Seriwi wamá lun Bungiu le íchugubei alibüreruni

“Ladügǘniwa le lubeibei Bungiu, ligía ínsiñehabunibei lun; ani ménrenguti lagunfulirúniwa lugumadin.” (1 HUAN 5:3)

KABA HAMUGA HÓUNABA?

Ida liña lálugun Satanási lafiñeragüdǘniwa hénrengu lan lagunfulirúniwa lilurudun Bungiu?

Ka uagu lunti lubéi duari wamá dan le wanúadiruniña wamadagu?

Kaba íderaguawa akipura úaraguni lun Bungiu le íchugubei líbürei?

1. Ida liña layusuruni Heowá líbürei le lúmabei ani ka katei lígirubei lun ladügüni Adán tuma Ewa?

LIDAN sun ubóu Heowárügüñein líbüre sunsuinagubei. Gama lumoun mayusurun lumuti lun lagumadiruniña lubúeingu lidan sun le lunbei hadügüni luma le lunbei madügün hamani. Lubaragiñe lira, líbüreti lígiruniña lun hagía guánarügü lan desidírei le habusenrunbei hadügün según ligaburi hayumahan. Aban hénpulu, tídangiñerügüñoun meha “tin wewe to lánina lasubudirúniwa le buídubei lumoun le wuribabei” leweridiraña Bungiu Adán tuma Ewa lun meigin hamá (Agu. 2:17). Ligíati, gayarati meha hadügüni le lubeibei Bungiu ani gunda hagía lau líbürei.

2. Ida liña haferidiruni furumiñetiña wagübürigu líbürei le meha líchugubei Bungiu houn?

² Ka uagu líchiga Heowá saragu líbürei houn furumiñetiña wagübürigu? Ladüga lenege guánarügü lan ladügaña ani ruti aban saminaü houn. Agurabati buga ladundehaniña ínsiñeni le hasandirubei luagu lidoun aban lubuidun ibagari (Agu. 1:27; Rom. 2:15). Gama lumoun lubaragiñe hamuga heteingiruni ani arufuda hagía luagu gebegi lan líbürei le líchugubei houn, himei hamuti hadügün gasu lau Satanási ani aba desidírü hamani houngua ka lan buídubei luma ka lan wuribabei. Saminatiña yebe líbüretimabaña lan meha ítara, gama lumoun bulíeiguatiña. Kei resultóu, adügaguarügütiña houngua ani adüga hamaña sun hadügawagun lidamunme figóu, barüti le saragu asufuriruni (Rom. 5:12).

3, 4. Ka katei labusenrubei Satanási lun wasaminarun luagu lilurudun Bungiu?

³ Anhein meha adüga lubéi satanási lun hebedaagun biama gürigia mafigountiña lun Bungiu ani adüga ligía lun mabahüdün hamani saragu ánheligu ladundehan Bungiu, chóuruti gayara lan giñe leyeeduniwa. Masansirun lágiru sádara to layusuruboun, adügati lun wafiñerun hénrengu lan lagunfulirúniwa lilurudun Bungiu ani michu lan giñe  lilurudun Bungiu ugundani woun lidan wabagari (1 Huan 5:3). Werederun asaminara ítara gayarati gani lan efekütu wawagu. Ariñagatu aban íbiri wein-gádürü irumu tau to éiguaduboun lidoun magíaguni: “Gánitiña meha hagübüri umadagu efekütu nuagu, lugundun hanufudetina nariñaguni le nasaminarubei houn”. Ma inarüni súngubei lan wagía ínchaha hamaadiwa umadagu adüga somu katei wuribati?

⁴ Ma lírun, gama lumoun dariwatiña giñe hagübüri umadagu lidan damuriguaü. Ariñagati aban kristiánu le nibureingili: “Gadariguatiña meha fiú hádangiñe numadagu hama gürigia ha mama gefentiña luagu Heowá. Lau lásügürün dan, aba níchugun fe eibu lan násügürün dan hama ábatima nítaradun kei hagía. Aba ledebilidun numadagua luma Heowá, masandihadina meha ugundani lidan adamuridaguni ani díseguati meha náfuridun apurichiha. Aba gunfurandanani lunti lan nasansiruniña numadagu. Ani ligía nadügübei”. Le linarün katei, wéiriti efekütu le gayarabei gani hamá umadagu wawagu. Ariha wamá aban hénpulu tídangiñeti Bíbülia le arufudubalin ítara liña lan (Rom. 15:4).

‘ÁBATI LAGAÑEIRUNIÑA ÍSÜRAELINA’

5, 6. a) Ida liña leyeeduniña Abüsalón saragu ísüraelina? b) Saliti san laransehan Abüsalón lun?

⁵ Anihein saragu hénpulu tidan Bíbülia le ayanuhabei hawagu gürigia ha gánibaña luriban efekütu hawagu amu. Lani Abüsalón, le liráü urúei Dawidi aban lídangiñe hénpulu ligía. Genegeti aban lan meha wügüri wéiriti lumagadiñegu. Gama lumoun, ítara kei meha Satanási aba lígirun lun tabuinchun lanigi lau memenihabuni, darí lun lawamadun larúeihan lúguchi lun, aban katei le úati meha yu lan lun. * Lau saragu ibibuni álugati lagidaruni arúeihani luéi lúguchi, eyeeda lumutiña ísüraelina lun hasaminarun meberesen lan larúeihan lúguchi hau. Adüga lumuti Abüsalón lememe ladügübei Mafia lidan fuluri-agei Edén: arufudaguati lungua kei aban gürigia buiti ani ayanuha ligía marasualugu luagu lúguchi (2 Sam. 15:1-5).

⁶ Saliti san laransehan Abüsalón? Luéigiñe aban oubaü saliti, lugundun ariñagatu Bíbülia luagu ‘aba lan meha lagañeiruniña’ Abüsalón ísüraelina (2 Sam. 15:6). Gama lumoun, wuribati lidin lun ladüga lanaagun lungua ani dandu ligía kei wügüriña ha leyeedubaña féridi hamuti habagari (2 Sam. 18:7, 14-17).

7. Ka katei wafurendeirubei lídangiñe lani Abüsalón hénpulu? (Arihualá dibuhu le lídanbei páhina 19.)

⁷ Ka uagu ménrengun lubéi meha heyeedúniwa ísüraelina? Másiñati ayumaha hamuti lan meha le füramase lubéi Abüsalón, o gayarati giñe ígiraguagüdatiña lan houngua lun leyeeduniña lumagadiñegu. Meberesenga ka lan lébunabei, le chóurubei úati lan úaragua hamá lun Heowá ni lun urúei le lanúadirubei. Uguñe weyu, anihagua Satanási ayusura gürigia ha ítarabaña kei Abüsalón lun leyeedagunu hanigi lubúeingu Heowá. Añahein ariñagutiña: “Hǘrüti lilurudun Bungiu”, o: “Anati gürigia ha meseriwidunbaña lun Heowá gúndaatimatiña!”. Wafalarubei san saminaü le? Rútiwa san fe aban lan óunwenbu iyeeni saminaü burí le? Chouru wamuti san ‘lilurudunrügüñein lan Heowá le úabei mégeiti lidan’, lidan amu dimurei, lilurudun Kristu íchugubei alibüreruni inarüniti woun? (Sant. 1:25.) Arufuda wamá gebegi lan lúrudu le woun ani keisi kristiánugu mayusura waméi líbürei le wámabei wuriba (aliihoualá 1 Féduru 2:16).

8. Ka burí sügǘ arufudubei manügün lan maganbadi lun lilurudun Bungiu ugundani?

⁸ Hawaguntima nibureintiña líchigei Satanási larihin. Aban íbiri le gúnfulihali 30 irumu guentó ariñagati: “Dan meha le nibureingidina saminatina meha luagu mahuudun lan lilurudun Heowá lun lóunigirunina, lubaragiñe lira saminatina adügarügüti lan lun madügün nani le nabusenrubei”. Barǘ lumuti saminaü le lun  léiguadun lidoun magíaguni. Gúndaatimati san libagari lárigiñe ladügüni lira? Uá. Ligía guánarügü ariñagubei: “Sügüti saragu irumu ani wuribamémegili nasandiragun nungua, ani mígirun lumutina nisaminan darangilu”. Abahüdaguatu giñe aban íbiri dan le taritagun luagun dan le meha nibureingiru: “Lárigiñe néiguadun lidoun magíaguni, híruti ani móuniti nasandiragun nungua. Sügühali disinéfu irumu lúmagiñe, gama lumoun siñagili nabulieiduni katei burí wuribati ligía”. Ariñagatu amu íbiri: “Danbei le níchugun fe luagu adügati lan ligaburi nóuserun damichi houn gürigia ha hínsiñebaña nun, aba nasandiragun nungua wuriba. Wéiriti luriban bawinwandun dan le féridibaali lufuleseinhabu Heowá”. Nibureinti, mígiraba lun leyeedunibu Satanási, lubaragiñe badügün somu katei saminabá súnwandan luagun resultóu le lunbei lanügüni.

9. a) Ka lunbei wálügüdagun woungua luagu Heowá luma luagu lilurudun luma ladundehan? b) Ka uagu súdini lubéi wasubudiruni Bungiu?

⁹ Híruti furendeihaña lan besafu kristiánugu dandu nibureintiña kei ha wéinamuhaña lau luriban barüti lan hígiraguagüdün houngua lun luriban ayumahani resultóu wuribati (Gal. 6:7, 8). Lunti lálügüdagun kada aban wádangiñe lungua: “Subudi numutu san sádara to layusuruboun Satanási lun leyeedunina? Ariha numuti san Heowá kei umadaü le buídutimabei ani afiñetina san súnwandan lan lariñaguni inarüni ani busén lani le buídutimabei nun? Chouru numuti san maweiyasunbei lan ángiida lau somu katei le gayarabei hamuga lanügün buiti luma ugundani nun?” (aliihoualá Isaíasi 48:17, 18). Gayarabei wóunabun anha lun álügüdahani le, ánhawa asubudirei Heowá buidu buidu. Lunti giñe gunfuranda wamani arufuda lumuti lan lúrudu luma  adundehani le tídanbei Bíbülia wínsiñe lun Heowá, mabusenrunti lagidaruni líbürei wawéi (Sal. 25:14).

AMURIAHA WAMÁ LICHÚ AAU TUMA ABAN ANIGI GAGANBADITU

10. Ka uagu lunti lubéi wáfaagun lun wáyeihani le ladügübei urúei Salomón dan meha nibureingili?

¹⁰ Dan meha le nibureingili Salomón lau ǘnabuguni furíeiti lun Heowá: “Ru baadina lun narúeihan [...] lau sun nibureingidina lan”. Lárigiñe aba lamuriahan aban anigi gaganbaditu luma (1 Uru. 3:7-9, 12). Óunaba lumuti Heowá furíei le, ligiamémeba ladüga ánhawa afurieida lun meberesenga ka lan warumudiribei. Inarüni luagu madügünbei lan Heowá aban milaguru lun líchugun subudi luma lichú aau woun. Gama lumoun wibihuba lichú aau ánhawa aturiahoun Lererun, ánhawa amuriaha sífiri sandu luma falá wameime adundehani le íchugubei woun lidan damuriguaü kristiánu (Sant. 1:5). Haritagua waméi yusu lumuti lan Heowá sun katei le, lun líderaguniña lubúeingu ha nibureingiña lun chútima lan hau hawéi “ha chúbaña aau luma hawéi furendeitiña” ha ubouagubaña (Luk. 10:21; aliihoualá Sálumu 119:98-100).

11-13. a) Ka burí katei súdiniti larufudahabei Sálumu 26:4, Ariñawagúni 13:20 luma 1 Korintuna 15:33 woun? b) Ida luba wafalaruni adundehani tídangiñeti Bíbülia le lidan wabagari?

¹¹ Kei aubei warihei lun wasubudiruni Heowá buidu, mosu waturiahanu Bíbülia ani samina wagíame luagun le waliihabei. Ru wamá fiú hénpulu, akutiha waméi fiú bérusu le íchugubei saragu adundehani hawagu umadagu. Ariñagati Sálumu 26:4: “Maganóuntina lidan aban hama yéetiña, móundaragun nuguya hama biangua tigibu”. Ariñagati Ariñawagúni 13:20: “Ha óundaragutiña hama chu tau, lachuuduba hau, ánhaña ha óundaragubaña hama ibidiougua tau, heferidiruba”. Ani ariñagati 1 Korintuna 15:33: “Féridigüda hamuti hagübüri umadagu lubuidun igaburi”.

¹² Ka burí katei súdiniti gayarabei wafurendeirun lídangiñe bérusu burí le? Furumiñe, furendeitiwa busén lan Heowá wanúadiruniña wamadagu buidu, lugundun busenti lóunigiruniwa luéi katei le gayarabei ladügün damichi woun o lun wamadagua luma. Libiaman, gürigia ha úmabaña wóundaragua gánitiña efekütu wawagu dandu lun buiti kei lun wuribati. Luéigiñe amu oubaü, ligaburi labürüdǘniwa bérusu burí le, arufudati luagu busén lan Heowá ladunrunu wanigi. Ida? Ariha wamuti luagu úati lan aban lúrudu lidan bérusu le le ariñagubei woun “madügabei le o lígita”, lubaragiñe lira rúrügüti adundehani woun. Ítara liña kamá hamuga lariñaguña Heowá woun: “Ítara liña katei, guentoti kaba badüga? Ka tídanbei banigi?”.

¹³ Seremei giñe bürüwa lan bérusu burí le kei adundehani huuti lidan ámuñegueinarügü dan lidan saragu manera. Adüga wamá álügüdahani kéiburi le wóuniwagua: “Kaba nadüga lun madügün nan umadaguaü hama ‘biangua tigibu’? Kaba burí hamuga katei adüga lun nóundaragun hama? (Ari. 3:32; 6:12.) Kátaña san gürigia ‘chu tau’ ha úmabaña labusenra Heowá lun nadügün umadaguaü, ani kátaña gürigia ‘ibidiougua tau’? (Sal. 111:10; 112:1; Ari. 1:7.) Katei burí ‘lubuidun igaburi’ le lunbei neferidiruni ánhana óundaragua hama hagübüri umadagu? Hádanrügüñanu san gürigia ubouaguna gayara lan nadeirun hagübüri umadagu? (2 Fe. 2:1-3.)”. Buiti lun wasaminarun luagun lóunabagüle álügüdahani burí le.

14. Ida luba wasagaruntima buiti lídangiñe Guñoun lánina Áhuduraguni kei Familia?

¹⁴ Gayarati wadügüni ligiaméme dan le wasaminarun luagu amu bérusu le arufudubalin ka lan lasaminarubei Heowá luagu katei le súdinibei woun luma houn wafamilian. * Gayarati hakutihan agübürigu tema ítarati lidan Guñoun lánina Áhuduraguni kei Familia. Moun lumuti habulieiduni híderaguniña kada lílana hafamilian gunfurandei arufuda lumuti lan lilurudun luma ladundehan Bungiu weiri lan wínsiñe lun,  lugundun ligía lisuunibei adamuridaguni ligía (Sal. 119:72). Ítarati, buídutimabei hanaagun lílana familia houngua ani yarafatimabei giñe hasandiragun houngua lun Heowá.

15. Ida luba wasubudiruni anhein wibihiña lubéi aban anigi gaganbaditu?

¹⁵ Ida luba wasubudiruni anhein wibihiña lubéi aban anigi gaganbaditu? Lau konpararü wamani ligaburi wasaminan luma ligaburi hasaminan binadu lubúeingu Bungiu ha meha úaraguabaña lun, ligía aban manera lun wasubudiruni. Aban hénpulu, abürühati urúei Dawidi: “Nubungiute, hínsiñeti nun lun nadügüni bugundan, barǘ numuti barufudahan tidan nanigi” (Sal. 40:8). Ani ariñagati le abürühabalin Sálumu 119: “Wéiriti línsiñe barufudahan nun! Sun weyu nau asaminara luagun!” (Sal. 119:97). Aban ínsiñeni libe le mama ítaraguarügü liabin: lun gayara lan wasandiruni mosu waturiahan buidu, wafurieidun luma wasaminarun luagun le waturiahabei, luma dan le warihini lidan guánarügü wabagari luagu biní lumutiña lan Bungiu gürigia ha gaganbadibaña lun lilurudun (Sal. 34:8).

ÁFAAGUA WAMÁ LUAGU WALIBURERUN KEISI KRISTIÁNUGU

16. Ka lunbei waritaguni lun wagañeirun lidan áfaaguni le wadügübei lun wibihin alibüreruni le inarüniti?

¹⁶ Luagu saragu irumu ageindaguaaña saragu néchanigu lanarime burí wuribu lun gayara lan ñein lan alibüreruni. Gíbetimati resun wama lun giñe wáfaagun lun meferidirun wamani líbürei le wámabei kei kristiánu! Haritagua waméi luagu mámarügüñein lan luma satanási, ubóu, hama máfianu wageindagua, lunti giñe wageindagun luma wafigoun guánarügü, luma tuma wanigi to geyeedaguadiboun (Her. 17:9; Efe. 2:3). Gama lumoun lau lídehan Heowá gayarati wagañeirun. Ani ságüme desidírü wamá wadügüni le buídubei wibihuba bián resultóu buiti. Furumiñeti, wagundaaragüdübei Heowá (Ari. 27:11). Libiaman, ságüme gaganbadi wamá lun ‘lilurudun Bungiu le úabei mégeiti luagu ani sefu lawa’, desidírütimabadiwa werederun lidan üma bürüraüti le anügübaliña gürigia lidoun ibagari magumuchaditi. Ani ámuñegü wagundaaruba lau alibüreruni wéiritimati le füramase lubéi Heowá houn ha eseriwidubaña lun lau úaraguni (Sant. 1:25; Mat. 7:13, 14).

17. Ánhawa éiguada lidoun somu figóu, ka uagu moun lumuti lubéi wabuinchun lau idiheri ani ka ídemuei líchugubei Heowá woun?

¹⁷ Le linarün aban katei, sun wagía chülüti oura lun wachararun (Apu. 7:20). Danme le lasuseredun le woun, mabuincha wamá lau idiheri, masaminarun wagíame luagu mebegi wamá ni kata. Ánhawa éiguada, iñuragua wamá ani sigí wamá wabaruaguóun, íbini mosu lanme wamuriahan ídemuei hama wéiyaaña lidan afiñeni. Lau ichouruni ariñagati Santiagu: “Dánmeti le hafurieidun lau afiñeni, ábame lareidaguagüdüni Bungiu sánditi iñuragualeime; ani anhein giñe afigouhaali lubéi, ferudunawabei lifigoun” (Sant. 5:15). Maweiyasun wamá abulieidei weiri lan lugudemehabu Heowá ani ligía lan achawahabaliwa lidoun damuriguaü ladüga larihin somu katei buiti wawagu (aliihoualá Sálumu 103:8, 9). Ligíati, maweiyasunbei Bungiu íchigei lanagan wawagun ánhawa asigira áfaagua tau sun wanigi lun úaragua wamá lun (1 Kro. 28:9).

18. Ítara kei lamuriahani Hesusu lidan furíei le lídanbei Huan 17:15, ka lunbei wadügüni lun lóunigiruniwa Heowá?

¹⁸ Lagumuhóun áriebu lubaragiñe lounwen Hesusu, adüga lumuti furíei mabulieidúati le lun Heowá luagu hafulesein unsu lani apostolugu ha úaraguabaña: “Namuriahan buma lun bóunigiruniña luéi wuribani” (Huan 17:15). Uguñe weyu, ligiaméme labusenrubei Kristu houn sun lánigu disipulu. Ligíati, gayarati wachoururuni luagu lóunabubei lan Bungiu lafurieidun Hesusu lau lóunigiruniwa lidan dan hénrenguti le. Chouru tumuti Bíbülia woun: “Íderagua lumutiña ani góunigi laña ha abagaridubaña lidan úarani [...]. Góunigi lumutiña ha éibugubaña richaguañu” (Ari. 2:7, 8). Inarüni anirein lan dan herénguti larufudúniwa úaraguni, gama lumoun ligíarügüñein üma le anügübaliwa lidoun ibagari magumuchaditi luma lidoun alibüreruni inarüniti (Rom. 8:21). Mígira wamá lun ñein lan asagarutiwa lídangiñe!

[Abürüdǘni burí]

[Álügüdahani lánina aturiahani]

[Iyawaü burí to lídanboun páhina 19]

Kátaña ítarabaña uguñe weyu kei Abüsalón, ani ida luba wóunigiragun woungua hawéi?