Anihein san aganbuti afurieiduni?

“Machourun numuti meha luagu anihein lan Bungiu. Íbini ítara, anihein meha dan furíeitina lun. Lau sun machourun nani luagu anihein lan aganbutina, nídangua ayumahatina meha ítara lan. Magundantina meha ani masuuniti meha nibagari. Hanufudetina meha nafiñerun luagu anirein lan Bungiu lugundun saminatina meha gürigiarügüñanu lan ha débilibaña afiñera luagu.” (PATRICIA, IRLANDA) *

SANDIGUATÜN san hungua kei Patricia? Furíeitün san lun Bungiu íbini machourun humani luagu anirein lan? Anhein ítara liña lubéi, mámarügüñein huguya.

▪ Según álügüdahani le adügǘbei houn 2,200 alunduna 22 hádangiñe kada san gürigia hagíarügüñanu afiñera luagu anihein lan aban Bungiu le aganbubalin furíei. Gama lumoun, ariñagatiña 55 hádangiñe kada san gürigia díseguati lan hafurieidun.

▪ Lidan amu álügüdahani le adügǘbei houn 10,000 gürigia ha lídangiñetiña gádürü kotinente arufudati 30 lan hádangiñe kada san gürigia ha ariñagubaña hawougua mafiñentiña lan luagu Bungiu furíeitiña.

Ka san uagu gibe lubéi machouruni?

Afuranguagüdati aban wügüri alunduna gíriti Allan ka lan uagu lariñaga mafiñenti lan luagu Bungiu: “Laganóun meha nun ítara liña lan relihión kei aban katei le ayusurúbei lun hagumadirún gürigia luma lun lasagarún seinsu hawéi. Saminati meha: ‘Lun hamuga anihein lan Bungiu, mígirunbei yebe lun lasuseredun saragu marichaü’. Íbini ítara, anihein meha dan aba nañuurun ayanuha luma somu ‘katei’. Álügüdaguatina giñe meha nungua ka lan lisuunibei ibagari”.

Ámuñegueinarügüti resun le uágubei machourun hamani fiú gürigia luagu anihein lan óunabuti furíei. Libe-agei dan machourun hamuti ladüga madari hamá óunabagülei lun álügüdahani kéiburi:

▪ Bungiu san adügübaliwa?

▪ Ka uagu genege lubéi turóbulirügüñein lan lanüga relihión?

▪ Ka uagu lígira Bungiu lun ñein lan saragu asufuriruni ?

Agia huguya, busentimabadün hamuga san hafurieidun anhein hamuga subudi humuti lóunabagüle álügüdahani burí le?

[Abürüdǘni]