini ámuñegü, rúhali Heowá aban katei woun, to unboun lagúara Santiagu “[lúrudu o] Lererun Bungiu to úabei mégeiti tidan, ani furigüda tawa lídangiñe figóu” o, kei tariñaguni amu Bíbülia “lúrudu le anügübei alibüreruni woun” o “lúrudu le úabei mégeiti luagu le lánina líbürei” (aliihoualá Santiagu 1:25; Dios habla hoy; La Biblia Latinoamérica). Gama lumoun, dan le  haganbun gürigia layanuhóun luagu lúrudu masaminaruntiña luagu líbürei, lubaragiñe lira, saminatiña luagu amudirawaguni. Ligíati, katei san ‘lúrudu le úabei mégeiti luagu ani furigüda lawa lídangiñe figóu’? Ida liña lalibüreruniwa?

LÚRUDU LE ALIBÜRERUBALIWA

4. Katei san ‘lúrudu le úabei mégeiti luagu ani furigüda lawa lídangiñe figóu’, ani kátaña asagarubaña buiti lídangiñe?

⁴ ‘Lúrudu le úabei mégeiti luagu ani furigüda lawa lídangiñe figóu’ mama layanuhaña luagu Lilurudun Moisesi, lugundun lun meha “larufuduni hamaganbadin gürigia” lahuuda ani gúnfuli laali Kristu lisuuni lúrudu ligía (Mat. 5:17; Gal. 3:19). Káteiti lúrudu le uágubei ladimureha Santiagu? Ladimurehaña luagu “lilurudun Kristu” (Gál. 6:2). Ligíati, “lúrudu le úabei mégeiti luagu” mini lan sun le lagurabubei Heowá wámagiñe. Dandu kristiánugu ha anuadirúaaña kei “amu mudún” sagatiña buiti lídangiñe lúrudu le (Huan 10:16).

5. Ka uagu ménrengun lubéi lagunfulirúniwa lúrudu lánina líbürei?

⁵ Mítaranti ‘lúrudu le úabei mégeiti luagu’ kei lilurudun somu ageiraü, lugundun sensiyuti ani ménrengunti gunfurandawa lan ani ménrengunti giñe lagunfulirúniwa (1 Huan 5:3). Ariñagati Hesusu: “Ménrengunti lun heseriwidun nun, huáliti giñe anügüni le níchugubei hun lun hanügüni” (Mat. 11:29, 30). Memegeirunti giñe ‘lúrudu le úabei mégeiti luagu’ aban lísüta migifeti lau burí lúrudu, ladüga ínsiñeni lébunabei ani tidan wanigi luma lidan wasaminan labürüdǘwa, mama luagu dübü (aliihoualá Ebüréu 8:6, 10).

IDA LIÑA LALIBÜRERUNIWA ‘LÚRUDU LE ÚABEI MÉGEITI LUAGU’?

6, 7. a) Ka gayarabei wariñagun luagu lilurudun Heowá? b) Ida liña lalibüreruniwa ‘lúrudu le úabei mégeiti luagu’?

⁶ Rúhali Heowá saragu lúrudu woun lun wabuidun guánarügü luma lun lóunigiruniwa. Aban lídangiñe katei le ladügübei Heowá aban erei le adügübei lun léiguadun katei múarugun luma lun lerederun ñein, lubaragiñe lerederun áfayaha garabalirugu. Úati ni aban gürigia ekeharuti luagu gidá lumuti lan katei le líbürei hawéi. Lubaragiñe lira, súngubei wagía rútiwa seremei luagu lúrudu le ladüga súdiniti lun wabuidun guánarügü. Ítarameme liña lúrudu luma adundehani le líchugubei Heowá lunti wabuidun guánarügü, ani furendei wamuti lidan ‘lúrudu le úabei mégeiti lidan’ le lani Kristu.

⁷ Lau sun óunigira lumutiwa lan lúrudu lánina alibüreruni, ígira lumutiwa giñe lun wadügüni katei buiti le wayumahabei sin wadügün dañu wóuniwagua ni houn ha híbiri gürigia. Ligíati, lun gani wamá aban alibüreruni inarüniti —lidan amu dimurei, lun wadügüni le wabusenrubei— lunti úaragu lan le wayumahabei wadügün dandu luma lilurudun kei luma ligaburi Heowá. Lidan amu dimurei, mosu hínsiñe lan le hínsiñebei lun Bungiu woun iyereegu ligíame le iyereegubei lun woun. Anihán katei le larufudahabei lúrudu lánina alibüreruni woun (Amos 5:15).

8, 9. Ka buiti lanügübei gaganbadi wamá lun lúrudu lánina alibüreruni? Ru humá aban hénpulu.

⁸ Kei gafigoungidiwa lubéi hénrenguti woun wárügüdagun woungua luéi luriban ayumahani. Gama lumoun, anhein úaragua wabéi ani gaganbadi wagía lun lúrudu lánina alibüreruni, gayarabei líbüretima lan wasandiragun woungua íbini guentó. Ítara liña larufuduni lásügürün Jay, dan le lagumeserunbei aturiahoun Bíbülia aban meha wügüri gagumulahaditi ligía. Dan le líchugunbei fe mínsiñe lan échuni le lun Bungiu mosu buga desidírü lan kaba lan ladüga, lígiraguagüdüba san buga lungua lun layumahan lagumulahan odi gaganbadibei buga lun Heowá? Lau lichú aau, aba lanúadirun leseriwidun lun Heowá íbini hénrengu lan lun lígiruni lagumulahan. Ida liña lasandiragun lungua lárigiñe lígiruni échuni le? Ariñagati: “Ma lubuidun nasandiragun nungua, sanditina aban ugundani ladüga líbürehadina lan sunsuinagubei”.

⁹ Furendeiti Jay aban katei súdiniti: líbürei le líchugubei ubóu houn gürigia —‘habagaridun según igaburi lánina figóu’— amudiraguarügü lumutiña; ánheinti líbürei le líchugubei Heowá woun —‘wabagaridun keisi lugundan  sífiri sandu’— sefu lumutiwa ani barǘ lumutiwa “lidoun ibagari tímatimaati luma darangilaü” (Rom. 8:5, 6). Halíagiñe libiha Jay erei lun lígiruni lagumulahan? Mama lúmagiñe guánarügü, lúmagiñe Heowá libihei. Ariñagati: “Aturiaha numutu Bíbülia sagü dan, amuriahatina luma Bungiu lun líchugun sífiri sandu nun ani ánhatina lun ídemuei le híchugubei lílana damuriguaü nun lau ínsiñeni”. Ariha waméi ida liña lan líderaguniwa katei burí le ibihei alibüreruni le inarüniti.

ATURIAHA WAMÓUN LERERUN BUNGIU ESTODI

10. Ka mini lubéi dimurei “arihati buidu lidoun lúrudu” le tídanbei Lererun Bungiu?

¹⁰ Ariñagati Santiagu 1:25: “Ánheinti gürigia le héchubei aturiahoun Lererun Bungiu [o le arihati buidu lidoun lúrudu le tídanbei, NM] to úabei mégeiti tidan, ani furigüda tawa lídangiñe figóu, [...] adüga lumuti le tariñagubei Lererun Bungiu ani gúndaati le tímatimaati”. Dimurei güriegu le ásügürawagüdübei kei “arihati buidu” mini lan “hélemuchun lun harihin”, ani mégeiwati áfaaguni lun ladügǘn luma lichugúniwa saminaü luagun. Le linarün katei, lun gani lan lúrudu lánina líbürei efekütu lidan wasaminan luma tidan wanigi, mosu wáfaagun lun waturiahanu Bíbülia estodi ani samina wagíame luagun le waliihabei lárigiñe wafurieidun (1 Tim. 4:15).

11, 12. a) Ida liña larufuduni Hesusu súdini lan warufuduni lau wabagari wawinwanduñein lan inarüni? b) Según dibuhu le lídanbei páhina le, ka katei peliguruti uéibei lunti lan hóunigiraguntima nibureintiña houngua?

¹¹ Lidan awanha lan adügei katei le, lunti wáfaagun lun wawinwandun lau le tariñagubei Lererun Bungiu, arufuda wagíame lidan wabagari luagu wawinwanduñein lan inarüni. Genegeguati le, luma le lariñagubei Hesusu houn ha afalarubalin: “Anhaün agunfulira lau nererun,  hiábinba lun nani humá disipulugu le tímatimaati. Ábame hasubudiruni inarüni, ábame lesefurunün inarüni” (Huan 8:31, 32). Según aban líburu, dimurei le ásügürawagüdübei ya kei “hasubudiruni” adügati lun wasaminarun luagun aban katei “gebegiti”, lugundun “gebegiti ani súdiniti le subudiwabei lun gürigia le asubudirubalin”. Lun wasubudiruni inarüni buidu buidu mosu gebegi lan woun ani warufudubei gebegi lan woun anhein wawinwanda. Ítararügübei gayara lan wariñagun ladügüña lan “luganute Bungiu” lun ‘wagaburidun buidu’ gayara láamuga wáyeihani ligaburi Wáguchi le siélubei (1 Tesa. 2:13).

¹² Buiti lun wálügüdagun woungua: “Le san lúgubu subudinani inarüni? Arufuda numuti san lidan nibagari nawinwanduñein lan? Odi uámaagili nun le unbei lagúara ubóu líbürei?” Aban íbiri to aweiriduboun hama agübürigu ha kristiánugu afuranguagüda tumuti le asuseredubei dan meha le nibureingiru: “Dan le bagüriahóuniwa lidan inarüni gayarati bariñagun anihein lan Heowá buma súnwandan. Gama lumoun, ibidiñeti meha nun buidu. Úati meha iyereegu lan le iyereegubei lun nun, masaminaruntina meha berese lan Heowá lau le nadügübei, máluahan numuti giñe dan le gaturobulin nan. Según nuguya subuditi meha sun katei nun, aban lúguchi bulíeiguaü lira, ladüga ibidiñeti meha ni kata nun”. Lau lásügürün dan, aba tíchugun fe luagu charatu lan ani aba tadügün fiú asansiruni súdiniti lidan tibagari. Darí lun tatatirun eseriwida kei aban prekursora to adügüboun ǘrüwa-wein-diisi oura sagü hati.

ÍDERAGUA LUMUTIWA SÍFIRI SANDU LUN LÍBÜRE WAMÁ

13. Ida liña lídehan lani Bungiu sífiri sandu lun líbüre wamá?

¹³ Ariñagati 2 Korintuna 3:17, NM: “Le ñein lumuti lani Heowá sífiri anihein esefuruni ñein”. Ida liña lídehan sífiri sandu lun líbüre wamá? Íderagua lumutiwa áyeiha igaburi le ídehati lun líbüre wamá, kéiburi “ínsiñehabuni, ugundani, darangilaü, gaguraasuni, areiduni, lubuidun igaburi, úaraguni, ǘnabuguni [luma] ragüguaü unguaü” (Gal. 5:22, 23). Ubóu le ñein lubéi wawinwanda arufuda lumuti siñati lan líbüre hamá gürigia anhein marufudúniwa lubéi igaburi burí le, ínsiñenitima. Lárigiñe lariñaguni apostolu Pábulu igaburi burí ligía, aba lariñagun: “Úaraguati burí igaburi le luma furumiñeguarügü lúrudu”. Ka mini lubéi burí dimurei le? Úabei lan ni aban lúrudu gabafuti lun lerederuni warufuduni lidan wabagari igaburi burí le líchugubei lani Bungiu sífiri (Gal. 5:18). Busenti Heowá wasigirun áyeihei igaburi burí le mararamagunga lun súnwandan.

14. Ida liña lamudiraguniña sífiri lánina ubóu gürigia ha ígiraguagüdübaña houngua lun ligía lan ladundehei habagari?

¹⁴ Gürigia ha ígiraguagüdütiña houngua lun sífiriba lan lánina ubóu le alidihei habagari adüga hamuti luriban haritagun, ani másiñati samina hamá líbüretiña lan (aliihoualá 2 Féduru 2:18, 19). Gama lumoun le linarün katei idamuni hagía. Anirein saragu lúrudu le ru hamaalibei gumadimatiña lun madügün hamani gürigia sun le hayumahabei. Kei lariñagun Pábulu: “Mama [...] houn ha adügübalin le buídubei ladügǘwa lúrudu; lúrudu hounti ha wuribabaña, ha maganbadibaña” (1 Tim. 1:9, 10). Lidamuñanu giñe figóu, aban iyubudiri furundeti, ladüga hafalaruni ‘lugundan hasaminan, keisi gürigia garaüwarügütiña’ (Efe. 2:1-3). Ítara haña gürigia hagía kei werere ha lachawahabaña maba, ábati héiguadun tidoun aban sádara gáfarahatu (Sant. 1:14, 15).

LÍBÜREI LIDAN DAMURIGUAÜ KRISTIÁNU

15, 16. Ka uagu súdini lubéi lidan wamá damuriguaü kristiánu, ani ka uéi líbüre wamá ñein?

¹⁵ Dan le hagumeserunbei lidan hadamuridagun kristiánugu inarünitiña mama amuriaharügütün lun habürüdǘniwa keisi lílana damuriguaü, lubaragiñe lira achawaharügü lumutün Heowá tidoun lóundarun (Huan 6:44). Ka san uagu ladügei? Ladüga funa san aban humá meha gürigia buiti ani úaraguati? Chóuruti mama lan luagu lira. Kati larihubei Heowá huagu? Ariha lumuti luagu haruma tan hanigi  ani ariha lumuti giñe gaganbadibadün lan buga lun lilurudun ani herederuba lan lau sun hugundan lábugiñe adundehani le líchugubei lau ínsiñeni. Danti le tídanhadün lan lóundarun góunigi lumutün lau adundehani le líchugubei tídangiñe Lererun. Ítara liña lesefurunün lídangiñe iyeeni luma arufudahani mébunati lánina relihión mama inarüniti, aba lubéi larufudahan hun lun háyeihani igaburi le harufudubei kristiánugu (aliihoualá Éfesuna 4:22-24). Seremei lun Heowá, gama wamuti lubuidun chansi lun hádangiñe wamá gürigia ha ‘esefurúbaña luéi lubafu figóu’ (Sant. 2:12).

¹⁶ Dan le hama wamá gürigia ha hínsiñehabubaña lun Heowá tídangiñe sun hanigi, ma manufudetiwa? Ma méibuguntiwa adigiragueina wánagangiñoun luéi lasuseredun somu katei wuribati woun? Ma inarüni mama lan mosu wárügüdüni wemegen buidu tidan Luban Wadamuridagun ladüga wanufude liweruhóuniwa wawéi? Uá manufudetiwa. Le linarün aban katei, líbüreti ani chóuruti wasandiragun woungua. Mítaranti kei dan le lidan wamá amu fulasu. Ani leti buídubei luagu líbürei le wasandirubei uguñe hadan lumutuniña Bungiu ábanrügüñein lan liraüraü hénpulu lani le lunbei wawinwanduni ámuñegü.

“HAWEIRIGUN LIRAHÜÑÜ BUNGIU”

17. Ida luba líderaguniña ‘harufudúniwa lirahüñü Bungiu’ gürigia alibürera?

¹⁷ Dan le lafuranguagüdünbalin Pábulu esefuruni le aranse láalibei Heowá habá lubúeingu ha ubouagubaña, ariñagati: “Lauñein saragu óurabahouni luma emenigini sun ubóu, agurabei dan le lunbei heresibiruni lirahüñü Bungiu halagante [o dan le lunbei harufudúniwa, NM]”. Lárigiñe aba lariñagun: “Lesefuruba [...] ubóu lídangiñe asufuriruni luma agadeiruni le gádanbalin lun gafanranbei lan lidan haweirigun lirahüñü Bungiu” (Rom. 8:19-21). Lidan bérusu le, dimurei “ubóu” mini lan gürigia ha hemenigibaña hawinwandun lun súnwandan ubouagu ha lúnbaña hasagarun buiti lídangiñe “harufudúniwa” lirahüñü Bungiu. Lagumeseruba arufudúni le danme híderaguni ha anuadirúaañabaña Kristu sielu arumadahei Ubóu luéi wuribani luma ebelaagüdaña “saragu gürigia” lidoun iseri ubóu (Aruf. 7:9, 14).

18. Ida luba alibürereina hamá gürigia ha gaganbadibaña ani kaba luwuyeri alibüreruni heresibira?

¹⁸ Habihiba gürigia aban alibüreruni le lunbei espechali lan, lugundun hesefuruba luéi lubafu Satanási hama lumafianu (Aruf. 20:1-3). Ma lueirin awalidaguni! Lárigiñe, heseriwiduba 144,000 urúeigu ani fádirigu úara luma Kristu ábameti hayusuruni lebegi asalbaruni murusun murusun darime lun halibureruniña gürigia sunsuinagubei lídangiñe figóu le galagante habéi (Aruf. 5:9, 10). Lárigiñeme lóuchawagun hafiñen, heresibiruba gürigia aban alibüreruni sunsuinagubei kei meha le labusenrubei Heowá lúmagiñe furumiñe, heresibirubei halibüreruniwa o “haweirigun lirahüñü Bungiu”. Samina humá luagun le, mámaalime mosu hageindagun luma luriban hayumahan, lugundun gidawaalime sun figóu wawéi ani gayarahalime wáyeihani ligaburi Bungiu sin wachararun.

19. Ka lunbei wasigirun adüga lun gayarabei lan wibihin alibüreruni inarüniti?

¹⁹ Ayumahatün san gafanran humá lidan esefuruni le lunbei liabin úara luma “haweirigun lirahüñü Bungiu”? Anhein ítara liña lubéi, ígira humá lun gani lan “lúrudu le úabei mégeiti luagu ani sefu lawa” efekütu lidan hisaminan luma tidan hanigi. Aturiaha humóun Lererun Bungiu buidu ani adüga huméi estodi. Arufuda huméi lidan hibagari hawinwanduñein lan inarüni. Amuriaha humá luma Heowá lun líchuguni lani sífiri sandu hun. Yarafalá hakipuragun hungua lun damuriguaü kristiánu ani sagá humá buiti lídangiñe arufudahani tídangiñeti Bíbülia le ítarabei kei éigini le líchugubei Heowá woun. Mígira humá lun leyeedunün Satanási ítara kei leyeedunu Ewa lau hasaminarun gidá lumuti lan lilurudun Bungiu líbürei huéi. Inarüni weiri lan lisumadin Mafia. Gama lumoun, gayarati wagañeiruni ladüga “subudi wamani luriban laritagun”, ligíaba wakutiha lidan le aban arütíkulu (2 Ko. 2:11).

[Álügüdahani lánina aturiahani]

[Iyawaü to lídanboun páhina 14]

Ayumaha humaagili san katei le unbei lagúara ubóu líbürei?

[Iyawaü to lídanboun páhina 14]

Arufudatina san lidan nibagari nawinwanduñein lan inarüni?