1, 2. Ka uagu lunti lubéi hakutihani anhein aranseñuhiña lubéi lun feruduna humaniña amu?

TIDAN Bíbülia to Lererun, arufuda lumuti Heowá woun ida liña lan larihini figóu luma ka lan lasandirubei dan le wafigouhan. Arufudatu giñe Lererun woun saragu burí katei luagu ferudun. Lidan arütíkulu le lubaragiñebei le, furendeitiwa gudemehabuti lan meha Heowá lun Dawidi luma lun Manasési ladüga igaburi le harufudubei. Adügati igarigu le hasandirubei tídangiñe sun hanigi lun hagufeseruni le hadügübei, lun desidírü hamá madügündigia hamaali lan asaküriha hagía tau sun hanigi. Ligíaya heresibirunbalin lufuleseinhabu Bungiu.

² Guentó akutiha waméi le mini lubéi ferudun luéigiñe amu oubaü. Ida luba hamuga san hasandiragun hungua lun hamuga hilagua hamá hiduheñu haganagua gürigia maduruntiña ha láfaragüdübaña Manasési? Feruduna humuti hamuga san urúei le? Súdiniti álügüdahani le, lugundun wawinwanduña lidan aban ubóu wuribati, le ídanbei hanarime hamá gürigia ani gimuga hagía. Ligíati, ka uagu lunti lubéi aranseñu lan kristiánu lun feruduna lániña amu? Ánhadün asufurira somu marichaü, ka gayarabei líderagunün lun hárügüdagun hungua, lun hóuserun lau aban igaburi le aubei lagundaara Heowá luma lun aranseñu humá lun feruduna humaniña amu?

3-5. a) Ka hénpulu layusurubei Hesusu lun gayarabei lan hasaminarun ha aganbubalin luagu lisudinin feruduna hamaniña amu? b) Ka wafurendeirubei lídangiñe abahüdaguni le lídanbei Matéu 18:21-35?

³ Súdiniti aranseñu wamá lun feruduna wamaniña ha híbiri, lílana hamá yebe o mama hamá yebe lílana damuriguaü lun gayara lan buidu lan wanaagun woungua hama waduheñu, wamadagu luma hama amu gürigia, íbini giñe luma Heowá. Arufudatu Bíbülia luagu ligía lan aban lídangiñe katei le agurabahóubei wámagiñe wagía kristiánugu, meberesenga átirihali lan wéiyaasu hachararun amu woun. Lun larufuduni Hesusu luagu súdini lan feruduna wamaniña amu, yúsuti aban hénpulu luagu aban musu le adúeihabei seinsu.

 ⁴ Íbini dúei lan meha musu le ǘrüwa-wein-míñunu weyu lánina wadagimanu lun liyubudiri feruduna lumuti iyubudiri le ladúeihan. Aba ladeirun musu le ábanya musu le adúeirubalin lebegi fáyeiti le lánina san weyu lánina wadagimanu. Aba layumuragun adúeihati le lun lun gaguraasun lan lubá, gama lumoun, máhati musu le buga unbei ferudunawa lan óunwenbu ladúeihan feruduna lani, ñǘdünrügü ligía aba ládaruni furisunrugun. Adügati katei lira lun lasafaragun urúei, ábati lariñagun lun musu le buga unbei feruduna lani dúeiti: “Lunti yebe giñe gudemehabu ban lun bouba kei gudemehabu nan bun”. Sigiti abahüdaguni ítara: “Ábati lagañidun urúei saragu, aba líchugun dimurei lun hasufuriragüdüni [lau hadaürüni] musu ligía darime lafayeiruni sun ladúeihan” (Mat. 18:21-34).

⁵ Ka larufudahabei Hesusu woun lau abahüdaguni le? Dan le lásurunbei labahüdaguni aba lariñagun: “Ítara luba giñe ladüga Núguchi Bungiu le siélubei hun anhein ua feruduna lani kada aban hídangiñe líbiri tídangiñe lanigi” (Mat. 18:35). Furanguti le gayarabei wafurendeiruni lídangiñe. Figóu burí le adüga wamaalibei lúmagiñe wagüriahóun arufudati luagu siñaguatiwa lan woungua lun wagunfuliruni lilurudun Bungiu sin wachararun. Gama lumoun, aranseñu liña lun feruduna lániwa luma lun labulieiduni wafigoun. Ligíati sun ha busenbaña gamadagua hamá houngua luma Bungiu lunti feruduna hamani hachara ha híbiri. Ítara liña kei lariñaguni Hesusu lidan yanu le líchugubei le gíribei Serumu luagu Wübü: “Ánhaña feruduna humá amu luagu wuribati le adüga hamaalibei hun, feruduna lubadün giñe Húguchi Bungiu le siélubei; anhein ua feruduna humá amu, úabei giñe feruduna lani Húguchi Bungiu hifigoun” (Mat. 6:14, 15).

6. Ka uagu anirein lubéi dan hénrengu lan lun feruduna wamaniña amu?

⁶ Másiñati hariñagun: “Buiti laganbun sun katei le, gama lumoun hénrengutimati ladügǘniwa luéi lariñawagúniwa”. Susereti katei le ladüga héreti lan katei burí le wasandirubei dan le hacharun gürigia woun. Másiñati wagañidun, wasandirun garabaguaaña lan gürigia woun, o busén wamá láfayeihan gürigia ligía luagu le ladügübei o —lasufurirun kei wagía. Le linarün katei, añahein hagía saminatiña luagu maweiyasunbaña lan íchiga ferudun houn ha achararubaña houn. Anhein ítara liña lubéi hasandiragun hungua, ida luba —aranseñu humá lun feruduna humaniña ha híbiri, ítara kei lagurabahan Heowá hadügüni lubúeingu?

7, 8. Kaba íderaguaü lun feruduna humá aban gürigia anhein gañi hubéi ladüga luriban ligaburi lóuserunün?

⁷ Dan le wouserúniwa wuriba o dan le samina wamá wuribati lan wóuserun, gayarati ladügün lun hanarime lan luriban wasandiragun woungua. Lidan aban akutihani le adügǘbei luagu igañi, afuranguagüda lumuti aban nibureinti igaburi le aubei lóusera: “Luagu meha aban dan [...] aba gadan lánina aban lanarime asigenehani múnada ábati náfuridun múnadagiñe, ani fiñutina luagu maweiyasunhadina lan agiribuda. Lidan meha aban lidaani lubachouga aba nerederun asariñaha lamidangua aban lubuidun áraabu, kei geyeguniña lan lau uéndeni aba nabuinchun lau darangilaü, ábati agidareina lan nigañi murusun murusun. Fiú oura lárigiñe aba nagiribudun múnadoun darangilañu ani asaküriheina tídangiñe sun nanigi”. Kei larufuduni sügǘ le, wígirun dan lun lásügürün igañi wawéi luma lun buídutima lan warihini katei ídehati lun móunabun wamá lidan aban igaburi le lunbei ladügün lun wasakürihan lárigiñe (Sal. 4:4; Ari. 14:29; Sant. 1:19, 20).

⁸ Ánheinti magidarun lubéi igañi huéi? Samina humá ka lan uagu hagañida. Ladüga funa san houserúniwa wuriba o ladüga ladügǘn somu katei le moun lumuti hun? O ladüga hasaminarun lau lan sun lichú lau gürigia ligía lacharara hun? Le san lugubu hanarime lan luriban le ladügübei gürigia ligía hun? Hakutihani luma gunfuranda humani kátima lan lébunabei hagañidun, líderagubadün arihei ka lan adundehani tídangiñeti Bíbülia gayarabei líderagunün lun buídutima lan hóuserun (aliihoualá Ariñawagúni 15:28 luma 17:27). Másiñati líderagubadün lan hakutihani kátima lan lébunabei higañi arihei katei buiti le lídanbei gádantün, aransetimaahadünme lun híchugun ferudun. Háfuga güreweibei harihini buiti le lídanbei gádantün, gama lumoun ítara luba gayara lan hígirun lun gani tan Lererun Bungiu efekütu lidan ‘haritagun luma sun le habusenrubei, arufudatéime ka lan tídanbei hanigi’, adüga tuguyame lun busén humá háyeihani lani Heowá hénpulu lánina gíchigadi lan ferudun (Ebü. 4:12).

9, 10. a) Ka gayarabei hadügüni dan le gañi humá ladüga lachararúniwa hun? b) Ka efekütu gayarabei gani lan lidan hibagari harufudun aban lubuidun igaburi luma gudemehabu?

⁹ Gíbeti sügǘ le gayarabei ladügün lun wagañidun. Aban hénpulu, dan le habugahaña lan ani itagaraü yebe lan tabuguchun aban karü tuagu hikarün. Kaba hadüga? Másiñati aganbaadün lan dan le lan lasuseredun aban katei ítarati aba lan lagañidun somu gürigia saragu darí lun lagayuahan luagu le abugahabarun to aban karü. Gama lumoun, maweiyasunbei aban kristiánu asaminara ladügüni katei le.

¹⁰ Lubaragiñe hagañidun, buídutimabei lun háraramagun asaminara. Gayarati gadurun humá lidan katei le, ladüga meteni humá lun habugahan buidu lugundun aba herederun asaminara luagu amu katei. O másiñati giñe anirein lan somu katei wuribati tuagu likarün le aban abugahati. Ka larufudahabei hénpulu le woun? Gayarati lan lídehan gunfuranda wamani katei buidu, warihini katei lau amu manera luma giñe lun gudemehabu wamá lun lagalumadun wagañi, lun manarime lan wasandiragun woungua wuriba ladüga masali lan katei woun buidu luma lun burí lagidarun amu burí luwuyeri saminaü mabuidunti wawéi. Ariñagati Apurichihati 7:9: “Mígiraguagüdaba bungua lun igañi, lugundun gürigia ibidiougua tau agañidubaña”. Manüga huméi sun katei huouguoun. Anihein dan genegeti woun lau lan lichú hau gürigia hóuserawa wuriba, gama lumoun libe-agei dan mítaranti, wasaminarunbei ítara ladüga gafigoun wamá o ladüga wuriba lan gunfuranda wamani katei. Houcha humá lun darañu lan hichügü lubá burí igaburi o dimurei le genegebei wuriba lan léiguadun. Aranseñu humá lun ferudun humaniña ha híbiri ladüga hínsiñe hamá hun ani gúndaatimabadün (aliihoualá 1 Féduru 4:8).

11. Ida luba wóunabun dan le wuriba lan heresibirúniwa gürigia lidan wapurichihan?

¹¹ Ka gayarabei hadügüni lun hárügüdagun hungua dan le wuriba lan lóuserunün somu gürigia  lidan apurichihani? Dan le lóunahanbei Hesusu 70 hádangiñe lánigu disipulu apurichiha, ariñagati houn lun hayumahan darangilaü houn tílana sun muna to ñeinhin lumuti hebelura. Ani ariñagati giñe: “Anhein añahein lubéi gürigia hínsiñehabutiña lun darangilaü tidan muna tuguya, heresibirubadün lau ugundani. Anhein ua habéi, giribugüda huméi [darangilaü le híridubei lidan] abusuruni.” (Luk. 10:1, 5, 6). Gúndaatiwa dan le heresibiruniwa gürigia buidu dan le wapurichihan, lugundun gayarati hasagarun buiti lídangiñe uganu le wanügübei. Gama lumoun, anirein burí dan wuribati hóunabun gürigia dan le wapurichihan houn. Kaba hadüga danme le lasuseredun katei le hun? Ariñagati Hesusu lunti lan lagiribudun darangilaü le híridubei lidan abusuruni huma. Meberesenga ida liña lan hónabunün gürigia, lunti háfuridun hábiñegiñe meferidirunga huméi hidarangilan. Ánhadün óunaba lau ligiaméme leferidiruba darangilaü.

12. Según le lariñagubei Pábulu lidan Éfesuna 4:31, 32, ka lunbei wadügüni?

¹² Houcha humá lun mámarügü lan lidan apurichihani meferidirun humani hidarangilan. Gama lumoun, aranseñu wamá lun feruduna wamá somu gürigia, úati mini lan wapouhani wáhabu luagu katei wuribati le ladügübei o meberesen wamá lau wuribati le adüga láalibei. Le mini lubéi, lunti lan wagidaruni sun wuribati le tídanbei wanigi lubá gürigia ligía ladüga luriban lóuserun luma lun meferidirun wamani wadarangilan. Añahein gürigia ladüga herederun asaminara saragu luagu katei wuribati le hasandirubei o luagu luriban houserúniwa, ígiratiña lun lagidaruni luriban hóuserun amu hagundan. Mígiraguagüda humá hungua lun burí saminaü le. Haritagua huméi magundanbadün lan ánhadün areidaha wuribani habá amu tidan hanigi. Ligíati, aranseñu humá lun feruduna humaniña amu (aliihoualá Éfesuna 4:31, 32).

13. a) Ida liña ladügün aban kristiánu lun “léigaaguniña busiganu” láganiñu? b) Ka gayarabei lasuseredun ánhawa óunaba lau aban igaburi darangilati dan le hóuseruniwa gürigia wuriba?

¹³ Aniheinbei dan le ídanbei gayara lan híderagun somu gürigia le óuserutün wuriba lun leberesedun lau arufudahani tídangiñeti Bíbülia. Abürühati apostolu Pábulu: “‘Anhein lamá habéi báganiñu, ruba éigini houn; anhein mágürabu habéi, ruba duna houn; ítara luba badügün lun léigaaguniña busiganu’. Mígiraguagüdaba bungua lun lagañeirunibu wuribani; lubaragiñe lira, gáñeibei wuribani lau buiti” (Rom. 12:20, 21). Dan le wouserúniwa wuriba ani aba wóuseruniña gürigia buidu gayarati wadügün lun furangutima lan larihíniwa igaburi buiti le hawagubei. Anhein gunfuranda humá gürigia le achararubei hun gudemehabu hugíame lun, másiñati gayarabei lan híderaguni afurendeirei inarüni burí tídangiñeti Bíbülia. Meberesenga kaba lan asusereda, gayarabei ladügün hóunabun lau aban igaburi darangilati lun lararamagun gürigia ligía asaminara luagu lubuidun ligaburi hóuseruni (1 Fe. 2:12; 3:16).

14. Meberesenga lau dañu le adüga láalibei somu gürigia hun, ka uagu moun lumuti lubéi hagüürün katei wuribati habá amu?

¹⁴ Añahein gürigia ha úmabaña moun lumuti lan wadügün umadaguaü. Kéiburi gürigia ha meha lílanabaña damuriguaü luagu aban dan aba hadügün somu figóu wéiriti ani masakürihantiña, lárigiñe aba habugún. Anhein adüga lubéi aban hádangiñe somu katei wuribati hun, másiñati hénrengubei lan hun feruduna humani íbinime anhein asaküriha, ladüga hanarimeti lan luriban hasandiragun hungua luagu le asuseredubei. Anhein ítara liña lubéi amuriaha humá saragu wéiyaasu luma Heowá lun líderagunün íchiga ferudun. Íbini ibidiñe lan hun ka lan tídanbei lanigi gürigia ligía, subudi lumuti Heowá. Heowá aríaahabalin lilulin-agei tabusenrun anigi ani gaguraasunti habá gafigountiña (Sal. 7:9; Ari. 17:3). Ligía tariñagunbei Bíbülia: “Mafayeira humá wuribani luagu wuribani lun ni aban. Áfaagua humá lun hadügüni le buídubei hagibugiñe súngubei. Adüga huméi sun le huáraati lun habagaridun lidan darangilaü hama súngubei. Niduheñu hínsiñetiña nun, máguyugüda huméi wuribani, ígira huméi lun Bungiu lan afayeigüda luagu. Tariñahare Lererun Bungiu: ‘Au lunbei nafayeiragüdüniña  gürigia luagu hariban, liña Aburemei’” (Rom. 12:17-19). Úati ni aban wádangiñe garichati lun líchugun lidurun amu gürigia (Mat. 7:1, 2). Gama lumoun, gayarati wachoururuni richabei lan laguseragüdün Heowá.

15. Ka katei buídubei lun waritaguni dan le ladügün aban gürigia somu katei wuribati woun?

¹⁵ Anhein hénrengu lubéi hun feruduna humá aban gürigia le adügübei aban katei wuribati ani adügati lun hasandiragun hungua wuriba, gama lumoun asakürihaali, haritagua huméi lasufuriruña lan giñe gürigia ligía ladüga lani figóu le galangante wabéi resultóu (Rom. 3:23). Gudemehabuti Heowá houn sun gürigia gafigountiña. Ligía buidu lubéi wafurieidun hawagu gürigia ha adügübaña somu katei wuribati woun. Dan le wafurieidun luagu somu gürigia aba magañidunhadiwa lan luma. Arufudati giñe Hesusu moun lumuti lan wagüragun wuribani tidan wanigi nírügü habá gürigia ha wuribabei hóuseruniwa, lugundun ariñagati: “Afurieida [humá] lun Bungiu hawagu ha anabagubalün, ha wuribabei óuserunün” (Mat. 5:44).

16, 17. Ka lunbei hadügüni dan le harihini wéiyaaña lidan afiñeni luagu asakürihaali lan aban afigouhati luagu lifigoun, ani ka uagu?

¹⁶ Úaragu luma lubalinti Bungiu, rúaaña wéiyaaña lidan afiñeni lun desidírü hamani kaba lan hadüga lau gürigia le adügübei somu figóu wéiriti lidan damuriguaü. Íbini siñá lan harihini íbirigu ha sun le larihibei Heowá, áfaaguatiña lun úaragua lan le desidírü habéi luma adundehani le tídanbei Lererun Bungiu luma le ñǘbuinbei lúmagiñe sífiri sandu. Ligíati, le desidírü habéi luagu burí katei le lárigiñe hafurieidun arufuda lumuti ka lan lasaminarubei Heowá (Mat. 18:18).

¹⁷ Lídanba katei le harufudei anhein úaragua hubéi. Ánhaña ariha wéiyaaña lidan afiñeni luagu asakürihaali lan somu afigouhati, feruduna hubéi san ani arufuda huguyame lun hínsiñegiili lan hun? (2 Ko. 2:5-8.) Másiñati hénrengubei lan hun anhein adüga lubéi meha ligaburi lóuserun damichi hun o lun somu hiduhe. Gama lumoun, anhein afiñe hubéi luagu Heowá luma luagu ligaburi lahandilihani katei lidan damuriguaü, hóuseruba lau lichú aau, arufuda huguyame luagu aranseñuhiña lan lun feruduna humaniña amu (Ari. 3:5, 6).

18. Kaba buiti hibiha lídangiñe feruduna humaniña amu gürigia?

¹⁸ Samina humá mabuidun lan lareidahan aban gürigia wuribani tidan lanigi ladüga barüti sandi, hafanreinragun umadagu, idiheri ani adügati lun ua lan gunfurandagua hamá gürigia hámagua. Guentó konpararü huméi katei le luma buiti le lanügübei feruduna wamaniña amu. Adügati ferudun lun hadisedun gürigia luéi gañi gañi luma luéi luriban saminaü le edebilidagüdübaliña le mabuidunbei lun átuadi, ani adügati lun buidu lan hawinwandun gürigia hámagua luma lun hawinwandun lau ugundani. Gama lumoun, resibiti gürigia le ferudunabaliña amu aban abinirúni le wéiritimati: lagundaarun lau aban lubuidun umadaguaü luma Heowá Wáguchi le siélubei (aliihoualá Kolosana 3:12-14).