Lidan dibuhu le luéigiñebei hóunwenren, arufudúati le hasaminarubei saragu gürigia, ligíaba lan asusereda lidan dan le unbei tagúara Bíbülia Luéyuri Aguseruni. Saminatiña ñéinbaña lan saragu míñunu uani óundaraguñu ligibugiñe lálana Larúeihan Bungiu lun haguserawagüdǘniwa luagu sun le adüga hamaalibei: añahein hádangiñe heresibiruba ibagari sielu keisi afayeiruahaü, ánheinti ha híbiri hasiadirúba lun houdin máfiougatin. Gama lumoun, arufudatu Bíbülia lagidarúniwa lan marichaü ubouagugiñe lisuunibei Luéyuri Aguseruni (Sálumu 96:13). Hesusu ligía Aguseragüdüti le lanúadirubei Bungiu lun lanügün irichaü houn gürigia ubouagu. (Aliiha huméi Isaíasi 11:1-5 luma Adügaü 17:31.)

Aba lebedaagun furumiñeti wügüri Adán kóntüra Heowá Bungiu. Lidurun gafigoun habéi, súfuri hagía ani hilagua hagía sun ladügawagun (Rómana 5:12). Lun laransehóuniwa marichaü le, láguyuguagüdübaña Hesusu saragu míñunu gürigia ha hilaañabaña. Tidan líburu to gíriboun Arufudúni, o Apokalipsis tidan Bíbülia, arufudúati ñein luagu lasusereduba lan le lídanme milu irumu le lánina larúeihan Hesukrístu. (Aliiha huméi Arufudúni 20:4, 11, 12.)

Ha lúnbaña háguyugun haguseragüdüwaba, gama lumoun, mama luagu katei le hadügübei lubaragiñe hounwen, haguseragüdüwaba luagu le lunbei hadügüni lárigiñeme láfuridun ariñahani tidan líburu hóuburatu to uáguboun ladimurehóua tidan líburu Arufudúni kapítulu 20 (Rómana 6:7). Ayanuhati apostolu Pábulu dandu hawagu “ha buídubaña kei ha wuribabaña [o maricharaguntiña]”, lun ladimurehan hawagu gürigia ha lúnbaña háguyugun lun gachansin hamá lun hafurendeirun luagu Bungiu. (Aliiha huméi Adügaü 24:15.)

Gürigia burí ha óunwegubaña sin hasubudiruni Heowá meseriwidun hagía lun gachansinbaña lun hadügüni lugundan. Ánhaña arufuda gaganbadi heresibiruba aban “águyuguni lánina ibagari”. Gama lumoun, hame mabuseruntiña gaganbadi hamá lun Bungiu lunbei ‘asiadirúni’ águyuguni le heresibirubei. (Aliiha huméi Huan 5:28, 29, NM; luma Isaíasi 26:10; 65:20.)

Danme le lagumuchun milu irumu le lunbei ladurarun Luéyuri Aguseruni gidá láalime Heowá sun figóu hawéi gürigia (1 Korintuna 15:24-28). Mame lubuidun afayeiruahaü houn ha gaganbadibaña! Lígiragüdübei Bungiu Mafia lárigiñe ladaürǘn luagu milu irumu ligía lidan aban fusu mébehati lun aban lagumuhóun óuchawaguni. Ladügübei Satanási sun liyaraati lun ladisedagüdüniña gürigia luéi Heowá, hámeti awanduti óuchawaguni le, gayarabei hawinwandun lun súnwandan ubouagu. (Aliiha huméi Isaíasi 25:8 luma Arufudúni 20:1, 7-9.)

Ayanuhatu Bíbülia luagu amu Luéyuri Aguseruni. Aban sügǘ le lunbei lagumuchun lau lagübüri ubóu le uguñebei weyu. Sódinibei lachülürün weyu ligía, ítara kei meha lachülürün Guran lidan lidaani Noé, le meha agumuchubei hau sun gürigia wuribatiña. Málühali “hagünrinchawagun wuribatiña”, gayarahalime hawinwandun amu hawuyeri gürigia lidan aban ubóu le ñeinba lubéi ‘buídubei lan sun katei, richagua’. (Aliiha huméi 2 Féduru 3:6, 7, 13.)