1, 2. Ka gürigia uágubaña lariñaga Féduru hagía lan “anúadira láañabaña Bungiu” ani ka uagu lagúarua houn “aganóutiña bóugudi luéi hageira”?

KÉIBURI 30 irumu lárigiñe lamudeirun Hesusu sielun, abürühati apostolu Féduru aban gárada houn “ha chagagubaña bóugudi luéi hageira lóubawagu Pontu, Galasia, Kapadósia, Asia luma Bitinia”. Gürigia ha “anúadira láañabaña Bungiu” (1 Fe. 1:1, 2). Furanguti ladimurehaña lan meha Féduru lidan bérusu le, hawagu gürigia ha “anúadira láañabaña Bungiu” lau sífiri sandu, ha ibihaañabaña, ítara kei ligía, aban “iseri ibagari [...] lau aban emenigini wínwanti” lun harúeihan úara luma Kristu sielu (aliihoualá 1 Féduru 1:3, 4). Kati uagu lariñagunbei Féduru ítara haña lan anuadirúaaña ha “keisi terencha lidan ubóu le, aganóutiña bóugudi luéi hageira”? (1 Fe. 2:11.) Ka uagu lariñaga hawagu ítara? Kati uagu lunti lubéi weberesedun súngubei wagía lau katei le, dan le fiúrügüñanu lan gefentiña luagu Heowá ariñaga luagu anuadirúaaña lan lau sífiri sandu?

² Lidan sígulu furumiñeti, buiti meha layusurúniwa dimurei “aganóutiña bóugudi luéi hageira” lun ladimurehóun hawagu kristiánugu anuadirúaaña. Gayarati giñe lariñawagúniwa ligiaméme hawagu hagumuhóun kristiánugu anuadirúaaña ha añahaguabaña ya ubouagu uguñe weyu, mámaba lidan Ubóu le haganawa gumugua dan. Ariñagati apostolu Pábulu luougua luma hawagu “mudún míbetiña” ha anuadirúaañabaña: “Anhein wagía, siéluna wagía, ani wagurabuña liabin Wabureme Hesukrístu le Wasalbaragüle siélugiñe” (Luk. 12:32, NM; Fili. 3:20). Ibihatiña kristiánugu anuadirúaaña aba emenigini lun “siéluna” hamá, danti le hóunwegun ígira hamuti habagari ubouagu luagu aban ibagari buídutimati: móuwedadi sielu (aliihoualá Filipuna 1:21-23). Lidan sun lúgubu dimurei, gadüna hamuti kristiánugu anuadirúaaña lun laguarúniwa houn “aganóutiña bóugudi luéi hageira” lugundun mawinwandunbaña gumugua dan lidan ubóu le lábugiñebei lubafu Satanási.

3. Ka gayarabei lariñawagún hawagu “amu mudún” ha lánina dan le?

 ³ Kati gayarabei lariñawagún hawagu “amu mudún”, ha hapaanágu kristiánugu anuadirúaaña? (Huan 10:16.) Adimurehatu funa san Lererun Bungiu luagu somu emenigini houn libügürü haganóun gumugua dan ya ubouagu? Ítara liña, gayarabei hawinwandun lun súnwandan ya ubouagu! Íbini ítara, gayarati giñe lariñawagún hawagu arihúa hamá kei “aganóutiña bóugudi luéi hageira”.

4. Ka hásiñarubei gumadimatiña ubouaguna adüga?

⁴ Lidan anihagua lan lagübüri ubóu le, sun gürigia —íbini kristiánugu— hasufuriramémebei resultóu le lanügübei lebedaagun Satanási hama lánigu kóntüra Heowá. Ítara liña larufuduni le lariñagubei Rómana 8:22: “Subudi wamuti luagu chülǘ lan lumoun dan le, sun ubóu le ladügübei Bungiu ayahuati lau igarigu kamá aban würi to agaridutu lubá tágurahan”. Íbini háfaagun gumadimatiña, aturiahatiña siensiasi hama burí gürigia gídehaditiña lun hasansiruni gádantiña gürigia ubouagu siñaguabaña houngua lun hagidaruni asufuriruni sunsuinagubei.

5. Ka desidírü hamaalibei míñunu gürigia lúmagiñe irumu 1914, ani ka uagu?

⁵ Lúmagiñe irumu 1914, desidírühaña saragu míñunu gürigia houdin luéigiñe lóubadina Hesukrístu, Urúei le lanúadirubei Bungiu. Mabusenruntiña ni murusun lun lánigu hamá ubóu le lábugiñebei lubafu Satanási ni lun houdin luéigiñe lóubadina. Lubaragiñe lira, yúsurügü hamuti sun habagari, hámati luma here lun hídehan lun lawanserun luadigimari Larúeihan Bungiu (Rom. 14:7, 8).

6. Ka uagu gayara lubéi lariñawagún luagu ítara waña lan wagía gefentiña luagu Heowá kei “aganóutiña bóugudi luéi hageira”?

⁶ Lidan lóugiñe 200 ageiraü, gaganbaditiña gefentiña luagu Heowá lun lilurudun hageira, gama lumoun meberesenga halía lan haganawa ítara haña kei aganóutiña bóugudi luéi hageira, ani mádaraguntiña houngua lidoun polítika, ni lidoun burí turóbuli le lídanbei hageira. Lúmagiñe guentó sandiguatiña houngua kei lílana iseri ubóu le füramase lubéi Bungiu, ani wéiriti hagundan ladüga málüdigiaña lan aganawa bóugudi luéi hageira lidan ubóu wuribati le.

7. Halíaba haganawa lubúeingu Bungiu gumugua dan, ani ídaba lasusereda?

⁷ Málühali Kristu ayusurei lubafu lun lagünrinchaguni ubóu le lábugiñebei lubafu Satanási.  Úati ni murusun charati lidan Larúeihan Kristu, ani ligíaba agumucha lau figóu luma asufuriruni ubouagugiñe. Lagumuchuba giñe hau sun ha ebedaagubaña lun liricha Heowá lun larúeihan, gürigia hamá yebe o ánheligu. Gayaraahalimeti haganóun lubúeingu Bungiu ha úaraguabaña gumugua dan lidan Paraísu ubouagu (aliihoualá Arufudúni 21:1-5). Lídounme dan ligía, gayaraahalime lariñawagún lidan sun lúgubu dimurei, luagu “[séfuwaali] lan ubóu lídangiñe asufuriruni luma agadeiruni le gádanbalin lun gafanranbei lan lidan haweirigun lirahüñü Bungiu” (Rom. 8:21).

8, 9. Afuranguagüda huméi ka lan labusenrubei Féduru lariñagun lau dimurei “layumahan ǘgürügü”.

⁸ Afuranguagüda lumuti Féduru ka lan agurabúbei hámagiñe kristiánugu dan le lariñagunbei: “Niduheñu hínsiñetiña nun, [...] ayumuraguatina hun lun mígiraguagüdün humá hungua lun burí layumahan ǘgürügü le ageindagubei tuma huani” (1 Fe. 2:11). Houn kristiánugu anuadirúaaña lariñawagúa dimurei burí le furumiñe, gama lumoun huuti giñe houn lánigu Kristu ha amu mudún.

⁹ Anihein ayumahani le maribanti, adügarügü hamaali ligía katei lau aban igaburi le aubei lagundaara Bungiu. Wadügüni katei burí le wayumahabei gayarabei ladügün lun gúndaatima lan wabagari. Aban hénpulu, aban layumahan ǘgürügü maribanti wabusenrun weigin éigini o watun uniñein semeeti, wásügürün lubuidun dan hama wamadagu luma wadügün katei burí lun wísebaharime. Ani anhein maríeihali lubéi aban gürigia, maribanti giñe lagunfulirun lau ayumahani lun larounrun tuma lani weiriou (1 Ko. 7:3-5). Gama lumoun, arufuda lumuti Féduru halía lan laribada “layumahan ǘgürügü”, ariñagati mabuidun lan dan le ‘ageindagua lan tuma uani’. Anuhein fiú Bíbülia afuranguagüda tumuti ka lan mini lubéi dimurei burí le lau tásügüragüdüni lau dimurei kéiburi “luriban ayumahani” luma “layumahóun figóu” (Nueva Biblia al Día; Reina-Valera Contemporánea). Chóuruti weiri lan lisudinin hárügüdagun kristiánugu houngua luéi furumiñeguarügü ayumahani le múaranti luma lugundan Bungiu, ayumahani le gayarabei lagadeiruni hamadagua luma Bungiu. Ánhaña ígiraguagüda houngua lun luriban layumahan ǘgürügü, gayarabei heferidiruni hemenigin lun hakipuragun houngua wínwanñu.

10. Ka burí sádara layusuruboun Satanási lun ladügün lun wáyeihani hagaburi gürigia ha lábugiñebaña lubafu?

¹⁰ Busenti Satanási masigirun wamá adügei le desidírü wamaalibei luáguti wóuseruba lan kei gürigia ha “aganóutiña bóugudi luéi hageira” lidan ubóu le. Busenti lun hínsiñe lan umegeguni woun, lun wéiguadun lidoun magíaguni, lun busén wamá wéirigu wamá, lun wóunguarügü lan wabusenra katei buiti, luma lun hanarime lan línsiñe wageira woun; lisadaran Satanási sun burí katei le, ani mosu ítara luba lan warihini. Ánhawa ageindagua lau sun were luma burí luriban ayumahani le, warufudubei mabusenrun wamá lánigu wamá ubóu le lábugiñebei lubafu Satanási, ani mawinwandunbadiwa lan lidan gumugua dan. Ayumahatiwa tídangiñe sun wanigi lun waganóun gumugua dan lidan iseri ubóu richati le füramase lubéi Bungiu, ani wáfaaguña lun wibihini.

11, 12. Libe-agei dan, ka ariñawagúbei hawagu terencha, ani ka gayarabei lariñawagún hawagu gefentiña luagu Heowá?

¹¹ Sigiti Féduru afuranguagüdei ka lan agurabúbei hámagiñe kristiánugu ha “aganóu[baña] bóugudi luéi hageira”, dan le labürüdünbalin le waliihabei lidan bérusu 12: “Buidulá hóuserun hadan ha ibidiñehabúbaña lun Bungiu; ítara luba, lau sun lan adimureha hamá wuriba huagu guentó kamá hamuga wuribatün, harihubei buiti le hadügübei, ábame híchugun uéiriguni lun Bungiu danme lachülürün weyu lun laguseragüdün”. Anihein dan, ayanuhatiña gürigia wuriba hawagu terencha ani ariñagatiña hawagu gürigia hamá wuribatiña ladügarügü amu lan haríawagun hawéi ani amu ligía ligaburi hóuserun, hadimurehan luma hasansiragun hawéi. Gama lumoun, dan le buidu  lan hóuserun, arufuda hamuti mébuna lan ladimurehóuniwa wuriba hawagu.

¹² Ítarameme, gayarati giñe anihein lan katei le ídanbei amu hamá kristiánugu inarünitiña hawéi hibe-agei habesinanigu, kéiburi katei le uágubei hayanuha, isebáhari le hanúadirubei, ligaburi hasansiragun luma haranseragun houngua. Ligíati, añahein lubéi gürigia adimurehatiña wuriba hawagu gefentiña luagu Heowá ladüga ibidiñe hamá houn buidu. Gama lumoun, añahein giñe gürigia adimurehatiña buidu luagu lubuidun hóuserun.

13, 14. Ida liña ‘larihíniwa lichú lau gürigia lidan burí katei le ladügübei”? Ru humá aban hénpulu.

¹³ Gayarabei larufuduni lubuidun wóuserun luagu mébuna lan ladimurehóun wuriba wawagu. Lau sun Hesusurügügili lan machara lun Bungiu hádangiñe sun gürigia ha wínwanhañabaña ubouagu íbini ítara, íridahouti meha luagu mama lidurun. Ariñagatiña luagu ‘géigadi lan, gátadi, hamada lan gafigountiña hama aguburahatiña liseinsuna gumadi’. Gama lumoun lau lóuserun Hesusu lau lichú aau, luma lau leseriwidun lau úaraguni lun Bungiu, arufuda lumuti iyeeni lan le ariñawagúbei luagu. Ligía guánarügü ariñagubei: “Arihúati lichú lau gürigia lidan burí katei le ladügübei” (Mat. 11:19, NM). Ligiaméme giñe asuseredubei uguñe weyu. Aban hénpulu, ariñagatiña fiú gürigia ha awinwandubaña yarafa tun Beteli to lídanboun uburugu Selters, lidan ageiraü Yámani, luagu amu hamá íbirigu ha eseriwidubaña ñein. Gama lumoun, aba ladimurehan gálidi luagu hafulesein aba lariñagun: “Ámuti ligaburi habagaridun Gefentiña ha nadagimeinbaña ñein, gama lumoun, magidarun hamuti darangilaü le haganaguabei gürigia”.

¹⁴ Susereti giñe aban katei libe le uburugu Moscú (Rusia), le ñein lubéi meha híridahoua gefentiña luagu Heowá luagu saragu katei le mama hadurun. Aba háluahan Gefentiña ídemuei tidan Tribunal Europeo de Derechos Humanos to lídanboun uburugu Estrasburgo (Faransu), subudiwati le desidírü lubéi Liñun-agei Lúrudu le lidan sisi-hati irumu 2010, ariñagati: “Saminati Liñun-agei Lúrudu luagu mébuna lan ládaragun [uburugu Moscú] lungua kóntüra haricha gefentiña luagu Heowá lun líbüre hamá lun hadügün kultu luma lun hadamuridagun. Míchutu luban burí guséi to lídanboun uburugu ligía resun ‘dǘgüdati ani nófuti’ lun harufuduni luagu fosu hamaniña gefentiña luagu Heowá iduheñu lun hafanreinragun, [...] o ínchaha hamaniña lílana [hani relihión] lun háfaragun houngua o lun hamahadun lun agaranihani [...]. Gíbeyati seinsu le laguburahabei Liñun-agei Lúrudu le Rusiabei hawéi [gefentiña luagu Heowá] ani arihúati deré lan lilurudun ageiraü ligía, ani hanarimeya lan lásügürün luéigiñe lébeha katei burí le yuubei lun”.

15. Ka burí adundehani tídangiñeti Bíbülia wafalarubei wagía kristiánugu inarünitiña lidan sun ubóu?

¹⁵ Gefentiña luagu Heowá ha Moskúbaña —hama ha lídanbaña sun ubóu— gúnfulitiwa lau amu gumadi le líchugubei Féduru: “Keisi lánigu humá Wabureme Kristu, ayumuraguatina hun lun gaganbadi humá lun sun gumadi ya ubouagu. Gúnfuli humá luma lugumadin urúei, kei ligía lan íñutimabei ubara” (1 Fe. 2:13, 14). Lau sun mama wamá lánigu ubóu wuribati le wagía kristiánugu inarünitiña, íbini ítara, gaganbaditiwa lau sun  wagundan houn gumadimatiña ánheingubeirügü kóntüra lubéi le hamuriahabei wama luma lilurudun Bungiu ligíarügüñein maganbadi wamá houn (Rom. 13:1, 5-7).

16, 17. a) Ka katei arufudubalin úati lan kóntüra hamá gefentiña luagu Heowá houn gumadimatiña? b) Ka katei uágubei híchiga fiú lábutigu polítika fe?

¹⁶ Íbini óusera wamá, wagía gefentiña luagu Heowá, kei “aganóutiña bóugudi luéi hageira” lidan ubóu le, mama wóuseruña ítara ladüga kóntürañadiwa lan houn gumadimatiña o lun wadimurehan wuriba hawagu amu gürigia. Úati kóntüra wamá houn gürigia ha desidírütiña hádaragun houngua lidoun polítika, o lidoun lituróbulin hageira. Mádaraguntiwa woungua lidoun polítika mouchun wagía wafosuruniña lúrudugu lun hasaminarun kei wagía, kei hadügüni lílana amu burí relihión. Mébunati duru le híchugubei gürigia wawagu luagu nege gidá wamani darangilaü o ebedaagua wamá kóntüra gumadimatiña, luma nege ínchaha wamá amu gürigia lun hebedaagun.

¹⁷ Dan le gaganbadi wamá wagía kristiánugu houn gumadimatiña —afalarei adundehani le líchugubei Féduru: “Inebelá [...] urúei hun”—, rútiwa inebesei houn gumadimatiña ha, ru wagía uéiriguni lun kada aban según ubaraü le resibi hamaalibei (1 Fe. 2:17). Añahein gürigia wéirigutiña ha rúhañabaña fe mébuna lan lasaminarúniwa peliguru hamá gefentiña luagu Heowá. Ligía asuseredubei lun aban polítiku yámani gíriti Steffen Reiche, ligía meha aban hádangiñe gürigia ha agumadihabaña uburugu Brandeburgo (Yámani), lárigiñe seriwiti giñe kei aban hádangiñe gürigia ha lídanbaña óundaruni le ídanbei ladimurehóua luéigiñe hafulesein lílana lageira. Ariñagati buidu lan meha hóuserun gefentiña luagu Heowá danbei héibaahañanu lan nasi, madügün lan éibaahouni ligía lun hasansiruni hafiñen, ani óusera hamaniña gürigia ha adaürǘbaña úara hama lau ínsiñehabuni. Ariñagati giñe, lidan lan aban ubóu le ídanbei furundetimarügaaña lan gürigia houn terencha, houn ha ámubaña afiñen hawéi, luma houn ha masaminarunbaña kei hagía lidan katei luáguti polítika, súdiniti lan háyeihani lílana ageiraü Yámani igaburi le harufudubei gefentiña luagu Heowá.

18. a) Ka uagu ménrengun lubéi woun warufudun “hínsiñe hamá [wa]duheñu luéigiñe Hesukrístu” woun? b) Ka katei adügübei lun taweiridun hanigi fiú gürigia?

¹⁸ Ariñagati giñe apostolu Féduru: “Hínsiñe hamá hiduheñu luéigiñe Hesukrístu hun” (1 Fe. 2:17). Inebeti Bungiu woun wagía gefentiña luagu Heowá, ani adügati inebesei le wasandirubei luagu lun wayumahan wadügüni Lugundan. Gúndaatiwa giñe ladüga hádangiñetiwa lan ibiriñaü ha lídanbaña sun ubóu, súngubei wagía weseriwiduña lun Heowá. Ligíati, ménrengun lubéi woun “hínsiñe hamá [wa]duheñu luéigiñe Hesukrístu” woun. Kei wawinwanduña lan lidan aban ubóu buin hau gürigia ha asaminarubaña hawouguounrügü, wéiritu hanigi gürigia dan le harihini ínsiñeni le warufudubei wámagua. Aban hénpulu, lidan irumu 2009, aba taweiridun tanigi aban würi to adundehabaliña asariñahatiña, to nadagimeinboun tun aban bísinisi merigana lánina áfayahani, dan le tarihinbalin ínsiñehabuni luma areini le aubei hóuseraña íbirigu lídangiñetiña ageiraü Yámani íbirigu terencha ha achülürübaña lun aban adamurini le ídanbei hóundaragua íbirigu lídangiñetiña saragu ageiraü. Ariñagatu marihinñahagiru lan aban katei ítarati lidan sun irumu le taubei nadagimein tun bísinisi tuguya. Dan lárigiñe, aba lariñagun aban íbiri: “Lau ligaburi tadimurehan wawagu, arihúati furangu hanarime lan taweiridun tanigi, weiri ligía tugundan”. Aganbañahaadün san aban gürigia ariñaga aban katei ítarati, lárigiñe laríaguni hóuserun gefentiña luagu Heowá lidan aban lídangiñe adamurini le adüga wamaalibei?

19. Ka katei desidírü wamaalibei, ani ka wemeniginbei?

¹⁹ Lidan sun manera le írida wamaalibei lidan arütíkulu le —lúmaya saragu amu— arufudatiña gefentiña luagu Heowá luagu inarüni lan “aganóutiña [hamá] bóugudi luéi hageira” lidan ubóu le lábugiñebei lubafu Satanási. Gúndaatiwa lau wóuserun ítara ani desidírühadiwa wasigiramémeba lan óusera ítara. Hemenigitiwa luagu chülümémeeli lan dan lun waganóun gumugua dan lidan iseri ubóu richati le füramase lubéi Bungiu. Ma inarüni ayumaha wamá lachülürün weyu ligía?