Katei san aganbubalin afurieiduni?
Katei san aganbubalin afurieiduni?
ANHEIN anihein lubéi aganbuti afurieiduni, mosu ligía lan adügübaliwa ani adügaléi wasesun. Ligíarügüñein gayara laliihani le wasaminarubei. Ligíarügüñein gayara lóunabuni afurieiduni ani ru ligía ídemuei houn gürigia ha emegeirubalin. Adügati katei le lun wálügüdagun woungua: anirein funa san resun lun wafiñerun anihein lan aban Bungiu le adügübalin sun katei?
Gíbetiña gürigia saminatiña kóntürati lan wafiñerun luagu adügǘwarügü wamá luma le arufuda láalibei siensiasi. Gama lumoun, aban iyeeni lasaminarúniwa kóntürati lan siensiasi luma wafiñerun luagu anihein lan Bungiu.
▪ Según aban aturiahani le adügǘbei ma meme binarü tidan wein-aban luban furendei íñuti to famosutu Meriga, dan le halügüdǘnwabei 1,646 máisturugu ha arufudahabaña siensiasi kéiburi 550 hádangiñe óunabatiña: “Mafiñentina luagu Bungiu”.
Le linarün aban katei, añahein aturiahatiña siensiasi afiñetiña anirein lan aban Bungiu.
Le arufudubalin anirein lan aban Bungiu
Mosu san wafiñerun mébunouga luagu anihein lan aganbuti afurieiduni? Uá. Aban charati saminaü luagu memegeirúnwati lan ébunaü lun lafiñerúniwa luagu somu katei. Tidan Bíbülia ariñawagúati afiñeni lan “wachoururuni le gumuti luagu anirein lan burí katei lau sun marihin wamani” (Ebüréu 11:1). Samina humá luagu le: íbini siñá lan harihini garabali, le linarün katei, gayarati harihini lánhingichuni tubana wewe dan le láfurun luégiñe tilimun. Adügati le lun hafiñerun anihein lan garabali. Ligiaméme asuseredubei luma Le aganbubalin afurieiduni, lau sun marihin wamani Bungiu, anirein katei le adügübei lun wafiñerun luagu anihein lan.
Halíaba san wadarirei katei burí le? Buídurügüti lun waríaguni le geyegubei wau. Afuranguagüdatu Bíbülia: “Sun muna adügarügü lumutu Ebüréu 3:4). Ma inarüniti le lariñagubei bérusu le? Ánhadün asaminara luagun óunwenbu ubóu, sielu luma lubuidun laransehóun sun katei le lídanbei, ligaburi ladügǘniwa ibagari, ligaburi ladügǘniwa katei le hanarimetimabei lachawagúniwa: hasesun gürigia, gayarabei giñe hasaminarun anirein lan somu katei le wéirigutimabei hawéi gürigia. *
somu gürigia; gama lumoun Bungiu adügübalin sun katei le aniheinbei” (Gama lumoun, siñati larufuduni katei burí le lídanbei ubóu sun le wemegeirubei wasubudirun luagu Bungiu. Ítara liña warihini katei burí le ladügübei Bungiu ubouagu kei hamuga waganbuni ládühan lugudi aban gürigia dan le ayarafadeina liña lan lun aban bena. Subuditi woun anihein lan somu gürigia lanagangiñe bena ligía, gama lumoun, katei san? Ánheinrügübei wadarara bena wasubudirei. Ítarameme, lun gayara lan wasubudiruni ka lan adügübalin sun katei mosu “wadararun” aban bena.
Káteiti bena ligía? Bíbülia mini lubéi bena ligía, ani gayarati wasubudiruni Bungiu tíndangiñe. . Profesía le tídanbei luma lagunfulirun arufuda lumuti luagu anihein lan Bungiu. * Ani lanwoun lira, arufuda tumuti líburu to ka lan ligaburibei Bungiu le aganbubalin wafurieidun, lugundun bürüwati tidan saragu ókaasion le ídanbei lóusera Bungiu hama gürigia.
Ida liña san ‘Le aganbubalin afurieiduni’?
Arufuda tumuti Bíbülia luagu chuti lan lau Sálumu 65:2). Aganba lumutiña Bungiu gürigia ha afurieidubaña lun lau afiñeni ani gíriti giñe. Ariñagatu Bíbülia: “Díreiti Wabureme [Heowá] [...] hawéi ha wuribabaña, gama lumoun aganba lumuti hafurieidun ha richaguabaña” (Ariñawagúni 15:29).
Bungiu ‘le aganbubalin wafurieidun’ ani gayarati lan wasubudiruni. Ábanrügüñein Bungiu le chuti lau gayara laganbuni le wariñagubei ani gunfurandalei. Ligía líchugunbei dimurei le gurasu woun: “Ladüga aganba bumuti afurieiduni! Ñǘbuintiña sun gürigia bumoun” (Sanditi giñe Heowá íruni luma ugundani. Ariñawagúati luagu “ínsiñeni [lan] Bungiu” luma giñe luagu “Gúndaati” lan giñe (1 Huan 4:8; Sálumu 104:31) Ligía aba lubéi “lírudun” Bungiu dan le larihinbalin lanarime wuribani le meha lídanbei binadu dan (Agumesehani 6:5, 6). Iyeeni luagu súfurigüda lumutiwa lan Bungiu lun lóuchaguniwa, lugundun ariñagatu Bíbülia: “Maritagua humá luagu adüga lan Bungiu le Suntigabafu wuribani odi marichaü” (Hobu 34:10). Gama lumoun, másiñati álügüdagua humá hungua: “Anhein Bungiu lubéi Suntigabafu adügübalin sun katei, ka uagu magumuchun lubéi lau asufuriruni?”.
Ígirati Heowá lun wagía guánarügü lan desidírei kaba lan wadüga lau wabagari ani arufudati katei le buidu lan Heowá. Ma gebegiti idewesei le woun? Híruti añahein lan saragu gürigia súfuritiña ani adügatiña lun hasufurirun amu ladüga wuriba lan hayusuruni líbürei le líchugubei Bungiu houn. Guentó anihein aban álügüdahani le lunbei wakutihani buidu: ida luba lagidaruni Bungiu asufuriruni sin lagidaruni líbürei le hámabei gürigia hawéi lun desidírü hamá? Dariwati óunabagülei lidan arütíkulu le asigirubei.
[Abürüdǘni burí]
^ par. 8 Hadariruba lanwoun burí katei le arufudubalin luagu anihein lan Bungiu, tidan garüdia El origen de la vida. Cinco cuestiones dignas de análisis, luma tidan líburu ¿Existe un Creador que se interese por nosotros?, hadügün gefentiña luagu Heowá.
^ par. 10 Adüga hamaaru gefentiña luagu Heowá garüdia Un libro para todo el mundo tuma líburu La Biblia... ¿la Palabra de Dios, o palabra del hombre? lun híderagunün akutihei katei le arufudubalin labürüdagüdün lan Bungiu Bíbülia.
[Rekuáduru le lídanbei páhina 5]
Adügati san luriban hénpulu le híchugubei lílana relihión lun machourun humani anhein anihein lubéi Bungiu?
Híruti lariñawagún, óundaruni lan lani relihión gadurunbei lun lalouguadun hafiñe saragu gürigia luagu anihein lan aban Bungiu gudemehabuti le aganbubalin afurieiduni. Íbini gürigia ha gánibaña relihión mafiñehaña luagu Bungiu ladüga harihini ládaragun relihión lungua lidoun wuribu, lidoun anarimeni le anufudedaguagüdübaliña gürigia, luma ladüga ígirati lan lun hañawarihóun irahüñü.
Ka uagu genege lubéi turóbulirügüñein lan lanüga relihión? Ladüga añahein lan gürigia wuribatiña ha adügübaña katei wuribati lidan liri relihión. Ariñagatu meha Bíbülia lidan aban profesía luagu ñeinbaña lan buga gürigia ayusuruti hani kristiánugu relihión lau aban igaburi le kóntürati luma lugundan Bungiu. Ru lumuti apostolu Pábulu eweridihani le, houn ha anügübalin ubaraü lidan damuriguaü kristiánu: “Ñéinbaña hídangiñe guánarügü [...] harufudahabei iyeeni lun hafalaruniña afiñetiña” (Adügaü 20:29, 30).
Gáñiti Heowá luagu katei burí le ladügübei relihión burí mama inarüniti. Ligía tariñagubei Lererun Bungiu luagu gadurun lan burí relihión le mama inarüniti lidan lawiyurún “hata sun ha áfarawaguañabaña ubouagu” (Arufudúni 18:24). Kei marufudahanlani inarüni houn gürigia luagu Bungiu le ínsiñenibei, gadurunti relihión mama inarüniti ligibugiñe Bungiu ladüga sun burí áfarahani le (1 Huan 4:8).
Gudemehabuti Bungiu houn gürigia ha asufurirubaña marichaü ladüga lidurun relihión. Luagu ínsiñeni le lasandirubei hawagu gürigia, málühali adüga lun laguseragüdüniña Liráü lílana relihión ladüga biangua lan hagibu. Ariñagati Hesusu: “Danme le lachülürün weyu lánina aguseragüdüni, saragubaña ariñagutiña nun: ‘Wabureme, Wabureme, apurichihatiwa méhatia luagu biri [...]’. Ábameti nariñagun houn: ‘Ibidiñegubeiñadün nun; dise humá nuéi, huguya le adaagubei wuribani!’” (Matéu 7:22, 23).