DAN meha le ya lubéi Hesusu ubouagu, arufuda lumuti buidu buidu ligaburi luma ligaburi lóuserun Lúguchi le siélubei. Ariñagati Hesusu: ‘Madügüntina ni kata lidan niri, luéidigia le larufudahabei Núguchi nun’. Ariñagati giñe: ‘Adüga numuti le aubei lagundaara súnwandan’ (Huan 8:28, 29; Kolosana 1:15). Ligíati, anhein busén wabéi wasubudiruni ka lan lasaminarubei Bungiu hawagu würiña luma ida liña lan labusenrun lun houserúniwa, buídubei lun wakutihani lani Hesusu hénpulu.

Móuserun lumutiña meha Hesusu würiña kei hóuseruniña amu gürigia lidan lidaani labürüdǘniwa Ewanhéliu. Ida liña meha lóuseruniña Hesusu würiña? Ani le súdinitimabei, gayarati san líchugun le larufudahabei Hesusu alibüreruni houn würiña uguñe weyu?

Marihin lumutiña meha kamá hamuga lúnrügü agamariduni hahuuda. Ariha hamutiña meha saragu huríu ha lábutigu relihión würiña kei gürigia peligurutiña ha gayarati hínchahan amu lidoun lueirin ayumahani lun ladügǘn magíaguni. Ligía meha hamahadunbei lun hayanuhan hama wügüriña lidan furumiñeguarügü fulasu furanguti o lun háfuridun múnadagiñe sin hadouragun lau hachügü. Gama lumoun, mariñagunti meha Hesusu luagu lunti lan buga hadisedagüdǘniwa würiña hawéi ha híbiri gürigia. Arufudaharügüti luagu lunti lan hárügüdagun wügüriña houngua luéi layumahan hágürügü, óusera hamañame würiña lau inebesei (Matéu 5:28).

Ariñagati giñe Hesusu: “Le ígirutu lúmari, aba lagamaridun amu, lagabarahañoun” (Márükosu 10:11, 12). Furanguti múaran lan meha Hesusu luma hasaminan sásaamu lidan halurudun huríu le meha kamanibei lidan lidaani luagu gayara lan “lígirunu gürigia lúmari luéigiñe furumiñeguarügü katei” (Matéu 19:3, 9). Gánitiña meha besafu huríu aban saminaü charati luagu agabarahani. Mafiñetiña meha lagabarahaña lan aban wügüri anhein arounra tuma aban würi to mama lani weiriou. Según meha sásaamu lidan halurudun huríu, würiñarügüñanu meha agabaraha. Ítara kei lafuranguagüdüni aban ariñahani tuagu Bíbülia, “lau lariñagun Hesusu ligiaméme lan ladügübei dandu wügüri kei würi dan le hagabarahan, íñugüda lumuti ligaburi harihíniwa würiña ani adügati lun inebewatima hamá”.

Buiti le hasagarubei würiña uguñe weyu lídangiñe le: Lidan damuriguaü hani gefentiña luagu Heowá adügatiña würiña umadaguaü hama wügüriña, ladüga chouru hamani meredebaña lan aríaguaña lau aban igaburi madünamati ani másügüragunbaña lan lídangiñe umadaguaü le gani habéi. Áfaaguatiña wügüriña kristiánugu lun hóuseruniña ‘wéiyaaña würiña kei hóuserunu háguchu, óusera hamañame würiña nibureingiña kei hamuga hátunu, lau lubuidun aritaguni’ (1 Timotéu 5:2).

Yúsuti Hesusu dan lun larufudahan houn. Hóuchatiña meha sásaamu lidan halurudun huríu lun hadügün lun mafurendeirun hamá würiña. Mítaranti meha Hesusu, yúsuti meha dan lun larufudahani inarüni houn würiña ani agunbiraha lumutiña ariñagei le hasaminarubei. Ani marufudahanti giñe luagu lunti lan buga herederun würiña awadigimarida tídanrügü gusina. Arufuda lumuti katei le, lau magidarun lani chansi tuéi María lidan aban ókaasion lun tafurendeirun (Lúkasi 10:38-42). Lubuidun óunabagülei le tíchugubei Marta to tíbugaña María lun Hesusu lárigiñerügü lounwen Lásaru, arufudati sagá tan meha buiti lídangiñe larufudahan Hesusu (Huan 11:21-27).

Súdiniti meha lun Hesusu lun hafurendeirun würiña. Besafu meha hádangiñe würiña huríu ha lídanbaña  lidaani, wéiriti meha lebegi houn garáü hamá aban irahü wügüri le ibihati lun súdini lan lau lásügürün dan, lúntima libihin lun profeta lan. Ligíati, danbei le tariñagun aban würi lun “fuleseiwatu hiñaru to águrahabalibu”, yusu lumuti chansi ligía lun larufudahan luagu súdinitima lan lun gaganbadiwa lan lun Bungiu (Lúkasi 11:27, 28). Ítara liña larufuduni anihein lan wadagimanu súdinitimati lun hagunfuliruni würiña sügǘ lau wadagimanu le meha uágubei héchuda (Huan 8:32).

Buiti le hasagarubei würiña uguñe weyu lídangiñe le: Lidan damuriguaü hani kristiánugu, buiti leresibirúniwa óunabagülei le híchugubei würiña lidan adamuridaguni. Inebetiña kristiánugu würiña ha derebuguhaña lidan hafiñen houn íbirigu ha anügübalin ubaraü lidan damuriguaü, ladüga ru hamá würiña ha “hénpulu buiti lau habagaridun luma hererun” dandu hábugua kei hagibugiñe amu (Titu 2:3). Ru hamuti giñe würiña hídehan houn lun hasubudiragüdüni uganu buiti le luáguti Larúeihan Bungiu (Sálumu 68:11; arihualá rekuáduru “Ariñagati san apostolu Pábulu siñá lan hadimurehan würiña?”, lidan páhina 9).

Gebegitiña meha würiña lun Hesusu. Lidan tidaani Bíbülia gebegitimatiña meha isaanigu wügüriña. Íbini tidan Talmud abürühóuati: “Fuleseiwatiña ha garahüñübaña irahüñü wügüriña, ani fugiabu ha garahüñübaña irahüñü würiña”. Aban meha ihürügu isaani würi houn fiú agübürigu: mosu meha hadarirun aban wügüri tun lun tamarieidun ani ligibuagun lira mosu meha hafayeiruni tebegi adari, ani siñati meha hagurabun tóunigirubaña lan danme le haweiyadun.

Ánheinti lun Hesusu gebegiti meha dandu libagari aban wügüri irahü kei tibagari aban würi irahü. Ítara kei láguyuguagüdüni tiráü aban würi hilaaru úmari lídangiñetu uburugu Naín, ítara liña giñe láguyuguagüdünu liráü Hairu (Márükosu 5:35, 41, 42; Lúkasi 7:11-15). Lidan amu ókaasion, areidaguagüdati aban würi to meha “disiwídü irumu tau lau aban sífiri wuribati”. Ani ariñagati tun “ladügawagun Abüraámü”, lóuguati meha layusurúniwa dimurei burí le tidan burí líburu to habürüdüboun huríu (Lúkasi 13:10-16). Lau layusuruni Hesusu dimurei lánina inebesei luma ínsiñeni le, arufudati arihalani mámarügü lueirin hafiñen würiña, ariha lumuti giñe lueirin hasudinin kei gürigia (Lúkasi 19:9; Galasiana 3:7).

Buiti le hasagarubei würiña uguñe weyu lídangiñe le: Ariñagati aban ariñawagúni lídangiñeti Asia ítara liña lan tagüriahóuniwa aban würi irahü, kei láturawagun lufulurin-agei aban besinu. Gama lumoun, úguchili kristiánu le hínsiñehabuti mígiraguagüdünti lungua lun ligaburi saminaü le. Lubaragiñe lira, tóunigi lumutiña sun lirahüñü, dandu wügüriña kéigubeirügü würiña, áfaagua ligía lun habihin furendei luma lun larihiniña surusia dan le sandi hamá.

Afiñeti meha Hesusu hawagu würiña. Mebegiti meha le tariñagubei aban würi to eseriwidutu kei gefentu lidan haguseragüdün huríu, ítara kei meha mebegi lan leseriwidun aban idamuni kei gefenti. Aban abürühati luagu dan le sügühalibei gíriti Josefo, le meha awinwandubei lidan furumiñeti sígulu, ábaha lariñagun: “Máhawabei lun le hariñagubei würiña lidan aguseragüdüni, ladüga úati súdini hamá úa ligía duari hamá, lugundun ítara haña würiña”.

Ánheinti Hesusu mítaranti meha. Anúadirati meha würiña lun hasubudiragüdüni águyuguaali lan (Matéu 28:1, 8-10). Íbini meha ariha hamani würiña  úaraguatiña ha, lafarún luma lábunahoun Habureme, hénrenguti meha houn apostolugu hafiñeruni le hariñagubei würiña hagía houn (Matéu 27:55, 56, 61; Lúkasi 24:10, 11). Gama lumoun, lau lanúadirun Hesusu fiú würiña lun hagía lan furumiñetiña íchugutiña fe luagu láguyugun, arufudati ariha lániña kei gürigia ha gayarati lafiñerúniwa hawagu lun heseriwidun kei gefentiña kei furumiñeguarügü amu disipulu (Adügaü 1:8, 14).

Buiti le hasagarubei würiña uguñe weyu lídangiñe le: Wügüriña ha anügübalin ubaraü lidan damuriguaü kristiánu arufuda hamuti inebe hamá würiña houn lau haganbuni le hariñagubei. Ánheinti wügüriña maríeitiña ru hamuti tufulasun hani weiriou tun dan le hetenirun lun le tariñagubei (1 Féduru 3:7; Agumesehani 21:12).

Dan le áyeiha hamani wügüriña lani Kristu hénpulu, ígiratiña lun líbüre hamá würiña, ru haméi inebesei le labusenrubei Bungiu houn lúmagiñe furumiñeti dan (Agumesehani 1:27, 28). Mawanseragüdün hamuti wügüriña maríeitiña ha kristiánugu igaburi lánina hagíaba lan anüga ubafu hawagu würiña lun hagumadiruniña. Lubaragiñe lira, falá hamuti adundehani le tíchugubei Bíbülia lúntima gunda tan hani weiriou (Éfesuna 5:28, 29).

Danbei le tagumeserunbei Yelena aturiahoun Bíbülia, líchuguña meha tani weiriei lidere ibagari tun ani maní tuguya lau. Laganagua meha ufasinin laweirida lidan aban fulasu le ñein lubéi meha kamani lan líweruhan aban wügüri aban würi to úmaboun labusenra lamarieidun busén tuguya yebe o mabusenrun o íbini mabusenrun hamá tagübürigu, kamaniti meha giñe habuleseirúniwa würiña ñein. Aba tariñagun Yelena: “Rutu Bíbülia erei nun. Aba nafurendeirun anihein lan aban Bungiu le unbei nínsiñeda le tímatimaati, le unbei gebegi nan ani bereseti nau. Aba níchugun fe gayarabei lan lasansirun ligaburi nani weiriei anhoun giñe laturiaha Bíbülia”. Dan lárigiñe, susereti le tayumahabei Yelena dan le labadiseirunbei tani weiriei lun ábanhali lan gefenti luagu Heowá. Aba tariñagun Yelena: “Aba lagumeserun íchiga hénpulu lánina ragüguaü unguaü. Biángubei wagía furendeitiwa íchiga ferudun”. Lagumuhóun, aba tariñagun: “Ídehaali adundehani le tídanbei Bíbülia lun nasandirun hínsiñetimahadina lan lun nani weiriei ani óunigiraladina” (Kolosana 3:13, 18, 19).

Mámarügüñein tun Yelena lasusereda katei ítarati. Añahein míñunu würiña kristiánugu ha gúndaabaña kei tuguya ladüga, áfaaguatiña úara luma hani weiriei lun hafalaruni adundehani le tíchugubei Bíbülia houn maríeitiña. Ani resibitiña giñe dǘgüdaguaü luma inebesei hámagiñe híbirigu lidan afiñeni ani líbüreti giñe hasandiragun houngua (Huan 13:34, 35).

Sun kristiánugu dandu wügüriña kei würiña subudi hamuti luagu chará hamá, gafigoun hagía luma lídangiñetiña lan ubóu le “siádiwaalibei lun wuribabei lan lidin lun”. Gama lumoun, chouru hamuti ánhaña lan ayarafada lun Heowá, Háguchi Bungiu le hínsiñehabubei, lesefurubaña lan “lídangiñe asufuriruni luma agadeiruni”, ábameti ‘gafanran hamá lidan haweirigun lirahüñü Bungiu’. Ma lubuidun emenigini le hagurabubei wügüriña hama würiña ha lóunigirubaña Bungiu lau ínsiñehabuni! (Rómana 8:20, 21.)