1. Ka álügüdahani hadügübei saragu lubúeingu Bungiu hóuniwagua?

ABAN íbiri to seriwiharuboun lun Heowá saragu irumu lau úaraguni íbini gagibugua tan luma saragu turóbuli álügüdahatu lau ǘnabuguni: “Nawinwanduba funa san lun narihini lagumuchagüle ubóu?” Saragu íbirigu ha barühaña saragu irumu eseriwida lun Heowá lau úaraguni adüga hamuti giñe ligiaméme álügüdahani hóuniwagua. Sun wagía ayumaha wamuti lachülürün weyu le ñeinba lubéi ladügei Heowá “sun katei iserime” ani gidaléime sun lénrengunga le úmabei wagagibudagua (Aruf. 21:5). Gíbeti resun wama lun wafiñerun luagu wéirihali lan liyarafan lagumuchagüle ubóu le lábugiñebei lubafu Satanási, íbini ítara, anihein dan hénrengu lan woun wagurabahan lau gurasu.

2. Kaba burí álügüdahani wóunaba lidan arütíkulu le?

² Arufudatu Bíbülia lunti lan gagurabahadi wamá. Lun warihini lagunfulirun füramasei le ladügübei Bungiu mosu derebugu lan wafiñen gaguraasun wagíame, ítara kei meha lubúeingu Bungiu lidan dan le sügühalibei (aliihoualá Ebüréu 6:11, 12). Íbini Heowá arufudaali gaguraasun lan. Gayarati hamuga binarü lan lagumucha Heowá lau ubóu wuribati le, gama lumoun lagurabahañein dan le buídutimabei lun lagumuchun lau (Rom. 9:20-24). Ka uagu weiri lubéi luguraasun? Ida liña meha láyeihani Hesusu Bungiu lidan gaguraasuni, ani ida luba lanügün buiti woun anhein wadüga ligiaméme? Wakutihani óunabagülei lun álügüdahani burí le líderagubadiwa lun wederebudagüdüni wafiñen luma lun gaguraasun wamá íbini genege lan woun luagu ladarasaruña lan Heowá lun lagunfuliruni füramasei burí le adüga láalibei.

3, 4. a) Ka uagu larufuda Heowá gaguraasuni? b) Ka ladügübei Heowá dan le lebedaagunbei Adán tuma Ewa?

³ Lau sun Heowá lan gabafutimabei lidan sun ubóu,  gániti buiti burí resun lun gaguraasun lan. Ebedaaguni le asuseredubei lidan fuluri-agei Edén ígirati burí álügüdahani le wéiriti lisudinin, ani subudi lumuti buga luagu mégeiwabei lan dan lun gayara lan lounabúniwa álügüdahani burí le sunsuinagubei. Subudi lumuti Heowá buidu buidu ka lan hadügübei ánheligu hama gürigia luma ka lan hagaburibei, ani dan le ladügün somu katei gabaroun lumuti kábatima lan anüga buiti woun (Ebü. 4:13).

⁴ Lisuuni meha Heowá lun labuinchun Ubóu hau ladügawagun Adán tuma Ewa. Dan le maganbadi lubéi Adán lun Heowá lárigiñe leyeedunu Satanási Ewa, masansirun lumuti Heowá lisuuni. Meferidirun lumuti luguraasun, míchugun lumuti giñe lanagan hawagun gürigia, aba ladügün aransehani lun gayara lan lagunfulirun le meha lisuunibei houn gürigia luma lun Ubóu (Isa. 55:11). Lun lagunfulirun lisuuni Heowá le, luma lun larufuduni ligía lan garichabei lun larúeihan, aba lárügüdagun lungua ábati lagurabahan lau gurasu luagu saragu milu irumu lun lagunfulirun fiú lídangiñe katei le labusenrubei lidan manera le buídutimabei.

5. Ka abiniruni gayaraabei leresibirúniwa seremei gaguraasun lan Heowá?

⁵ Lagurabahaña giñe Heowá lau gaguraasuni ladüga ítara gíbetimabaña gürigia ibiha ibagari magumuchaditi. Reiti guentó ladügüñein le mégeiwabei lun gayara lan hasalbarun “saragu gürigia” (Aruf. 7:9, 14; 14:6). Layusuruñein apurichihani le wadügübei lun lamisurahaniña gürigia afurendeirei lilurudun le richabei luma katei burí le lunbei ladügüni Larúeihan. “Uganu buiti” luáguti Larúeihan Bungiu ligía uganu buídutimabei houn gürigia (Mat. 24:14). Sun gürigia ha lachawahabaña Heowá luouguoun aba hádangiñehaña lan ibiriñaü ha lídanbaña sun ubóu ha hínsiñehabubaña lun irichaü (Huan 6:44-47). Íderagua lumutiña Wabungiute le hínsiñehabubei lun hibihini lufulesein. Anúadiraali giñe ani anihagua anúadira fiú hádangiñe gürigia lun hagíaba lan arúeiha lidan arúeihani le siélubei. Danme le ragǘ hamaali kristiánugu úaraguatiña ha habara sielu híderagubaña gürigia ha gaganbadibaña lun mafigounhaña lanme luma lun hibihin ibagari magumuchaditi. Ligíati, íbini lagurabahaña lan lau gurasu sun dan le, awadigimaridaali lun labiniruniwa lau lagunfulirun füramasei burí le adüga láalibei.

6. a) Ida liña meha larufuduni Heowá luguraasun lidan lidaani Noé? b) Ida liña larufuduni Heowá luguraasun lidan wadaani?

⁶ Gaguraasunti Heowá íbini súnhaña lan gürigia wuribatiña adüga lun hagañidagüdüni, ítara liña larufuduni le meha asuseredubei lubaragiñe Guran. Lidan meha dan ligía, buin liña meha Ubóu lau magíaguni luma anarimeni, ábati “lírudun” Heowá ladüga gáriti tun lanigi larihini salufuri hamá gürigia (Agu. 6:2-8). Mígirunbei buga Heowá lun lasuseredun katei le gumugua dan, ligíati aba lubéi desidírü lan lanügün aban guran lun lagumuchun hau gürigia wuribatiña. Gama lumoun, lidan anihán lan Bungiu ‘agurabaha’ lidan lidaani Noé, aba ladügün aransehani lun gayara lan lasalbaruni Noé hama liduheñu (1 Fe. 3:20). Lidan dan le buídutimabei, aba lariñaguni Heowá le desidírü láalibei lun Noé, ábati lóunahani adüga aban árüka (Agu. 6:14-22). Aban meha giñe gürigia “le apurichihabei houn gafigountiña” Noé, le awisarubaliña gürigia luagu málühali lan meha ubóu agünrinchawagúa (2 Fe. 2:5). Ariñagati meha Hesusu ítara luba lan wadaani kei meha lidaani Noé. Desidírü laali Heowá ídaba lan lagumucha lau lagübüri ubóu le, gama lumoun úati ni aban gürigia asubudiruti kaba lan “weyu luma oura” ladügei (Mat. 24:36). Lubaragiñe lasuseredun le, óunaha lumutiwa Bungiu eweridiraña gürigia, ariñaga wameime houn ida luba lan hasalbarun.

7. Ladarasahaña san Heowá saragu lun lagunfuliruni le füramase láalibei? Afuranguagüda huméi.

⁷ Lígirarügüña san Heowá lun lásügürün dan? Uá. Moun lumuti wasaminarun ligiaméme lan gaguraasuni luma meberesenhabuni. Gama lumoun, ménrengunti wasaminaruni lira dan le aweiyaadeina waña lan o wasufuriruña lan lidan  lagübüri ubóu le. Gayarati weferidiruni waguraasun o wasaminarun weiri lan ladarasahan Bungiu lun lagunfuliruni le füramase láalibei (Ebü. 10:36). Gama lumoun, maweiyasun wamá abulieidei anihein lan buiti resun luma Heowá lun gaguraasun lan, ani layusuruñein lan dan ligía lidan aban manera le anügübei buiti houn lubúeingu ha úaraguabaña (2 Fe. 2:3; 3:9). Guentó ariha waméi ida liña lan larufudun Hesusu aban gaguraasuni libe le larufudubei Bungiu.

8. Ka idan larufuda Hesusu gaguraasuni?

⁸ Barühali Hesusu saragu milu irumu adügei lugundan Bungiu lau saragu ubebeni. Dan le lebedaagunbei Satanási kóntüra Heowá, aba desidírü lan Heowá lóunahani Liráü le ábanrügüti ubouagun lun ligía lan Mesíasi. Samina wamá luagun óunwenbu gurasu le meha lunbei larufuduni Hesusu lidan lagurabahan saragu milu irumu lun lachülürün dan ligía (aliihoualá Galasiana 4:4). Ani mácharagun lumuti meha lúhabu agurabaha. Lubaragiñe lira, bereseguñein meha lidan wadagimanu le líchugubei Lúguchi lun. Dan le lachülürünbei dan lun liabin ubouagun, subudi lumuti meha láfaragüdübei lan Satanási, ítara kei lariñaguni profesía (Agu. 3:15; Mat. 16:21). Lau gaguraasuni súfuriti meha saragu igarigu ladüga subudilani lugundan lan meha Bungiu lun ítara luba lan lounwen. Meredeti meha asaminara luouguounrügü ni luagu lubara. Ma lubuidun hénpulu le líchugubei woun! (Ebü. 5:8, 9.)

9, 10. a) Ka ladaagubei Hesusu lidan aniha lan agurabahei lau gaguraasuni le lunbei ladügüni Heowá? b) Ida luba warihini oura le anúadira láalibei Heowá lun lagunfulirun lisuuni?

⁹ Lárigiñe láguyugun Hesusu aba leresibiruni sun ubafu sielu luma ubouagu (Mat. 28:18). Ani súnwandan layusuruni Hesusu ubafu ligía lun lagunfuliruni lisuuni Bungiu lidan oura le anúadira láalibei Heowá. Lau gurasu agurabahati Hesusu luéigiñe lóunwenren Bungiu darí irumu 1914, dan le hichugúnwabei láganiñu lábugiñoun lugudi (Sal. 110:1, 2; Ebü. 10:12, 13). Málühali Hesusu agumucha lau ubóu le lábugiñebei lubafu Satanási, gama lumoun gaguraasunti habá gürigia ani adundeha lumutiña lidoun “duna le íchugubei ibagari” (Aruf. 7:17).

¹⁰ Arufuda lumuti lani Hesusu hénpulu woun ida luba lan warihini oura le anúadira láalibei Heowá lun lagunfulirun lisuuni. Chóuruti ayumaha lan meha Hesusu ladügün furumiñeguarügü katei le lamuriahan Lúguchi luma, íbini ítara agurabaha lumuti oura le anúadira láalibei Bungiu lun lagunfulirun lisuuni. Lidan awanha lan agurabahei lagünrinchawagúniwa ubóu wuribati le lábugiñebei lubafu Satanási, súngubei wagía mégeitiwa warufudun libe gurasu le larufudubei Hesusu luéi wásügüragun luma Bungiu ni lun wígiraguagüdün woungua luma lun mábürühan lan warüna. Ligíati, kaba wadüga lun gaguraasun wamá?

11. a) Ida liña úara lan afiñeni luma gurasu? b) Ka uagu anirein lubéi saragu resun wama lun derebugu lan wafiñen?

¹¹ Lubaragiñe meha liabin Hesusu ubouagun, añaheinhaña meha profetagu hama amu lubúeingu Bungiu úaraguatiña ha meha íchugubaña hénpulu le arufudubalin íbini lan gürigia gafigountiña gayarati hawandun. Úarati meha hafiñen luma haguraasun (aliihoualá  Santiagu 5:10, 11). Lun hamuga meha mafiñen hamá sunsuinagubei lun le lariñagubei Heowá houn, gaguraasunbaña hamuga san lun hagurabuni lagunfulirun le füramase lubéi houn? Anihein meha dan, gagibugua hamá luma peliguru luma lénrengunga, gama lumoun adüga hamuti lau ichoururuni luagu lachülürüba lan buga dan lun harihini lagunfulirun le füramase lubéi Bungiu houn (Ebü. 11:13, 35-40). Uguñe weyu gíbetimahali resun wama lun derebugu lan wafiñen lugundun guentó Hesusu “abuiduragüdübalin wafiñen sunsuinagubei” (Ebü. 12:2). Ítara liña, lau lagunfuliruni sun profesía le adimurehabei  luagu, íderagualawa lun gunfuranda wamani lisuuni Bungiu, rúhali Hesusu saragu resun woun lun wafiñerun luagu Heowá.

12. Ka lunbei wadügüni lun wederebudagüdüni wafiñen?

¹² Ka lunbei wadügüni lun wederebudagüdüni wafiñen luma lun gaguraasun wamá? Súdiniti lun gaganbadi wamá lun burí eweridihani le líchugubei Bungiu woun. Aban hénpulu, ráramagua wamá asaminara luagu resun burí le wámabei lun wíchuguni Larúeihan Bungiu lidan furumiñeti lúgaaru lidan wabagari. Gayarati san wáfaagun lun buídutima lan wafalaruni eweridihani le lídanbei Matéu 6:33? Lun wadügüni lira, háfuga mosu waganwoundagüdüni dan le wásügürübei lidan wani ministeriu, o wasansirun somu katei lidan ligaburi wawinwandun. Mabulieida waméi biní laali lan Heowá áfaaguni le wadügübei lun weseriwidun lun. Másiñati íderagua láadiwa lan agumesera aban iseri aturiahani tídangiñeti Bíbülia luma somu gürigia o ru laali lan ‘darangilaü le wéiritimabei luéi sun subudi woun’ (aliihoualá Filipuna 4:7). Ligíati, ánhawa etenira lun sun buiti le wibihibei ladüga gaganbadi wamá lun adundehani le líchugubei Heowá woun, gunfurandatima wabéi luagu buidu lan gaguraasun wamá (Sal. 34:8).

13. Afuranguagüda huméi lau aban hénpulu ida liña lan laganwoundagüdüniwa afiñeni luma gurasu.

¹³ Genegeguati katei le luma labunawagúniwa nadü, lóunigiruniwa luma lalubahóuniwa. Dántima le weiri lan lalubahan ábunaguti lídangiñe lin linadüri, wéiritimabei ichouruni le luágubei lunya lagiribudun ábunagua. Subuditi lun mosu lan lagurabahani lachülürün lidaani alubahani lau gurasu, gama lumoun meferidirun lumuti luguraasun. Le linarün katei, másiñati gíbetimabei lan múa lábunagun sügǘ lau dan le ásügürübei, lugundun chouru lumuti lalubahaba lan. Susereti ligiaméme lau eweridihani le líchugubei Bungiu. Sagü wafurendeiruni, wafalaruni ani ariha waméi resultóu buiti le lanügübei eweridihani le líchugubei Bungiu, ábatima laweiridun wafiñen luagu Heowá, ábati ménrenguntimahali lan woun werederun  agurabahei abiniruni burí le lunbei liabin (aliihoualá Santiagu 5:7, 8).

14, 15. Ida luba warihini hasufurirun gürigia?

¹⁴ Lúntima gaguraasun wamá, mosu warihini ubóu luma le gádanbaliwa ítara kei larihini Heowá. Aban hénpulu, íbini rúhali lan asufuriruni le háfagubei gürigia saragu igarigu lun luagu saragu milu irumu, mígiraguagüdünti lungua lun idiheri. Lubaragiñe lerederun madügünga ni kata, aba lóunahani Liráü le ábanrügüti lun “lagünrinchaguni luadigimari Mafia” lun laransehani sun damichi le adüga láalibei Satanási houn gürigia (1 Huan 3:8). Le linarün katei, madurabei asufuriruni gumugua dan, ánheinti awalidaguni le lunbei lanügüni Bungiu laduraruba lun súnwandan. Ligíati, lubaragiñe wadiheridun luagu wuribani le lídanbei ubóu le lábugiñebei lubafu Satanási o weferidiruni waguraasun ladüga busenhadiwa lan lagidarúniwa, afiñe wamá luagu katei burí le marihínwabei gama lumoun magumuchadibei. Desidírü laali Heowá ídaba lan lagumuchúa lau ubóu le, ani ladügübei lidan lidaani (Isa. 46:13; Naún. 1:9).

¹⁵ Lidan lagumuhóun burí luéyuri ubóu wuribati le, gayarati wásügürüba lan lídangiñe turóbuli hérenguti le lunbei lóuchaguni wafiñen. Ánhawa asufurira ladüga anarimeni o ánhawa ariha somu waduhe asufurira magañidunbadiwa. Íbini hénrengu lan woun ladüga gafigoun wamá, áfaagua wamá lun wafiñerun luagu Heowá ani áyeiha wameime igaburi le larufudubei Hesusu lidan Matéu 26:39 (aliihoualá).

16. Ka katei lunbei madügün wamani lidan anihagua lan dan le?

¹⁶ Anhein busén wabéi wáyeihani luguraasun Bungiu, mosu wafiñerun luagu le lariñagubei Heowá. Ka uagu wadimureha? Dan le mafiñen lan aban gürigia luagu inarüni lan yarafaali lan lagumuchagüle ubóu le, gayarati lagumeserun adüga amu aransehani luéidügü magunfulirun lan le füramase láalibei Heowá. Aban hénpulu, másiñati aba lanme láfaagun lun aban lan gürigia súdiniti ubouagu o lagumeserun afiñera luagu seinsu ábati míchugun laali lan Larúeihan Bungiu lidan furumiñeti lúgaaru o háfuga lebelurun aturiaha tidan luban furendei íñuti lun libihin aban lubuidun ibagari. Gürigia ha láubaña igaburi le arufudatiña lougua lan hafiñen. Haritagua waméi amisuraha lániwa Pábulu lun wáyeihaniña gürigia ha eresibirubalin le füramase lubéi Bungiu houn ladüga ‘awanda hamani sun asufuriruni lau afiñeni luma gurasu’ (Ebü. 6:12). Mígirunbei Heowá lun ladurarun ubóu le lóugiñe dan le mégeiwabei lun lagunfulirun lisuuni (Abak. 2:3). Lidan wagurabahañein lan lagunfulirun lisuuni, míchiga wamá lébeha le gayarabei wadügüni lidan weseriwidun lun Bungiu. Lubaragiñe lira, agagudúañu wamá ani apurichiha waméi uganu buiti lau ubebeni, labuinchagüdübadiwa wadagimanu le lau ugundani íbini lidan dan le (Luk. 21:36).

17, 18. a) Ka chansi wámabei seremei gaguraasun lan Heowá? b) Kaba buiti wibiha ámuñegü ánhawa arufuda gaguraasuni guentó?

¹⁷ Sun liña lan yebe wasubudiruni Heowá o lüha lan wasubudiruni, súngubei wagía busentiwa weseriwidun lun lun súnwandan. Líderagubadiwa gaguraasuni awanda darí wasalbarun, meberesenga átirirügaali lan dan lubá lagumuchun ubóu le. Uguñe weyu, líchuguña Heowá chansi woun lun warufuduni afiñe wamá luagu le desidírü láalibei ani aranseñu waña lan íbini lun wasufurirun luagu liri (1 Fe. 4:13, 14). Ani líderaguñadiwa giñe lun wibihini gaguraasuni le wemegeirubei lun wasalbarun (1 Fe. 5:10).

¹⁸ Rúaali sun ubafu lun Hesusu sielu luma ubouagu, ligíati, úati amu katei le gayarabei ladisedagüdüniwa luéi waweidigia (Huan 10:28, 29). Moun lumuti wanufudedun ni luéi le lunbei lasuseredun ámuñegü ni luéi óunweni. Sun ha awandutiña lau gurasu darí lagumuchun ubóu hasalbaruba. Ligíati, mígira wamá lun leyeeduniwa ubóu le, mígirun wagíame lun ledebilidagüdüni wafiñen luagu Heowá. Adüga wamá lun lederebugudun wafiñen ani sagá wamá buiti lídangiñe luguraasun Bungiu (Mat. 24:13; aliihoualá 2 Féduru 3:17, 18).