Ka san uagu lígira lun ñein lan asufuriruni?

AÑAHEIN saragu gürigia furíeitiña lun Bungiu, gama lumoun machourun hamuti luagu anihein lan. Ka uagu? Másiñati ladüga lan harihin saragu asufuriruni ubouagu. Álügüdaguadün san hungua ka lan uagu lígira Bungiu lun ñein lan asufuriruni?

Adüga lumutiwa funa san Bungiu lun gafigoun wamá luma lun wasufurirun? Lun hamuga ítara liña lan, hénrengubei yebe woun warufudun inebesei lun aban Bungiu le adügübaliwa ítara. Samina humá luagun hénpulu le: lun hamuga herederun aríagua aban karü to iserigiru ani sódini harihin luagu anirein lan somu dañu luagu touba karü tuguya, hasaminaruña hamuga san ítara liña lan tadügǘniwa? Uá. Hasaminaruña hamuga úati lan mégeiti tuagu dan le ladügünbarun gürigia le adügübarun ani amu lan gürigia o katei adügübalin dañu ligía tun.

Ítarameme liña lidan katei le geyegubei wau arihúati aban lubuidun aransehani luma lídanñein lan dan ladügüni Bungiu, gama lumoun, arihúati giñe saragu chagaguaü luma wuribani ubouagu. Anihán funa san meha katei le labusenrubei Bungiu? Arufudahatu Bíbülia sin lan figóu ladügaña Bungiu furumiñetiña gürigia, gama lumoun ladüga le hadügübei féridi hamuti ibagari sin figóu (2 Lúrudu 32:4, 5). Lau sun lira, anihein uganu buiti, füramaseti Bungiu laranseruni sun damichi le adügǘbei ani ru ligíame ibagari sin figóu houn gürigia ha gaganbadibaña. Kati uagu líbebei dan lagurabun?

Ka uagu lígira saragu dan?

Óunabagülei lun álügüdahani le, gániti luma asigenehani luáguti ka lan garichabei lun larúeihaniña gürigia. Le meha lisuunibei Heowá lun ligíaba lan agumadiraña gürigia, mama meha lun hagía lan agumadiragua houngua.

Ariñagatu Bíbülia: “Mama wügüri laburemebei lémeri, siñá lumuti giñe wügüri le éibugubei  lupasun ásururagüda” (Heremíasi 10:23, NM). Híruti anúadira lan Adán tuma Ewa híchuguni hanagan luagun larúeihan Bungiu, ani adügati ebedaaguni le lun gafigoun hamá (1 Huan 3:4). Ligía heferidirunbalin ibagari sin figóu ani barüti luriban resultóu dandu houn kei houn hadügawagun.

Lúmagiñe saragu milu irumu ígiraali Heowá lun harúeihan gürigia ubouagu, gama lumoun sun le susereelibei arufudati luagu mabafu hamá gürigia lun buidu lan harúeihan. Furanguti barühali lan sun hagumadihan gürigia asufuriruni. Úagili ni aban agidaruti wuribu, wuribani, marichaü o sandi.

Ida luba laranseruni Bungiu sun damichi le adügǘbei?

Füramasetu Bíbülia málübei lan Bungiu anüga aban iseri ubóu le ñeinba lubéi úaragua lan sun katei (2 Féduru 3:13). Gürigiarügübaña ha desidírübaña harufudun ínsiñeni houn amu gürigia luma lun Bungiu awinwanda ñein (2 Lúrudu 30:15, 16, 19, 20).

Afuranguagüda tumuti giñe Bíbülia lidan lanme “luéyuri guséi”, le ayarafadubei lau lóufudagun, lagumuchaguba Bungiu lau asufuriruni luma hau gürigia ha adügübalin (2 Féduru 3:7). Lárigiñemeti, larúeihabaña Hesukrístu, Urúei le líridubei Bungiu, gürigia ha gaganbaditiña (Danieli 7:13, 14). Kaba lanüga arúeihani le? Ariñagatu Bíbülia: “Ánhaña ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (Sálumu 37:11).

Kei urúei sielu laransehabei Hesukrístu sun dañu —kéiburi sandi, aweiyaduni luma óunweni— le lanügübei hagarabaagun gürigia lun Heowá, le “lubuñe ibagari” (Sálumu 36:9). Lareidaguagüdübaña Hesusu sun gürigia ha erederubaña lábugiñe larúeihan le lánina ínsiñeni. Ladügüba Hesusu lun lagunfulirun füramasei burí tídangiñeti Bíbülia kéiburi le:

 ▪ “Mariñagunbei ni aban lílana fulasu: ‘Sándiñadina’.” (Isaíasi 33:24.)

▪ “Laragahabei [Bungiu] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei.” (Arufudúni 21:4)

Ma ruti gurasu woun wasubudiruni luagu málühali lan Bungiu agunfulirei le füramase láalibei gumú ligíame lau sun asufuriruni? Gayarati wachoururuni aganba lumuti lan wafurieidun, íbini ígiragili lan lun ñein lan asufuriruni uguñe weyu.

Yarafati Bungiu houn sun gürigia, íbini hun. Aganba lumuti hayahun, higarigu luma hirun íbini maweirin lan, ani ayumahati larihini dan danme le líbürehadün lanme luéi asufuriruni luma machouruni.