Gayarati layarafadúniwa lun ‘Le aganbubalin afurieiduni’
Gayarati layarafadúniwa lun ‘Le aganbubalin afurieiduni’
SARAGU gürigia ha ariñagubaña afiñe hamá luagu Bungiu siñaguatiña houngua hafuranguagüdüni ka lan uagu hafiñera luagu. Ibidiñeti giñe houn ida luba lan hafuranguagüdüni ka lan uagu lóusera relihión wuriba o ka lan uagu lígira Bungiu lun ñein lan asufuriruni. Hafurieidun lun aban Bungiu le ibidiñeti houn ligíarügüñein katei hadüga.
Gama lumoun, gayarati layarafadúniwa lun ‘Le aganbubalin afurieiduni’. Lasubudirúniwa luagu Bungiu ligía lébunabei afiñeni, ani adügati le lun línsiñedun woun. Le linarün katei, aban afiñeni inarüniti lunti gébuna lan (Ebüréu 11:1). Ánhadün afurendeirei inarüni luagu Bungiu, gayarabei hasubudiruni ayanuha hugíame luma kei hayanuhan luma aban umadaü. Lidan arütíkulu le, larufudúba fiú hénpulu hawagu gürigia ha meha afurieidubaña lun Bungiu íbini machourun hamani luagu anihein lan.
▪ Patrisia (to iridúboun lidan furumiñeti arütíkulu). “Aban weyu hámañadina meha diisi umadagu dan le hagumeserunbei ayanuha luagu relihión. Abahüdaguaadina meha houn luagu chülǘ tan meha aban gefentu luagu Heowá aban weyu múnada, gama lumoun aba lan nidin ladüga mabusenrun nan naganbuni le lunbei hayanuhani, lugundun mafiñenti meha núguchi luagu Bungiu. Aba lariñagun aban hádangiñe numadagu: ‘Háfuga inarüni le hariñagubei gefentiña luagu Heowá’.
”‘Ka uagu midin wabéi lidan aban lídangiñe hadamuridagun lun wasubudiruni?’, tiña aban hádangiñe nupanaagu. Ani ligía wadügübei. Íbini lougua lan meha wafiñen, fiú wádangiñe sigí mémetiwa ñüdün lidoun adamuridaguni ladüga gamadoun hamá gefentiña luagu Heowá.
”Gama lumoun, aban dimaasu aganbatina aban katei lidan adamuridaguni le adügübei lun nasansiruni nigaburi. Lidan aban yanu afuranguagüdawati ka lan uagu hasufurira gürigia. Furendeitina danbei lan le ladügǘniwa furumiñeti eyeri mafigounti meha, gama lumoun, ladüga lumaganbadin sügügüda lumuti figóu luma óunweni hawagun ladügawagun. Afuranguagüdawati giñe mosu lan meha lounwen Hesusu lunya heresibiruni gürigia le leferidirubei furumiñeti eyeri (Rómana 5:12, 18, 19). * Sódini aba gunfuranda nani ida liña lan katei. Aba níchugun fe anihein lan aban Bungiu le ebereserubei wau. Ábati nasigirun aturiahoun Bíbülia, furumiñeti wéiyaasu lidan nibagari gunfurandanani luagu gayarati lan nafurieidun lun aban Bungiu inarüniti.”
▪ Allan (le iridúbei lidan furumiñeti arütíkulu). “Aba hadaünrün gefentiña luagu Heowá luagu nubenari, ábati tagunbirahaniñu nani weiriou lun hebelurun lasalirugun lugundun hínsiñeti meha le hariñagubei tun luagu lawinwandúniwa lun sun dan ubouagu. Aba nagañidun saragu, ábati nanügünu nani weiriou gusinarugun, aba nariñagun tun: ‘Mígirabatia lun hayeedunibu. Marasualugu sun lira!’.
”Aba tóunabunina: ‘Anhein ítara liña lubéi gíribuba lasalirugun beiba arufudei houn luagu bulieiguatiña lan’.
”Gama lumoun, siñati narufudun ni kata houn. Buiti hóuserunina gefentiña luagu Heowá ani aba hígirun aban líburu nun to ayanuhaboun luagu ida liña lan lagumeserun ibagari anhein saliguarügü lubéi o anhein adügüwarügü lubéi. Furanguti meha katei le naliihabei ani ruti lubuidun hénpulu le arufudubalin lubudubu katei, aba desidírü nan nasigirun afurendeira luagu Bungiu. Lau hídehan gefentiña luagu Heowá, aba nagumeserun aturiahoun Bíbülia aba níchugun fe amu lan le meha nasaminarubei luagu relihión luéi le tarufudahabei Bíbülia. Eibu nasubudiruni Heowá aba abuidureinatima lan furíei le nadügübei. Subuditi meha nun mosu lan nasansirun somu katei luagu nigaburi ábati namuriahan ídemuei luma. Óunaba lumuti Heowá nafurieidun.”
▪ Andrew (Alundu). “Íbini meha derebugu lan nafiñen wéiriti meha línsiñe katei lánina siensiasi nun, afiñetina meha luagu ewolusión lugundun arufudúati meha kei aban katei le inarüniti. Luagu burí saragu katei wuribati le asuseredubei ubouagu machourun numuti meha anhein anirein lubéi aban Bungiu.
”Lau sun lira, anihein meha nasaminarun: ‘Anhein anihein lubéi somu gürigia sielu, hínsiñeti
hamuga nun nálügüdüni ka lan lisuunibei ibagari luma ka lan uagu anihein lubéi saragu wuribani luma wuribu’. Dan meha le gaturobulin nan, anihein meha dan furíeitina amuriaha ídemuei, gama lumoun, ibidiñeti meha nun ka lan uma nayanuha.”Lidoun burí dan ligía, aba tichugún aban tratadu tun nani weiriou, tratadu to gíriboun ¿Podrá sobrevivir este mundo?, hadügün gefentiña luagu Heowá. Ligía álügüdahani le meha nadügübei núniwagua sagü dan. Adügatu tratadu tuguya lun nálügüdagun nungua anhein buidu lubéi lakutihóuniwa óunabagülei le tíchugubei Bíbülia. Dan lárigiñe, aba nidin bakechanu aba tichugún aban líburu nun to gíriboun La Biblia... ¿la Palabra de Dios, o palabra del hombre? Danbei le narihinbalin úaratu lan Bíbülia luma siensiasi, ábatima nabusenrun nafurendeirun. Ligía nánharunbei lun líchugun aban gefenti luagu Heowá külase tídangiñeti Bíbülia nun. Adügati nasubudiruni lisuuni Heowá lun narihini kei aban gürigia inarüniti le unbei gayara lan nafurieidun lau sun nafiñen.”
▪ Yanet (wínwantu meha Alundu kei aban hádangiñe gürigia ha ariñagubaña afiñe hamá luagu Kristu). “Luriban ligaburi lóuserun relihión luma asufuriruni le narihubei ubouagu adügati lun nígiruni relihión. Aba giñe desidírü nan nígiruni naturiahan tidan luban furendei íñuti. Lun lubeiti nagañeirun seinsu aba nagumeserun eremuha luma áfara gidara. Ábati nasubudiruni Patrick. Le meha agüriahóubei kei katoliku, gama lumoun ígira laali meha lafiñen kéigubeirügü nuguya.
”Wínwantiwa meha tidan aban muna maburemetu hama amu nibureintiña ha ígurubalin giñe haturiahan ani hínsiñeti meha relihión kéiburi induismo, budismo, sintoísmo luma amu ítarati houn. Héchutiwa meha eredera asigeneha darí láriebudun luagu lisuuni ibagari. Íbini meha mafiñen wamá luma Patrick luagu Bungiu, gama lumoun, saminatiwa meha anihein lan somu “erei” le adügübalin sun katei.
”Lárigiñe aba wáguyun awinwanda luéigiñe nórute libiti Alundu, áluaha wadagimanu kei eremuhatiña, ñein nasirua lan wasaani. Aban áriebu aba lasandirun irahü, ábati nafurieidun lun aban Bungiu le nege uágubei mafiñe nan. Fiú dan lárigiñe, aba manaagun haadina lan nungua buidu luma Patrick, aba nanügüni irahü ábati nidin. Ábaya nafurieidun amuriaha ídemuei, luéidügü anihein lan aganbutina. Íbini ibidiñe lan meha nun, ligiaméme giñe ladügübei Patrick.
”Murusun dan lárigiñe lídanmeme weyu ligía aba hachülürün biama gefentiña luagu Heowá bisidei Patrick ani arufudatiña fiú eweridihani tídangiñeti Bíbülia le ahuudubei lidan ibagari lun. Aba lagúarun nun aba lálügüdünina anhein nánharuña lubéi hamuga waturiahanu Bíbülia úara hama gefentiña luagu Heowá. Fiú dan lárigiñe, aba wafurendeirun mosu lan wamarieidun anhein ayumaha wabéi wagundaaragüdüni Bungiu. Gama lumoun, hanufudetiwa meha wamarieidun ladüga anihein meha dan buiti wanaagun woungua anihein meha dan wuribati.
”Busentiwa meha wasubudirun saragu luagu burí lagunfulirun sun burí profesía le tídanbei Bíbülia, ka lan Larúeihanbei Bungiu luma ka lan uagu anirein lubéi saragu asufuriruni. Aba gunfurandeina wamani luagu samina lan Bungiu wawagu. Busentiwa meha wadügüni lugundan, ligíati aba lubéi wamarieidun. Íderagua láadiwa lichú aau lúmagiñeti Bungiu agüriahaña ǘrüwa wasaanigu. Chouru wamuti aganba lumuti lan Heowá wafurieidun.”
Akutiha huméi hungua
Dandu Patricia, Allan, Andrew tuma Yanet hámaya míñunu gürigia, mígiraguagüdüntiña houngua lun leyeeduniña relihión le mama inarüniti, lubaragiñe lira, akutiha hamuti houngua ka lan uagu lígira Bungiu lun ñein lan asufuriruni. Seremei hakutihani le tariñagubei Bíbülia, chouru hamaali luagu aganba lumuti lan Heowá furíei.
Hínsiñeti hamuga san hun hakutihani katei le arufudubalin anihein lan Bungiu? Lau sun hagundan híderagubadün gefentiña luagu Heowá asubudirei inarüni luagu ‘Le aganbubalin afurieiduni’ ani híderagubadün giñe ayarafada lun (Sálumu 65:2).
[Abürüduni]
^ par. 6 Hadariruba lanwoun ariñahani luagu lebegi lounwen Hesusu lidan kapítulu seingü tidan líburu Kátima san tarufudahabei Bíbülia?, hadügün gefentiña luagu Heowá.
[Ariñahani lidan létüra wéinamuti lidan páhina 10]
“Adügati nasubudiruni lisuuni Heowá lun narihini kei aban gürigia inarüniti le unbei gayara lan nafurieidun lau sun nafiñen”
[Iyawaü to lídanboun páhina 9]
Gébunati afiñeni inarüniti ani lun wabihini mosu busén wamá wasubudiruni inarüni luagu Bungiu