Ka hasandirubei dan le hasaminarun luagun 21 lidan duusu-hati irumu 2012, weyu le nege lunbei lasansiragun katei ubouagu según hani maya kalendariu? Según ka lan hagurabahabei, gayarati hasandirun awalidaguni, magundani o masandi humá ni kata. Sun le, ábanya funa san lídangiñe katei charati le ayanuhóubei luagu lagumuchagüle ubóu?

Ka hisaminanbei luagun “lagumuchagüle ubóu” le uágubei tayanuha Bíbülia? (Matéu 24:3.) Añahein gürigia hanufudetiña luéi lagudúba lan ubóu. Añahein amu busentiña harihini katei burí le lunbei lasuseredun. Ani añahein saragu amu gürigia, buchá hawagu aganba luagu yarafaali lan lagumuchagüle ubóu. Mama funa san hóunabarügüña gürigia lun abahüdaguni le haganbubei sügǘ lau lun inarüni le tídanbei Bíbülia?

Háfuga taweiriduba hanigi lau hafurendeiruni le tarufudahabei Bíbülia libügürü katei le. Rutu Bíbülia resun woun lun wayumahani liabin lagumuchagüle ubóu; ariñagatu giñe woun gayara lan labuchadun wawagu agurabaha ánhawa asaminara darasa lan. Ligía wamisurahanbadün lun hakutihani óunabagülei le tíchugubei Lererun Bungiu lun gádürü álügüdahani le hadügübei gürigia hóuniwagua.

ÓUNABATU BÍBÜLIA: “Ru bumuti múa luagu lebu, lun mánhingichun lan lídangiñe lubara” (SÁLUMU 104:5).

Magünrinchawagunbei ubóu, ni lau watu ni lau amu katei; arufudahatu Bíbülia hawinwanduba lan gürigia ligibuagu ubóu lun súnwandan. Ariñagati Sálumu 37:29: “Galagantehabei gürigia buítiña múa, haganóuba giñe lidan súnwandan” (Sálumu 115:16; Isaíasi 45:18).

Lárigiñebei ladügüni Bungiu Ubóu, ariñagati “buidu lan sun le ladügübei”, ani masansirungili lisaminan (Agumesehani 1:31). Masaminarunti Bungiu lagünrinchaguni Ubóu, füramaserügüti “[l]agünrinchaguniña ha agünrinchagubalin ubóu”. Lidan amu dimurei, mígirunbei lun hagünrinchaguni sunsuinagubei (Arufudúni 11:18).

Gama lumoun, háfuga hasaminaruña luagun 2 Féduru 3:7 ñein lubéi lariñaga: “Sielu luma múa le guentobei, lareiduñein Bungiu lubame weyu lagünrinchawagun lau watu gemeti”. Ma ariñagati bérusu le lagudúba lan Ubóu? Anihein dan yusu tani Bíbülia dimurei sielu, múa luma watu kei sínbolu. Kéiburi lidan 2 Lúrudu 32:1 lariñaga ñein: “Sielu, aganbabá, lugundun nadimureha, múa, ruba arigei lun nererun”. Chóuruti yúsua lan dimurei múa ya lun layanuhóun hawagu gürigia ha ubouagubaña.

Lidan bérusu burí le lubaragiñebei 2 Féduru 3:7 arufudati yúsua lan dimurei sielu, múa luma watu gemeti kei sínbolu. Lidan bérusu 5 luma 6 konpararuati luma guran le lánina lidaani Noé. Gama lumoun, magumuchagunti meha múa. Günringuati meha guran aban “ubóu”, o saragu gürigia wuribatiña, luma aban “sielu”, o gürigia ha meha agumadihabaña ubouagu lidan dan ligía (Agumesehani 6:11). Ítarameme, ayanuhati 2 Féduru 3:7 luagu hagünrinchawaguba lan gürigia wuribatiña hau sun urúeigu marichatiña, kamá hamuga lau watu.

ÓUNABATU BÍBÜLIA: “Ani ubóu, agumucheina liña lau burí sun luriban hayumahan gürigia; ánheinti le adügüti lugundan Bungiu, labagariduba lun sun dan” (1 HUAN 2:17).

“Ubóu” le lunbei lagumuchun, mama múa le uágubei wawinwanda, lagumuchaguba ubóu hani gürigia ha madügünbalin lugundan Bungiu. Ítara kei dan le lagidarun aban surusia aban tumoru lánina kánserü luéi aban gürigia lun lesefuruni libagari, ítara luba lagidaruniña Bungiu wuribatiña lun gayara lan hagundaarun ha buídubaña lau habagari ubouagu (Sálumu 37:9). Lidan manera le, aban katei buiti “lagumuchagüle ubóu”.

Saminaü buiti le luagu “lagumuchagüle ubóu” úati furangu lan tidan fiú Bíbülia to ídanboun hásügüragüdei kei “lagumuchagüle sun katei” o “lagumuchagüle wadaani” (Matéu 24:3; Biblia Textual). Anhein magumuchagunbei lubéi ubóu ani añaheinbaña gürigia awinwandutiña ubouagu lárigiñe lagumuchagüle ubóu, ma súdiniti lun ñeinbei lan aban iseri dan o aban iseri hawuyeri gürigia? Arufudatu Bíbülia luagu ítara luba lan, lugundun ayanuhatu luagu “ubóu le lunbei liabin” (Lúkasi 18:30, TNM).

Dan le layanuhan Hesusu luagu dan ligía, ariñagati: “Danme iseri lan sun katei”. Ladügüba lun ítara lan habagari gürigia kei meha labusenruni Bungiu lúmagiñe furumiñeti dan (Matéu 19:28). Gayarahalime wagundaarun lau abinirúni burí le:

• Aban paraísu ubouagu lau ichouruni luma lubuidun ibagari houn sun gürigia (Isaíasi 35:1; Mikeasi 4:4).

• Wadagimanu buiti le íchuguti ugundani (Isaíasi 65:21-23).

• Úaalime sandi (Isaíasi 33:24).

• Ábayame niburein hamá sun gürigia (Hobu 33:25).

• Háguyuguagüdüniwa hilaaña (Huan 5:28, 29).

Anhein wadüga “lugundan Bungiu”, mama mosu wanufudedun luéi lagumuchagüle ubóu, lubaragiñe lira, busenrügübadiwa lun lachülürün.

ÓUNABATU BÍBÜLIA: “Danme giñe le harihini lasuseredun burí katei le, subudi huméi luagu madiseeli lan lidaani Bungiu lun larúeihan” (LÚKASI 21:31).

Tidan líburu The Last Days Are Here Again (Giribuha lagumuhóun burí dan), ariñagati máisturu Richard Kyle luagu “sun lan asansiruni burí magurabunwati le luma lénrengunga le ubouagubei adügati lun lagibedagun sun katei le ariñawagúbei luagu ídaba lan liabin lagumuchagüle ubóu”, dántima le ibidiñewa lan ka lan uagu lasusereda sun burí katei le.

Gama lumoun, madügǘnwati profesía burí le tídanbei Bíbülia lun lafuranguagüdüni sügǘ burí le adiheridagüdübaliña gürigia. Ruti Bungiu sífiri sandu houn lánigu profeta lun hariñaguni katei burí le lunbei larufuduni yarafaali lan lagumuchagüle ubóu. Teni humá lun fiú lídangiñe profesía ligía ábame harihini hungua anhein lagunfuliruña lubéi o magunfulirun lan.

• Wuribu, ilamaü, hárabaganali luma burí sandi le gáfarahati (Matéu 24:7; Lúkasi 21:11).

• Lanarime laganwoundun wuribani (Matéu 24:12).

• Hagünrinchaguni gürigia Ubóu (Arufudúni 11:18).

• Hóunguarügüñein gürigia habusenra buiti, hínsiñeti seinsu houn, áluaha hamuti hagundan guánarügü mama lun háluahani Bungiu (2 Timotéu 3:2, 4).

• Lafanreinragun familia (2 Timotéu 3:2, 3).

• Mebereseni luagu katei burí le arufudubalin yarafaali lan dan lun lagumuchun ubóu le (Matéu 24:37-39).

• Lapurichihóun uganu buiti luáguti Larúeihan Bungiu lidan sun Ubóu (Matéu 24:14).

Kei lariñaguni Hesusu, danme warihini “sun burí katei le” leseriwiduba woun lun wasubudiruni yarafaali lan lagumuchun ubóu (Matéu 24:33). Wagía gefentiña luagu Heowá afiñetiwa luagu seini burí le, ani ligía wapurichihanbei lau afiñeni lidan 236 ageiraü luma burí aüdü.

ÓUNABATU BÍBÜLIA: “Danme añaha lan gürigia ariñaga: ‘Lídanñein darangilaü luma achoururuni sun katei’, ligíame liabin günringuaü hawagun sódini kei liabin agariduni tun würi dageinatu; siñabeiti hesefurun” (1 TESALÓNIKANA 5:3).

Konpararü tumuti Bíbülia lagünrinchawagun ubóu luma tagaridun aban würi dageinatu: siñati lararamúniwa tagaridun aban würi ani sódiniti lagumeserun. Ítarameme, gayarati konpararua lan lagumuhóun dan luma aban dageinaü, lugundun eibu dan ligíatima tarihin würi dageinatu saragu seini luagu yarafaali lan tágurahan. Ani íbini machülügili lan dan le lariñagubei surusia tun, chouru tumuti aniteeli lan irahü. Ítarameme, íbini miabin lan lagumuchagüle ubóu lidan weyu le hariñagubei gürigia, sun katei le asuseredubei ruti ichouruni woun luagu wawinwanduña lan lidan “lagumuhóun dan” (2 Timotéu 3:1).

Gayarati hálügüdagun hungua: “Anhein furangu lubéi seini luagu yarafaali lan lagumuchun ubóu, ka uagu masubudirun habalin saragu gürigia?”. Ariñagatu meha Bíbülia danme lan yarafaali lagumuchagüle ubóu meberesenbaña lan gürigia lau seini burí le arufudubalin katei le. Lubaragiñeme hetenirun lun lanarime burí asansiruni le asuseredubei, adügarügübaña bula, ábame hariñagun: “Hilagua wagübürigu ani ítaramemegili sun katei kei  meha lúmagiñe dan le ladügǘnbei ubóu” (2 Féduru 3:3, 4). Lidan amu dimurei, íbini furangu lan larihín liseinin lagumuhóun dan, hibe-agei gürigia meberesenbaña (Matéu 24:38, 39).

Lidan arütíkulu le fiúrügüñein lídangiñe seini le tídanbei Bíbülia luagu yarafaali lan lagumuchagüle ubóu. * Busentün hafurendeirun lanwoun le? Amisuraha wamutün lun háluahaniña gefentiña luagu Heowá lun hamuriahan aban aturiahani tídangiñeti Bíbülia mafayeihanga. Gayarati heresibiruni aturiahani le húbiñe o lidan amu fulasu, íbini luéigiñe gágamuru. Ábanrügübei katei hemegeirun, dan, gama lumoun buiti le lunbei hibihini wéiriti lebegi.