1-3. a) Ka burí sügǘ arufudubalin le larufudahabei Hesusu lidan biama lídangiñe lani hénpulu? b) Lun burí ka álügüdahani megei wamá óunabagülei?

SAMINA humá: lun hamuga lamuriahan aban gürigia súdiniti huma lun hanügüni tidan hikarün lidoun aban fulasu lun laríagun lungua luma somu gürigia súdini. Fiú minutu lubaragiñe hidin áluahei aba híchugun fe lóuguaali lan higasin, siñá hadügün amu katei luéidigia hidin furesegueina agañeiha. Sunti áüngüra lan agañeiha gasi, aniha wügüri ligía digiguañahadügü luagun sun oubaü áluahaün, siñá lagurabahan. Keiti marihin lani hachülaagun, aba lamuriahan luma amu gürigia lun lanügüni. Dan le hachülürün úaali gürigia ligía ñein. Ida luba hamuga hasandiragun hungua?

² Guentó samina humá huguya lan gürigia súdiniti ligía ani anúadiraadün lan ǘrüwa wügüriña ha uágubaña hafiñera lun híchugun fiú wadagimanu súdiniti houn lun hadügüni. Aba hafuranguagüdüni houn ka lan lunbei hadügüni, ani lau lóufudagun ánhatiña ǘrüwagubei lun hadügüni le uágubei hariñaga houn. Gama lumoun, dan le hagiribudun aba híchugun fe luagu biámarügüñanu lan hádangiñe adügei le hariñagubei houn. Le lǘrüwan móuchungubeiti ladügüni le hariñagubei lun, ani lanwoun lira, áluaharügüti kaba lan lariñaga lun lafuranguagüdüni lébuna madügün lani. Ida luba hamuga hasandiragun hungua?

³ Yúsuti Hesusu sügǘ libe le lidan hénpulu hawaguti diisi nibureintiña luma lidan hénpulu luáguti seinsu. Lau burí hénpulu le, afuranguagüda lumuti ka lan uagu ñeinbaña lubéi kristiánugu anuadirúaaña ha úaraguatiña ani duaritiña hama amu ha mítarantiña lídounme lagumuhóun dan (Mat. 25:1-30). * Ani águyuguagüda lumuti saminaü le dan le lariñagunbei: “Agagudúañu humá, ladüga ibidiñeti hun kaba lan weyu, ni kaba lan oura”, dan le ladimurehanbei luagu dan le ñeinba lubéi liabin lun lagunfulirun lau lasiadihan Bungiu kóntüra ubóu le  lábugiñebei lubafu Satanási (Mat. 25:13). Chóuruti súdini lan giñe eweridihani le woun uguñe weyu. Ka buiti lanügübei woun gaganbadi wamá lun Hesusu redei wagíame agagudúañu? Kátaña arufudubaña aranseñu haña lan lun herederun wínwanñu? Ani ka lunbei wadügüni lun agagudúañu wamá?

4. Ka uagu memegeirun wabéi wagía kristiánugu werederun “aríagu luagun wachi” lun agagudúañu wamá?

⁴ Anihein burí dasi le ídanbei mosu lan woudin luagu dan, kéiburi dan le wawadigimaridun tidan aban fábürika, woudin lúbiñe surusia o dan le wárügüdün busu o amu ugunei to góurateti táfayahan. Aniheinti amu luwuyeri wadagimanu le ídanbei denchá lan herederun nadagimeintiña etenira lun wachi, kéiburi gürigia ha nadagimeinbaña éñegucha watu o esefuha gürigia. Lidan burí wadagimanu le súdinitimati hetenirun nadagimeintiña lun le hadaagubei lubaragiñe hetenirun lun oura. Ítarameme, eibu layarafaduntima lagumuchagüle ubóu le, eibu súdinitima lan wadagimanu le lánina lasubudirawagüdǘniwa katei burí le adüga láalibei Heowá lun wasalbarun. Gama lumoun, wagía kristiánugu memegeiruntiwa werederun “aríagu luagun wachi” lun agagudúañu wamá. Le linarün katei, ibidiñe lan woun kábatima lan weyu luma oura lachülüra lagumuchagüle ubóu barüti buiti woun kéiburi lidan seingü manera.

5. Ka uagu ru lubéi libidiñe woun ídaba lan lagumucha ubóu le chansi woun lun warufuduni ka lan tídanbei wanigi?

⁵ Lidan furumiñeti lúgaaru, ibidiñe lan woun ídaba lan lachülüra lagumuchagüle ubóu le, ruti chansi woun lun warufuduni ka lan tídanbei wanigi. Inebeti waricha lun Heowá, ligíati líchugunbei líbürei woun lun desidírü wamá anhein úaraguabadiwa lubéi lun. Inarüni sun lan wagía busentiwa werederun wínwanñu lárigiñe lagumuchun ubóu, gama lumoun, mámarügü ladüga busén wamá wawinwandun lun súnwandan weseriwidunbei lun Heowá, seriwitiwa lun ladüga hínsiñe lan woun (aliihoualá Sálumu 37:4). Hínsiñeti woun wadügüni le lubeibei ani subudi wamuti lun lan wabuidun guánarügü sun le larufudahabei woun (Isa. 48:17). Marihin wamuti lugumadin kei aban ihürügu (1 Huan 5:3).

6. Dan le weseriwidun lun Heowá ladüga hínsiñe lan woun, ida liña lasandiragun lungua, ani ka uagu?

⁶ Lidan libiaman lúgaaru, libidiñe woun ídaba lan lagumucha ubóu le ruti chansi woun lun wagundaaragüdünu lanigi Heowá. Dan le weseriwiduni ladüga hínsiñe lan woun —mámarügü ladüga wasaminaruña lan luagun aban weyu o aban afayeiruahaü—, íderagua wamuti Heowá arufudei luagu yeeti lan Satanási le lágani (Hob. 2:4, 5; aliihoualá Ariñawagúni 27:11). Dan le wasaminarun luagu sun igarigu luma asufuriruni le lanügübei Mafia, lau sun wagundan wárügüda luéigiñe lóubadina Heowá lidan liricha lun larúeihan ani máharuntiwa lun lisalufurin lagumadihan Satanási.

7. Ka uagu busén hubéi heseriwidun lun Bungiu íderagua hugíame amu gürigia?

⁷ Lidan lǘrüwan lúgaaru, libidiñe woun ídabatima lan lagumucha ubóu le, ínchaha lumutiwa lun masaminarun wamá wawouguarügün luma lun weseriwidun lun Heowá íderagua wagíame amu gürigia. Uguñe weyu añahein gürigia ha mafiñetiña luagu Bungiu, gama lumoun hanufudetiña luéi málühali lan ubóu le agumucha lidan aban óunwenbu günringuaü. Ligía hariñagunbei: “Hou wamá, gurá wamá, lugundun haruga wóunwegun” (1 Ko. 15:32). Ánheinti wagía manufudetiwa. Mámarügüñein wawouguounrügü wasaminara (Ari. 18:1). Lubaragiñe lira, lau sun wagundan yusu wamuti wadaani, were luma wámati lun wasubudiragüdüni uganu buiti le luáguti Larúeihan Bungiu houn amu gürigia (Mat. 16:24). Hínsiñeti woun weseriwidun lun Bungiu, dántima le wíderaguña lan amu gürigia lun hasubudiruni.

8. Ka hénpulu tídangiñeti Bíbülia arufudubalin woun mosu lan wafiñerun luagu Heowá sunsuinagubei luma tuagu Lererun?

⁸ Lidan ligadürün lúgaaru, libidiñe woun kaba lan weyu ni kaba lan oura lagumucha ubóu le íderagua lumutiwa lun wafiñerun luagu Heowá sunsuinagubei luma lun wadügüni le tariñagubei Lererun. Hanarime lan wafiñerun wawougua ligía aban lídangiñe katei le ladügagüdübei figóu woun ani wéiriti furangu lan larihíniwa. Eweridihati Pábulu houn sun kristiánugu: “Le [...] haritaguabei luagu deregüdagua lan léibugun luma Bungiu,  góunigila, ábürühadügüliñein”. Murusun dan lubaragiñe lalidihadihaniña Hosué lubúeingu Bungiu lidoun Fulasu le Füramasewabei, féridi hamuti wein-ǘrüwa-milu ísüraelina lufulesein Heowá. Ariñagati Pábulu: “Susereti sun le [...] aba labürüdǘn tidan Lererun Bungiu keisi arufudahani woun, wagía le wínwanbei lidan lagumuhóun dan le” (1 Ko. 10:8, 11, 12).

9. Ida luba labuiduragüdüni lénrengunga wagaburi, íderagua láwame lun wayarafadun lun Bungiu?

⁹ Lidan liseingün lúgaaru, ibidiñe lan woun kaba lan weyu liabin lagumuchagüle ubóu ídehati lun labuiduragüdüni lénrengunga le ídangiñebei wásügüra wagaburi (aliihoualá Sálumu 119:71). Chóuruti wawinwanduña lan lidan burí “weyu hénrenguti” lidoun lagumuhóun dan le (2 Tim. 3:1-5). Iyereegutiwa houn hibe-agei gürigia ha lílana ubóu le lábugiñebei lubafu Satanási, ligíati gayara lubéi wasufurirun éibaahouni luagu wafiñen (Huan 15:19; 16:2). Gama lumoun ánhawa ǘnabugu áluaha wameime ladundehan Bungiu, ítara luba óuchawaguni woun kei aban watu gemeti le abuiduragüdübalin o arumadagügübalin wafiñen. Lubaragiñe wígiraguagüdün woungua lun óuchawaguni, wayarafadatimaba lun Heowá lidan aban manera le masaminarunñaha wamagili (Sant. 1:2-4; 4:8).

10. Ka uagu anirein lubéi weyu éibaagueina liña lan lásügürün dan?

¹⁰ Gayarati genege lan woun furese lan lásügürün dan o hámaru lan. Dan le bereseguñadiwa lan ani metenitiwa lun wachi fureseti léibaagun dan. Ítarameme, ánhawa etenira lun lubuidun wadagimanu le líchugubei Heowá woun, másiñati lachülürün weyu luma oura lubaragiñe wíchugun fe. Rúhaña hibe-agei kristiánugu anuadirúaaña aban buiti hénpulu lidan katei le. Adimurehaya wamá murusun luagu le asuseredubei lárigiñe lañuurun Hesusu luagu lálana arúeihani lidan irumu 1914. Warihubei arufuda hamá fiú hádangiñe luagu aranseñu haña lan, ánheinti ha híbiri maranseruntiña.

11. Lárigiñebei irumu 1914, ka uagu hasaminara fiú kristiánugu anuadirúaaña luagu ladarasaruña lan Iyubudiri?

¹¹ Adimurehaya wamá luagu hénpulu le uágubei ladimureha Hesusu. Lun hamuga meha subudi hamani würiña nibureintiña o musu kaba lan oura liabin adari o iyubudiri, memegeiruntiña hamuga meha herederun agagudúañu. Kei méhati ibidiñe lubéi houn mosu meha agaradahañu hamá. Fiuraü irumu lubaragiñe irumu 1914, subudi hamaali meha kristiánugu anuadirúaaña luagu espechalibei lan irumu ligía, íbini ibidiñe lan houn kaba lan asusereda lidan. Dan le lachülürünbei irumu ligía ani masuseredunti le hagurabubei, aba hasaminarun fiú hádangiñe luagu ladarasaruña lan Adari. Dan lárigiñe, ariñagati aban íbiri: “Fiú wádangiñe agurabatiwa yebe tídangiñe sun wanigi woudin sielun lidan furumiñeti dimaasu lánina diisi-hati [irumu 1914]”.

12. Ida liña harufudun kristiánugu anuadirúaaña úaraguni luma duari?

¹² Gayarati wasaminarun luagun maguraasuni le hasandirubei kristiánugu anuadirúaaña dan le harihinbalin luagu machülürün lan lagumuchagüle ubóu lidan dan le hagurabubei. Lanwoun lira, dan le lageindawagunbei Furumiñeti Wuribu Wéiriti súfuritiña éibaahouni. Aba lararamagun apurichihani, ítara liña lira kamá hamuga aba harumugun kristiánugu anuadirúaaña. Gama lumoun lidan irumu 1919 aba lachülürün oura lun hagagudun. Ñǘbuinhali meha Hesusu arihei ida liña lan léibugun aransehani le ladügübei Bungiu lun áhuduraguni inarüniti. Ariha lumuti Hesusu mabuidun hamá saragu hádangiñe, ligía heferidirunbalin lubuidun chansi le hámabei lun hasigirun awadigimarida lun Urúei (Mat. 25:16). Ítara haña meha kei würiña nibureintiña ha maranserunbaña lau gasi bóugudin luéi le lídanbei halanpun. Ani ítara haña meha kei musu magúaliti, ladüga mabusenrun hamá hadügün sákürifisiu burí luagu Larúeihan Bungiu. Gama lumoun, hibe-agei kristiánugu anuadirúaaña arufudatiña meha ua lan ni kata adügüti lun múaragun hamá lun Iyubudiri, arufuda hamuti giñe weiri lan habusenrun heseriwidun lun, íbini lidan lénrengunga le hásügürübei lidan sun irumu le ladurarunbei wuribu.

13. Ka igaburi harufudubei kristiánugu anuadirúaaña lárigiñe irumu 1914, ani ka igaburi harufudubei uguñe?

¹³ Lidan irumu 1916, ariñagatu garüdia to: “Íbirigu, wagía ha arufudubaña aban lubuidun igaburi lidan katei luáguti Bungiu madügünti le desidírü  lubéi Heowá lun weferidiruni waguraasun. Mama meha wagundan wabusenrubei wadügün; ligía, dan le wíchugunbei fe luagu bulíeiguatiwa lan lidan katei le wagurabahabei lasusereduba lan lidan diisi-hati irumu 1914, gúndaaguatiwa ladüga masansirun lani Aburemei Laransehan lun lúaradun luma le wagurabubei. Mabusenruntiwa meha lun Ladügüni lira. Gunfuranda wamani Laransehan luma Lisuuni ligíarügüñein wabusenrun”. Uguñe weyu, añahagua kristiánugu ha anúadira láañabaña Aburemei arufudei ligiaméme igaburi lánina ǘnabuguni luma gúnfuli luma Bungiu. Mariñaguntiña luagu Bungiu lan íchugubalin sun le habürüdübei haritagunrügün, gama lumoun aranseñu haña lun hadügüni le lariñagubei Hesusu houn lunti lan hadügüni ya ubouagu. Añahein giñe “saragu gürigia” ha “amu mudún” —kristiánugu ha hemenigibaña hawinwandun lun súnwandan ubouagu— ha áyeihabaliña kristiánugu anuadirúaaña lidan agagudúañu haña lan luma lidan ubebeni le harufudubei (Aruf. 7:9; Huan 10:16).

14. Ida liña lóunigiruniwa gaganbadi wamá lun le larufudahabei musu úaraguati ani gunfuranda ligía?

¹⁴ Ítara kei kristiánugu anuadirúaaña, rédeitiña saragu gürigia agagudúañu lau gaganbadi hamá lun le larufudahabei musu úaraguati ani gunfuranda ligía ladüga ru laali lan Heowá kárugu le lun. Ítara liña hachoururuni lun ñein lan saragu sífiri sandu hama luma saragu subudi tídangiñeti Lererun Bungiu le ítarabei kei gasi (aliihoualá Sálumu 119:130 luma Huan 16:13). Ítara liña hibihin erei lun aranseñu hamá lubá lagiribudun Kristu, kípugua hagía houngua beresegu íbini hagagibudagun luma lanarime lóuchawagun hafiñen. Aban hénpulu, dan le meha tídanñanu lubéi aban furisun hani nasi, ábanrügüñoun meha Bíbülia hama íbirigu, ligíati hafurieidunbei lun Heowá lun líchugun lanwoun ariñahani tídangiñeti Lererun houn. Murusun dan lárigiñe, aba híchugun fe sun liña lan meha ladaürǘn aban íbiri ani ibiha lan lebelaagüdün saragu Garüdia Atalaya to málügili lúmagiñe táfuridun lidan lúruna le adügǘbei lau fulansu. Fiú irumu lárigiñe, abahüdaguati Ernst Wauer, aban kristiánu anuadirúaali, aban hádangiñe íbirigu ha erederubaña wínwanñu: “Íderagua lumutiwa Heowá lun wafurendeiruni lau wachügü saminaü burí le gíchigaditi iderebugu le lídanbei arütíkulu burí ligía”. Ariñagati giñe: “Uguñe ménrengunti libihíniwa arufudahani lúmagiñeti Bungiu, gama lumoun arufudamémegidiwa san luagu gebegi lan woun? Chouru numuti luagu anihein lan saragu abinirúni luma Heowá habá ha afiñetiña luagu, kíputiña úaraguni ani resibi haméi larufudahan”.

15, 16. Ka afayeiruahaü heresibirubei biama íbirigu maríeitiña ladüga ubebeni le harufudubei lidan hani ministeriu, ani ka wafurendeirubei lídangiñe hénpulu kéiburi le?

¹⁵ Adüga hamuti giñe amu mudún sun hayaraati  lun híchugun ídemuei houn líbirigu Kristu lau beresegu hamá lidan wadagimanu lánina apurichihani (Mat. 25:40). Mítarantiña kei “musu salufuriti, [ani] móuniti” le uágubei ladimureha Hesusu lidan lani hénpulu, ladüga lau sun hagundan adüga hamuti burí sákürifisiu le mégeiwabei lun híchuguni Larúeihan Bungiu lidan furumiñeti lúgaaru lidan habagari. Aban hénpulu, aba lamisurahóun Jon tuma Masako lun hapurichihan houn gürigia ha adimurehabaña cheini lidan ageiraü Kenia. Ásuhatiña yebe furumiñe, gama lumoun lárigiñe hafurieidun lun Heowá akutiha haméi gádantiña, aba desidírü hamá háguyun ñeinhin.

¹⁶ Gíbeti afayeiruahaü heresibirun luagu áfaaguni le hadügübei. Ariñagatiña: “Hanarimeti lubuidun apurichihani ya!”. Gumesetiña aturiahoun Bíbülia hama sedü gürigia ani wínwantiña saragu lubuidun sügǘ. Ariñagatiña giñe: “Sagü weyu weteingiruni Heowá luagu líchuguni chansi woun lun weseriwidun ya”. Le linarün katei, gíbetiña íbirigu ha arufudaañabaña inarüni lan busén hamá hakipuragun houngua beresegu eseriwida lun Bungiu meberesenga ídaba lan lachülüra lagumuchagüle ubóu le. Samina wamá hawagun saragu milu kristiánugu ha eresibihaañabaña tídangiñe Leskuela Galaadü ani gumeseeña eseriwida kei misioneru. Anhein busén hubéi hasubudiruni ida liña lan aban weyu lidan libagari aban misioneru, aliiha huméi arütíkulu “Hacemos todo lo que podemos”, tidan Garüdia Atalaya to lánina 15 lidan diisi-hati irumu 2001. Lídanme aünha lan aliihei, álügüdagua humá hungua ida luba lan haganwoundagüdüni heseriwidun lun lalawahóun Heowá luma lun hibihin ugundani.

17. Ida liña wibihin buiti lídangiñe libidiñe woun ídabatima lan lachülüra lagumuchagüle ubóu?

¹⁷ Furanguti ibiha wamá saragu buiti lídangiñe libidiñe woun ídabatima lan lachülüra lagumuchagüle ubóu. Lubaragiñe lábürühan warüna o weferidiruni waguraasun, ténitiwa lun wadügüni lugundan Heowá ani yarafatimati wasandiragun woungua lun Wáguchi le hínsiñehabubei. Lau wakipuruni wáhabu “luagu awouhagülei” mígirunga lun ladügün somu katei lun wadireiruni wasaminan luéi weseriwidun lun Iyubudiri, adügati katei le lun wabuinchun lau ugundani (Luk. 9:62).

18. Ka uagu mabusenrun wabéi lun ledebilidun wafiñen?

¹⁸ Óufudagueina liña layarafadun luéyuri laguseragüdün Bungiu. Mabusenruntiwa wadügün lun lírudagun Heowá ni lun lírudagun Hesusu. Biángubei hagía rúhaña lubuidun burí chansi lánina eseriwiduni woun lidan burí lagumuhóun dan le. Ma lueirin eteingiruni le wasandirubei hawagu ladüga hafiñerun wawagu! (Aliihoualá 1 Timotéu 1:12.)

19. Ida liña warufuduni luagu aranseñu waña lan?

¹⁹ Hemenigi wamá yebe wawinwandun sielu o lidan Paraísu ubouagu, desidírü wamá wagunfulirun lau kárugu le ru láalibei Bungiu woun lánina wapurichihan luma wadügün disipulugu. Ibidiñemémegili woun kaba lan weyu luma oura lachülüra lagumuchagüle ubóu, gama lumoun, mégeitiwa funagia wasubudiruni? Gayarati ani mosu wasigirun arufudei luagu aranseñu waña lan (Mat. 24:36, 44). Ánhawa afiñera luagu Heowá sunsuinagubei, ru wameime Larúeihan lidan furumiñeti lúgaaru, maweiyasunbei acharara woun (Rom. 10:11).