1, 2. Ka burí lamiselu kamanibei uguñe weyu, ani ka wemegeirubei wagía lubúeingu Bungiu?

WAWINWANDUÑA lidan aban dan le ñein lubéi lasusereda óunwenbu burí lamiselu. Barüti hárabaganali múarugu o baranaha, léigaahan watu, fuludu, bolkán, hiriri luma herigini günringuaü lidan sun ubóu. Súfuritiña giñe gürigia sun luwuyeri turóbuli le hani hábugua o hama haduheñu ani adügati le lun habuinchun lau anufudei luma íruni. Tinarün Bíbülia dan le tariñagun gayara lan “lasuseredun katei magurabunti” lun furumiñeguarügü gürigia (Apur. 9:11, NM).

² Sun lubúeingu Bungiu awanda wamaali sun lénrengunga le lau ganigi. Gama lumoun, mégeitiwa lun aranseñu wamá lubá le lunbei liabin éibutima layarafadun lagumuchagüle ubóu le. Ida lubati gayara lan wawanduni turóbuli sin weferidiruni waguraasun? Kaba íderaguawa lun wawanduni lénrengunga lau ganigi?

3. Según Rómana 15:4, ka gayarabei líchugun gurasu woun dan le gaturobulin wamá?

³ Lau sun gíbetimahaña lan gürigia gaturobulintiña uguñe weyu, le linarün katei, aniheingubeiñein turóbuli lúmagiñe saragu milu irumu. Ariha waméi ida liña lan meha hawandun fiú lubúeingu Bungiu ha meha awinwandubaña lidan tidaani Bíbülia lérengunga lidan habagari (Rom. 15:4).

4. Ka meha uma lagagibudagua Dawidi, ani halíagiñe lasagara erei lun lawanduni?

⁴ Lidan furumiñeti lúgaaru, adimureha wamá luagu Dawidi. Lidan burí amu katei, gagibuguati meha lun ligañi aban urúei, hábürühan láganiñu luagun, hárügüdüniña áganiñu lúmarigu, hagarabaagun luwügüriñanigu luagun luma burí amu katei le íchugubei saragu idiheri tun lanigi (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8). Abahüdaguni le tídanbei Bíbülia luáguti libagari Dawidi, arufuda lumuti buidu  súfuri lan meha saragu. Gama lumoun, magumuchunti turobuli lau lumadagua luma Bungiu. Halíagiñe lasagara erei? Ariñagati buin lau afiñeni: “Sefu lumuti Aburemei nibagari, kaba uei nanufudeda?” (Sal. 27:1; aliihoualá Sálumu 27:5, 10).

5. Ka íderagubalin Abüraámü tuma Sara awandei saragu lénrengunga le úmabei hagagibudagua lidan habagari?

⁵ Guentó, samina wamá luagu Abüraámü tuma Sara. Biángubei hagía sügǘ hamuti libe-agei dan lidan habagari awinwanda kei terencha tidan kianpu. Íbini meha anihein lan dan hásügürün lénrengunga, desidírütiña lun gagibugua hamá luma burí turóbuli, kéiburi ilamaü luma burí háluahan néchanigu ha yarafabaña houn wuribu hama (Agu. 12:10; 14:14-16). Ida liña hadügüni? Ariñagatu Lererun Bungiu luagu “agurabaha lan [Abüraámü] lebelurun lidoun lubuidun uburugu le derebugubei ebu, uburugu le ladügübei Bungiu” (Ebü. 11:8-10). Lubaragiñe meha lígirun Abüraámü tuma Sara lun lachawahaniña ubóu, ru hamuti harihin luagun le lunbei liabin ámuñegü.

6. Ka idan mosu lan wáyeihani Hobu?

⁶ Awandati giñe Hobu lanarime burí lénrengunga. Samina wamá luagu le lasandirubei dan le larihinbei gumugua lan buga sun burí katei buiti le lídanbei libagari (Hob 3:3, 11). Leti wuribatimabei lídangiñe sun le lásügürübei, ua lan meha gunfurandalani ka lan uagu lasuseredunbei sun lamiselu ligía lun. Gama lumoun mábürühanti larüna, kípurügü lumuti lafiñen luagu Bungiu (aliihoualá Hobu 27:5). Ma lubuidun hénpulu lánina úaraguni!

7. Ka burí sügǘ ídangiñebei lásügüra Pábulu lidan leseriwidun lun Bungiu, ani ka íchugubei ganigi lun lun lasigirun lubaruaguoun?

⁷ Guentó, ariha waméi lani Pábulu hénpulu. Sügüti apostolu le lídangiñe “denchaü uburugu”, lidan “fulasu mageirawati” (NM), “baranaha”. Ani awandati giñe “ilamaü luma mágürabu”, “lidiliga luma tilouguan daüguaü”. Ariñagati awanda lan íbini “aban áriebu luma aban weyu anagü baranaha”, chóuruti ladimurehaña lan meha luagu aban lídangiñe wéiyaasu le tadibiragunbei ugunei lau (2 Ko. 11:23-27). Gama lumoun, súnwandan meha buidu lan ligaburi, ítara liña larihíniwa lidan le lariñagubei lárigiñeraü háfaraali lan yebe hilagubei ladüga leseriwidun lun Bungiu: “Arufudahati lira woun lun wemenigidun luagu Bungiu le gabafubei lun lásaaragüdüniña hilaaña, mama lun wawougua lan wemenigida. Sefu lumutiwa Bungiu, ani lesefuramémeñadiwa” (2 Ko. 1:8-10). Míbetiña gürigia ásügürütiña lídangiñe saragu sügǘ hanarimeburiti luriban ítara kei le ídangiñebei lásügüra Pábulu. Gama lumoun, gayarati gunfuranda wamani le lasandirubei, ibiha wagíame gurasu lárigiñe wakutihani hénpulu lánina ganigi le líchugubei.

8. Ka sügǘ ídounbei gayara lan wéiguadun? Abahüdagua humá aban sügǘ.

⁸ Gíbetiña gürigia aba hadiheridun saragu dan le harihini günringuaü, turóbuli luma lénrengunga le uguñebei weyu. Íbini houn fiú kristiánugu susereti. Lani, * aban íbiri to meha eseriwiduboun lidan dan dayarüti úara luma tani weiriei lidan ageiraü Australia, féridi tumuti temenigin luma tugundan sódini dan le lariñawagúnbei tun anihein lan kánserü luagu taniguagu. Ariñagatu: “Sándigüda lumutina árani, aríagua nuguya nungua kei aban gürigia to móunitu lun ni kata”. Ani lanwoun lira, aba libugúniwa tani weiriei ladüga aban sandi luagu lanaganébu, ani mosu buga tóunigiruni. Ka gayarabei wadügüni ánhawa adariragua woungua lidan aban sügǘ ítarati?

9, 10. a) Ka katei lunbei mígirun wamani lun ladügüni Mafia? b) Ka efekütu lunbei gani lani le ariñawagúbei lidan Adügaü 14:22 wawagu?

⁹ Mabulieida waméi yusu lani Satanási turóbuli burí le úmabei wagagibudagua lun leferidiragüdüni wafiñen. Mígira wamá lun lagidaruni wagundan. Ariñagati Ariñawagúni 24:10: “Anhein ábürüha barüna dan le lidan ban lénrengunga, lóuguarügü liña bere”. Ánhawa asaminara hulili luagu burí hénpulu le tídanbei Bíbülia kéiburi le akutiha wamaalibei, gayarabei wagagibudagun lau ganigi luma burí turóbuli.

 ¹⁰ Le linarün katei, siñati wagurabun masuseredunbei lan ni kata wuribati woun, lubaragiñe lira, lunti wagurabuni (2 Tim. 3:12). Ariñagati Adügaü 14:22 luagu “lunti lan wasufurirun saragu lun gayara lan webelurun lidoun larúeihan Bungiu”. Gama lumoun, lubaragiñe weferidiruni waguraasun lunti warihini turóbuli kei aban chansi lun warufudun ganigi luma afiñeni luagu ídemuei le líchugubei Bungiu woun.

11. Ka lunbei wadügüni luéi lagidaruni lamiselu waguraasun?

¹¹ Mégeitiwa wetenirun lun burí katei le adügübei lun wasandiragun woungua buidu. Afuranguagüdatu Lererun Bungiu: “Dan le gunda tan lanigi gürigia gúndaati ligibu, dan le sandi tan lanigi, híruti ligibu” (Ari. 15:13). Barühaña aturiahatiña siensiasi saragu dan lúmagiñe hasubudiruni dan le lan harihini gürigia katei burí buiti le lídanbei gádantiña lau sun gaturobulin hamá, barǘ lan lira saragu buiti lun hátuadi. Saragu sánditiña ha únbaña tichugúa pili to lautu súgara, sanditiña aba lan hóuchaadagun ladüga samina hamá hátuña lan árani inarüniti. Arihúaali giñe dan le lan latun aban gürigia aban pili to uáguboun lasaminara tadügüba lan dañu lun, ábatima lan lasandirun. Ánhawa adiherida saragu luagu katei le wásiñarubei aransera, adügarügübei lun lábürühan warüna. Leti buídubei míchugun lan Heowá “pili lautu súgara” woun. Dan le wáfagun somu lamiselu, yusu lumutu Lererun, yusu lumutiña wíbirigu ha hínsiñehabubaña luma lani sífiri sandu lun líchugun iderebugu inarüniti woun. Anhein wáluaha ǘrüwagubei ídemuei le, wibihayaba erei. Ligíati, lubaragiñe werederun adiherida luagu katei wuribati, adüga waméi wayaraati lun wararamun lun kada turóbuli ani kipu wameime wasaminan luagu katei burí buiti le susereelibei lidan wabagari (Ari. 17:22).

12, 13. a) Ka íderagubaliña lubúeingu Bungiu lun hawanduni luriban efekütu le burí lígirubei somu günringuaü? Ru humá aban hénpulu. b) Dan le lasuseredun somu günringuaü, ida liña furangu lan larihíniwa kátima lan súdinitimabei lidan ibagari?

¹² Lidan burí lagumuhóun irumu, susereeli óunwenbu burí günringuaü lidan fiú ageiraü, ani kristiánugu ha awinwandubaña ñein arufudaaña awanda hamá saragu. Lídanbei lagumeseha irumu 2010 susereti aban lueirin hárabaganali múarugu luma baranaha lidan ageiraü Chile le agünrinchagubarun haban saragu íbirigu. Gíbetiña hádangiñe féridi hamuti hamegegun, híbiri féridi hamuti le meha hawadigimaribei lun hanuriagun houngua. Gama lumoun meferidirun hamuti hamadagua luma Bungiu. Aban íbiri gíriti Samueli le eferidirubarun luban, ariñagati: “Lau sun wásügürün lídangiñe lénrengun sügǘ le, dandu au kei nani weiriou sigitiwa apurichiha, ñüdün wagía adamuridagua. Afiñetina íderagua lániwa katei le lun meferidirun wamani waguraasun”. Úara hama saragu íbirigu, sigitiña eseriwida lun Heowá.

¹³ Lidan nefu-hati irumu 2009, buíngüdati saragu huya lóugiñe 80 lídangiñe kada san fulasu Manila, uburugu le lichügüdinabei ageiraü Filipina. Aban wügüri rísiti le eferidirubei saragu lídangiñe lirisin lidan fuludu, ariñagati: “Adügaali fuludu lun ábanmeme lan gádantiwa dandu rísitiña kei gudemetiña, wagagibudaguña luma burí ligiaméme turóbuli”. Haritaguagüda lumutiwa le luagu eweridihani hanichiguti le líchugubei Hesusu: “Óundaragua humá irisini sielu, le ñein lubéi siñá lan háhüchün hamutiri, magahüdadi ligía ni kata, mebelu hagía híwerutiña íweruha ñein” (Mat. 6:20). Gürigia ha awinwandubalin habagari lúnrügü háluahan umegeguni —le agumuchagubei lau lufuresen— aba hírudagun saragu dan le híchugun fe luagu meseriwín lan katei burí le lun ni kata. Buítimati wetenirun lun wamadagua luma Heowá, lugundun meferidiragüdün lubéi katei burí le asusereduti geyegu wau umadaguaü ligía wawéi (aliihoualá Ebüréu 13:5, 6).

14. Ka burí resun wámabei lun ganigi wamá?

¹⁴ Wisá lumutiña Hesusu lani disipulugu luagu ñeinbei lan buga saragu turóbuli, danme le aniha lan agumadiha keisi Urúei marihúaditi sielu, gama lumoun ariñagati houn: “Manufudedagua  humá” (Luk. 21:9). Le linarün aban katei, lau Hesusu kei Urúei luma Heowá le adügübalin sun katei wámagiñe, ígiraguati resun wama lun ganigi wamá. Ruti Pábulu dǘgüdaguaü lun Timotéu lau burí dimurei le: “Míchugunti Bungiu aban [s]ífiri lánina anufudei woun, aban [s]ífiri lánina ubafu, ínsiñeni, luma ragüguaü unguaü líchugubei woun” (2 Tim. 1:7).

15. Kátaña arufudubaña aban afiñeni derebuguti luagu Bungiu, ani ida luba wáyeihan aban ganigi ítarati?

¹⁵ Gíbetiña lubúeingu Bungiu ha arufudubalin lau le hariñagubei afiñe hamá le gumuti luagu. Aban hénpulu, ariñagati Dawidi: “Nabureme nérebei, le óunigirubalina; luagu temenigida nanigi ani íderagua lumutina. Gúndaatu lubeiti nanigi” (Sal. 28:7). Ariñagati Pábulu: “Lidan sun katei le, sügütiwa hau agañeirutiña lídangiñe le hínsiñehabubei woun” (Rom. 8:37). Ani danbei le lagagibudagun Hesusu luma peliguru, arufuda lumuti furangu derebugu lan lumadagua luma Bungiu dan le lariñagunbei: “Mama [...] nábuguañadina ladüga anihein Núguchi numa” (Huan 16:32). Arufuda lumuti dimurei burí le hariñagubei sun hagía luagu afiñe hamá luagu Heowá sunsuinagubei. Ánhawa áyeiha aban igaburi libe le harufudubei, ganigibadiwa lun wagagibudagun luma furumiñeguarügü turóbuli (aliihoualá Sálumu 46:1-3).

16. Ka san uagu weiri lubéi lisudinin waturiahanu Lererun Bungiu?

¹⁶ Ganigitiwa wagía kristiánugu ladüga subudi wamani Bungiu ani afiñe wagía luagu, mama ladüga afiñe wamá wawougua. Ligíati mosu lubéi waturiahanu Bíbülia, to Lererun. Aban íbiri to lauboun sandi lánina lueirin íruni, afuranguagüda tumuti ka lan íderagubarun: “Aliiha numuti bérusu burí létima íchugubei dǘgüdaguaü nun saragu wéiyaasu”. Wayusuruña san dan lun wagunfulirun lau Guñoun lánina Áhuduraguni lidan Familia? Anhein ítara liña lubéi, gayarabei wáyeihani igaburi le larufudubei abürühati Sálumu le ariñagubei: “Wéiriti línsiñe barufudahan nun! Sun weyu nau asaminara luagun!” (Sal. 119:97).

17. a) Kaba íderaguawa lun wakipurun aban lubuidun igaburi? b) Írida humá somu sügǘ lídangiñe le haliihabei le íderagua laadün lidan hibagari.

¹⁷ Anuhein giñe saragu agumeiraguagüdüni tídangiñetu Bíbülia wama to ederebudagüdübalin wafiñen luagu Heowá. Gíbeeña íbirigu líderagun abahüdaguni le burí áfuridubei tidan burí wani agumeiraguagüdüni luagu habagari amu. Aban hénpulu, aban íbiri lídangiñetu aban ageiraü le Ásiabei, táfaguña aban sandi lánina lasansiragun ligaburi tasandiragun tungua sódini, aba taliihan aban abahüdaguni luagu libagari aban íbiri le meha eseriwidubei kei mísioneru le unbei buidu lan lidin lidan lageindagun luma ligiaméme sandi. Ariñagatu íbiri to lau saragu eteingiruni: “Íderagua lumutina [abahüdaguni ligía] lun gunfunranda nani nisandi ani ruti emenigini nun”.

18. Ka uagu lunti lubéi wasagarun saragu buiti lídangiñe afurieiduni?

¹⁸ Anihein giñe aban ídemuei wama le gayarabei líderaguniwa lidan furumiñeguarügü gádantiwa:  afurieiduni. Afuranguagüda lumuti apostolu Pábulu lueirin lisudinin afurieiduni, dan le líchugunbalin eweridihani le: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Fili. 4:6, 7). Sagatiwa san saragu buiti lídangiñe ídemuei le lun wibihin erei dan le wagagibudaguña lan luma burí lénrengunga? Aban nibureinti alunduna gíriti Alex, le lühali ageindagua luma sandi le lánina lueirin íruni, ariñagati: “Nayanuhan luma Heowá luma naganbuni le lariñagubei tídangiñe Lererun ítara liña nun kei aban salufu”.

19. Ida luba warihini lidiniwa lidan adamuridaguni?

¹⁹ Adamuridaguni hani kristiánugu, ligía amu ídemuei le wámabei. Ariñagati abürühati Sálumu: “Óunwenbu nayumahan lun ñéinbadina lan lidan tibürürün [sanduariu]” (Sal. 84:2). Sandiguatiwa san woungua kei ligía? Lani, íbiri to buga uáguboun wadimureha, ariñaga tumuti ida liña lan meha tarihini adamuridaguni: “Mosu meha ñein nan busén nuguya mabusenrun. Subuditi meha nun, anhein lan busén nubéi líderagunina Heowá, mosu meha ñein nan”.

20. Ida liña líderaguniwa apurichihani?

²⁰ Íderagua lumutiwa giñe wapurichihani uganu buiti luáguti Larúeihan Bungiu lun ganigi wamá (1 Tim. 4:16). Aban íbiri lídangiñetu ageiraü Australia, to sügüharuboun lídangiñe ámuñegueinarügü turóbuli ariñagatu: “Agunbiraha lumutina aban wéiyaali lidan afiñeni lun nidin apurichiha, lau sun mabusenrun nan meha nidin, ñǘdüntina. Ani chóuruti líderaguñadina lan meha Heowá, lugundun sagü meha náfuridun apurichiha wéiriti meha nugundan” (Ari. 16:20). Ariha hamaali saragu kristiánugu houngua, dan lan le híchugun iderebugu lun hafiñen amu aba giñe lederebugudun hafiñen. Dísegüda hamuti giñe idiheri lídangiñe hasaminan lau herederun beresegu lidan wadagimanu le súdinitimabei (Fili. 1:10, 11).

21. Ka katei gayarabei wachoururuni?

²¹ Rúhali Heowá saragu ídemuei woun lun wagagibudagun lau ganigi luma burí lénrengunga lidan wabagari. Ánhawa áfaagua lun wasagarun buiti lídangiñe, samina wagíame hulili luagu burí abahüdaguni le waliihabei hawagu lubúeingu Bungiu ani áyeiha wameime hénpulu lánina ganigi le híchugubei, gayarabei wachoururuni luagu buídubei lan lidin woun danme le wagagibudagun luma burí turóbuli. Éibume ayarafadeina lan lagumuchagüle ubóu le, gayarati lasuseredun katei burí wuribati woun, gama lumoun gayarati wariñaguni lememe lariñagubei apostolu Pábulu: “Huchúatiwa, gama lumoun magünrinchagun hamutiwa. [...] Ligía mábürühan lubéi warüna” (2 Ko. 4:9, 16). Anhein anihein lubéi Heowá wámagiñe, gayarabei wagagibudagun lau ganigi luma burí lénrengunga lidan wabagari (aliihoualá 2 Korintuna 4:17, 18).