1, 2. Kaba katei luáguti adamurini hani lubúeingu Bungiu wakutiha?

BARÜHAÑA gefentiña luagu Heowá ha lánina wadaani saragu irumu adaagua adamurini lánina distritu luma burí adamurini le ídanbei hadamuridagua lílana ámuñegueinarügü ageiraü. Besafu wádangiñe ñǘdünhadiwa lidan saragu lídangiñe ókaasion burí espechaliti le, háfuga barühadiwa lóugiñe diisi irumu abasiha lidoun adamurini burí le.

² Saragu milu irumu lubaragiñe wadaani, adügatiña meha giñe lumutuniña Bungiu adamurini burí sánduti. Lídanme wáguyuguagüdüña lan fiú lídangiñe adamurini le meha adügǘbei lidan tidaani Bíbülia, ariha waméi ka lan idan genegegua lan adamurini meha ligía luma adamurini burí le wadügübei uguñe weyu, ani teni wamá lun buiti le wibihibei dan le woudin lidan burí adamurini le (Sal. 44:1; Rom. 15:4).

3. a) Ka burí sügǘ súdiniti asuseredubei lidan furumiñeti adamurini le uágubei tadimureha Bíbülia le ídanbei hadamuridagua lumutuniña Heowá? b) Ida liña meha hóundarawagun ísüraelina?

³ Adamurini le adügǘbei ligibugiñe wübü Sinaí, ligía furumiñeti adamurini le uágubei tadimureha Bíbülia le ídanbei hadamuridagua lumutuniña Bungiu lun heresibirun arufudahani lúmagiñe, ligíati súdini lubéi adamurini ligía lidan áhuduraguni inarüniti. Lidan meha lubuidun ani mabulieidúaditi ókaasion ligía, líchigei Heowá Lilurudun houn ísüraelina labadinagua larufuduni óunwenbu lubafu (Afu. 19:2-9, 16-19; aliihoualá Áfuriduni 20:18 luma 2 Lúrudu 4:9, 10). Súdiniti sügǘ le lidan ligaburi lanaagun Bungiu lungua hama ísüraelina lúmagiñe dan ligía. Murusun dan lárigiñe, aba ladügün Heowá aban aransehani lun lóundaraguagüdüniña lumutuniña: ariñagati lun Moisesi lun ladügün biama fidu lautu pülata le meha lunbei layusurún lun “hóundaragun gürigia [...] tubenari kianpu lánina óundaruni” (1 Lur. 10:1-4). Ma funa meha lueirin ugundani le hasandirubei saragu gürigia úaraguatiña hagía!

4, 5. Ka meha uagu súdini lubéi adamurini le ladügübei Moisesi luma le ladügübei Hosué?

 ⁴ Lídounbei lagumuchun bián-wein irumu le haubei ísüraelina éibugañahadügü lidan fulasu mageirawati, lidan aban dan súdiniti lidan habagari lílana néchani le meha iserigilibei íbini mámadigia lan saragu, aba lóundaraguagüdüniña Moisesi ísüraelina ha líbirigu. Belumémeeña meha lidoun Fulasu Füramasewati, ani anihán meha dan lun haritaguagüdüniwa luagu sun le meha adüga láalibei Heowá hawagu luma le lunbei meha ladügüni (2 Lur. 29:1-15; 30:15-20; 31:30).

⁵ Háfuga lidan lan meha adamurini ligía ladimureha Moisesi luagu gumadi lun hadamuridagun lumutuniña Bungiu estodi lun hafurendeiruni lémeri. Lidan meha tufedun Dibasein sagü sedü irumu, mosu meha hadamuridagun dandu wügüriña kei würiña ítara kei terencha ha meha aganóubaña Ísüraeli lidan fulasu le lanúadirun Heowá. Ka meha un hadamuridagua? Óunabatu Bíbülia: “Lun haganbuni laliihóun lúrudu furendei hamaamuga lichugún inebesei lun Bungiu le Habungiute, adüga hameime sun le lariñagubei lúrudu” (aliihoualá 2 Lúrudu 31:1, 10-12). Ítara liña lúmagiñe lan lagumeserun néchani Ísüraeli, arihúati furangu luagu mosu lan hóundaragun sun ísüraelina estodi lun hakutihani lererun Bungiu luma lisuuni. Lárigiñe hárügüdüni ísüraelina Fulasu Füramasewati —lau sun meha añahagua lan gürigia ha máhuduraguntiña lun Heowá geyegu hau—, aba lóundaraguniña Hosué sun ísüraelina lun líchugun iderebugu houn lun desidírütima hamá hasigirun eseriwida lun Heowá lau úaraguni. Ábati háfiñurun ísüraelina luagu heseriwiduba lan lun Heowá (Hos. 23:1, 2; 24:1, 15, 21-24).

6, 7. Ka uagu gayara lubéi wariñagun luagu súdini lan adamurini burí le adüga hamaalibei gefentiña luagu Heowá ha lánina wadaani?

⁶ Lidan burí adamurini le hadügübei gefentiña luagu Heowá ha lánina wadaani, aniheinhali giñe adamurini súdiniti le ñein lubéi larihúa lawanserun wadagimanu lánina Larúeihan Bungiu o gunfurandawa lan somu arufudahani tídangiñeti Lererun Bungiu (Ari. 4:18). Le furumiñeti óunwenbu adamurini le hadügübei Aturiahatiña Bíbülia lárigiñebei lagumuchun Furumiñeti Wuribu Wéiriti adügǘwati lidan irumu 1919 lidan uburugu Cedar Point (Ohio, Meriga). Chülütiña kéiburi sedü-milu gürigia, ani ñein lagumeserúa aban wadagimanu lánina apurichihani lidan sun ubóu. Lidan irumu 1922, lidan aban adamurini le adurarubei nefu weyu lídanmeme fulasu ligía ínchaha lumutiña Joseph F. Rutherford íbirigu lun hídehan lidan óunwenbu wadagimanu le, dan le lariñagunbei houn gürigia ha íchugubaña arigei lun: “Gefentiña humá ha úaraguatiña ani inarünitiña lun Wabureme. Hubaruaguóun humá darime gumuhali sun le erederubei tídangiñe Babilónia. Weiri lan hasubudiragüdüni uganu buiti lidan sun lidise-agei fulasu. Mosu hasubudiruni gürigia Heowá lan Búngiubei ani Hesukrístu lan Harúeitebei urúeigu, Habureme aburemeigu. Aban weyu wéiriti lisudinin le. Ariha humá, lagumadihaña Urúei! Hugía asubudiragüdübalin. Ligíati, awisaha, awisaha, awisaha humá luagu Urúei luma luagu larúeihan!”. Dandu meha gürigia ha ñeinbaña kei ha híbiri lubúeingu Bungiu ha lídanbaña sun ubóu ánhatiña lun amisurahani le lau sun hagundan.

⁷ Lidan irumu 1931, lidan uburugu Columbus (Ohio), resibi hamuti Aturiahatiña Bíbülia iri gefentiña luagu Heowá lau ugundani. Lidan irumu 1935, lidan uburugu Washington afuranguagüda lumuti íbiri Rutherford kátaña lan “saragu gürigia” ha áfuachubaña rara “ligibugiñe lálana arúeihani luma ligibugiñe Mudún” tidan líburu Arufudúni (Aruf. 7:9-17). Lidan irumu 1942, dan le anihán lan Libiaman Wuribu Wéiriti ageindawagúa, aba líchuguni íbiri Nathan H. Knorr yanu dǘgüdati le gíribei: “Darangilaü... laduraruba funa san?”, lidan yanu le ariñaga lumuti katei lan “mónsturu funati” le uágubei ladimurehóua lidan kapítulu 17 tidan líburu Arufudúni ani ariñagati meha giñe lúngili lanme lapurichihóun saragu lárigiñe wuribu.

8, 9. Ka uagu anihein lubéi meha adamurini le ánhingichubarun hanigi gürigia?

⁸ Lidan Adamurini le luáguti Larúeihan Bungiu le gíribei: “Néchanigu Gúndaatiña”, le adügǘbei lidan irumu 1946 lidan uburugu Cleveland (Ohio), ruti íbiri Knorr aban yanu súdiniti le gíribei: “Turóbuli lánina taransehóun luma taweiridagüdüniwa Beteli”. Luagu ugundani le harufudubei ha  aganbubalin yanu le, abürühati aban hádangiñe íbirigu ha meha ñeinbaña: “Ibiha numuti lubuidun chansi lun lidan nan plataforma lanagangiñe íbiri Knorr guñoun ligía, danti le aniha lubéi ariñagei ida liña lan lawanserun wadagimanu lánina apurichihani luma luagu aransehani lun taweiridagüdüniwa Beteli to lídanboun uburugu Brooklyn tuma fábürika to ñeinboun, aba hapouhani saragu gürigia ha ñéinbaña háhabu lóugiñe aban wéiyaasu ani lütiña apouhei háhabu. Íbini marihíniwa lan hagibu luéigiñe plataforma, gayarati meha larihíniwa ugundani le hasandirubei”. Lidan irumu 1950, adügǘwati aban adamurini le ñein lubéi hóundaragua íbirigu lídangiñetiña ámuñegueinarügü ageiraü lidan uburugu Newayoru, lidan adamurini ligía ibiha hamutu gürigia ha ñeinbaña Traducción del Nuevo Mundo de las Escrituras Griegas Cristianas, lau sun hagundan, tuguya furumiñetu Bíbülia adügǘboun lidan ligaburi hadimurehan gürigia uguñe weyu to ídanboun lichugúa liri Bungiu lidan burí bérusu le ñein lubéi yu lan lidin liri tidan Lererun (Her. 16:21).

⁹ Hingí lumutu giñe hanigi gürigia adamurini burí le ídanbei lóundaraguagüdaña Heowá Gefentiña ha úaraguatiña lárigiñe hásügürün lídangiñe éibaahouni o maha lan lilurudun hageira lun wadagimanu lánina apurichihani. Aban hénpulu, lidan ageiraü Yámani fiñuhali meha Adolf Hitler lagumuchuba lan hau gefentiña luagu Heowá. Gama lumoun, lidan irumu 1955 adügǘwati aban adamurini lidan uburugu Núremberg, fulasu le ñein lubéi habuinchagua 107,000 gefentiña luagu Heowá, ñein meha lóundaragua Hitler hama lisudaranigu. Gíbetiña hádangiñe gürigia ha ñeinbaña ayahuahatiña ladüga ugundani. Lidan irumu 1989, lidan ageiraü Polonia adügǘwati ǘrüwa adamurini gíriti: “Ederegeraguni unguaü lun Bungiu (Devoción Piadosa)”. Haganagua 166,518 gürigia ha meha ñeinbaña ñeinñanu meha gürigia lídangiñetiña ageiraü burí le meha gíribei Unión Soviética luma Checoslovaquia luma burí amu ageiraü le luéigiñebei oubaü le ñéingiñe lubéi laboucha weyu libiti Yuropa. Saragu hádangiñe furumiñeti meha wéiyaasu harihin hóugiñe keinsi o wein lubúeingu Bungiu óundaraguñu lidan ábanmeme adamuridaguni. Lidan irumu 1993, adügǘwati adamurini “Arufudahani lúmagiñeti Bungiu” le ñein lubéi hóundaragua íbirigu lídangiñetiña ámuñegueinarügü ageiraü lidan uburugu Kiev (Ucrania). Samina humá luagun ugundani le hasandirubei ha arihibalin habadiseirun 7,402 gürigia, marihínwañahagili habadiserun saragu gefentiña luagu Heowá ítara kei weyu ligía! (Isa. 60:22; Ahe. 2:7.)

10. Ka adamurini mabulieidun hubéi ani ka uagu?

¹⁰ Másiñati anihein lan adamurini lánina distritu o le ñein lubéi hadamuridagua íbirigu lídangiñetiña ámuñegueinarügü ageiraü le mabulieidun humuti. Chóuruti, haritagua humani furumiñeti adamurini le ídanbei hidin o le ídanbei habadiseira ladüga weiri lan lisudinin hun lidan hibagari kei kristiánu. Mabulieida huméi lubuidun burí adamurini le! (Sal. 42:4.)

11. Ka burí meha fedu irumu-auti lóunahabei Bungiu lun hefeduhani binadu ísüraelina?

¹¹ Óunahati Heowá houn ísüraelina lun houdin Herusalén sagü irumu lun hefeduhan ǘrüwa fedu: tufedun Fein maganatu Lébini, lufeduna Dimaasu lau furumiñeti alubahani (le unbei laguarúa Pentekosutesi dan lárigiñe) luma tufedun Dibasein. Ariñagati meha Lilurudun Bungiu: “Sun wügüriña gasu harufudagun houngua ligibugiñe Bungiu ǘrüwa wéiyaasu lidan irumu” (Afu. 23:14-17). Gunfuranda hamuti meha saragu hachügüdina  familia luagu weiri lan buiti le asagarúbei lídangiñe adamuridaguni burí le lidan áhuduraguni lun Bungiu, ligía méhati hanügünbaliña sun haduheñu hámagua dan le houdin (1 Sam. 1:1-7; Luk. 2:41, 42).

12, 13. Ka meha lunbei hadügüni saragu familia ísüraelina lun houdin lidan burí fedu irumu-auti?

¹² Samina humá luagun sun katei le meha lemegeirubei aban familia ísüraelina lun hadügüni wéiyaasu ligía. Kéiburi meha Hosé tuma María, mosu meha héibugun kéiburi 100 kilometuru lúmagiñe Nasarétügiñe darí Herusalén. Según hisaminan, átiribei hamuga san lidura huéiyasun éibugeina hau irahüñü ñǘbürigiña? Abahüdaguni luáguti lidin Hesusu Herusalén dan le meha irahügili arufudati háfuga lan meha héchutiña iduheñu hama hasubudiragun aweiyasuha lidoun burí fedu le úara. Háfuga aban meha sügǘ móubawati haweiyasuhan luma hábougun úara, hadarirun halíaba lan harumuga lidan burí fulasu le lóuguati hasubudiruni. Gama lumoun, anihein meha ichouruni le nófuti lun gayara lan líchugun murusun líbürei lun aban irahü le gúnfulihali 12 irumu. Samina humá luagun burí lubuidun sügǘ le hásiñarubei hátima ñǘbürigiñabaña abulieida (Luk. 2:44-46).

¹³ Gíbetiña meha ísüraelina awinwandutiña bóugudi luéi Ísüraeli le hageira. Ligíati, saragu meha hádangiñe gürigia ha ñǘdünbaña lubá fedu lídangiñetiña meha ámuñegueinarügü ageiraü. Lun Pentekosutesi le lánina irumu 33 lárigiñe lidaani Hesusu, ñǘdüntiña meha huríu hama gürigia ha meha barǘ hamaali ligaburi hafiñen huríu lídangiñe fulasu díseti kéiburi Italia, Libia, Küreta, Liraüraü Asia, luma Mesopotámia (Adü. 2:5-11; 20:16).

14. Ida liña meha hasagarun ísüraelina buiti lídangiñe houdin lidan burí fedu irumu-auti?

¹⁴ Le meha hínsiñetimabei houn ísüraelina lídangiñe wéiyaasu le gayara lan háhuduragun lun Heowá úara hamá milu gürigia ha giñe hínsiñehabubaña lun Heowá. Ka meha efekütu lánibei fedu le hawagu gürigia ha ñǘdünbaña? Gayarabei wasubudiruni seremei adundehani le líchugubei Heowá houn lumutuniña lubá tufedun Dibasein: “Gunda humá lidan fedu ligía hama hisaanigu, hidamun, Lewitagu, terencha, méteñuhaña, hama würiña hilaguaaña úmari ha aganóutiña huburuguterugu. Sédübei weyu hau efeduhei fedu le, lidan liri Wabureme le Hubungiute, lidan fulasu le lanúadirubei, ladüga labinirubadün Wabureme le Hubungiute lidan sun halubahan luma lidan sun huádigimari, buídubei dan hun sunsuinagubei” (2 Lur. 16:14, 15; aliihoualá Matéu 5:3).

15, 16. Ka burí sákürifisiu adüga humaalibei lun burí hidin lidan adamurini? Ka buiti hibihubei lídangiñe hidin?

¹⁵ Gíbeti katei gayarati wafurendeiruni lídangiñe adamurini le meha adügǘbei lidan burí sígulu le sügühalibei. Inarüni luagu sánsihali lan saragu katei lúmagiñe dan ligía, gama lumoun aniheingua katei burí le súdinitimabei. Lidan meha tidaani Bíbülia mosu meha ladügǘniwa saragu sákürifisiu lun ñein hamá lidan burí fedu ligía, ani ligiaméme asuseredubei uguñe weyu; gama lumoun barüti saragu buiti woun. Wéiriti lisudinin sügǘ burí le lidan wáhuduragun lun Heowá dandu lidan binadu dan kei uguñe weyu. Lidan adamurini burí le, ibiha wamuti subudi luma gunfurandaü le wemegeirubei lun wakipurun aban lubuidun umadaguaü luma Bungiu. Íderagua lumutiwa lun wayusuruni le wafurendeirubei, luéi webelurun lidoun turóbuli luma lun wetenirun lun le wabusenrubei wadügün lidan wáhuduragun lun Heowá, katei burí le lunbei líchugun iderebugu woun lubaragiñe ladiheridagüdüniwa (Sal. 122:1-4).

¹⁶ Súnwandan anihein lan ugundani hadan gürigia ha achülürübaña lidoun adamurini. Lidan ariñahani le ichugúbei luagu aban óunwenbu adamurini lidan irumu 1946 ariñagati: “Ruti meha óunwenbu ugundani houn ha arihibaliña saragu milu Gefentiña ha ñuruñubaña darangilu luagu hala, ani wéiritimati ugundani dan le haganbunbalin hóundaragun aban sétanu eremuhatiña hama saragu gürigia ha ñeinbaña lun hadügün lun lánhingichun burí esütépu lau uremu gúndaati le heremuhabei lun halawahani Heowá”. Ani ariñagati giñe: “Gíbetiña íbirigu ha abürüdagüdübalin hiri lidan Departamentu lánina Eseriwiduni lau Gundaü lun hawadigimaridun lidan burí sun departamentu ladügarügü gunda hamá heseriwidun houn híbirigu lidan afiñeni”. Sandí humaali giñe san  ugundani le lidan burí adamurini lánina distritu o adamurini le ñein lubéi hadamuridagua íbirigu lídangiñetiña ámuñegueinarügü ageiraü? (Sal. 110:3; Isa. 42:10-12.)

17. Ka burí asansiruni málügilibei lúmagiñe ladügǘn lidan ligaburi ladügǘniwa adamurini?

¹⁷ Anihein saragu katei le sánsihali lidan burí ligaburi ladügǘn adamurini. Aban hénpulu, añahein íbirigu ha haritagua hamagili dan meha wídügili weyu lidura adamurini. Anihein meha burí sesión binaafin, rábounweyu luma guñoun. Mosu meha giñe háfuridun íbirigu apurichiha. Anihein meha yanu agumeseruti ladaün nefu binaafin, ani libe-agei dan durati meha sesión darí ladaünrün nefu guñoun. Nadagimeintiña meha íbirigu saragu lun hadügün éigini lánina binaafin, amidirugu luma adineruni houn sun ha achülürütiña lidoun adamurini. Guentó maduraali adamurini saragu weyu, ani adüga hamuti sun gürigia heigin lun hanügüni hámagua lidoun adamurini, gayara láamuga hetenirun lun programa le lánina arufudahani lúmagiñeti Bungiu.

18, 19. Ka burí katei hínsiñetimabei hun lídangiñe adamurini ani ka uagu?

¹⁸ Katei burí le masansirungilibei lúmagiñe saragu dan lidan adamurini adügati lun wóurabahoun lubá. Mámarügü lidan burí yanu le ichugúbei lidan adamurini weresibirei “éigini [lánina larufudahan Bungiu] [...] lidan dan” le burí íchugubalin gunfurandaü le buídutimabei woun luagu burí profesía luma arufudahani le tídanbei Bíbülia, resibi wamuti giñe éigini ligía tidan burí iseri agumeiraguagüdüni to burí áfuriduboun lidan (Mat. 24:45). Libe-agei dan huutu agumeiraguagüdüni burí to lun wíderaguniña gürigia lun línsiñedun inarüni le tídanbei Bíbülia houn. Drama burí le ichugúbei lidan, íderaguati dandu nibureingiña kei wéinamuhaña lun haríaagun houngua luma lun hóunigiragun houngua luéi hadügüdarun gürigia ubouaguna hawagu lun madügün hamani le lariñagubei Bungiu houn. Ruti yanu le lánina abadiseiruni chansi woun lunya wakutihani ka lan súdinitimabei woun lidan wabagari luma lun wasandiruni ugundani le líchugubei warihiniña amu arufudei luagu deregeguaaña lan houngua lun Heowá.

¹⁹ Súdiniti adamurini lidan áhuduraguni inarüniti lúmagiñe binadu dan. Aranse lumutiña lubúeingu Heowá ha gúndaabaña lun harufudun úaraguni lidan lidaani lénrengunga. Ruti giñe iderebugu lun wafiñen, luma chansi lun wadügün umadagu ha buítiña, íderagua lumutiwa lun gebegi hamá wíbirigu ha lídanbaña sun ubóu woun, ani yusu lumuti Heowá adamurini burí le lun labiniruniwa luma lun lóunigiruniwa. Chóuruti wadügübei lan aransehani le mégeiwabei lun meferidirun wamá ni aban lídangiñe sesión lánina burí adamurini luma lun wasagarun buiti lídangiñe (Ari. 10:22).