1. Ka idan amu lubéi füramasei le ladügübei Bungiu luéi le hadügübei gürigia?

HEOWÁ ‘Lubungiutebei inarüni’ (Sal. 31:5). Kei gafigoun habéi gürigia, mama sun dan gayara lan lafiñerúniwa hawagu; ánheinti Bungiu ‘siñati leyeehan’ (Ebü. 6:18; aliihoualá 1 Lúrudu 23:19). Súnwandan lagunfuliruni Bungiu lisuuni lun habuidun guánarügü gürigia. Aban hénpulu, sun meha le lariñagubei lidan lagumeseha luagu ladügübei lan dan le lagumeserunbei adügei “aba lasuseredun ítara”, ligíati lúmounbei lagumuchun lisisin weyu “aba larihin Bungiu luagu buidu lan sun le ladügübei” (Agu. 1:6, 7, 30, 31).

2. Katei san luéyuribei lemeraagun Bungiu, ani ka uagu lariñaga sagüráu lan?

² Lárigiñebei laríaguni Heowá sun meha le adüga láalibei, aba lawisahan luagu lagumeserun aban lisedün weyu. Mama meha layanuhaña luagu aban weyu le lánina wein-gádürü oura, layanuhaña meha luagu aban dan migifeti le ídanbei lemeraagua madügünga ligía ámuya katei lidan Ubóu (Agu. 2:2). Ani magumuchungili “weyu” ligía (Ebü. 4:9, 10). Mafuranguagüdün tumuti Bíbülia ídabugatima lan lagumesera “weyu” ligía, gama lumoun gumeseti somu dan lárigiñe tadügǘniwa Ewa, to lani Adán weiriou, kéiburi sisi-milu irumu guentó. Málühali Larúeihan Hesukrístu le lánina Milu Irumu agumesera, ani ligíaba adüga lun lagunfulirun le lisuunibei Bungiu lun Ubóu lúmagiñe ladügüni: lun aban lan paraísu le ñein lumuti hawinwanda gürigia lun súnwandan sin figóu (Agu. 1:27, 28; Aruf. 20:6). Gayarati san wachoururuni wawinwanduba lan lau ugundani ámuñegü? Anha, gayarati wachoururuni, lugundun aba “labiniruni [Bungiu] lisedün weyu, aba lariñagun lun lareidúniwa [o lun larihíniwa kei sagüráuti]”. Ruti abinirúni le ichouruni woun luagu meberesenga lan anhein asusereda somu katei le magurabúnti, lagunfuliramémebei lan Bungiu lisuuni  danme lagumuchun luéyuri emeraaguni (Agu. 2:3).

3. a) Ka ebedaaguni iñuragubei lárigiñeraü lagumeserun luéyuri lemeraagun Bungiu? b) Ida liña lariñagun Heowá lagidarubei lan lani ebedaaguni resultóu?

³ Lárigiñeraü lagumeserun luéyuri emeraaguni, aba lagadeirun katei. Satanási, aban meha lani Bungiu ánheli, iñuraguati lungua kei aban bungiu ágani dan le lariñagunbalin furumiñeti iyeeni tun Ewa, adüga ligía lun maganbadi tan lun Bungiu le adügübarun (1 Tim. 2:14). Adügatu giñe Ewa lun lúaradun tani weiriei tuma lidan katei wuribati le tadügübei (Agu. 3:1-6). Ebedaaguni le, ligía katei wuribatimati lídangiñe sun le susereelibei ubouagu, lugundun ariñagati Satanási yee lan Heowá, íbini ítara masaminarunti meha Heowá mosu lan láfiñurun lagunfulirubei lan lisuuni. Lubaragiñe lira, ariñagarügü lumuti ida luba lan lagidaruni lani ebedaaguni ligía resultóu, dan le lariñagunbei fiú dimurei le meha lunbei gunfurandawa lan danme le larihini Heowá lúnhali lan lasubudiragüdüni. Ariñagati lun Satanási: “Níchuguba gáganiguaü bidoun tuma würi, hadoun badügawagun hama tadügawagun. Hachuinrubei tadügawagun [Adügawaguni le füramasewaalibei] bábulugu, bágüreime lihilin hagudi” (Agu. 3:15; Aruf. 12:9).

4, 5. Ka katei lábugiñeti lúrudu layusurubei Abüraámü lidan burí somu ókaasion?

⁴ Lidan meha lagumeseha habagari gürigia, háfuga úati meha mégeiwa lan lachoururúniwa aban katei lau áfiñuruni. Memegeiruntiña ni ánheligu ni gürigia ha mafigountiña ha hínsiñehabubaña lun Bungiu ani áyeiha haméi háfiñurun, lugundun súnwandan hariñaguni inarüni ani afiñetiña hawagu ha híbiri. Gama lumoun, aba lasansiragun katei dan le hafigouhanbei gürigia. Lau lásügürün dan, aba kamanihali lan iyeeni luma amañounhani haganagua gürigia, ñeinti harihei megei hamá háfiñurun lun hachoururagüdüni hariñaguñein lan inarüni lidan burí katei súdiniti.

⁵ Kéiburi lidan ǘrüwa ókaasion, yusu lumuti Abüraámü áfiñuruni kei aban katei lábugiñeti lúrudu (Agu. 21:22-24; 24:2-4, 9). Adügati aban fiñú lárigiñe lagañeiruni wuribu kóntüra lurúeite Elamü hama lánigu. Ariñagatu Bíbülia dan le lan lagiribuduña lubéi Abüraámü wuriburugugiñe aba lan lidin lurúeite Sálemü luma lurúeite Sodoma lubaroun. Le furumiñeti, urúei le gíribei Melükisedekü, “lufadirin [meha] giñe Bungiu”, keiti fádiri lubéi ligía, aba labiniruni Abüraámü ani alawahalei Bungiu luagu líderaguni Abüraámü lun lagañeiruniña láganiñu (Agu 14:17-20). Danti le lálugunbei lurúeite Sodoma líchugun afayeiruahaü lun Abüraámü luagu lesefuruniña lumutuniña hawéi súdaragu ha ebelurubaña fulasurugun, aba lóunabun Abüraámü: “Fiñuhadina lun Nabureme, Bungiu le íñutimabei, le adügübalin sielu luma ubóu, luagu márügüdünbadina lan ni kata le bani, ni íbini murusun filu o aban lan tagürüga sabadu lun nagüürünu nisabadun, mariñagun báamuga lachülürün somu weyu luagu buguya lan arisidagüdübalina” (Agu. 14:21-23).

6. a) Ka lubuidun hénpulu líchugubei Abüraámü woun? b) Kaba buiti wibiha lídangiñe laganbadi Abüraámü?

⁶ Adügati Heowá áfiñuruni lun líderaguniwa afiñera luagu burí lani füramasei, gumeseti áfiñuruni ligía lau burí dimurei kéiburi le: “Au le Aburemei [Heowá] fiñutiña luagu nibagari” (Ese. 17:16). Tidan Bíbülia dariwati lóugiñe bián-wein áfiñuruni le ladügübei Heowá, ani háfuga subudiwatimati lan áfiñuruni le ladügübei lun Abüraámü. Eibu lásügürün dan adügati Heowá saragu füramasei le asubudiragüdübalin hádangiñeba lan buga ladügawagun Abüraámü luma Isaakü le liráü liabin Adügawaguni le füramasewaalibei (Agu. 12:1-3, 7; 13:14-17; 15:5, 18; 21:12). Ábati ladügün Heowá lun lásügürün Abüraámü lídangiñe aban óuchawaguni hénrenguti, lugundun ariñagati lun lun ladagaragüdüni liráü le hínsiñebei lun keisi sákürifisiu. Desidírüti Abüraámü  ladügüni le lariñagunbei Bungiu lun lau lóufudagun, dan le lafaramémeeli lan Abüraámü Isaakü, aba lerederuni aban ánheli. Ábati ladügüni Bungiu áfiñuruni le lun: “Ladüga badügüni katei le, mamahantibu lau biráü le ábanrügüti nun, fiñutina nuagu guánarügü luagu nabinirubadibu lan saragu. Nadügüba lun gibe hamá badügawagun kei waruguma ha siélubaña, kei giñe lagu sagoun le lárubei beya. Hagañeirubaña giñe háganiñu súnwandan, habinirúba giñe sun néchani ha ubouagubaña hádangiñe ladüga adüga baali le nubeibei” (Agu. 22:1-3, 9-12, 15-18).

7, 8. a) Ka uagu ladüga Bungiu aban áfiñuruni lun Abüraámü? b) Ida luba hasagarun “amu mudún” buiti lídangiñe áfiñuruni le ladügübei Bungiu?

⁷ Ka uagu láfiñurei Bungiu lun Abüraámü luagu lagunfulirubei lan le füramase láalibei? Lun líchugun gurasu luma iderebugu lun hafiñen hame lúnbaña harúeihan úara luma Kristu, gürigia hame lúnbaña hádangiñebaña lan libiaman fánreinti hádangiñe “ladügawagun Abüraámü” (aliihoualá Ebüréu 6:13-18; Gal. 3:29). Kei lafunranguagüdüni apostolu Pábulu, “ru laali Bungiu lererun woun, ruléi láfiñurun luagu; gayaraati wemenigidun luagu bián katei ligía [füramasei luma áfiñuruni le ladügübei Heowá], ladüga siñá lan leyeehan Bungiu. Ani [...] sun ha ñǘbuinbaña lun Bungiu [...] gayaraati hárügüdün gurasu; wagía le afiñeelibei luagu emenigini le ru laalibei woun”.

⁸ Mámarügüñanu kristiánugu ha anuadirúaaña ibiha buiti lídangiñe áfiñuruni le. Fiñuti Heowá habinirúba lan “sun néchani ha ubouagubaña” hádangiñe ladügawagun Abüraámü (Agu. 22:18). Hadan sun néchani ha, añahein “amu mudún” ha lánigu Kristu, gürigia gaganbaditiña ha hemenigibaña hawinwandun lun súnwandan ubouagu danme le paraísuhali (Huan 10:16). Hemenigi wamá yebe wawinwandun sielu o ubouagu lunti ítaramemela kada aban wádangiñe, “arufudei afiñeni le darí lumoun lagumuhóun” lau gaganbadi wamá lun Heowá lidan sun le wadügübei lidan wabagari (aliihoualá Ebüréu 6:11, 12).

9. Ka láfiñurubei Bungiu dan le meha heseriwiduña lubéi ladügawagun Abüraámü kei idamuni houn ehiptuna?

⁹ Saragu sígulu lárigiñe, ábanya láfiñurun Heowá luagu lagunfulirubei lan le füramase lubéi lun Abüraámü dan le lóunahanbalin Moisesi adimureha hama ladügawagun Abüraámü ha meha eseriwidubaña kei idamuni houn ehiptuna lidoun dan ligía (Afu. 6:6-8). Aba ladimurehan Bungiu luagu meha ókaasion ligía, lariñaga: “Dan le nanúadirunbalin Ísüraeli, fiñutina [...] nasagaruniña Ehiptugiñe lun nanügüniña lidoun ageiraü le naranserubei habá, aban ageiraü le rísibei, ani buidu ligía lun ábunaguni” (Ese. 20:5, 6).

10. Ka füramase lubéi Bungiu houn ísüraelina lárigiñebei lesefuruniña lídangiñe hamudirawagúniwa Ehiptu?

 ¹⁰ Lárigiñe lesefuruniña Heowá ísüraelina luéi hamudiraguniña ehiptuna, ábanya ladügüni áfiñuruni le: “Anhaün lubeiti ñüdün lau le nubeibei lidan sun katei, gúnfuli huguyame luma nidaradun, huguyaba numutuniña ha hínsiñetimabaña nun hádangiñe sun gürigia. Fádirigubadün [“ani urúeigubadün”, NM] nun, gürigia deregeguatiña houngua nun” (Afu. 19:5, 6). Ma lubuidun chansi! Ánhaña buga gaganbadi gayarabei meha hemenigi hamá saragu hádangiñe ísüraelina layusuruniña Bungiu kei urúeigu luma fádirigu lun labiniruniña ha híbiri gürigia. Dan lárigiñe, aba lafunranguagüdüni le meha adüga láalibei hawagu, ábati lariñagun Heowá houn: “Aba [...] nadügün aban daradu [lau fiñú buma]” (Ese. 16:8).

11. Ka hadügübei ísüraelina danbei le lariñagun Bungiu houn lun hadügün aban daradu luma keisi aban néchani le anuadirúaali?

¹¹ Mafosurun lumutiña Heowá ísüraelina lun háfiñurun gaganbadibaña lan, ni lun hadügün aban umadaguaü espechaliti luma. Hagía ariñagubaña lau sun hagundan: “Wadügübei sun le lariñagubei Bungiu” (Afu. 19:8). Ǘrüwa weyu lárigiñe, aba lariñaguni Heowá houn ka lan lunbei hadügüni kei aban néchani le anuadirúaali. Furumiñe aba haganbuni Diisi Gumadi, lárigiñe aba líchuguni Moisesi le líbiri adundehani le leresibirubei lúmagiñe Bungiu houn (Afu. 20:22–23:33). Kati hadügübei? “Aba hóunabun súngubei: ‘Wadügübei sun le lariñagubei Wabureme!’.” (Afu. 24:3.) Dan lárigiñe, aba labürüdüni Moisesi lúrudu burí ligía tidan “líburu to lánina daradu”, ábati laliirunu lau umalali héreti hagibugiñe sun ísüraelina lunya gayara lan haganbuni. Ouraméme ligía, ábanya füramase hamá sun ísüraelina luagu lǘrüwan wéiyaasu: “Wíchaaguba woungua lun wadügüni sun le ariñaga láalibei Wabureme” (Afu. 24:4, 7, 8).

12. Ka ladügübei Heowá hama lílana néchani le lanúadirubei lau daradu le hadügübei?

¹² Lau lóufudagun gumeseti Heowá agunfulira lau le yuubei lun lídangiñe daradu lánina Lúrudu. Ida liña ladügüni? Dan le ladügagüdünbei aban kianpu lun láhudurawagun lun, ru ligía fádirigu. Ítarati, gayarahali meha hayarafadun gürigia gafigountiña lun. Ánheinti ísüraelina fureseti habulieiduni deregeguaña lan buga houngua lun Bungiu. Lau hóuserun ítara, “híruguagüda hamutiha Lubungiute Ísüraeli” (Sal. 78:41). Aban hénpulu, dan le meha aniha lubéi Moisesi eresibira lanwoun adundehani lúmagiñe Bungiu ligibuagu wübü Sinaí, aba hasaminarun ísüraelina fuí laaña lan Moisesi, ábati heferidiruni haguraasun, aba hagumeserun eferidirei hafiñen luagu Bungiu. Kei resultóu, aba hadügün aban liyawa bágasu lauti golu ábati hariñagun: “Ísüraeli, anihán bubungiutebei le asagarubalibu Ehiptugiñe!” (Afu. 32:1, 4). Ábati hagumeserun abuluchagua ligibugiñe bágasu ligía ariñageina hadügüña lan aban ‘fedu lidan liri Heowá’, ani adagaragüda hagía sákürifisiu burí lun. Dan le larihinbalin Heowá katei ligía, aba lariñagun lun Moisesi: “Ma loufun hígiruni [ísüraelina] üma le uágubei nariñaga houn lun hafalaruni” (Afu. 32:5, 6, 8). Ma lirun lúmagiñe lan dan ligía lun lubaruaguoun, aba héchudun ísüraelina adüga füramasei le magunfulirun hamuti (1 Lur. 30:2).

13. Ka áfiñuruni ladügübei Bungiu lun urúei Dawidi, ani ka lánibei áfiñuruni ligía luma Adügawaguni le meha füramasewaalibei?

¹³ Dan le larúeihanbei Dawidi, adügati Heowá biamaya áfiñuruni lun labiniruniña sun lubúeingu ha gaganbadibaña. Lidan furumiñeti lúgaaru, aba láfiñurun lun Dawidi laduraruba lan lálana larúeihan lun súnwandan (Sal. 89:35, 36; 132:11, 12). Mini lan lira hádangiñeba lan buga ladügawagun Dawidi liabin Adügawaguni le füramasewaalibei, ligíati lagúaruba lubéi buga lun “ladügawagun Dawidi” (Mat. 1:1; 21:9). Le linarün katei, lau ǘnabuguni ariñagati Dawidi luagu ladügawagun ligía “Nabureme”, ladüga gunfunrandalani íñugutimabei lan buga lubara Kristu sügǘ lau (Mat. 22:42-44).

14. Ka áfiñuruni ladügübei Heowá libügürü Adügawaguni le füramasewaalibei, ani ida liña wibihin buiti lídangiñe?

 ¹⁴ Lidan libiaman lúgaaru, adügati Heowá lun labürühan Dawidi aban profesía le arufudubei luagu leseriwiduba lan buga giñe Urúei móubawati ligía kei Fádiri le Íñugutimati houn gürigia. Lidan meha Ísüraeli úati meha urúei eseriwiduti kei fádiri. Sun meha fádirigu lídangiñetiña meha lani Lewí türibu, ánheinti urúeigu lídangiñetiña meha lani Hudá türibu. Gama lumoun, adimurehati Dawidi luagu ladügawagun súdiniti le lidan aban profesía le ñein lubéi lariñaga: “Lariñahare Bungiu lun Nabureme: ‘Ñuruba luéigiñe nóunwenren darí níchuguniña báganiñu lábugiñoun bugudi’. Adügaali Aburemei aban áfiñuruni, ani madüraagun lubéi: ‘Fádiri buguya lun súnwandan, ítara kei Melükisedekü’” (Sal. 110:1, 4). Gumeseeli Hesukrístu, Adügawaguni le füramasewaalibei, arúeiha sielu, ítara kei lariñaguni profesía le. Leseriwiduña giñe kei Fádiri le Íñugutimati houn gürigia, ani kei Fádiri líderaguñanu gürigia ha asakürihaañabaña lun buidu lan hanaagun houngua luma Bungiu (aliihoualá Ebüréu 7:21, 25, 26).

15, 16. a) Ka bián néchani unbei tagúara Bíbülia Ísüraeli, ani ka lídangiñe biángubei labinirubei Bungiu uguñe weyu? b) Ka gumadi líchugubei Hesusu houn lánigu libügürü áfiñuruni?

¹⁵ Dan le maha habéi ísüraelina heresibiruni Hesukrístu, aba leferidiruni néchani le ubaraü espechaliti le meha hámabei lílana ligibugiñe Bungiu, ani féridi hamuti giñe chansi lun heseriwidun kei fádirigu luma kei urúeigu. Ariñagati Hesusu houn hábutigu huríu: “Lagidarúaba [...] larúeihan Bungiu huéi, [...] ábame lichugúniwa houn gürigia ha ederegeruti alubahani” (Mat. 21:43). Iseri néchani le ñǘbuinbei leweñegua binadu Ísüraeli gumeseti lidan fedu le gíribei Pentekosutesi lidan irumu 33 lárigiñe lidaani Hesusu, dan le líchugunbalin Bungiu lani sífiri sandu hawagun kéiburi san-wein lani Hesusu disipulugu ha óundaraguñubaña Herusalén. Subudiwati iseri néchani le kei “Ísüraeli le lani Bungiu” ani lau lóufudagun aba meha hóundaragun saragu milu kristiánugu lídangiñetiña sun néchani le subudiwabei lidoun dan ligía hamoun (Gal. 6:16, NM).

¹⁶ Mítaranti iseri néchani le kei binadu ísüraelina, lugundun anihagua arufuda gaganbadi lun Bungiu. Aban lídangiñe gumadi le unbei gaganbadi hamá lílana, gániti luma burí áfiñuruni le meha ladügübei Bungiu. Lidan meha lidaani Hesusu, héchutiña meha saragu gürigia áfiñura ani magunfulirun hamuti, fiñú hagía luagu burí katei le úati súdini lan (Mat. 23:16-22). Gama lumoun, arufudahati Hesusu houn lánigu disipulu “moun lumuti lan háfiñurun ni ka uagu” ariñagati giñe houn: “Ariñagarügü humá ‘anha’ o ‘uá’, máfiñurunga ni ka uagu; ladüga furumiñeguarügü amu katei hariñagun luéi lira lúmagiñeti Mafia” (Mat. 5:34, 37).

17. Kaba burí álügüdahani wakutiha lidan le aban arütíkulu?

¹⁷ Mini lan san le lariñagubei Hesusu luagu siñá lan ladügǘniwa áfiñuruni ni aban wéiyaasu? Ani létima súdinibei, ka uagu súdini lubéi wagunfulirun lau wererun? Wakutihabei óunabagülei lun burí álügüdahani le lidan le aban arütíkulu. Adügalá wararamagun asaminara estodi luagu le waliihabei tidan Lererun Bungiu, lun wasigirun lau waganbadi lun. Gúndaabeiti Bungiu lun líchugun abinirúni magumuchaditi woun, úaragu lun áfiñuruni súdiniti le adüga láalibei.