1, 2. Ka larufudahabei Hesusu houn lani apostolugu lagumuhóun guñoun le lawinwandubei kei wügüri ubouagu?

LÁSÜGÜRÜÑEIN meha Hesusu lagumuhóun guñoun le lawinwandubei kei wügüri ubouagu hama lani apostolugu íñugiñe tibiti aban muna Herusalén. Dan lubeiti hadineruña lan, aba lásaarun Hesusu aba laragachunu lidáü, aba lagüürün aban tuaya liranaagua. Aba líchugun duna lidoun aban dabarasi, aba lagumeserun achibei hagudi disipulugu, aba laragahani tau tuaya to liranaaguaboun. Dan le gumuhali aba ladaürünu lidáü. Ka san uagu ladügei Hesusu katei ǘnabuguti le? (Huan 13:3-5.)

² Ligía guánarügü afuranguagüdübalin dan le lariñagunbei: “Gunfuranda humuti san le nadügübei hun? [...] Ánheinti chibá nubalin hugudi lau sun Humaisturun nan ani Habureme, lunti giñe hachibuni hugudi húmagua. Rúhadina aban hénpulu hun lun hadügüni libeméme le nadügübei” (Huan 13:12-15). Lau ladügün aban wadagimanu ǘnabuguti lau sun lugundan, ruti aban lubuidun hénpulu le mabulieidúati houn lani apostolugu, le lunbei meha línchahaniña arufuda ǘnabuguni lun sun habagari.

3. a) Lidan biama ókaasion, ida liña larufuduni Hesusu luagu súdini lan lun ǘnabugu wamá? b) Kaba wakutiha lidan arütíkulu le?

³ Mama meha furumiñe larufudahan Hesusu houn lani apostolugu súdini lan ǘnabuguni. Dan lubaragiñe, dan larihinbei Hesusu harufuduña lan fiú hádangiñe lani apostolugu aban igaburi lánina hásügüragun hámagua luagu furumiñeti ubaraü, aba lanügün aban irahü lóubawagun ábati lariñagun houn: “Le eresibiruti aban irahü keisi irahü le lidan niri, resibi lumutina; le eresibirutina, resibi lumuti giñe le óunahabalina. Le lubeiti ǘnabugutimabei hidan, ligía wéirigutimabei” (Luk. 9:46-48). Kei gabaroun lubalin wéirigu lan meha hanaagun fariséugu houngua, dan lárigiñe aba lariñagun: “Le íñubei lanaagun lungua, lǘnabudagüdüwaba; le ǘnabuti lanaagun lungua, wéiribei lanügǘn” (Luk. 14:11).  Chóuruti busén lan meha Hesusu lun ǘnabugu hamá sun ha afalarubalin, lidan amu dimurei, lun manaagun hamá houngua, ua ligíame panta hamá, míñugun ligíame hanaagun houngua. Lun gayara lan wáyeihani Hesusu, akutiha waméi hénpulu lánina ǘnabuguni le líchugubei ani ariha waméi ka lan buiti lasagarubei dandu gürigia le arufudubalin igaburi le kei ha híbiri.

4. Ida liña larufudun Liráü Bungiu le ábanrügüti luagu ǘnabugugubeiñein lan lubaragiñe liabin ubouagun?

⁴ Lubaragiñe liabin Liráü Bungiu le ábanrügüti ubouagun, arufudaali meha lidan saragu míñunu irumu le lásügürübei luma Lúguchi sielu luagu ǘnabugu lan. Dan le ladimurehanbei Isaíasi tidan liliburun luagu lubuidun lanaagun Hesusu lungua luma Bungiu, aba lariñagun: “Arufudahaali Bungiu nun lun níchugun dǘgüdaguaü houn ha buchaañabaña uagu. Adügati lun deregüdagu nan sagü binaafin lun naganbuni le larufudahabei kei lubudubu. Rúhali Aburemei gunfurandaü nun, ani aganba numuti, michu numuti nanagan luagun” (Isa. 50:4, 5). Kei weiri lubéi meha labusenrun Hesusu lafurendeirun, lau ǘnabuguni aganba lumuti le larufudahabei Bungiu le inarüniti lun. Ani chóuruti teni lan meha lun hénpulu lánina ǘnabuguni le líchugubei Heowá lau lóuseruniña gürigia gafigountiña lau gudemehabu.

5. Lidan lubara kei arükánheli, ida liña líchugun Hesusu aban hénpulu lánina ǘnabuguni luma manaaguni unguaü dan le lasigenehanbei luma Mafia?

⁵ Gama lumoun, marufuduntiña meha sun sífirigu ha siélubaña aban ǘnabuguni libe le larufudubei Hesusu. Ñeinñein meha aban ánheli mígiraguagüdünti lungua lun larufudahóuniwa lun, lubaragiñe lira, aba lígiraguagüdün lungua lun anaaguni unguaü luma lun wéirigu lan larihín. Darí lun lebedaagun lun Heowá, ábati Satanásihali lan le Mafia. Ánheinti Hesusu gúndaati meha lau ubaraü le lúmabei sielu ani máluahanti layusuruni lubafu wuriba. Dan le lasigenehanbei “arükánheli [...] Migeli, [lememe Hesusu] luma Mafia luéigiñe lúgubu Moisesi”, másügürünti Hesusu luéi lébeha ubafu le rúaalibei lun, lubaragiñe lira, óuserati lau ǘnabuguni. Lau sun lugundan, aba lagurabahan lun Heowá lan ariha lau turóbuli ligía lídanme dan luma igaburi le buídutimabei lun, lugundun gabaroun lumuti Hesusu luagu Heowá lan Bungiu Suntigabafu le Aguseragüdübei lidan sun ubóu (aliihoualá Húdasi 9).

6. Ida liña larufuduni Hesusu ǘnabugu lan lau lánharun lun liabin agunfulirei leseriwidun kei Mesíasi?

⁶ Chóuruti, lídangiñe lan sun burí katei le lafurendeirubei Hesusu sielu anihein lan burí profesía le adimurehabei luagu le lunbei lawinwanduni ya ubouagu. Ligíati, másiñati lubaragiñe lan meha liabin awinwanda kei Mesíasi le füramasewabei ubouagu ani hilá ligía, subudi laali meha Hesusu lásügürüba lan lídangiñe luriban burí sügǘ. Íbini ítara, ánhati Liráü Bungiu le ábanrügüti liabin agunfulira lau kárugu ligía. Ka uagu? Ladüga meha ǘnabugu lan. Afuranguagüda lumuti apostolu Pábulu dan le labürüdünbei: “Lau sun meha lenege lan Bungiu, masaminarunti lagidaruni lubaraü Bungiu luéi, lun ítara lan kei Ligía. Uá; lubaragiñe lira, aba lígiruni sun le lánibei, aba lítaradun kei aban idamuni, ábati liabin lun ítara lan kei aban hádangiñe wügüriña” (Fili. 2:6, 7, NM).

7, 8. Ida liña larufudun Hesusu ǘnabuguni danbei le irahügili, luma lidan lani ministeriu ya ubouagu?

⁷ Ariñagati Pábulu luagu dan le lan meha lawinwandunbei Hesusu kei wügüri, “aba lǘnabudaguagüdüntima lungua, ani ladüga laganbadi, aba lounwen” luagu wagabu (Fili. 2:8). Lúmagiñe ñǘraügili ruti aban lubuidun hénpulu lánina ǘnabuguni. Lau sun bián lan gürigia gafigountiña agüriarubalin, Hosé tuma María, “aba lasigirun laumeme laganbadi houn” (Luk. 2:51). Gayarati hafurendeirun nibureintiña saragu lídangiñe lani Hesusu hénpulu. Ánheinti háyeiha ani gaganbadi hagía houn hagübürigu labinirubaña Heowá.

 ⁸ Dan le wéiriaali Hesusu, arufudati ǘnabugu lan lau líchuguni le labusenrubei Heowá lidan furumiñeti lúgaaru, rulei le labusenrubei lidan libiaman lúgaaru (Huan 4:34). Yusu lumuti Hesusu liri Bungiu lidan sun lani ministeriu ani íderagua lumutiña gürigia ha harumabaña anigi lun hasubudiruni ligaburi Heowá luma lisuuni houn gürigia buidu buidu. Úaraguati giñe ligaburi lawinwandun luma le larufudahabei luagu Bungiu. Aban hénpulu, gumese lumuti furíei le larufudahabei keisi hénpulu lau burí dimurei le: “Wáguchi Bungiu le siélubei, inebewalá biri” (Mat. 6:9). Ítara liña larufuduni houn ladügǘniwa lan liri Heowá sándume ligía lan katei súdinitimabei. Arufudahati giñe Hesusu lau lani hénpulu. Ligíati, gayara lubéi meha lariñagun lun Lúguchi dan le gumumémeeli lani ministeriu: “Subudigüda naali biri houn [apostolugu], ani nasubudiragüdamemebei” (Huan 17:26, NM). Ru lumuti giñe Hesusu sun uériguni lun Heowá luagu sun le ladügübei ubouagu (Huan 5:19).

9. Ka lariñagubei Sakaríasi lidan aban profesía luagu Mesíasi, ani ida liña lagunfuliruni Hesusu profesía le?

⁹ Lidan aban profesía ariñagati Sakaríasi luagu Mesíasi: “Gundaaguabá saragu uburugu Sión! Beremuha lau ugundani, uburugu Herusalén! Ladüga anite burúeite bun, richaguabei, anite lau saragu agañeiruni, gama lumoun lau ǘnabuguni, wariñu luagu aban burigü; luagu aban liraüraü burigü” (Sak. 9:9). Gúnfuliti dimurei le lidan irumu 33, dan le lebelurunbei Hesusu Herusaléun lubaragiñe lefeduhóun Luéyuri Esefuruni. Aba hábudunu saragu gürigia ha ñéinbaña hadaüragun ani íchaaha hagía tilimun wewe ǘmadarugu lun heresibiruni, wéiriti ugundani lidan uburugu ladüga lachülürün Hesusu. Gama lumoun, meferidirun lumuti Hesusu ǘnabuguni le luágubei ni íbini dan le hagúarunbei lun Urúei (Mat. 21:4-11).

10. Ka larufudubei Hesusu lau gaganbadi lan darí lun lounwen?

¹⁰ Lau lounwen luagu wagabu lagumuchei Hesusu libagari lánina ǘnabuguni luma gaganbadi ya ubouagu. Ítara liña larufuduni furangu luagu gayara lan úaragua hamá gürigia lun Heowá íbini houchawagúniwa darí lumoun lagumuhóun. Arufuda lumuti giñe ítara iyeeni lan le lariñagubei Satanási luagu seriwi hamá gürigia lun Bungiu luágurügü le heresibiruni lúmagiñe (Hobu  1:9-11; 2:4). Úaraguni le larufudubei Hesusu lidan sun libagari seriwiti lun larufudúniwa Heowárügüñein lan garicha lun urúei lan lidan sun ubóu ani richá lan larúeihan. Ani chóuruti luagu gúndaagua lan Heowá luagu úaraguni gumuti le larufudubei Liráü le ǘnabugubei (aliihoualá Ariñawagúni 27:11).

11. Ka bián emenigini hámabei kristiánugu ha úaraguabaña seremei lani Hesukrístu sákürifisiu?

¹¹ Seriwiti giñe lounwen Hesusu lun lafayeirúniwa lebegi hasalbarun gürigia (Mat. 20:28). Ítara liña gayara lan feruduna lani Heowá hafigoun gürigia sin ladüraaguni lilirudun le richabei ani ru ligía chansi houn lun hawinwandun lun súnwandan. Abürühati Pábulu: ‘Lídangiñe laricharagun aban gürigia gayarati haricharagun sun hawuyeri gürigia, richaguaü le anügübei ibagari’ (Rom. 5:18). Seremei lani Kristu sákürifisiu hemenigitiña kristiánugu ha anuadirúaaña houdin sielun luma lun móunwegundigiaña lanme, ánhañati “amu mudún” hemenigitiña hawinwandun lun súnwandan ubouagu (Huan 10:16; Rom. 8:16, 17).

12. Ida liña larufudun Hesusu ǘnabugu lan ani gaguraasun ligía lau ligaburi lóuseruniña gürigia gafigountiña?

¹² Amisuraha lumutiña Hesusu ‘sun ha buchaañabaña uagu lárigi hawadigimari luma lihürü hanügün’ lun houdin lumoun. “Resibi huméi narufudahan —liña—, furendei huguyame númagiñe; lau gaguraasun nan, ñulú tuguya nanigi [o ‘ǘnabugutina tídangiñe sun nanigi’, NM], ábame hadarirun emeraaguni tun huani.” (Mat. 11:28, 29.) Kei meha ǘnabugu lubéi ani gaguraasun ligía, óusera lumutiña gürigia gafigountiña lau ínsiñeni ani úati meha himei lan aban gürigia luéi aban. Mamuriahanti hama lani disipulugu lun híchugun lóugiñe le hayarabei íchiga, ariñaga lumuti buiti le hadügübei houn ru ligía gurasu houn. Madügünti lun hasandiragun houngua mouni hamá ani madügünti giñe lun hasandirun mebegi hamá ni kata. Móuseragun lumutiña. Lubaragiñe lira, ariñagati meha houn luagu ánhaña lan ayarafada lun ani falá haméi larufudahan, habihuba lan awalidaguni lugundun ménrengunti leseriwidúniwa lun, huali ligía anügüni le líchugubei houn lun hanügüni. Buiti meha hasandiragun gürigia houngua lóubawagu Hesusu meberesenga anhein wügüriña habéi o würiña hamá o meberesenga ka lan harumudiribei (Mat. 11:30).

13. Ida liña larufudun Hesusu gudemehabu houn gürigia ha míderawagunbaña?

¹³ Gudemehabuti meha Hesusu houn gürigia ha mibihinbaña ubaraü súdini Ísüraeli ani lau ínsiñeni ru lumuti le hemegeirubei houn. Dariti Hesusu bián arihadihatiña marihintiña yarafa lun Herikó, Barütiméu liri aban hádangiñe marihintiña hagía, ha amuriahabaña ídemuei lúmagiñe lau erei. Aba hadeinhan gürigia houn lun hámanichun. Merenguñein hamuga meha lun Hesusu mabahüdün lani le hamuriahabei wügüriña marihintiña hagía. Gama lumoun, aba lariñagun lun hanügǘniwa lun ani ladüga hagudemen lun adügati lunya harihin. Kei warihini, áyeiha lumuti Hesusu Heowá, le Lúguchi, lau  lóuseruniña gürigia ha míderawagunbaña lau ǘnabuguni luma gudemehabu (Mat. 20:29-34; Mar. 10:46-52).

14. Ka burí buiti heresibirubei sun gürigia lídangiñe ǘnabuguni le larufudubei Hesusu danbei le ya lubéi ubouagu?

¹⁴ Ǘnabuguni le arufuda laalibei Hesusu lidan sun libagari barüti ugundani luma saragu buiti. Gúndaaguati Heowá saragu dan larihinbalin Liráü le hínsiñebei lun agunfulirei lubalinti lau sun lugundan. Sanditiña apostolugu hama disipulugu dǘgüdaguaü luma gurasu ladüga óusera lániña Hesusu lau ínsiñeni luma ǘnabuguni. Dandu lau lani hénpulu, larufudahan luma lau lariñaguni katei buiti le hadügübei houn, íderagua lumutiña lun háfaagun lun buídutima lan heseriwidun lun Bungiu. Sagatiña meha giñe ha híbiri gürigia buiti lídangiñe ǘnabuguni le larufudubei lugundun íderagua lumutiña meha, arufudahati houn, ru ligía gurasu houn. Heresibiruba sun gürigia ha gaganbadibaña abinirúni magumuchaditi seremei lani Kristu sákürifisiu le anügübei asalbaruni.

15. Ka buiti lasagarubei Hesusu lídangiñe ǘnabuguni le larufudubei?

¹⁵ Agia san Hesusu? Sagati san buiti lídangiñe ǘnabuguni le larufudubei? Ítara liña, lugundun ariñagati houn lánigu disipulu: “Le anaaguti lungua ǘnabu, laweiridagüdüwaba” (Mat. 23:12). Luagu guánarügü lagunfulira dimurei burí le lariñagubei, lugundun ariñagati Pábulu: “Ligía líchugunbalin Bungiu liñun-agei uéiriguni lun luma iri le wéirigutimabei lídangiñe súngubei, lun danme lan haganbuni sun ha siélubaña, ha múarugubaña, hama ha lábugiñebaña múa liri Hesusu, lun háhuduragun lun; gúfese tuguyame sun iñeñein luagu Hesukrístu lan Waburemebei, lun luéirigun Bungiu Úguchili”. Kei arufuda lan Hesusu úaraguni luma ǘnabuguni sun dan le lawinwandunbei kei wügüri, aba líchugun Heowá uériguni lun —lidan amu dimurei ruti aban ubaraü le íñutimati lun— lau líchugun ubafu lun hawagu sun ha siélubaña luma hawagu sun ha ubouagubaña (Fili. 2:9-11).

16. Ida liña wasubudiruni luagu ǘnabugumemebei lan Liráü Bungiu ámuñegü?

¹⁶ Ámuñegü ǘnabugumemebei Liráü Bungiu. Lidan aban profesía, ariñaga lumuti abürühati Sálumu ida luba lan lageindagun Hesusu kóntüra láganiñu danme le ibihaali aban ubaraü wéiriguti sielu: “Bawanserun lidan bagañeirun ligía buéirigunbei, ageindagueina luagu lóubadina inarüni, íchigeina haricha ha ǘnabugubaña” (Sal. 45:4). Lidan Arümahedón lageindaguba Hesukrístu luagu lóubadina inarüni luma irichaü, gama lumoun, lageindaguba giñe luagu lóubadina ǘnabuguni. Kábati asusereda danme le lagumuchun Larúeihan Kristu le lánina Milu Irumu, danme le günringua laali “sun líbiri luwuyeri arúeihani, ubafu, luma erei le ubouagubei”? Lau ǘnabuguni le uágubei léchuda Hesusu, “ábame lederegeruni arúeihani lun Bungiu Úguchili” (aliihoualá 1 Korintuna 15:24-28).

17, 18. a) Ka uagu súdini lubéi háyeihani lubúeingu Heowá ǘnabuguni le larufudubei Hesusu? b) Kaba álügüdahani ounabúa lidan le aban arütíkulu?

¹⁷ Agia san wagía? Wafalarubei san hénpulu lánina ǘnabuguni le líchugubei Hesusu woun? Ida luba lidin woun danme le liabin Hesukrístu kei Urúei agunfulira lau lasíadihan Bungiu lídanme Arümahedón? Kei lageindaguba lan Hesusu luagu lóubadina inarüni luma irichaü luma ǘnabuguni, adügati lun gürigiarügübaña lan ha richaguabaña ani ǘnabugu hagía asalbara. Ligíati súdiniti igaburi burí le lun werederun wínwanñu. Ítara kei barǘ lan ǘnabuguni le larufudubei Hesukrístu buiti lúniwagua luma houn amu gürigia, gayarati giñe lanügün ǘnagubuni le warufudubei saragu buiti.

¹⁸ Kaba íderaguawa áyeihei hénpulu lánina ǘnabuguni le líchugubei Hesusu woun? Ka áfaaguni gayarabei wadügüni lun ǘnabugu wamá íbini lidan lénrengunga? Lóunabuba álügüdahani burí le lidan le aban arütíkulu.