Arufudahani tídangiñe Lererun Bungiu
Ida luba arúeihani le füramase láalibei Bungiu lagumadihabei lan sun ubóu?
Lidan arütíkulu le, gayarabei hadarirun tidan hibibülian guánarügü óunabagülei lun álügüdahani le adüga humaalibei húniwagua. Ánhadün busén gayarabei hakutihani gefentiña luagu Heowá óunabagülei úara huma.
1. Ka uagu megei habéi gürigia ábanrügü lan arúeihani lidan sun ubóu?
Uguñe weyu, turóbuli burí le ídangiñebei hásügüra gürigia anihein giñe lidan sun ubóu. Lidan burí saragu ageiraü, gudemetiña hibe-agei gürigia ani súfurigüdawatiña, ánheinti lidan burí amu ageiraü gámatiña gürigia saragu katei lóugiñe le hemegeirubei. Ábanrügübei arúeihani le agumadihati sun ubóu gayara lafanreinhani lirisin Ubóu lau irichaü. (Aliiha huméi Apurichihati 4:1 luma 8:9.)
2. Ka gabafubei lun lagumadihani sun ubóu?
Besafu gürigia mabusenruntiña lun ñein lan aban arúeihani lidan sun ubóu, lugundun laganóun houn kamá úati ni aban gürigia le gabafubei lun lagunfulirun lau kárugu le. Lidan furumiñeti lúgaaru, mámabaña sun gürigia lun hánharuba lan lun gumadimati ligía. Subudiwati giñe adüga lan ubafu lun lagadeirun hagaburi gürigia. Hanufudebaña gürigia luéi lagumadihan aban gürigia le salufuriti. (Aliiha huméi Ariñawagúni 29:2 luma Heremíasi 10:23, NM.)
Anúadira laali Heowá Hesusu, le Liráü, lun lagumadihaniña gürigia lun súnwandan (Lúkasi 1:32, 33). Wínwanñahaali Hesusu ubouagu. Dan meha ya lubéi ubouagu areidaguagüdati sánditiña, arufudahati houn gürigia haruma tanigi, yusuléi lidaani hama irahüñü (Márükosu 1:40-42; 6:34; 10:13-16). Chóuruti Hesusu lan gabafutimabei lun larúeihaniña gürigia. (Aliiha huméi Huan 1:14.)
3. Gayarati san ábanrügü lan urúei lidan sun ubóu?
Írida laali Bungiu Liráü lun larúeihani Ubóu siélugiñe (Danieli 7:13, 14). Ítara kei memegeirun lan aban urúei le lídangiñeti somu ageiraü lun lidin lidan burí sun uburugu le lábugiñebei larúeihan, úati giñe mégeiwa lan lun ya lan Hesusu ubouagu lun larúeihani. (Aliiha huméi Matéu 8:5-9, 13.)
Hánharubati sun gürigia lun Hesusuba lan agumadiraña? Uá. Gürigiarügübaña ha hínsiñehabubaña lun buiti ánhara lun. Ánhañati ha máhabaña hánharun lun urúei hínsiñehabuti ani richaguati le lanúadirubei Heowá hagünrinchawaguba sunsuinagubei. (Aliiha huméi Sálumu 37:9-11.)
4. Kaba buiti lanüga Hesusu keisi lurúeite sun ubóu?
Ítara kei lóundaraguniña aban hóuniri mudún mudún, lóundaraguagüdüñanu Hesusu gürigia ha ǘnabugubaña ha lídangiñetiña sun néchani ani larufudahaña houn lun háyeihani línsiñehabu Bungiu (Huan 10:16; 13:34). Rédeitiña gürigia ha lau sun hagundan lábugiñe lagumadihan Hesusu (Sálumu 72:8; Matéu 4:19, 20). Ani hasubudiragüdüñein gürigia úaraguatiña ha lidan sun Ubóu luagu urúeihali lan Hesusu. (Aliiha huméi Matéu 24:14.)
Yarafa madise, lalibürerubaña Hesusu gürigia lídangiñe habafu gumadimatiña ha wíyebaña igaburi. Anúadiraali fiú hádangiñe lani disipulugu ha úaraguatiña, lun harúeihan úara luma siélugiñe (Danieli 2:44; 7:27). Seremei Arúeihani le, labuinchuba sun fulasu lau lasubudirúniwa Heowá, ábayameti ladügǘn Ubóu ábanme paraísu kei le eferidirubei lidan lagumeseha habagari gürigia ubouagu. (Aliiha huméi Isaíasi 11:3, 9 luma Matéu 19:28.)
