Góunigi humá tuéi lisadaran Mafia!
Góunigi humá tuéi lisadaran Mafia!
‘Sefu humá tídangiñe lisadaran Mafia.’ (2 TIM. 2:26)
KABA HAMUGA HÓUNABA?
Ka akutihani lunbei wadügüni wóuniwagua anhein ganigi wabéi werederun adimureha wuriba hawagu amu?
Ida liña líderaguniwa abahüdaguni luagu Pilatu luma Féduru lun mígiraguagüdün wamá woungua lun anufudei luma lun hínchahaniwa amu?
Kaba wadüga luéi ladügün wachara lun wasandiragun woungua méreediwa lan?
1, 2. Kaba tídangiñe sádara to layusuruboun Satanási wakutiha lidan arütíkulu le?
SÉTIÑU liña Mafia lun lagayuahan hawagu lumutuniña Heowá. Gama lumoun, mabusenrunti láfaruniña hilagubei, ítara kei hamuga labusenrun aban agaliruhati láfaruni líliru. Lubaragiñe lira, busenti lárügüdüniwa wínwanñu lun ladügüni le labusenrubei wau (aliihoualá 2 Timotéu 2:24-26).
2 Dan le busén lan aban agaliruhati lárügüdün aban animaalu wínwanñu, gayarati layusurun ámuñegueinarügü tuwuyeri sádara. Aban hénpulu, gayarati ladügün lun láfuridun animaalu ligía lidoun aban fulasu wayati lun ladahiruni o gayarati layusurun aban sádara aramudaguatu lun gayarabei lan lábürühan animaalu tidoun sódini danme le laguurun tuagu. Yúsuti giñe Mafia sádara ítaratu, lun gayarabei lan lárügüdüniwa wínwanñu. Lun márügüdün lániwa lunti wéfegechuni wagu buidu ani teni wagíame lun katei le awisarubaliwa dan le yarafa wamá tun aban tídangiñe sádara to. Lidan arütíkulu le, warihuba ka lan lunbei wadügüni luéi wéiguadun tidoun ǘrüwa tídangiñe sádara to yusu láaruboun Satanási ani ibihati resultóu buiti: 1) dimurei le ariñawagúbei sin lasaminarúniwa, 2) anufudei luma hínchahaniwa amu adüga katei wuribati, luma 3) igarigu le wasandirubei luagu katei wuribati le meha wadügübei. Lidan arütíkulu le asigirubei wakutihaba biama tídangiñe sádara to.
RAGǗ WAMÓUN WAÑEÑE TO ÍTARABOUN KEI WATU GEMETI
3, 4. Ka gayarabei lasuseredun anhoun móunigirun wamá wañeñe? Ru humá aban hénpulu.
3 Dan le laramudagun aban animaalu lidan aban fulasu chóuruti durunguagüda hamuti somu géibaahatiña híduru le yarafabei lun fulasu ligía, lun láfuridun animaalu lun hárügüdüni. Gayarati wariñagun adüga lan Mafia aban katei libe le. Hóuchati “laduranguagüdün watu” lidan damuriguaü kristiánu lun wígiruni ichouruni le lídanbei aramudaguagülei lúmagiñeti
Bungiu lun woudin sügülügü lúhaburugun. Ida luba hamuga webelurun lidoun watu ligía sin wíchugun fe?4 Ariñagati disipulu Santiagu luagu “ítara tiña [lan] wañeñe kei aban watu gemeti” (aliihoualá Santiagu 3:6-8). Anhein móunigirun wamá le wariñagubei, gayarati waduranguagüdün aban “watu” lidan damuriguaü. Ida? Samina wamá luagu sügǘ le. Lidan aban adamuriguni aba lichugún awisahani luagu prekursoraharu lan aban íbiri hádangiñe ha adügübaña ǘrüwa-wein-diisi oura sagü hati. Dan le lagumuchun adamuridaguni aba hadimurehan bián íbirigu würiña luagu katei le. To furumiñetu, aba tagundaarun luagu ñunsu le ani aba tariñagun busén tan lun buidu lan lidin tun iseri prekursora to. To tibiaman, aba tadimurehan ka funa lan lébunabei tagumeserun íbiri to eseriwida kei prekursora, darí lun tariñagun háfuga lan táluahaña lan íbiri to lun hetenirun ha híbiri íbirigu tun. Ka hamuga hádangiñe bián würiña ha habusenra lun humada tan? Ka hádangiñe gayarabei taduranguagüdün aban “watu” lidan damuriguaü tau tiñeñe? Menefánti ka lan óunabagülebei.
5. Ka akutihani lunbei wadügüni wóuniwagua luéi wadügün lun ladurangun aban watu tau wañeñe?
5 Ka lunbei wadügüni lun madügün lan le wariñagubei lun ladurangun aban watu? Ariñagati Hesusu: “Katei le buinbei tidan anigi, ligía lariñagubei iyumaü” (Mat. 12:34). Ligíati, le furumiñeti katei le lunbei wadügüni, wakutihani le tídanbei wanigi. Áfaaguatiwa san wagidaruni tídangiñe wanigi furumiñeguarügü wuribani le wagüürübei habá amu le adügübei lun wadimurehan wuriba hawagu? Aban hénpulu, ánhawa íchiga fe láfaaguña lan aban íbiri lun leseriwiduntima lidan damuriguaü, éibaaguatiwa san asaminara buidu lan lébuna ladügüni, o saminatiwa láluahaña lan uéiriguni lúniwagua? Anhein hechu wabéi asaminara wuriba hawagu amu, buídubei waritaguni luagu adimureha lan giñe Satanási wuriba luagu lébuna leseriwidun Hobu lau úaraguni lun Bungiu (Hobu 1:9-11). Lubaragiñe werederun asaminara wuriba hawagu amu, lunti waríaagun woungua lun wasubudiruni ka lan uagu wayanuha wuriba luagu wíbiri. Rúhali san lébuna wasaminarun wuriba luagu? Odi alugura hamaadiwa san gürigia lau lilouguan ínsiñeni le kamanibei lidan lagumuhóun dan le? (2 Tim. 3:1-4.)
6, 7. a) Ka katei gayarabei lanügüniwa ayanuha wuriba hawagu amu? b) Ida luba wóunabun anhein adimureha somu gürigia wuriba wawagu?
6 Ka amu katei gayarabei lanügüniwa adimureha wuriba hawagu amu? Másiñati wáluahaña lan lun letenirúniwa lun le wayaraabei adüga o busén wamá lun íñugu wamá hawéi ha híbiri, íbini mosu lan wǘnabudagüdüniña lun wibihini le wabusenrubei. O másiñati wáluahaña lan wácharuni máfaagun wamá lun wawanserun lidan damuriguaü. Anhein luagu lubéi anaaguni unguaü, gimugaü o ladüga mafiñen wamá wawougua wadügei katei, wuribabei lidin woun.
7 Anihein dan gayarati wasaminarun luagu gébuna lan wadimurehan wuriba luagu somu gürigia, kéiburi dan le ladügün aban íbiri lun wasandiragun 2 Tim. 2:26). Buídutimati wáyeihani ligaburi Hesusu: “Dan le hanabuni, móunabunti lau anabahani [...], lubaragiñe lira, deregeguarügüti lungua lun Bungiu le aguseragüdübei lau ísuruni” (1 Fe. 2:21-23). Chouru lumuti meha Hesusu ladügübei lan Heowá le mégeiwabei danme le larihini lunti lan ladügüni. Lunti giñe wafiñeruni ligiaméme. Dan le wayusurunu wañeñe lun wareidaguagüdün amu, ídehatiwa lun wakipuruni “darangilaü le óundarubaliwa súngubei” lidan aban lidan damuriguaü (aliihoualá Éfesuna 4:1-3).
woungua wuriba ladüga lariñagun somu katei masaminarunga. Gama lumoun, haritagua waméi manügünbei lan wafayeirun wuribati luagu wuribati ni kata buiti; ibiharügübadiwa waduranguagüdünitima watu. Mama hamuga giñe wadügüñein lugundan Bungiu, lubaragiñe lira wadügüñein hamuga lugundan Satanási (MÍGIRAGUAGÜDA WAMÁ WOUNGUA LUN ANUFUDEI NI LUN HÍNCHAHAN AMU
8, 9. Ka uagu lasiadirei Pilatu Hesusu lun lounwen?
8 Aban animaalu le éiguaduti tidoun aban sádara siñati lamufurun buidu. Ítarameme, gürigia le ígiraguagüdübei lungua lun anufudei luma lun hínchahani amu adüga katei wuribati fériditi lídangiñe lubafu luagu libagari (aliihoualá Ariñawagúni 29:25). Akutiha waméi le asuseredubei houn bián wügüriña ha ígiraguagüdübaña houngua lun anufudei luma lun hínchahaniña amu adüga katei wuribati, ani ariha waméi kaba lan wafurendeira lídangiñe.
9 Subuditi meha lun Pilatu le gumadimati rómana, luagu madurun lan Hesusu, ani genegeti yebe luagu mabusenrun lan ladügün dañu lun. Ligía lariñagunbei luagu Hesusu: “Ariha humaali luagu madügün lan ni kata le lunti láfarun hilagubei luéigiñe”. Íbini ítara siadi lumuti lun lounwen. Ka uagu ladügei? Ladüga lígiraguagüdün lungua lun hanufudedaguagüdüni gürigia (Luk. 23:15, 21-25). Aba hagúaragun gürigia: “Anhein bígiragüda, mama buguya lumada urúei Rómana” (Huan 19:12). Háfuga hanufudeti meha Pilatu leferidiruni lubara keisi gumadimati o libagari anhein ñüdün lúmagiñe Kristu. Aba lígiraguagüdün lungua lun hínchahani gürigia ani aba ladügüni lugundan Mafia.
10. Ka uagu lariñaga Féduru ibidiñegubeiti lan Kristu lun?
10 Aban meha hádangiñe besi lumadagu Hesusu apostolu Féduru. Masaminarunti bián wéiyaasu lubá lariñagun hagibugiñe amu gürigia ligía lan Mesíasibei (Mat. 16:16). Rédeiti lóubawagu Hesusu dan le hígiruni ha híbiri disipulugu ladüga wuriba lan gunfuranda hamani aban katei le lariñagubei (Huan 6:66-69). Dan le houdin áganiñu árügüdei lun hadaürüni lumaisturun, yúsuti aban eféin lun lageindagun luéigiñe (Huan 18:10, 11). Gama lumoun, lau lásügürün dan aba lanufudedagun ani ariñagati ibidiñegubeiti lan Hesusu lun. Luagu murusun dan, ráramaguagüda lumuti anufudei hawéi gürigia luéi lóuserun lau ganigi (Mat. 26:74, 75).
11. Ka luwuyeri óuchawaguni úmabei gayara lan wagagibudagun?
11 Wagía kristiánugu súfuritiwa ladüga héredun amu gürigia wawagu lun wadügün katei burí le mínsiñeti lun Bungiu. Lidan wadagimanu, gayarati lafosuruniwa wábuti o somu wani paaná lun wíweruhan o lun weyeehan. Másiñati lariñagun aban paaná leskuelarugu o kolehiurugu lun wechepiahan, warihin iyawaü lánina agamariduni, wagumulahan, wayusurun düroga, wátagun o wadügün magíaguni. Kaba wadüga lun mígiraguagüdün wamá woungua lun anufudei luma lun hínchahaniwa amu lun burí wadügün katei ítarati?
12. Ka gayarabei wafurendeiruni lídangiñe le asuseredubei lun Pilatu luma lun Féduru?
12 Ka gayarabei wafurendeiruni lídangiñe le asuseredubei lun Pilatu luma lun Féduru? Lóuguati meha katei lasubudirun Pilatu luagu Kristu, ábanrügüñein meha katei lasubudirun luagu, mítaran lan Kristu kei ha híbiri wügüriña ani luagu madurun lan. Gama lumoun, úati meha ǘnabugu lan ani mínsiñeti meha Bungiu le inarüniti lun, ligía ménrengun lubéi léiguadun lúhaburugun Mafia. Luéigiñe amu oubaü, subuditi meha Bungiu lun Féduru ani hínsiñeti giñe meha Mar. 14:29). Aranseñu luba hamuga yebe apostolu Féduru lubá lóuchawagun lafiñen, anhein hamuga afiñeti luagu Bungiu ítara kei meha lafiñerun abürühati Sálumu le eremuhabei: “Anihein Nabureme numa, manufudetina. Kaba gayara lan gürigia adüga nau?” (Sal. 118:6). Lidan lagumuhóun guñoun le laubei Hesusu kei wügüri, beluti Hesusu luma Féduru hama amu apostolugu lidoun fuluri-agei Hetüsemaní. Gama lumoun, lubaragiñe herederun agagudúañu aba harumugun ǘrüwagubei. Aba lagagudahaniña Hesusu aba lariñagun houn: “Agagudúañu humá, afurieida huguyame luéi héiguadun lidoun óuchawaguni” (Mar. 14:38). Lau sun lira, ábaya larumugun Féduru, murusun dan lárigiñe aba lígiraguagüdün lungua lun anufudei luma lun héredun amu luagu lun ladügün aban katei wuribati.
lun. Gama lumoun, anihein meha dan marufudunti ǘnabuguni ni anigi, ligía mawandun lubalin lénrengunga. Aban hénpulu, lubaragiñe ladaürǘniwa Hesusu, ariñagati Féduru lau afiñeni luougua: “Gayaraati hígirunibu sun ha, anhein au, mígirun nubadibu” (13. Ka wemegeirubei lun mígiraguagüdün wamá woungua lun hínchahaniwa amu adüga katei wuribati?
13 Lídangiñe abahüdaguni luáguti Pilatu luma Féduru gayarati wafurendeirun aban katei súdiniti: lun wawandun danme héredun gürigia wawagu lun wadügün somu katei wuribati mégeitiwa subudi inarüniti, ǘnabuguni, wasubudiruni le wayaraabei luma le wásiñarubei adüga, hínsiñe lan Heowá woun ani inebe ligíame woun, manufude wagíame hawéi gürigia. Anhein subudi lubéi inarüniti lébunabei wafiñen, wadimurehaba luéigiñe lau ganigi luma ichouruni. Ítara luba mígiraguagüdün wamá woungua lun anufudei luma lun hínchahaniwa amu. Moun lumuti weiri lan wafiñerun wawougua, lubaragiñe lira, lunti ǘnabugu wamá mabulieida wameime luagu megei wamani lubafu Bungiu. Mosu wamuriahan sífiri sandu luma Heowá ani mosu línsiñedun woun saragu, ínsiñeni le lunbei línchahaniwa lun gaganbadi wamá lun lilurudun ani adimureha wagíame luéigiñe liri. Súdiniti giñe lun waranserun lun mígiraguagüdün wamá woungua danme le héredun amu wawagu lun wadügün katei wuribati. Ligíati, buidu lubéi lun hafurieidun agübürigu hama hasaanigu asayaha hagíame hama ida luba lan hadügün danme le hínchahaniña hapanaagu lun hadügün somu katei wuribati (2 Ko. 13:7). *
MÍGIRA WAMÁ LUN LAGIDARUNI WADURUN WERE
14. Ka hamuga katei labusenrubei Satanási lun wafiñerun luagu charati le meha wadügübei luagu aban dan?
14 Anihein dan, dibigüdatiña agaliruhatiña aban dübü o aban wewe luéigiñe üma le ñéingiñe lubéi hásügüra háliru. Dan le labuguchun animaalu luagu gúrudu, aba léiguadun dübü o wewe luagun aba laburechaguni. Ítarameme, adügati igarigu le lasandirubei aban gürigia luagu charati le meha ladügübei lun lasandiragun lungua ‘méreeli lan’ (aliihoualá Sálumu 38:3-5, 8). Hínsiñeti hamuga lun Satanási wafiñerun maweiyasunbei lan Heowá ferudunawa ani siñaguabadiwa lan woungua wagunfuliruni lilurudun.
15, 16. Ka lunbei wadügüni lun méiguadun wamá tidoun sádara to lánina wasandirun gadurunmémegidiwa lan?
15 Kaba wadüga luéi tadügün lisadaran Satanási lun wasandiragun woungua méreediwa lan? Anhein adügaadün lubéi aban figóu wéiriti, adüga huméi sun le mégeiwabei lau lóufudagun lun harandarun luma Heowá. Amuriaha humá ídemuei hama wéiyaaña lidan afiñeni (Sant. 5:14-16). Adüga huméi sun hiyaraati lun haransehani gádantün (2 Ko. 7:11). Ánhadün eresibira somu luwuyeri ébechuni, meferidira huméi huguraasun, lugundun larufuduñein Heowá lau lira hínsiñe humá lun (Ebü. 12:6). Desidírü humá madügündigia humaali lan katei burí le adügübei lun hafigouhan ani ligía lan hadüga. Danme le asakürihaadün giribu huguyame lidoun lubuidun üma, afiñe humá luagu larumadahabei lan lani Hesukrístu sákürifisiu hifigoun (1 Huan 4:9, 14).
16 Añahein gürigia sandimémetiña gadurun hamá íbini ferudunawaali lan hachara. Anhein asusereda katei le hun, haritagua huméi feruduna 1 Ko. 5:1-5; 2 Ko. 2:6-8). Tidan Lererun Bungiu ayanuhóuati hawagu ámuñegueinarügü gürigia ha feruduna lubaña Heowá ladüga hasakürihan íbini meha wéinamu lan hafigoun (2 Kro. 33:2, 10-13; 1 Ko. 6:9-11).
lumuti lan meha Heowá Féduru hama ha híbiri apostolugu lárigiñe hígiruni Liráü le hínsiñebei lun dántima le lemegeiruniña. Feruduna lumuti giñe Heowá wügüri korintuna le meha asakürihabei lárigiñe labugún lídangiñe damuriguaü ladüga lanarime magíaguni le meha ladügübei (17. Ka gayarabei ladügüni lebegi asalbaruni wawagu?
17 Anhein asakürihaadiwa lubéi tídangiñe sun wanigi ani ánhatiwa lun lugudemehabu Heowá feruduna lubadiwa ani bulíeileime wafigoun. Maweiyasun wamá asaminara luagu úati lan buídurügü lan sákürifisiu le ladügübei Hesusu lun ferudunawa lan wafigoun. Ánhawa asaminara ítara, héiguadiwa tidoun lisadaran Satanási. Ka lan yebe lásurun Mafia ariñaga luagu marumadahanlani lebegi asalbaruni figóu, inarüni luagu chibalani lebegi asalbaruni hafigoun sun ha asakürihabaña (Ari. 24:16). Lesefurubadiwa afiñeni luagu lebegi asalbaruni luéi lihürü igarigu le lanügübei duru ani líchuguba erei woun lun weseriwidun lun Bungiu tídangiñe sun wanigi, wawani luma wasaminan (Mat. 22:37).
‘SUBUDI WAMUTI LURIBAN LARITAGUN’
18. Ka lunbei wadügüni lun méiguadun wamá tidoun lisadaran Mafia?
18 Meberesegunti Satanási ka lan tuwuyeri sádara layusuruboun; le súdinibei lun wéiguadun tidoun aban tídangiñe. Gama lumoun, moun lumuti lárügüdüniwa magaradahanga, ladüga “subudi wamani luriban laritagun” (2 Ko. 2:10, 11). Ánhawa amuriaha lichú aau luma Heowá lun wagagibudagun luma burí turóbuli, méiguadunbadiwa tidoun lisadaran Mafia. Ariñagati Santiagu: “Anhein megei lubéi aban hídangiñe lichú aau, amuriahalá luma Bungiu, ábame líchuguni lun, ladüga mánginti ani ruti lau areini houn súngubei” (Sant. 1:5). Lun lóunabuni Heowá wafurieidun, mosu úaragua lan wóuserun luma le wamuriahabei lau waturiahanu Lererun ani adüga wameime le wafurendeirubei. Arufuda tumutu agumeiraguagüdüni lani musu úaraguati ani gunfuranda ligía furangu katoun lan lisadaranboun Mafia ani ka lan lunbei wadügüni luéi wéiguadun tidoun.
19, 20. Ka uagu lunti lubéi iyereegu lan le wuribabei woun?
19 Dan le wafurieidun ani aturiaha wamóun Bíbülia, furendeitiwa asandira ínsiñeni luagu le buídubei ani mosu giñe iyereegu lan le wuribabei woun (Sal. 97:10). Wasaminarun luagu resultóu le lunbei lanügüni wafalaruni luriban ayumahani, íderagua lumutiwa saragu (Sant. 1:14, 15). Ítara mawamaaboun lisadaran Satanási woun, lubaragiñe lira iyereeguboun woun.
20 Ma lueirin weteingiradi luagu líderaguniwa Heowá adiseda tuéi lisadaran Satanási! Yusu lumuti Bungiu lani sífiri, Lererun luma lóundarun lun lalibüreruniwa luéi “Mafia” (Mat. 6:13, NM). Lidan le aban arütíkulu wafurendeiruba tuagu biámaya sádara to layusuruboun Mafia to rúharuboun resultóu lun lun lárügüdüniña lubúeingu Heowá wínwanñu.
[Abürüdǘni]
^ par. 13 Buiti lun hakutihani agübürigu hama hasaanigu lidan Guñoun lánina Áhuduraguni lidan Familia rekuaduru “Estrategia contra la presión de grupo”, lidan páhina 132 luma 133 tidan líburu Lo que los jóvenes preguntan. Respuestas prácticas (volumen 2).
[Álügüdahani lánina aturiahani]
[Iyawaü to lídanboun páhina 24]
Anhein móunigirun wamá le wariñagubei, gayarati waduranguagüdün aban “watu” lidan damuriguaü
[Iyawaü to lídanboun páhina 27]
Masigira humá asaminara gadurunmémegidün lan