Lǘrüwan álügüdahani: Ka uagu lígira Bungiu lun nasufurirun?
GÁTAATI meha lúguchi Ian. Íbini meha memegeirun lan ni kata, wéiriti meha lasufurirun ladüga meteni lan lúguchi lun ida liña lan lasandiragun lungua. Ariñagati: “Maweirinti meha ínsiñeni le nasandirubei luagu. Mínsiñeti meha nun látagun ni lóuserunu núguchu wuriba”. Lau lásügürün dan aba lasaminarun Ian ua lan Bungiu, lugundun ábaha lasaminarun lúnguarügü: “Anhein anihein lubéi Bungiu, ka uagu lígira lun wasufurirun?”.
Ka lébunabei hadügüni gürigia álügüdahani le?
Íbini anhein maweirindigia lubéi waturóbulin, gáñigüda lumutiwa warihini hasufurirun gürigia ha maduruntiña, ladüga tidan wanigi ayumahatiwa lun ñein lan irichaü. Gama lumoun, gáritimati woun dan le wagía lan asufurirubei, ítara kei lasuseredun lun Ian, o somu lan waduhe asandirubei o óunwebei.
Ka óunabagülei híchugubei fiú gürigia?
Añahein asaminarutiña ígira lan Bungiu lun wasufurirun lun larufudahan ǘnabuguni woun luma lun gudemehabu wamá. Añahein amu afiñetiña wafayeiruña lan luagu burí figóu le wadügübei lidan meha aban ibagari le sügühalibei.
Ka lanagangiñebei óunabagülei le?
Wuriba lan Bungiu ani meberesenti lan ánhawa asufurira, ani ligía lan hénrengu lubéi lasandirúniwa ínsiñeni luagu.
Ka tarufudahabei Bíbülia?
Mama lan Heowá gadurunbei luagu asufuriruni. “Dan le lebelurun lun aban gürigia lun ladügün katei wuribati, maritagualá luagu Bungiu lan ádarubalin katei ligía lidoun; lugundun mebeluti lidoun Bungiu lun ladügün wuribani, mada lumuti giñe hadoun gürigia lun hadügüni.” (Santiagu 1:13.) Ani según tadimurehan Bíbülia luagu Bungiu, siñati ligía lan gadurunbei luagu asufuriruni. Ka uagu?
Ladüga ínsiñeni, ligía aban lídangiñe igaburi le méinitimabei lídangiñe ligaburi Bungiu (1 Huan 4:8). Konpararü tumuti Bíbülia línsiñehabu Bungiu luma ínsiñeni le tasandirubei aban úguchuru luagu tisaani le figigilibei. “Rédeiti funagia tínsiñehabu aban úguchuru houn tirahüñü odi bulíei tumutiña?”, liña lálügüdahan Bungiu. Ábati lariñagun: “Íbini hamuga tabulieiduniña, au, mabulieidun nubadibu” (Isaíasi 49:15). Ma inarüni úatu lan aban úguchuru buitu abuleseiruti tiráü chuñu tau? Lubaragiñe lira, chóuruti táfaaguba lan hamuga lun tíchugun awalidaguni lun lídangiñe furumiñeguarügü asufuriruni. Ítarameme, maweiyasunti Bungiu adüga lun hasufurirun gürigia maduruntiña (Agumesehani 18:25).
Háfuga álügüdagua humá hungua: “Kati uagu gibe habéi gürigia asufurira? Anhein berese lubéi Bungiu wau ani suntigabafu ligía, ka uagu magidarun lubalin lébuna asufuriruni sunsuinagubei?”.
Anihein resun buiti luma Bungiu lun magidarun lani asufuriruni guentó. Le linarün katei, libe-agei dan amu gürigia adügübaña lun hasufurirun ha híbiri. Buin liña ubóu hau gürigia deré tanigi ani fásitiña ha adügübaña saragu dañu ani mabusenruntiña hasansirun. Ligíati, lun lagidaruni Bungiu asufuriruni, mosu lagünrinchaguniña gürigia ha ítaratiña.
Másiñati álügüdagua humá hungua: “Kati uagu madügün lágili lubéi?”. Afuranguagüda lumuti apostolu Féduru ka lan uagu: “Mama hamugatia ladüga ladarasarun lagunfuliruni Bungiu le füramase láalibei, keisi haritagun saragu; gaguraasunrügüti habá gürigia ladüga mabusenrunti lun leferidirun ni aban hádangiñe; labusenrun lun hasakürihan sun gürigia.” (2 Féduru 3:9). Le linarün katei, arufudati luguraasun Bungiu luagu hínsiñehabu lan ani gudemehabu ligía.
Íbini ítara, málühali Bungiu ‘asufuriragüdaña sun ha asufuriragüdübaña amu’. “Günringuaü le magumuchaditi, ligíaba habeichúagüle” gürigia wuribatiña ha óuserubaliña ha híbiri lau marichaü (2 Tesalónikana 1:6-9).
Darí lumuti Ian, le buga uágubei wadimureha lidan lagumeseha arütíkulu le, óunabagülei le furanguti lun burí álügüdahani le ladügübei libügürü asufuriruni.
