KA UAGU AMU TUBÉI BÍBÜLIA TUÉI TÍBIRI LÍBURU? Besafu binadu líburu ayanuhatu luagu katei luma árani le uágubei tariñaga siensiasi uguñe mabuidun lan ani peliguru ligía. Uguñe weyu, íbini ariñahani le tídanbei líburu mosu lasansirúniwa estodi. Ánhounti Bíbülia kei aban tubéi líburu lúmagiñetu Bungiu, “durati [le tariñagubei] lun sun dan” (1 Féduru 1:25).

FIÚ HÉNPULU: Ariñawagúati meha houn ísüraelina lidan Lilurudun Moisesi lun hachigin aban huyu lidan “aban fulasu bóugudi tuéi kianpu”, lun hawiyedun ñeinhin (2 Lúrudu 23:12, 13). Ariñagati giñe houn lunti lan meha hachibagun houngua lau duna lárigiñe haguurun aban animaalu o aban gürigia hilaali (Fádirigu 11:27, 28; 1 Lúrudu 19:13, 19). Ariñagati giñe Lúrudu houn mosu lan meha hadisedagüdüniña gürigia ha gawagutiña lépüra hawéi ha híbiri darí lachoururúniwa malugurun haaña lan amu lau hasandi (Fádirigu 13:1-8).

KA SUBUDIWAALIBEI LUAGU AGARANIHANI UGUÑE WEYU? Lubuidun manera lun lahandilihóuniwa duna wíyeti luma ifei, lachibúniwa úhabu luma hadisedawagüdǘniwa gürigia sánditiña hawéi ha híbiri ídehagili lun maburuchagun lan sandi. Ligíati, anhein ua tubéi kumú huma o amu katei libe lira, ariñagatu aban óundaruni merigana gíritu Centros para el Control y la Prevención de Enfermedades (CDC, sígüla lauti giyoü) luagu mosu lan “hámuñachuni hawiyedun lidan aban fulasu kéiburi 30 méturu [100 ugudi] dise luéi duna”. Según Organización Mundial de la Salud, dan le hagumuchun gürigia lau hawiyedun lidan manera le úati peliguru lan, adügati lun lalouguadun sandi le íchugubei luburu urageirugu houn gürigia 36 wéiyaasu lídangiñe kada san lidan fulasu le ñein lubéi hawinwanda. Kéiburi 200 irumu lumoun oura le, ligía hasubudiruni surusiagu hagía guánarügü lan ásügüragüdübaña sandi hawagun gürigia ha únbaña hagaraniha dan le machibun hamani háhabu lárigiñe haguurun luagu somu hilaali. Ariha hamuti óundaruni CDC luagu lachibúniwa lan úhabu “ligía igaburi buídutimabei lun madagarun lan sandi wawagu”. Agiati lun hadisedagüdǘniwa gürigia ha gawagubaña lépüra fiú dan hawéi amu? Ma meme binarü ariñagatu aban agumeiraguagüdüni gíritu Saudi Medical Journal: “Dan le lagumeserun sandi galugurahati adagara luagu aban gürigia, ladisedagüdǘniwa hawéi ha híbiri gürigia, ligíarügübei gayara lan madaga lan sandi ligía hawagu amu”.

IDA LIÑA HARIHIN LUN? Subuditu san amu líburu sagüráutu hun to lüha lúmagiñe tabürüdǘn ani úaraguatu luma agaranihani uguñe weyu? Odi Bíbüliarügüñoun?