AÑAHEIN gürigia saminatiña harufuduña lan menebenehabuni lun Bungiu anhein hálügüda ka lan uagu lígira lun lasuseredun somu katei. Háfuga saminatün kei hagía.

Gama lumoun, subuditi san hun añaheinhaña lan saragu gürigia buítiña ha álügüdagua hamaali Bungiu?

Aban hénpulu, álügüdahati aban wügüri úaraguati gíriti Hobu: “Ka san uagu gabagarimeme habéi gürigia wuribatiña, chülǘ hagía aweiyada buin lau ubafu?” (Hobu 21:7).

Aban profeta úaraguati gíriti Abakúku, ariñagati lun Bungiu: “Ida liñati maní bubéi dan barihiniña gáfarahatiña, maní buguya sun añaha lan ha wuribabaña agünrinchaguaña ha buítimabaña hawéi?” (Abakúku 1:13).

Íbini Hesukrístu ariñagati lidan aban ókaasion: “Nubungiute, Nubungiute, ka san uagu bígirana?” (Matéu 27:46).

Adügati san álügüdahani burí furanguti le lun lagañidun Heowá? * Úati ni kata lidan burí kapítulu tídangiñeti Bíbülia le arufuduti gáñigüda lani meha álügüdahani burí le Heowá. Ani moun lumuti taweiridun wanigi luagu katei le. Subudi wamuti magañidun lan Bungiu wama dan le wamuriahani le wemegeirubei luma lun wóunigiruni wátuadi, lubaragiñe lira, ru lumuti woun lau sun lugundan (Matéu 6:11, 33). Ligíati, ida lubagia lagañidun wama luagu wamuriahan ariñahani huuti luma lun buidu lan wasandiragun woungua dandu tídangiñe wanigi kei lidan wasaminan? (Filipuna 4:6, 7.) Hesusu guánarügü ariñagubei houn lani disipulugu: “Háluaha, ábame hadarirun” (Matéu 7:7). Le lariñagubei bérusu burí le lubaragiñebei luma le lárigiñebei füramasei le lídanbei bérusu le arufudati mámarügüñein lan luagu libihíniwa umegeguni ladimureha Hesusu, ladimurehaña lan giñe luagu óunabagülei lun álügüdahani burí súdiniti.

Ánhadün hamuga gachansin, kaba hamuga lídangiñe álügüdahani le hadüga lun Bungiu?

• “Ka san lisuunibei nibagari?”

• “Kaba san asusereda nun ánhana ounwe?”

• “Ka san uagu nasufurira?”

Kei sun lubéi “le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni”, áluaha wameigia óunabagülei le líchugubei tidan Lererun (2 Timotéu 3:16). Guentó wakutihaali ka lan lébunabei hadügüni gürigia álügüdahani burí le hóuniwagua luma ida liña lan tóunabuni Bíbülia.