1. Ka lubuidun ibagari hagurabubei “saragu gürigia” lubá ámuñegü?

GAYARATI san hasaminarun luagun sun katei le gayarabei ladügün aban arúeihani gabafuti le ñein lubéi larúeiha aban urúei richati ani gudemehabuti lidan milu irumu hawagu gürigia ha lábugiñebaña larúeihan? Ligíaba hawinwanda “saragu gürigia” ha siñabei habahüdǘn, ha lúnbaña herederun wínwanñu lídangiñe “óunwenbu asufuriruni” le ñeinba lubéi lagumuchúa lau ubóu wuribati le (Aruf. 7:9, 14).

2. Ka susereelibei lidan sisi-milu irumu le haubei gürigia arúeiha ubouagu?

² Lidan sun sisi-milu irumu le haubei gürigia arúeiha ubouagu, buin liña ubóu lau igarigu luma asufuriruni. Lüha tariñagun Bíbülia: “Ubafu le luágubei gürigia lun ladügün damichi lun gürigia líledi” (Apur. 8:9). Ani ligía warihibei uguñe weyu: wuribu, hiñuragun gürigia luagun gumadi, turóbuli wéinamuti kéiburi gudemei, laburuchagun sandi, hagadeiruni gürigia sun le geyegubei wau kéiburi duna, garabali luma katei líbeina lira, luma lasansiragun ligaburi dan. Ariñagatiña besafu gumadimatiña anhein lan masansirun wamá ligaburi wóuserun, wuribabei lan lani resultóu.

3. Kaba füramasei agunfulira lábugiñe Arúeihani lánina Milu Irumu?

³ Lídanme Larúeihan Bungiu le ñeinba lubéi larúeiha Hesukrístu le Liráü úara hama 144,000, aranseheina lubéi Arúeihani le sun dañu le adügǘwaalibei houn gürigia luma lun Ubóu le ñein lubéi hawinwanda. Lábugiñe Arúeihani lánina Milu Irumu lagunfuliruba füramasei le ladügübei Heowá woun ani ruti gurasu woun: “Nadügüba aban iseri sielu luma aban iseri ubóu. Labulieidúaba sun le sügühalibei, úaalime aritaguti luagun” (Isa. 65:17). Kaba burí katei buíduburiti asusereda lídanme dan ligía? Íbini siñá lan warihini, íderagua lumutiwa profesía burí le tídanbei Lererun Bungiu arihei katei burí le ‘marihínwagilibei’ (2 Ko. 4:18).

4. Ka turóbuli úmabei hagagibudagua hibe-agei gürigia uguñe weyu lun hadarirun haban?

⁴ Ka gürigia mabusenrunbei aban muna to lani, to ñein lumuti chóuruñu lan hasandiragun liduheñu houngua? Gama lumoun, gaturobulintiña hibe-agei gürigia uguñe weyu lun hadarirun haban. Murugu haña gürigia lidan burí uburugu, ani saragu hádangiñe háfaguña lidere ibagari lidan burí fulasu gudemeti lidan aban óunwenbu gudemei. Houn gürigia ha aban uénedü hawinwandun tidan aban muna to gadünamatu.

5, 6. a) Ida luba lagunfulirun Isaíasi 65:21 luma Mikeasi 4:4? b) Ka lunbei wadügüni lun warihini lagunfulirun füramasei burí le?

⁵ Lábugiñe Larúeihan Bungiu harihibei sun gürigia lagunfulirun hayumahan lun gaban hamá, lugundun ariñagati Isaíasi lidan aban profesía: “Hábunaguba gürigia haban ábame haganóun tidan, hábunaguba beibei ábame héiginu tin” (Isa. 65:21). Inarüni añahein hamá gürigia ha gábantiña uguñe weyu, añahein hagía hawinwanduña tidan aban óunwenbu muna ani wéiriti hafulasun. Gama lumoun, súnwandan láuñanu lan anufudei luéi heferidirunu ladüga turóbuli lánina seinsu o ladüga híweruhoun o ladüga amu katei wuribatimati. Lagidarubei giñe Larúeihan Bungiu idiheri burí le, lugundun abürühati profeta Mikeasi: “Haganóuba súngubei manufudeuga, gayaraabei hemeraagun lábugiñe tamuñadiri hanadürigu” (Mik. 4:4).

⁶ Ka efekütu lunbei gani lani lubuidun emenigini le wawagu? Le linarün katei, sun wagía mégeitiwa aban muna gadünamatu lun wawinwandun. Gama lumoun, lubaragiñe wáfaagun lun wibihinu muna to wayumahaboun —háfuga lau wabuinchun lau saragu dúeiti—, ma buídutimati hamuga lun wetenirun lun füramasei le adüga láalibei Heowá woun? Ladimurehaña Hesusu luougua dan le lariñagunbei: “Daritiña gasigamu huyu lun haganóun ñein, gádibu hagía dunuru; anhein au le Wügüri Garaüwarügüti, úati ni halíaba lan nabalachagüdei nichügü” (Luk. 9:58). Gabafuti meha Hesusu lun lábunagunu o lagañeihanu muna tótima buídutimaboun to gayaraboun libihinu somu gürigia. Ka uagu madügün lubalin? Chóuruti mabusenrun lan meha Hesusu ladireiruni laritagun luéi Larúeihan Bungiu ni lun ladügün somu katei le gayarabei lanügüni íchigei Larúeihan Bungiu lidan libiaman lúgaaru. Gayarati san wáyeihani lani Hesusu hénpulu lau sensiyu lan wakipuruni wagu, luma lau mígirun wamá lun lagüraguniwa línsiñegu umegeguni luma idiheri le lanügübei lúmagua? (Mat. 6:33, 34.)

7. Ka meha lisuunibei Heowá houn gürigia luma houn animaalugu?

⁷ Gürigia hagumuhóunbaña lídangiñe sun le meha ladügübei Heowá, ani hagía súdinitimabaña lídangiñe sun le ladügübei ubouagu. Ka méhati lisuunibei houn? Ariñaga lumuti Heowá dan le lariñagunbei lun Liráü le Ígiramaübei le Nadagimeinti Hemeniti: “Guentoti adüga waméi wügüri. Wenegebei, gabafubei hawagu úduraü, dunuru, ibiñanigu, animaalugu áraabuna hama sun ha aduruuharügübaña múarugu” (Agu. 1:26). Ítara liña, lisuuni meha Bungiu lun gabafubei lan Adán tuma Ewa hama ha híbiri gürigia hawagu animaalugu.

8. Ka ligaburi hóuserun animaalugu kamanibei uguñe?

⁸ Inarüni funa san gayara lan gabafu hamá gürigia hawagu animaalugu luma lun hawinwandun lidan darangilaü hama? Gíbetiña gürigia buiti hanaagun houngua hama halügüniña ounli, mesu, hama burí amu ibiñanigu. Ágiati hama animaalugu áraabuna? Ariñagati aban ariñahani: “Aturiahatiña siensiasi ha wínwanhañabaña yarafa houn animaalugu áraabuna ani aturiaha hamaaña, arihaaña luagu sun lan animaalugu ha átubalin timiligin háguchu gayarati hasandirun ugundani, íruni o katei líbeina lira”. Sun wagía ariha wamaaña arufuda katei kéiburi anufudei o igañi dan le harihin lídanñanu lan denchaü, gama lumoun gayarati funa san  harufudun ínsiñeni, o katei líbeina lira? Ariñagati giñe ariñahani le buga iridúaalibei: “Lidan aweirideina hamá harahüñü animaalugu ha átubalin timiligin háguchu, ligía harufuduni lubuiduntima hagaburi: óunwenbu iarani le hawagubei lánina harufudun ínsiñeni”.

9. Ka asansiruni gayarabei wagurabuni hawagu animaalugu ámuñegü?

⁹ Ligíati moun lumuti lubéi taweiridun wanigi dan le waliihan tidan Bíbülia luagu ñeinbei lan darangilaü hadan gürigia hama animaalugu (aliihoualá Isaíasi 11:6-9 luma 65:25). Ka uagu? Haritagua waméi ariñaga lan Heowá lun Noé luma houn liduheñu dan le háfuridunbei tídangiñe árüka: “Sun animaalugu ha ubouagubaña hadadagaruba lau anufudei huéi”. Anufudei le hasandirubei animaalugu, góunigi lumutiña (Agu. 9:2, 3). Chóuruti gayara lan lagidarun Heowá lídangiñe anufudei ligía hawéi o lagidaruni sunsuinagubei lun gayara lan lagunfulirun le lisuunibei lúmagiñe furumiñeti dan (Ose. 2:18). Mame lubuidun dan houn ha lúnbaña hawinwandun ubouagu lídanme dan ligía!

10. Libe-agei dan, ka uagu wayahuaha?

¹⁰ Dan meha le larihinbaliña Salomón “saragu amudirawagutiña ani óuserawagua hagía” ubouagu, aba lariñagun lau íruni: “Ayahuahatiña ha óuserawagubaña, gama lumoun úatiña kaba lan íderaguaña” (Apur. 4:1). Ítaramemegili katei ubouagu ani másiñati wuribatimahali lan. Ka mayahuahangilibei luagu somu katei? Inarüni anihein lan dan ayahuahatiwa ladüga gunda wamá, gama lumoun, libe-agei dan íruni tidan wanigi adügübei lun wayahun.

11. Kátima abahüdaguni tídangiñe Bíbülia ánhingichubarun hanigi?

¹¹ Samina wamá luagun fiú abahüdaguni le tídanbei Bíbülia le ídanbei tañuludagua hanigi gürigia ani arufuda haméi le hasandirubei. Kéiburi dan le “layahun Abüraámü luagu tounwen Sara” dan le meha gúnfuliharu san-wein-sedü irumu (Agu. 23:1, 2). Dan le tayouragunbei Noemí houn tídiñugu “aba hayahun” lidan biama ókaasion (Rudu 1:9, 14). Dan le lasandirunbei urúei Esekíasi ani subudi lumuti meha lounwe lan, aba lafurieidun lun Bungiu ábati “layahun lau igarigu”, genegeti adüga lan katei le lun tañuludagun lanigi Heowá (2 Uru. 20:1-5). Ka anigi mañuludagunboun dan le waliihani abahüdaguni luagu leyeedagun apostolu Féduru lau Hesusu? Dan le laganbunbalin layugurahan gayu “aba láfuridun Féduru [...], aba layahuahan lau igarigu” (Mat. 26:75).

12. Kaba awalidaguni líchiga Larúeihan Bungiu houn gürigia?

¹² Sun wagía súfuritiwa lamiselu —ñǘraüti o wéiriti—, ani súngubei mégeitiwa wibihin awalidaguni luma gurasu. Ligíaba lanüga Arúeihani lánina Milu Irumu houn gürigia ha lúnbaña hawinwandun lábugiñe lagumadihan, lugundun füramasetu Bíbülia “laragahabei [lan Bungiu] sun háguira [gürigia]; úaalime óunweni ni ayahuni ni íruni ni igarigu” (Aruf. 21:4). Gúndaatiwa lau wasubudiruni úaali lanme íruni, ayahuni luma igarigu. Ani füramase haali Bungiu lagidaruba lan aban katei wuribatimati, létima háganibei gürigia: óunweni. Ida luba ladügüni?

13. Ka efekütu lánibei óunweni wawagu lúmagiñe lafigouhan Adán?

¹³ Lúmagiñe lafigouhan Adán, gabafuti óunweni hawagu gürigia gafigountiña kei aban ágani le magañeirúaditi le uéibei siñá lan lanurahóuniwa, ani barühali íruni luma igarigu le mébehati houn gürigia (Rom. 5:12, 14). Gayarati wariñagun ‘aganóuaña lan míñunu gürigia kei idamuni’ lidan sun habagari “ladüga hanufude luéi óunweni” (Ebü. 2:15).

14. Kaba asusereda danme le ‘lagünrinchawagún’ óunweni?

¹⁴ Füramasetu Bíbülia óunweniba lan, “lagumuhóun ágani agünrinchawaguti” (1 Ko. 15:26). Biámabaña sétanu gürigia asagara buiti lídangiñe katei le. Luéigiñe aban oubaü, gayarabei  hásügürün “saragu gürigia” ha awinwandubaña uguñe weyu wínwanñu lidoun iseri ubóu, ani mámabei mosu hóunwegun. Luéigiñe le aban oubaü, gayarabei habagaridunya saragu míñunu gürigia ha ábürühaañabaña lidoun óunweni. Gayarati san hasaminarun luagun óunwenbu ugundani le lunbei hasandiruni “saragu gürigia” danme le heresibirúniña ha lúnbaña háguyugun? Akutiha wamá fiú águyuguni le uágubei tabahüdagua Bíbülia le gayarabei larufuduni woun ida luba lan háguyugun hilaaña ámuñegü (aliihoualá Márükosu 5:38-42 luma Lúkasi 7:11-17).

15. Ida luba san hasandiragun hungua danme le háguyugun hiduheñu?

¹⁵ Samina wamá luagu dimurei burí le lídanbei bérusu le buga waliirubei “aba taweiridun hanigi gürigia” luma “aba hagumeserun íchiga uéiriguni lun Bungiu”. Lun hamuga ñéinñadiwa lan meha lidan burí ókaasion gúndaati ligía, másiñati giñe wagundaaraguba lan hamuga saragu. Chóuruti luagu lanügüba lan hásaarun waduheñu lídangiñe óunweni aban ugundani le móubawati woun. Ariñagati Hesusu: “Lachülürüba dan lun haganbuni sun hilaguaaña numalali, ábame háfuridunga lídangiñe hamúaha” (Huan 5:28, 29). Íbini águyuguni lan aban lídangiñe katei burí le ‘marihínwagilibei’ uguñe weyu, chóuruti ligíaba lan aban lídangiñe sügǘ le lunbei mabulieidúniwa lan lídangiñe sun le lunbei lasuseredun ubouagu.

16. a) Ka uagu lunti lubéi wadimurehan lau ugundani luagu burí “katei le [...] marihínwabei”? b) Ida liña líchugun Pábulu dǘgüdaguaü houn kristiánugu korintuna?

¹⁶ Gürigia ha úaraguabaña lun Heowá lidan burí dan herénguti le, hibihiba aban lubuidun ibagari ámuñegü. Lau sun marihin wamagili lan lubuidun burí abiniruni le, anhein wakipura súnwandan lidan wasaminan líderagubadiwa lun wetenirun lun katei le súdinitimabei luma lun mígirun wamá lun lasagaruniwa katei burí  lánina ubóu le lídangiñe üma le buídubei (Luk. 21:34; 1 Tim. 6:17-19). Danme le waturiahanu Bíbülia o wáhuduragun lun Heowá hama wafamilian, danme le wadimurehan hama wíbirigu lidan damuriguaü, danme le wíchugun külase tídangiñe Bíbülia, o danme le wapurichihan adimureha wamá lau ugundani luagu lubuidun burí katei le uágubei wemenigida. Anhein wadüga ítara, wakipurubei emenigini le lidan wasaminan luma tidan wanigi. Ítara liña meha líchugun apostolu Pábulu dǘgüdaguaü houn líbirigu kristiánugu, gayarati wariñagun adüga lan lun hasaminarun luagun burí katei le lunbei lasuseredun danme le lagumuchun Larúeihan Kristu le lánina Milu Irumu. Amisuraha wamutün lun hararamagun asaminara luagun létima mini lubéi dimurei burí le lariñagubei Pábulu lidan 1 Korintuna 15:24, 25, 28 (aliihoualá).

17, 18. a) Ida liña meha “Búngiurugü[ñein] lan sun katei hadan súngubei” lidan lagumeseha habagari gürigia ubouagu? b) Kaba ladüga Hesusu lunya lagiribudun darangilaü luma úarani?

¹⁷ Úati amu manera buítimati lun wadimurehan luagu ida luba lan ibagari danme le lagumuchun Larúeihan Kristu le lánina Milu Irumu kei lau burí dimurei le: “Búngiurügüba [...] sun katei hadan súngubei”. Ka mini lubéi dimurei burí le? Lubaragiñe meha lafigouhan Adán tuma Ewa, hádangiñetiña meha lufamilian Heowá dandu ha siélubaña kei meha ha ubouagubaña ani lidan meha darangilaü luma úarani hawinwanda hámagua. Heowá le Bungiu Suntigabafu ligía meha agumadihabei luagu sun le ladügübei, dandu ánheligu kei gürigia. Gayarati meha háhuduragun kada aban hádangiñe lun ayanuha hagía luma, ani biní lumutiña meha Heowá. Ligía meha ‘sun káteibei hadan súngubei’.

¹⁸ Aba lagadeirun lubuidun umadaguaü le, dan le ladügünbei Satanási lun hebedaagun gürigia kóntüra Heowá. Gama lumoun, lúmagiñe irumu 1914 ladügüña Larúeihan Bungiu le ídanbei Kristu lan Urúei aransehani lunya lagiribudun darangilaü luma úarani (Efe. 1:9, 10). Lábugiñe Arúeihani le lánina Milu Irumu lagunfuliruba lubuidun burí katei le ‘marihínwagilibei’. “Ligíabati liabin lagumuchagüle sun katei” lememe lagumuchagüle Larúeihan Kristu le lánina Milu Irumu. Kábati asusereda lárigiñe? Íbini ‘rúaali lan sun ubafu lun Hesusu dandu sielu kei ubouagu’ mabusenrunti lagidaruni lubara Heowá luéi. Lubaragiñe lira, lau ǘnabuguni ábame “lederegeruni arúeihani lun Bungiu Úguchili”, layusurubei lubafu luma liñun lubara “lun luéirigun Bungiu” (Mat. 28:18; Fili. 2:9-11).

19, 20. a) Ida luba harufuduni sun ha lúnbaña hawinwandun lábugiñe Larúeihan Bungiu luagu anha hamá lun liricha Heowá lun larúeihan? b) Kaba burí katei buíduburiti wibiha ámuñegü?

¹⁹ Lúmounme dan ligía, mafigounhañame gürigia ha lúnbaña lábugiñe hamá Larúeihan Bungiu. Háyeihabei lani Hesusu hénpulu ani lau sun hagundan hánharuba lau ǘnabuguni lun liricha Heowá lun larúeihaniña. Lun harufuduni busén hamá hadügüni mósume hawandun aban lagumuhóun óuchawaguni (Aruf. 20:7-10). Lagumuhóun, ábame lagumuchún lun súnwandan hau sun ebedaagutiña dandu gürigia kei sífirigu. Mame lubuidun dan ligía! Sunme gürigia hama sun ánheligu halawahabei Heowá lau ugundani, ani ligíaba “sun katei hadan súngubei” (aliihoualá Sálumu 99:1-3).

²⁰ Ka burí katei buíduburiti le lunbei lanügüni Larúeihan Bungiu yarafa madise ínchahabadün lun hetenirun luma lun háfaagun lun hadügüni lugundan Heowá? Hígiraguagüdüba san hungua lun leyeedagunün emenigini iyeeniti luma lubuidun ibagari le lídanbei ubóu le lábugiñebei lubafu Satanási? Desidírütimabadün san luéigiñebadün lan lóubadina liricha Heowá lun larúeihan? Anhein ítara liña lubéi, arufuda huméi lidan sun le hadügübei luagu busén humá hadügüni lun súnwandan. Ábameti hawinwandun lau darangilaü luma lubuidun dan luagu milu irumu luma lun súnwandan!