1-3. a) Ka uagu aban lubéi hénpulu buiti Hosué lani aban gürigia le anúadahabalin üma le buídubei? b) Ka lunbei waritaguni lidan lóurate desidírü wamá?

SÚDINITI ganúadahadi lan gürigia. Dan le lunti lan desidírü lan aban gürigia, gíbeti katei gayarati ladügüni ani gayararaüti desidírü lani kaba lan émeri lárügüda lidan libagari. Ru wamá aban hénpulu: lun hamuga laweiyasuhan aban gürigia lídangiñe aban üma eibu, sódini aba lafanreinragun üma, aban luagun lóunweren aban luagun lubaünan. Kaba luwuyeri lanúadaha lun lachülürün ñeinhin lubéi labusenra? Le chóurubei anihein lan aban üma le lunbei lanügüni yarafa ñeinhin lubéi labusenra lachülürün luma aban le lunbei lanügüni diseun.

² Tidan Bíbülia daritiwa saragu hénpulu hani gürigia ha agagibudagubaña luma sügǘ ítarati. Kéiburi Kaín, biámañein meha katei gayarati ladügüni: lígiraguagüdün lungua lun igañi o lárügüdagun lungua (Agu. 4:6, 7). Mosu meha desidírü lan Hosué anhein leseriwiduba lubéi lun Bungiu le inarüniti o houn búngiugu ha mama inarünitiña (Hos. 24:15). Kei busén lubéi meha Hosué lerederun yarafa lun Heowá, aba lasigiruni lémeri Bungiu. Ánheinti Kaín, mama ligía labusenrubei ligía lanúadahanbalin üma létima adisedagüdübalin luéi Bungiu.

³ Háfuga lasuseredun somu katei le ídanbei mosu lan hanúadahan aban lídangiñe bián üma. Danme lasuseredun ítara, haritagua huméi ka lan habusenrubei: híchugun uéiriguni lun Heowá lidan sun le hadügübei luma lun hadisedun luéi katei le gayarabei ladisedagüdünün luéi (aliihoualá Ebüréu 3:12). Lidan arütíkulu le luma le lárigiñebei le wakutihaba sedü katei lidan wabagari le ídanbei moun lumuti lan wígirun lun ñein lan adisedagüdütiwa luéi Heowá.

4. Ka uagu súdini lubéi wadagimanu lidan habagari gürigia?

⁴ Hani kristiánugu buligasion hanuriagun houngua ani anuriaha hamañame hafamilian. Ariñagatu Bíbülia  le lan maritagunti hawagun liduheñu wuribatimati sügǘ lau aban gürigia mafiñenti (2 Tesa. 3:10; 1 Tim. 5:8). Furanguti súdini lan wadagimanu lidan habagari gürigia, gama lumoun ánhawa móunigi, gayarati ladisedagüdüniwa luéi Heowá. Ida?

5. Ka burí katei súdiniti lunbei wasaminaruni lubaragiñe wánharun lun aban wadagimanu?

⁵ Samina humá háluahaña lan wadagimanu. Anhein hénrengu lubéi libihín wadagimanu lidan fulasu le ñein lubéi hawinwanda, gayarati hasaminarun mosu lan hánharun lun furumiñeti chansi le hadarirun, ka lan yebe luwuyeri wadagimanu. Gama lumoun, ánheinti dürügua lubalin wadagimanu ligía aban lídangiñe lúrudu le tídanbei Bíbülia? Ánheinti mosu lubéi hawadigimaridun saragu dan o haweiyasuhan darí lun siñá lan hagunfulirun buidu lau hani buligasion kei kristiánu o ladisedagüdünün hawéi hiduheñu? Hánharuña hamuga san lun wadagimanu ligía ladüga hasaminarun buítimati lan sügǘ lau ni kata? Mabulieida huméi anhaün lan desidírü wuriba gayarati lan ladisedagüdünün luéi Heowá (Ebü. 2:1). Ligíati, anhein háluahaña lubéi wadagimanu o hasaminaruña lan hasansirun wadagimanu, kaba íderaguaün lun desidírü humá buidu?

6, 7. a) Ka burí katei gayarabei habusenrun gürigia hibihini lídangiñe wadagimanu? b) Ka lídangiñe biama katei le gayarabei layarafadagüdüniña lun Heowá, ani ka uagu?

⁶ Kei wafurendeiruni, moun lumuti wabulieiduni ka lan wabusenrubei lidan wabagari. Álügüdagua humá hungua: “Haliñoun san nabusenra lanügünina nuadigimari luma le naturiahabei?”. Anhein ariha hubalin wadagimanu keisi aban katei le lunbei líderagunün lun hanuriagun hungua anuriaha humañame hufamilian lun heseriwidun lun Heowá, labinirubei Heowá háfaagun (Mat. 6:33). Meredeti Heowá madügünga ni kata dan le weferidiruni wawadigimari o dan le sódini lan wemegeirun somu katei ani mebegiti woun (Isa. 59:1). Ariñagatu Bíbülia: “Salba lumutiña [...] Bungiu ha deregeguabaña houngua lun luéi óuchawaguni” (2 Fe. 2:9).

⁷ Gama lumoun, ánheinti busén hubéi harisidun? Gayarati hibihini. Gama lumoun mabulieida huméi mosu lan hafayeirun aban ebegi le moun lumuti háfaagun lun hafayeiruni (aliihoualá 1 Timotéu 6:9, 10). Ánhadün adiherida saragu luagu wadagimanu luma irisini, ladisedagüdübadün luéi Heowá.

8, 9. Ka lunbei mabulieidun hamani agübürigu lidan luáguti igaburi le harufudubei luagu wadagimanu? Afuranguagüda huméi hóunabagüle.

⁸ Anhein úguchili hubéi, samina humá ka lan hénpulu híchugubei houn hisaanigu. Ka harihibei súdinitima lan hun, wadagimanu o humadagua luma Heowá? Ánhaña ariha súdinitima lan seinsu hun o harihín kei gürigia rísitiña ani subudiwa hugía, ma gayarabei hasigiruni hémeri le lunbei lanügüniña lidoun chagaguaü? Gayarabei san íbini heferidiruni inebesei le hasandirubei huagu keisi úguchili? Ariha huméi le tariñagubei aban nibureintu kristiána: “Le naritagubei, súnwandan deregeguañu liña lan núguchi lungua lun wadagimanu. Furumiñe genegeti yebe lawadigimariduña lan saragu lun memegeirun wamá ni kata. Gama lumoun, sánsihali fiú katei lidan lagumuhóun burí irumu. Gumugua dan lau nadagimein, ani mama lun lagañeihan katei le mégeiwati, lúnrügü lanügün wendei múnadoun. Ligía wasubudirúnwabei kei familia ha rísibaña, lubaragiñe hamuga wasubudirúniwa kei familia ha ínchahabaliña ha híbiri lun haganwoundagüdüni heseriwidun. Himei nágili hamuga milu wéiyaasu lun líderagunina núguchi lidan neseriwidun lun Heowá sügǘ lau liseinsun”.

⁹ Agübürigu, madiseda humá luéi Heowá lun hayusurun saragu dan luma erei lidan wadagimanu o aturiahani. Arufuda huméi houn hisaanigu luagu afiñe humá  luagu umadaguaü lan luma Heowá irisini le súdinitimabei, mama seinsu (Mat. 5:3).

10. Nibureinti, ka lunbei furangu lan lidan bisaminan dan le desidírü ban kaba lan badüga lau bibagari?

¹⁰ Anhein nibureingidibu lubéi ani basaminaruña kaba lan badüga lau bibagari, ida luba desidírü ban buidu? Kei aubei warihei, mosu basubudiruni ka lan babusenrubei. Háfuga busentibu baturiahan somu katei. Gama lumoun, líderagubadibu san wadagimanu ligía lun beseriwidun lun Heowá, o ladisedagüdübadibu luéi? (2 Tim. 4:10.) Busentibu san ítara ban kei gürigia ha gúndaabaña dánrügü le anihein lan seinsu hama bánkurugu o dan le buidu lan lidin houn lidan hani bísinisi? O barufudubei afiñeni le larufudubei Dawidi? Ariñagati: “Nibureintina meha, guentó wéiyaadina, ani marihingidina láguruniña Bungiu gürigia ha buídubaña, marihin naña hasaanigu arihadiha” (Sal. 37:25). Haritaguabá anihein lan aban üma le lunbei ladisedagüdünibu luéi Heowá luma aban le lunbei lanügünibu lidoun ibagari le gúndatimabei (aliihoualá Ariñawagúni 10:22 luma Malakíasi 3:10). Kaba banúadaha lídangiñe? *

11. Ka tariñagubei Bíbülia luagu isebáhari, ani ka lunbei gabaroun wamani?

¹¹ Mariñaguntu Bíbülia mosu lan wawinwandun lidan íruni, mariñaguntu giñe leferidirún lan dan laluahóun isebáhari. Abürühati apostolu Pábulu lun Timotéu “hu lan lánhingichun úgubu” (1 Tim. 4:8). Ariñagatu giñe Bíbülia anihein lan “lidaani éherahani” luma “lidaani efeduhani”, ani ariñagatu giñe lun hemeraagun gürigia buidu (Apur. 3:4; 4:6). Gama lumoun, ánhawa móunigi, gayarati ladisedagüdüniwa isebáhari luéi Heowá. Lun masuseredun lan woun, anihein bián katei lunti gabaroun wamani: luwuyeri isebáhari le wanúadahabei luma dan le wígirubei lun.

12. Ka katei lunbei gabaroun wamani lidan lóurate wanúadahan somu isebáhari?

¹² Gumese wamá akutihei luwuyerigu isebáhari. Chóuruti gayara lan wadarirun isebáhari le buiti. Gama lumoun, mosu wasubudiruni libe-agei lan isebáhari uguñe weyu ínchaha lumutiña gürigia lidoun katei le iyereegubei lun Heowá, kéiburi wuribani, katei hani máfianu luma agamariduni le kóntürati luagu lilurudun Bungiu. Ligíati, teni wamá buidu lun luwuyeri isebáhari le hínsiñebei woun. Álügüdagua wamá woungua: “Ka san  lánibei efekütu nuagu? Adügati san lun nagañidun, lun násügüragun o lun narufudun lanarime ínsiñeni luagu ageiraü?” (Ari. 3:31). “Adügati san lun nagastarun saragu? Gayarati san ladügün dañu lun hasaminan amu?” (Rom. 14:21). “Dan le nadügüni, ka hawuyeri gürigia úmabaña nóundaragua?” (Ari. 13:20). “Adügati san lun nasaminarun nadügün somu katei wuribati?” (Sant. 1:14, 15).

13, 14. Ka katei lunbei gabaroun wamani lidan luáguti dan le wayusurubei lun isebáhari?

¹³ Guentó wayanuha luagu libiaman katei: dan. Ígiratiwa san saragu dan lun isebáhari darí lun lóuguali lan wadaani lun katei le lánina weseriwidun lun Heowá, kéiburi apurichihani luma adamuridaguni? Anhein ítara liña lubéi, gayarabei magundaarun wamá buidu lidan isebáhari ligía. Le linarün katei, ha akipurubalin isebáhari lidan lilugaarun, gúndaatimatiña. Ka uagu? Ladüga subudi hamuti adüga hamaali lan “katei le buídubei” o le súdinitimabei, ligía masandiragun habéi houngua lau duru dan le hemeraagun (aliihoualá Filipuna 1:10, 11).

¹⁴ Inarüni hínsiñe lan houn gürigia hásügürün saragu dan lidan isebáhari, gama lumoun gayarabei ladisedagüdüniwa émeri ligía luéi Heowá. Furendei tumuti aban íbiri 20 irumu tau gíritu Kim katei le lidan tibagari. Aba tariñagun: “Súnwandanha lídanñadina lan fedu sagü wándaradi, samudi luma dimaasu. Anhein guenlé subudi naali anihein lan saragu katei súdinitimati lun nadügüni. Kéiburi guenlé, neseriwiduña kei prekursora, ladaün sisi binaafin násaara lun napurichihan, siñati lubeiti nerederun lidan isebáhari darí ladaün aban o biama lubá larugan. Furanguti mariban lan sun fedu, gama lumoun gayarati ladügün lun wabulieiduni le súdinitimabei. Kei lidan sun katei, mosu wafurendeirun íchigei isebáhari lidan lubara”.

15. Ida luba híderaguniña agübürigu hasaanigu lun hagundaarun lau isebáhari le harumati?

¹⁵ Mosu habihini agübürigu le hemegeirubei luma hemegeirun hasaanigu, dandu éigini tuma daüguaü kei hamadagua luma Heowá luma lun buidu lan hasandiragun houngua. Ligíati, laganagua lira mosu ñein lan isebáhari. Anhein agübürigu hubéi, ígira humá lun hagundaarun hisaanigu; íbini mosu lan hóunigiruniña luéi katei le gayarabei ladügün dañu houn, masaminara humá wuriba lan sun isebáhari (1 Ko. 5:6). Ánhadün adüga aransehani le buiti, hadariruba isebáhari le buiti houn hiduheñu. * Ítarati, dandu huguya kei hisaanigu héibuguba luéigiñe üma le lunbei layarafadagüdünün lun Heowá.

16, 17. Ka igarigu hásügürübei saragu agübürigu, ani ida liña wasubudiruni gunfuranda lani Heowá hagarigu?

¹⁶ Wéiriti ínsiñeni le hádanbei agübürigu hama isaanigu darí lun layusuruni Heowá lun larufuduni ínsiñeni le lasandirubei hawagu lumutuniña (Isa. 49:15). Ligíati, dan le ladisedun aban waduhe luéi Heowá, sanditiwa aban lanarime íruni, ani maribanti lira. Aban íbiri to abugúboun isaani lídangiñe damuriguaü, ariñagatu: “Féridi numuti nuguraasun, aba nálügüdagun nungua ka lan uagu tígirei nisaani Heowá. Sun meha dan nau íchigei duru nuouguoun”.

¹⁷ Anhein ítara liña lubéi gádantün, subudi lumuti Heowá hasufurirun. Íbini Heowá aba meha “lírudun” tidan lanigi dan le hebedaagunbei furumiñetiña wagübürigu lun hama giñe hibe-agei gürigia ha awinwandubaña lubaragiñe Guran (Agu. 6:5, 6). Ha másügürüngiñabaña lídangiñe katei le háfuga úati gunfuranda hamani ligari. Gama lumoun, moun lumuti hígirun lun ladügün luriban desidírü lan somu hiduhe lun hadisedun luéi Heowá. Kaba íderaguaün lun hawanduni lanarime igarigu le?

18. Ka uagu moun lumuti lubéi híchuguni agübürigu duru hawouguoun dan le ladisedun aban hasaani luéi Heowá?

¹⁸ Míchiga huméi duru huouguoun luagu  le asuseredubei. Ru laali Heowá ubafu lun kada aban wádangiñe lun desidírü wamá anhein weseriwiduba lubéi lun o meseriwidunbadiwa lan, ani kada aban hádangiñe lílana familia le deregeguaalibei lungua lun Heowá ani badisei ligía mosu lanügüni “lanügün guánarügü” (Gal. 6:5). Le linarün katei, le afigouhabei ligía laguseragüdübei Heowá, mama hugía (Ese. 18:20). Míchiga huméi giñe duru hawagun amu, inebehabu humá lun aransehani le ladügübei Heowá lun lererehan houn lubúeingu. Lunlá Mafia hebedaagua, mama houn hóuniri mudún ha óunigirubalin damuriguaü (1 Fe. 5:8, 9).

19, 20. a) Ida luba hawanduni agübürigu igarigu le lanügübei habugún hasaanigu lídangiñe damuriguaü? b) Ka hemeniginbei agübürigu ha?

¹⁹ Luagu le aban oubaü, ánhadün agañida luma Heowá, hanúadahañein üma le lunbei ladisedagüdünün luéi. Mégeiti hisaani larihini luéigiñeñadün lan lóubadina Heowá lubaragiñe furumiñeguarügü katei, íbini iduheguaü. Ligíati, lun hawandun, góunigi huméi humadagua luma Heowá ani madiseda humá hawéi íbirigu ha lídanbaña damuriguaü (Ari. 18:1). Dará humóun hanigi lun Heowá (Sal. 62:7, 8). Máluaha humá lébuna hayanuhan luma gürigia le bugawaalibei, kéiburi habürühan lun lidan Internet, hayanuhan luma o habürühan lun luagu gágamuru (1 Ko. 5:11). Ru huméi hisaminan lidan heseriwidun lun Heowá (1 Ko. 15:58). Íbiri to buga uáguboun wayanuha ariñagatu: “Subudi numuti mosu lan nerederun beresegu lidan neseriwidun lun Bungiu ani héregüdaneime numadagua luma. Ítarati, danme le tagiribudun nisaani lun Heowá, derebugubadina lun níderagunu”.

²⁰ Ariñagatu Lererun Bungiu luagu aguraba lumuti lan ínsiñeni sun katei (1 Ko. 13:4, 7). Maribanti lubeiti hemenigidun luagu lagiribuduba lan hisaani lun Heowá. Sagü irumu asakürihatiña saragu gürigia ani giributiña tidoun lóundarun Heowá. Mareidunti Heowá igarihabu, lubaragiñe lira, ‘aranseñu liña lun feruduna lániwa’ (Sal. 86:5).

21, 22. Ida luba hayusuruni líbürei le hibihibei lun hanúadahan?

²¹ Rúhali Heowá üma woun lun wanúadahan (aliihoualá 2 Lúrudu 30:19, 20). Gama lumoun gánitiwa aban buligasion sériuti. Sun kristiánugu mosu wálügüdagun woungua: “Ka san émeri nárügüdübei? Ígiraadina san lun ladisedagüdünina wadagimanu, isebáhari o iduheñu luéi Heowá?”.

²² Medebilidunti ínsiñeni le lasandirubei Wáguchi le siélubei wawagu. Ánhawa adiseda luéi, ladügarügü liña wanúadahan aban üma wuribati (Rom. 8:38, 39). Ani mama mosu lasuseredun le woun. Mígira humá lun ñein lan somu katei le adisedagüdütün luéi Heowá. Lidan le aban arütíkulu warihiba gádürü amu katei le ídanbei gayara lan warufuduni busén wamá werederun yarafa lun Heowá.