“Búmañadina”

“Saragubaña gürigia éibugutiña yagüroun yaroun áluaha laganwoundun hasubudin.” (DAN. 12:4)

KABA HAMUGA HÓUNABA?

Ida liña laburuchagun ‘subudi inarüniti’ uguñe weyu?

Ida liña hagibedagun gürigia ha ánharubaña lun inarüni?

Ka burí manera ídanbei laganwoundagua subudi inarüniti?

1, 2. a) Ka katei arufudubei luagu anihein lan Hesusu hama lánigu disipulu uguñe ani ñeinbei lan giñe hama ámuñegü? b) Según Danieli 12:4, kaba buga resultóu eresibirúa lídangiñe taliihóuniwa Bíbülia buidu buidu?

SAMINA humá lídanñadün lan Paraísu. Sagü binaafin aba hásaarun lau iseri erei memeniha hanigi hatatirun ábanya weyu. Masufurirunhadün gáriti, lugundun gumugua sun sandi. Sun hani sentidu kéiburi harihin, haganbun, hirimichun, sentidu lánina lasandirúniwa ligustun éigini luma sentidu lánina laguurúniwa luagu katei lawadigimariduña lidan dan. Buin hiña lau erei, ruti huádigimari ugundani hun, gíbetiña humadagu ani madiheridunhadün. Anihánba abinirúni burí le gayarabei heresibirun lábugiñe Larúeihan Bungiu. Labinirubaña Hesukrístu Urúei le iridúaalibei gürigia ha lúnbaña hawinwandun lábugiñe Arúeihani le, ani larufudahabei subudi lúmagiñeti Heowá houn.

² Ñeinbei Bungiu hama lubúeingu ha úaraguatiña danme le hídehan lidan wadagimanu lánina arufudahani le lunbei heresibiruni ámuñegü lidan sun ubóu. Le linarün katei, luagu saragu sígulu hámañanu kristiánugu ha úaraguabaña Heowá luma Hesusu. Lubaragiñe lamudeirun Hesusu sielun chouru lumuti houn lánigu disipulu hámabei lan (aliihoualá Matéu 28:19, 20). Lun gayara lan wafiñerun tídangiñe sun wanigi luagu füramasei le, akutiha wamá fiú dimurei lídangiñe aban profesía le labürüdagüdübei Bungiu lidan binadu Babilónia, lóugiñe bián-milu-seingü-san irumu guentó. Luagu “lagumuhóun dan” le ídanbei wawinwanda ariñagati profeta Danieli: “Saragubaña gürigia éibugutiña yagüroun yaroun áluaha laganwoundun hasubudin” (Dan. 12:4). Dimurei güriegu le asügürawagüdübei lidan bérusu le kei ‘éibuga yagüroun yaroun’ mini lan akutiha buidu buidu. Ligíati, gürigia ha aturiahabarun Bíbülia buidu buidu ibihatiña abiniruni lánina hadeiruni subudi inarüniti tídangiñe Lererun Bungiu. Ariñagati giñe profesía luagu  saragubaña lan buga gürigia ibihei. Ani laganwounduba buga subudi le, burugua ligíame lidan sun fulasu ani ménrengunbei buga libihíniwa. Lidan awanha lan akutihei lagunfulirun profesía le, warihibei luagu anihein lan Hesusu uguñe weyu hama lani disipulugu ani gabafu lan Heowá lun lagunfuliruni sun le füramase lubéi.

LAFURANGUDUN ‘SUBUDI INARÜNITI’

3. Ka asuseredubei lau ‘subudi inarüniti’ lárigiñe hóunwegun apostolugu?

³ Lárigiñe hóunwegun apostolugu aba lagumeserun arufudahani mama inarüniti lidan damuriguaü kristiánu kei lariñaguni profesía ani aba laburuchagun kei watu (Adü. 20:28-30; 2 Tesa. 2:1-3). Lidan burí sígulu le asigirubei, maganwoundunti ‘subudi inarüniti’ ni murusun, ni íbini hadan ha ariñagubaña kristiánugu hamá. Íbini meha hariñagun afiñe hamá tuagu Lererun Bungiu, buruguagüdatiña alidihatiña relihión iyeeni lau “arufudahani hámagiñeti máfianu” le anabagubalin Bungiu (1 Tim. 4:1). Ítara liña hadügün lun masubudirun hamani gürigia inarüni. Lidan burí arufudahani iyeeniti le harufudahabei, arufudahatiña ǘrüwañanu lan gürigia lidan Bungiu, móunwedaditu lan uani, luma súfuritu lan fiú uani lidan máfiougati lun súnwandan.

4. Ida liña lagumeserun aban sétanu hani kristiánugu áluahei ‘subudi inarüniti’ lidan burí irumu 1870?

⁴ Gama lumoun, lidan irumu 1870, kéiburi 40 irumu lubaragiñe lagumeserun “lagumuhóun dan” óundaratiña aban sétanu hani kristiánugu úaraguatiña Pensilvania (Meriga) lun haturiahanu Bíbülia lau ubebeni luma lun háluahani ‘subudi inarüniti’ (2 Tim. 3:1). Aturiahatiña Bíbülia ligía iri le híchugubei hawougua, ani mama meha hádangiñetiña “chu tau hama gunfurandatiña” ha uéibaña laramudei Heowá subudi le, kei lariñaguni Hesusu (Mat. 11:25). Gürigia meha ǘnabugutiña hagía, ha meha busenbaña tídangiñe sun hanigi hadügüni lugundan Bungiu. Lau saragu duari aliiha hamutu Lererun Bungiu, samina hagía luagun le haliihabei, lárigiñe aba hayanuhan luagu le haliihabei. Konpararü hamuti giñe bérusu burí tídangiñeti Bíbülia ani akutiha haméi le habürüdübei amu gürigia ha meha adügübaña aban akutihani ítarati. Murusun murusun aba gunfuranda hamani Aturiahatiña Bíbülia ha inarüni le burí meha aramudañubei luagu saragu sígulu.

5. Ka meha tisuunibei tratadu to gíriboun The Old Theology (Binadu subudi luéigiñe Bungiu)?

⁵ Íbini meha weiri lan hagundan luagu le hafurendeirubei, mígiruntiña meha lun ladügün le hasubudirubei lun habuinchun lau anaaguni unguaü ani mariñaguntiña giñe hasubudiragüdüña lan somu katei iseriti (1 Ko. 8:1). Lubaragiñe lira, aba hadügün fiú tratadu to gíriboun The Old Theology (Binadu subudi luagu Bungiu) adügǘwatu meha lun tíderaguniña gürigia lun gayarabei lan hasubudiruni inarüni tídangiñeti Bíbülia. To furumiñetu tratadu rutu “lanwoun ariñahani lánina aliihani lun taturiahoun Bíbülia, lun gayara lan hesefurun luéi échuni mama inarüniti le hani gürigia luma lunya habihini binadu subudi le meha larufudahabei Wabureme Hesusu hama lánigu apostolu luagu Bungiu” (The Old Theology númeru 1, gádürü-hati irumu 1889, páhina 32).

6, 7. a) Ka inarüni líderagubadiwa Heowá gufuranda lúmagiñe burí irumu 1870? b) Kátima inarüni ánhingichubarun hanigi dan le hafurendeirunbalin?

⁶ Ma liibe inarüni buíduburiti asubudirua lúmagiñe burí irumu 1870! * Dan le waturiahani inarüni le, mámarügüñein dátosu wafurendeira. Le linarün aban katei, hanarimeti lubuidun inarüni le, ruti alibüreruni, ruti isuuni lun wabagari ani ruti giñe ugundani luma emenigini woun. Íderagua lumutiwa asubudirei lubuidun ligaburi Heowá luma giñe lisuuni. Furanguagüda lumuti woun ka lan ligaradanboun Hesusu, ka lan uagu lawinwanda ubouagu ani hilá ligía, luma giñe ka lan ladügübei uguñe. Arufudati lubuidun burí inarüni le, ka lan uagu lígira Bungiu  lun ñein lan wuribani, ka lan uagu wóunwegua, ida luba lan wafurieidun ani ida luba lan wibihini ugundani inarüniti.

⁷ Guentó gunfuranda haadiwa profesía burí le meha ‘aramudañubei’ luagu saragu milu irumu ani lagunfuliruña lidan lagumuhóun dan le (Dan. 12:9). Darí wamuti profesía burí le tidan sun líburu to tídanboun Bíbülia lídantima Ewanheliu luma tidan líburu Arufudúni. Íbini sügǘ le marihin wabéi lau wagu afuranguagüda lumuti Heowá woun, kéiburi dan le ladügǘnbei Hesusu urúeime, wuribu le asuseredubei sielu luma lachagarún satanási lun múarugun (Aruf. 12:7-12). Rúhali giñe Heowá lichú aau woun lun gunfuranda wamani le mini lubéi le warihubei, kéiburi wuribu, hárabaganali, sandi, ilamaü, hama gürigia wuribatiña ha adügübaña lun ‘hénrengu lan’ weyu burí le (2 Tim. 3:1-5; Luk. 21:10, 11).

8. Ka un wíchiga uéiriguni luagu sun katei le subudi wamaalibei luma luagu le aganba wamaalibei?

⁸ Ménrengunti woun wariñaguni dimurei le lariñagubei Hesusu houn lani disipulugu: “Fuleseiwatiña ha arihubalin katei le harihubei; ladüga nariñahare hun luagu saraguhaña lan urúeigu hama profetagu abusenrutiña yebe meha harihini le harihubei guentó, gama lumoun marihin hamuti; busentiña meha giñe yebe haganbuni le haganbubei guentó, ani maganbun hamuti” (Luk. 10:23, 24). Kei lánigu Hesusu disipulu rútiwa uéiriguni lun Heowá luagu lígiruniwa lun warihini luma lun waganbuni katei burí ligía, ani wéiriti eteingiruni le wasandirubei luagu lóunahani sífiri sandu lun ‘líderaguniwa’, luma lun ladundehaniwa lidoun “sun inarüni” (aliihoualá Huan 16:7, 13). Ligíati, gebegilá ‘subudi inarüniti’ woun ani arufudaha waméi houn amu.

SARAGUHAÑA ÁNHARUTIÑA LUN ‘SUBUDI INARÜNITI’

9. Ka agunbirahani adügǘbei tidan Garüdia Atalaya to lánina gádürü-hati irumu 1881?

⁹ Lidan gádürü-hati irumu 1881, lubaragiñe lagunfulirúniwa biama irumu lúmagiñe lagumeserun tadügǘn garüdia to, adügǘwati aban agunbirahani tidan, luagu busenwa hamá 1000 apurichihatiña. Ariñagati meha arütíkulu le tídanbei: “Sun ha gayarabei híchugun íbini lamidan lídangiñe hadaani lun hídehan lidan luadigimari Aburemei, busentiwa wariñagun houn [...]: lun hidin lidoun burí uburugu wéiriti o le ñǘraüti kei prekursorugu o apurichihatiña lidan dan dayarüti según le hayarabei adüga, lun háfaagun lun háluahaniña kristiánugu ha harumabaña anigi lidan sun fulasu, ha hínsiñebei Bungiu houn, gama lumoun ibidiñeti houn; áluaha humaña lun harufuduhan houn luagu lueirin lareini Wáguchi luma luagu katei buíduburiti le tídanbei Lererun”.

10. Ida liña hóunabun saragu gürigia lun agunbirahani le adügǘbei luagu mégeiwa hamá meha apurichihatiña lidan dan dayarüti?

¹⁰ Arufudati amisurahani le gunfuranda hamuti lan Aturiahatiña Bíbülia aban lan fánreinti súdiniti lídangiñe hawadigimari keisi kristiánugu inarünitiña hapurichihani uganu buiti. Lidoun burí dan ligía fiúrügüñanu san gürigia ñüdün lidan adamuridaguni, úati meha emenigi luagu hánharuba lan saragu lun amisurahani le. Gama lumoun, lárigiñe haliihan somu garüdia o tratadu gíbetiña íchugutiña fe anihein lan inarüni tidan ani lau sun hagundan aba hánharun lun amisurahani. Aban hénpulu, lárigiñe lakutihanu aban aliihati alunduna garüdia to subudiwaboun uguñe weyu kei Garüdia Atalaya tumaya amu garüdia hadügün Aturiahatiña Bíbülia, abürühati lidan irumu 1882: “Lau fulesei ru humá adundehani nun luagu ida luba lan ani kaba lan napurichiha lun nagunfulirun lau wadagimanu le labusenrubei Bungiu wadügün”.

11, 12. a) Ka uagu gayara lubéi wariñagun ligiaméme lan meha hasuunibei prekursorugu kei wagía uguñe weyu? b) Ida liña meha hagumeserun prekursorugu “külase” o damuriguaü?

¹¹ Lidan irumu 1885 ñeinñanu meha ǘrüwa-san Aturiahatiña Bíbülia ha eseriwidubaña kei afanreinhatiña o prekursorugu. Hadügüniña  gürigia lánime Hesukrístu disipulu ligía meha hasuunibei apurichihatiña ha, ítara kei wagía uguñe. Gama lumoun, amu meha ligaburi hadügüni wawéi. Uguñe weyu rútiwa aturiahani lun ábanrügü gürigia, lárigiñe aba wamisurahani aturiahati lidoun aban damuriguaü le adügǘwaalibei. Lidan meha dan ligía, ábaha hafanreinhan prekursorugu líburu ábatiha hóundaraguagüdüniña ha busenbaña hafurendeirun úara lun híchugun aturiahani houn. Lubaragiñe hamuga híchugun aturiahani lun ábanrügü gürigia, gumesetiña burí damuriguaü, le meha unbei hagúara “külase”.

¹² Aban hénpulu, lidan irumu 1907, adügatiña aban sétanu apurichihatiña aban aransehani lun houdin lidoun fiú uburugu lun háluahaniña gürigia ha gama hamaaru fiú tídangiñe líburu to gíriboun La Aurora del Milenio (subudiwatu giñe kei Estudios de las Escrituras). Ariñagatu Garüdia Atalaya: “Aba hóundarawagun ha busenbaña hafurendeirun lidan aban liraüraü adamuridaguni tidan luban aban hádangiñe. Aban weyu dimaasu aba lakutihanu aban prekursoru ka lan lisuunibei Bungiu houn gürigia úara hama, ani le aban dimaasu aba lariñagun houn lun hasigirun adüga adamuridaguni sagü dan”. Lidan irumu 1911 aba lasansirúniwa ligaburi ladügǘniwa. Rútiña dimí-san-widü eseriwidutiña kei óunigirutiña sirkuitu yanu houn sun gürigia Meriga luma Kanadá, aba habürühani hiri luma fulasu le ñein lubéi heredera gürigia ha achülürübaña aganbei yanu. Ábatiha hadügün aransehani lun hóundarun gürigia ha tidan burí muna lun hagumeserun iseri damuriguaü. Lidan irumu 1914, lidan sun ubóu ñeinñein meha milu-bián-san damuriguaü hani Aturiahatiña Bíbülia.

13. Kátima hínsiñebei hun luagu laburuchagun ‘subudi inarüniti’ lidan wadaani?

¹³ Uguñe weyu anihein kéiburi 109,400 damuriguaü lidan sun ubóu, ani lidan damuriguaü burí le, añahein kéiburi 895,800 prekursorugu. Ánharaaña kéiburi widü-míñunu gürigia lun ‘subudi inarüniti’ ani falá hamuti lidan habagari (aliihoualá Isaíasi 60:22). * Wéirigüda lumutu númeru le wanigi dántima waritaguni ariñaga lan meha Hesusu lidan aban profesía houn lánigu disipulu luagu ‘hiyereegudúba lan houn sun gürigia’ luéigiñe, ani héibaahouba lan buga, daüwagua hagía darí lun hafarawaguba lan (Luk. 21:12-17). Íbini kóntüra lan Satanási, lumafianu hama áganiñu ha ubouagubaña, gúnfulitiña lubúeingu Heowá lau hawadigimari lánina hadügün disipulugu ani buiti lidin houn. Uguñe weyu apurichiha hamuti uganu buiti “lidan sun ubóu”, lidan burí áraabu, lidan fulasu le ñein lubéi léiguada niewe, luma lidan fulasu le dísetimabei (Mat. 24:14). Láurügüñein lídehan Bungiu gayara lan hagunfulirun lau wadagimanu le.

GÁNWOUNGUATI ‘SUBUDI INARÜNITI’

14. Ida liña laganwoundun ‘subudi inarüniti’ lau tayusurúniwa wani agumeiraguagüdüni?

¹⁴ Gánwounguati ‘subudi inarüniti’ seremei lun gibe hamá apurichihatiña uganu buiti, seremei  giñe tun agumeiraguagüdüni. Lidan sedü-hati irumu 1879, adüga hamutu Aturiahatiña Bíbülia Garüdia Atalaya to meha gíriboun Zion’s Watch Tower and Herald of Christ’s Presence (Luayelesin Óunigiruti Sión luma Asubudiragüdüti Larúeihan Kristu keisi Urúei Marihúaditi) dan le tagumeserúnbei adügǘwa. Lídanrügüñein inglesi imprimírua tan ladüga mégeiwa lan meha taseinirúniwa, imprimíruatu 6,000 tídangiñe. Anuadirúati Charles Taze Russell lun ligía lan ariha lau wadagimanu le, wein-sedü meha irumu lau lidan dan ligía, ani súnwanda giñe meha hídehan seingü Aturiahatiña Bíbülia ha derebugubaña lidan hafiñen. Uguñe weyu imprimíruatu 42,182,000 tídangiñe Garüdia Atalaya lidan 195 iñeñein. Tuguya garüdia to wéiritimabei tafanreinhoun ubouagu. Tárigiñe Garüdia Atalaya aba tiabin garüdia ¡Despertad!, imprimíruatu 41,042,000 tídangiñe garüdia to lidan 84 iñeñein. Sagü irumu imprimíruatu giñe 100 míñunu líburu tuma burí bíbülia.

15. Ida liña lamainirúniwa wadagimanu lánina imprimírua tan wani agumeiraguagüdüni?

¹⁵ Amainirúati óunwenbu wadagimanu le lau budagia (aliihoualá Matéu 10:8). Adügati katei le lun taweiridun hanigi taburiña bísinisi ha subudihabubaña luagu lebegi máhina lun imprimírua lan, gárada, tinta luma burí amu katei le mégeiwabei lun ladügǘniwa wadagimanu le. Ariñagati aban íbiri le nadagimeibei agañeihein ubuñaü le emegeirúbei tidan burí Beteli lun imprimírua lan: “Wéiritu hanigi wügüriña ha tabureme burí bísinisi ha abisidahabarun Beteli to ñein lubéi imprimírua tan agumeiraguagüdüni, ladüga lau lan budagia lamainirúa máhina burí awanseti le imprimírübei saragu milu agumeiraguagüdüni. Wéiritu giñe hanigi lau harihin gibe hamá nibureintiña gúndaatiña ha nadagimeinbaña Betelirugu”.

LABUINCHUBA LISUBUDIN BUNGIU UBOUAGU

16. Ka lisuunibei laganwoundun ‘subudi inarüniti’?

¹⁶ Gánwounguaali ‘subudi inarüniti’ lau aban lubuidun isuuni. Busenti Bungiu “hasalbarun sun gürigia, lun giñe hayabin lun hasubudiruni inarüni” (1 Tim. 2:3, 4). Busenti lun hasubudiruni gürigia inarüni lun háhuduragun lun kei aubei labusenra lun heresibirun abiniruni lúmagiñe. Lidan lasubudiragüdüni ‘subudi inarüniti’, óundaraguagüdati Heowá aban sétanu hani kristiánugu úaraguatiña ha anuadirúaañabaña. Ani lóundaraguagüdüña “saragu gürigia lídangiñetiña sun fulasu, sun rasa, sun iñeñein luma néchani” ha hemenigibaña hawinwandun lun súnwandan ubouagu (Aruf. 7:9).

17. Ka larufudubei laganwoundun áhuduraguni inarüniti?

¹⁷ Laganwoundun áhuduraguni inarüniti lidan san-darandi irumu le sügühalibei arufuda lumuti furangu luagu íderagua laaña lan Bungiu luma Hesukrístu, Urúei le líridubei, kristiánugu ani hámañanu súnwandan lun hadundehaniña, hóunigiruniña, ru hamaña lidan aban óundaruni ani arufudaha hagía houn. Arufudati giñe ligaburi aganwounduni le, luagu chóuruti lan lagunfulirubei lan Heowá le füramase lubéi. “Ítara kei labuinchagüdüni duna barana, ítara luba labuinchun sun fulasu lau lasubudirúniwa luéirigun Wabureme.” (Isa. 11:9.) Mame lubuidun abiniruni le lunbei heresibiruni gürigia!

[Abürüdǘni burí]

[Álügüdahani lánina aturiahani]

[Iyawaü to lídanboun páhina 14]

Ǘnabugutiña meha Aturiahatiña Bíbülia ani busentiña meha tídangiñe sun hanigi hadügüni lugundan Bungiu

[Iyawaü to lídanboun páhina 15]

Lun Heowá gebegiti áfaaguni le wadügübei lun laburuchagun ‘subudi inarüniti’