1. Ka ñunsu hawaguti kristiánugu korintuna agundaaragüdübalin Pábulu saragu?

LAWANSERUÑA irumu 55 lidan wadaani. Anihein meha apostolu Pábulu luagu wafu uburugu Turoasi, ani siñati lígiruni lasaminarun hawagun kristiánugu ha Korintubaña. Fiú dan lubaragiñe dan ligía, nidiheriti ladüga laganbun anihein lan magundani hadan. Ligíati, keisi aban úguchili le nidiheriti hawagun lisaanigu, aba lóunahan aban gárada houn lun leweridiruniña (1 Ko. 1:11; 4:15). Amuriahati giñe luma Titu le lumada lun lidin bisidaña, lárigiñe ábame lan lidin adunragua luma Turoasi lun lasubudiragüdüni lun ida liña lan léibugun katei ñein. Guentó, lagurabahañein Pábulu lachülürün Titu, lugundun busenti laganbuni ka lan ariñahani lanügübei lun. Gama lumoun, híruti Pábulu ladüga machülüti Titu. Kábati ladüga Pábulu? Aba lárügüdün aban waporu lun lidin Masedónia. Ñein aba ladunragun luma Titu, le anügübei buiti ñunsu lun: resibi hamuti íbirugu korintuna ladundehan Pábulu lau ugundani ani hínsiñeti hamuga houn lunya harihini. Dan le laganbuni Pábulu ñunsu le, ábatima lagundaarun (2 Ko. 2:12, 13; 7:5-9).

2. a) Ka labürühabei Pábulu houn korintuna luagu afiñeni luma ugundani? b) Kaba burí álügüdahani wóunaba?

² Murusun dan lárigiñe, aba labürühanu Pábulu tibiaman ligaradan houn Korintuna ñein lubéi lariñaga: “Mama hamugatia wabusenruña wariñagun hun: ‘Anihánba hafiñera’; ladüga deregüdaguaadün lidan hafiñen; busenrügütiwa wíderagunün lúntima laganwoundun hugundan” (2 Ko. 1:24). Ka labusenrubei Pábulu lariñagun? Ka gayarabei hafurendeiruni wéiyaaña lidan afiñeni ha guentobaña lídangiñe dimurei burí le?

3. a) Ka labusenrubei Pábulu lariñagun lau dimurei: “Ladüga deregüdaguaadün lidan hafiñen”? b) Ida liña háyeihani wéiyaaña lidan afiñeni Pábulu uguñe weyu?

³ Ayanuhati apostolu Pábulu luagu biama igaburi  súdiniti lidan wáhuduragun: afiñeni luma ugundani. Libügürü afiñeni, abürühati: “Mama hamugatia wabusenruña wariñagun hun: ‘Anihánba hafiñera’; ladüga deregüdaguaadün lidan hafiñen”. Subudi lumuti meha Pábulu úaragua hamá kristiánugu korintuna ladüga hafiñen luagu Bungiu, mariñagunti seremei lan ligía o amu gürigia. Saminati luagu mama lan mosu hagía lan labureme hafiñen híbirigu, ani mabusenrun lumuti meha giñe ítara, lugundun afiñeti luagu busenbaña lan hadügüni le buídubei (2 Ko. 2:3). Íbirigu ha arihibaña lau damuriguaü uguñe weyu áyeiha hamuti Pábulu, lugundun afiñetiña luagu hafiñen íbirigu luma lébuna heseriwidun (2 Tesa. 3:4). Lubaragiñe híchugun lanarime burí lúrudu lidan damuriguaü, sigí hamuti adundehani le tídanbei Bíbülia luma ladundehan lóundarun Heowá. Lau sun luwuyeri, mama hagía laburiñabei hafiñen íbirigu (1 Fe. 5:2, 3).

4. a) Ka labusenrubei Pábulu lariñagun lau dimurei: “Busenrügütiwa wíderagunün lúntima laganwoundun hugundan”? b) Ítara kei Pábulu, ka habusenrubei wéiyaaña lidan afiñeni uguñe weyu?

⁴ Ariñagati giñe Pábulu: “Busenrügütiwa wíderagunün lúntima laganwoundun hugundan”. Lau dimurei le, layanuhaña Pábulu luougua luma hawagu lánigu paaná. Ida liña wasubudiruni? Tídanmeme gárada tuguya ayanuhati hawagu biama hádangiñe. Abürühati: “Hesukrístu [...] lememe wapurichihabei hun, au, Silübánu, luma Timotéu” (2 Ko. 1:19). Ani sagü layusuruni Pábulu dimurei niduheñu o nani paaná layanuhaña hawagu ha yarafatimabaña lun, kéiburi Apolosu, Akila, Pürisika, Timotéu o Titu (Rom. 16:3, 21; 1 Ko. 3:6-9; 2 Ko. 8:23). Dan le lariñagun “busenrügütiwa wíderagunün lúntima laganwoundun hugundan”, lachoururuñein houn dandu lan ligía kei lánigu paaná busentiña hadügüni sun hayaraati lun haganwoundagüdüni hagundan sun lílana damuriguaü. Ligiaméme giñe habusenrubei wéiyaaña lidan afiñeni uguñe weyu: hadügüni sun hayaraati lun híderaguniña híbirigu lun heseriwidun lun Heowá “lau ugundani” (Sal. 100:2; Fili. 1:25).

5. Kaba wakutiha lidan arütíkulu le, ani ka uagu?

⁵ Fiú dan lubaragiñe le, adügǘwati álügüdahani houn fiú íbirigu ha apurichihabaña lau ubebeni lidan ámuñegueinarügü fulasu ubouagu. Aba halügüdǘniwa: “Ka ladügübei o lariñagubei somu wéiyaali lidan afiñeni lun laganwoundun hugundan?”. Danme le awanha lan akutihei le hariñagubei, samina wamá kaba lan hamuga wóunabagüle luma le gayarabei ladügüni kada aban wádangiñe lun laganwoundun ugundani lidan damuriguaü. *

6, 7. a) Ka aban manera ídanbei gayara lan háyeihani wéiyaaña lidan afiñeni lani Hesusu, Pábulu luma hani amu lubúeingu Bungiu hénpulu? b) Ka uagu wéiritima lubéi hagundan wíbirigu dan le waritaguni hiri?

⁶ Gíbetiña íbirigu ariñagutiña gúndaatima hamá dan le harufudun wéiyaaña lidan afiñeni luagu berese hamá hau tídangiñe sun hanigi. Dan le háyeihani wéiyaaña lidan afiñeni hénpulu lani Dawidi, Eliú luma Hesusu ligía aban manera le ídanbei harufudei berese hamá hau íbirigu (aliihoualá 2 Samueli 9:6; Hobu 33:1 luma Lúkasi 19:5). Ǘrüwagubei wátiña houn gürigia lau hiri. Ani Pábulu, súdiniti meha giñe lun laritaguni hiri líbirigu ani yusuléi. Dan le lagumuchuñoun lan ligaradan houn kristiánugu rómana, óunahati mábuigaü houn hóugiñe wein-seingü íbirigu ani írida lumuti hiri. Kei hénpulu, abürühati: “Mábuiga niña [...] tun waduhe Pérüsida to hínsiñeboun woun” (Rom. 16:3-15).

⁷ Añahein wéiyaaña lidan afiñeni, hénrenguti houn haritaguni hiri lílana damuriguaü le aubei hariha. Gama lumoun, dan  le háfaagun lun haritaguni, ítara liña kamá hamuga hariñaguña lun kada íbiri: “Súdinitibu nun” (Afu. 33:17). Ídehatiña wéiyaaña lidan afiñeni saragu lun hagundaarun híbirigu dan le haritaguni hiri dan le híchugun óunabagülei houn lidan Taturiahóun Garüdia Atalaya o lidan amu burí adamuridaguni (konpararü huméi luma Huan 10:3).

8. Ida liña meha lasigiruni Pábulu lani Heowá luma lani Hesusu hénpulu?

⁸ Arufuda lumuti giñe Pábulu berese lan hau líbirigu lau lariñagun houn buidu lan hadüga, ligía ábanya manera lun waganwoundagüdüni hagundan wíbirigu. Arihúati le furangu tidan tibiaman ligaradan houn Korintuna ñein lubéi lariñaga: “Wéiriti [...] nanaagun nungua huagu” (2 Ko. 7:4). Dimurei burí lánina dǘgüdaguaü le chóuruti ru lan saragu ugundani houn íbirigu korintuna. Ariñagati giñe Pábulu dimurei libe burí le houn lílana amu burí damuriguaü (Rom. 1:8; Fili. 1:3-5; 1 Tesa. 1:8). Le linarün katei, lárigiñebei líridunu Pérüsida tidan ligaradan lun damuriguaü le Rómabei, ariñagati: “To adügaaruboun saragu lidan liri Kristu” (Rom. 16:12). Chóuruti weiri lan ugundani le tasandirubei wíbiri! Sigí lumuti Pábulu lani Heowá luma Hesusu hénpulu lau lariñagun houn amu buidu lan hadüga (aliihoualá Márükosu 1:9-11 luma Huan 1:47; Aruf. 2:2, 13, 19).

9. Ka uagu aba lubéi laganwoundun ugundani lidan damuriguaü dan le wíchugun ani resibi wagía dimurei le íchuguti gurasu?

⁹ Uguñe weyu, ariha hamuti giñe wéiyaaña lidan afiñeni súdini lan hariñaguni houn íbirigu hínsiñe hamá houn (Ari. 3:27; 15:23). Dan le hadügüni, ítara liña kamá hariñaguña: “Ténitina lun le badügübei ladüga beresetina bau”. Chóuruti megei hamá wíbirigu haganbun dimurei lánina dǘgüdaguaü hámagiñe wéiyaaña lidan afiñeni. Dimurei le tariñagubei aban kristiána kéiburi 55 irumu tau, arufuda lumuti le hasaminarubei saragu: “Lidan wadagimanu hénrenguti liabin aban gürigia ariñaga bun ‘buiti badüga’. Úati ínsiñeni ñein ani anihein ásügüraguni. Ligía weiri lubéi nugundan dan le lariñagun aban wéiyaali lidan afiñeni nun gunda lan lau le nadügübei lidan damuriguaü. Ruti saragu erei nun! Ítara liña narihini ínsiñeni le lasandirubei Núguchi le siélubei nuagu”. Ma meme binarü, ariñagati aban wéiyaali lidan afiñeni fiú dimurei buíduburiti lánina dǘgüdaguaü lun aban úguchili le agüriahabaliña bián lisaanigu lábuguarügü. Ka resultóubei? Aba lariñagun úguchili ligía: “Ruti lererun saragu erei nun”. Ítara liña, dan le hariñagun wéiyaaña lidan afiñeni houn íbirigu buidu lan hadüga, rútiña gurasu houn ani wéiritimati hagundan. Ani kei resultóu, héretimatiña lun hasigirun éibuga lidan üma le anügübei lidoun ibagari sin labuchadun hawagu (Isa. 40:31).

10, 11. a) Ida liña gayara lan háyeihani wéiyaaña lidan afiñeni lani Neemíasi hénpulu? b) Kaba íderaguaña wéiyaaña lun híchuguni “abinirúnimeme le líchugubei lani Bungiu [s]ífiri” houn íbirigu dan le houdin abisidahaña?

¹⁰ Ka amu manera súdiniti ídanbei gayara lan harufuduni wéiyaaña lidan afiñeni houn íbirigu berese hamá hau lun gayara lan laganwoundun hagundan? Dan le hagía lan ñüdün furumiñe íchiga gurasu houn ha emegeirubalin (aliihoualá Adügaü 20:28). Dan le hadügüni, áyeiha hamuti hénpulu hani ha arihibaña lau damuriguaü lidan binadu dan. Kei hénpulu, teni humá lun le ladügübei alidihati úaraguati Neemíasi dan le larihinbei ledebiliduña lan hafiñen fiú hádangiñe líbirigu huríu. Ariñagatu Bíbülia aba lan lararamun, aba lagumeserun íchiga dǘgüdaguaü houn (Neem. 4:14). Ligiaméme hadügübei wéiyaaña lidan afiñeni uguñe weyu: aba hararamun —lidan amu dimurei, aba híchuguni furumiñeti pasu— lun  héredagüdüni hafiñen híbirigu. Ligía habisidahanbaliña hábiñe dan le gayara lan lun híderaguniña lau “abinirúnimeme le líchugubei lani Bungiu [s]ífiri” houn (Rom. 1:11). Kaba íderaguaña wéiyaaña lidan afiñeni lun hagunfuliruni le lariñagubei bérusu le lidan habisidahaniña íbirigu?

¹¹ Lubaragiñe habisidahan, mégeitiña hígirun dan lun hasaminarun luagun gürigia le úmabei hasaminara hayanuhan. Gayarati hálügüdagun houngua: “Ka funa san liturobulinbei íbiri le? Ka gayarabei nariñaguni lun níchugun gurasu lun? Ka burí bérusu tídangiñe Bíbülia gayarabei líderaguni? Ayanuhóuati san luagu somu gürigia tidan Bíbülia le awinwandubei aban sügǘ libe le?”. Álügüdahani burí libe le ladügüba lun buidu lan yanu ani hu ligíame. Lidan bisida ligía, rútiña wéiyaaña lidan afiñeni chansi houn íbirigu lun hayanuhan lau líbürei ani rútiña arigei lun haganbuniña (Sant. 1:19). Ariñagatu aban íbiri lau ichouruni: “Ruti saragu gurasu dan le laganbunibu aban wéiyaali lidan afiñeni buidu!” (Luk. 8:18).

12. Ka hádangiñe lílana damuriguaü mégeibaña gurasu, ani ka uagu?

¹² Ka san un buídubei lan léiguadun aban bisida hani wéiyaaña? Ariñagati Pábulu houn wéiyaaña lidan afiñeni: ‘Góunigi humaña afiñetiña ha líchugubaña sífiri sandu lun hóunigiruniña’. Ítara liña, sun lílana damuriguaü mégeitiña dǘgüdaguaü, íbini apurichihatiña hama prekursorugu ha lǘñahaaña apurichiha. Ka uagu megei habéi íbirigu héretiña ani úaraguatiña ha ídemuei hámagiñe wéiyaaña lidan afiñeni? Lugundun íbini hagía gayarati hasandirun mawandun hamaali lan óuchawaguni le lídanbei ubóu wuribati le. Aban lídangiñe katei le asuseredubei lidan libagari urúei Dawidi arufudahati woun ka lan uagu megei habalin íbini lubúeingu Bungiu ha úaraguatiña lídehan aban paaná.

13. a) Ka chansi ladarirubei Isübí-benobu lun yebe láfaruni Dawidi? b) Ka uagu gayara lubéi meha lesefuruni Awisái libagari Dawidi dan le lemegeirunbalin?

¹³ Murusun dan lárigiñe lanuadirún Dawidi  lurúeiteme Ísüraeli, aba lageindagun luma Goliadi, aban hádangiñe ladügawagun Refa, ha hígandei. Arufuda lumuti Dawidi ganigi lan, áfara lumuti hilagubei (1 Sam. 17:4, 48-51; 1 Kro. 20:5, 8). Fiú irumu lárigiñe, lidan aban wuribu hama filistéana, ageindaguayati Dawidi luma ábanya hígandei hádangiñe ladügawagun Refa. Isübí-benobu meha líribei (2 Sam. 21:16). Gama lumoun, ítagaraü yebe lagumuchun hígandei lau Dawidi. Ka uagu? Mama meha ladüga féridi laali lan Dawidi ganigi le luágubei, erei leferidirubei. Según abahüdaguni, buchá meha luagu Dawidi ani dan le líchugunbei Isübí-benobu fe, aba lachansihani lun lagumuchun lau. Dan yebe le láfaraali lan, “aba liabin Awisái le liráü Seruiá íderaguei Dawidi, aba lábürühan luagun Filistéana ligía, aba láfaruni hilagubei” (2 Sam. 21:15-17). Ítagaraü yebe lounwen Dawidi! Háfuga wéiriti leteingiruni Awisái luagu lóunigiruni ani séfulei dan le lídanñein lan peliguru. Ka wafurendeirubei lídangiñe abahüdaguni le?

14. a) Ida luba wáfuridun lídangiñe lénrengunga le wéinamuti kei Goliadi? b) Ida liña gayara lan híderaguniwa wéiyaaña lidan afiñeni lunya wibihini erei luma ugundani le féridi wamaalibei? Ru humá aban hénpulu.

¹⁴ Íbini anihán lan Satanási hama lánigu abusenra heredehaniwa, sun lubúeingu Heowá sigimémetiwa agunfulira lau wadagimanu lánina apurichihani lidan sun ubóu. Añahein fiú wádangiñe gagibuguatiwa luma lénrengunga wéinamuti kei liseisin Goliadi, gama lumoun, gañei wamuti seremei wíchuguni sun wafiñen luagu Heowá. Anihein dan labuchadun wawagu lárigi wáfaagun saragu kóntüra óuchawaguni le lídanbei ubóu le. Dan le wasandiragun woungua ítara, peligurutiwa luéi wéiguadun lidoun óuchawaguni le hamuga lunbei méiguadun wamá lidoun dan le buidu lan wasandiragun woungua. Lidan burí ókaasion ligía, gayarati híderaguniwa wéiyaaña lidan afiñeni lunya wibihin erei luma ugundani. Ariñagatu aban prekursora 65 irumu tau: “Fiú dan lubaragiñe le, mabuidunti nasandiragun nungua ani ábaha labuchadagüdüni apurichihani nuagu. Aba larihini aban wéiyaali lidan afiñeni buchá lan nuagu aba layanuhan numa. Buiti liyanun numa ani yúsuti aban sügǘ tídangiñe Bíbülia. Sigí numuti ladundehan ani buiti lidin nun. Wéiriti neteingiruni luagu líderagunina!”. Aban abinirúni wéiriti gama wamá wéiyaaña lidan afiñeni ha hínsiñehabutiña, ha beresetiña wau ani aranseñu haña kei Awisái lun híderaguniwa.

15, 16. a) Ka uagu weiri lubéi meha línsiñen Pábulu houn líbirigu? b) Ka uagu hínsiñe habéi wíbirigu wéiyaaña lidan afiñeni woun?

¹⁵ Wéiriti wadagimanu le lanügübei hounigirún lílana damuriguaü. Anihein dan marumuguntiña wéiyaaña lidan afiñeni áriebu afurieida ladüga nidiheri hamá hawagu lumutuniña Bungiu o ladüga híderaguñanu lan íbirigu akipurei hamadagua luma (2 Ko. 11:27, 28). Ani gúnfuli hamuti hawadigimari buidu buidu lau ugundani, kei Pábulu le abürühabei houn kristiánugu korintuna: “Lau ugundani [...] newesiraguba nungua luagu hufulesein” (2 Ko. 12:15). Wéiriti hínsiñe íbirigu lun darí lun ladügüni sun liyaraati lun líchugun erei houn (aliihoualá 2 Korintuna 2:4; Fili. 2:17; 1 Tesa. 2:8). Ligía weiri lubéi meha línsiñe houn! (Adü. 20:31-38.)

¹⁶ Sun lubúeingu Bungiu uguñe weyu hínsiñetiña giñe wéiyaaña lidan afiñeni woun, ani rútiwa seremei lun Heowá hawagu. Ínsiñeni le harufudubei wügüriña ha woun gánwoungüda lumuti wagundan, ani ruti hani bisida iderebugu woun. Ani seremei wamutiña luagu aranseñu hamá lun híderaguniwa dan le wasandiragun woungua buchá lan wawagu ladüga ubóu le. Chóuruti ‘híderaguñadiwa lan lúntima laganwoundun wagundan’.