Wéridi tumutiwa Bíbülia: “Tídangiñe anigi láfurida saminaü wuribati, áfarahani, agabarahani, agamariduni mamarieidunga, íweru, iyeeni luma lanabúniwa Bungiu” (Mat. 15:19). Gayarati teyeeduniwa wanigi ani adüga tuguya lun wáluahan lébuna wadügün somu katei le iyereeguti lun Bungiu. Gayarati míchugun wamá fe darí dan le adüga wamaali. Ida luba wasubudiruni ka lan tayumahabei wanigi lubaragiñe wárügüdün aban luriban üma?

Aliiha wamóun Bíbülia sagü weyu ani samina wamá luagun le waliihabei.

Según labürühan apostolu Pábulu, “wínwantu Lererun Bungiu ani gabafu tuguya. Hamanatu sügǘ tau aban eféin to biánguati tamana, belú tuguya chülǘ tumoun wawani luma wani sífiri”. Uganu lúmagiñeti Bungiu le waliihabei tidan Bíbülia “furangugüda [l]umuti sun waritagun luma sun le wabusenrubei, arufuda[léi] ka lan tídanbei wanigi” (Ebü. 4:12). Dan le waturiahanu Bíbülia, mosu wakutihani wasaminan luma wóuserun, anhein wadüga ítara, wasubudirubei kátima lan tayumahabei wanigi. Ligía súdini lubéi waliihanu sagü weyu ani samina wagíame luagun le waliihabei, ítara luba gayara lan warihini katei kei larihini Heowá.

Dan le wánharun lun eweridihani le tídanbei Bíbülia ani winwan waméi, aranse lumuti wasaminan. Ani líderagubadiwa wasaminan asubudirei le buídubei luma le wuribabei, ladügüba giñe lun máluahan  wamá wadouragun lau aban usa wuribati (Rom. 9:1). Daritiwa giñe hénpulu burí tidan Bíbülia le gayarati leseriwidun woun keisi eweridihani (1 Ko. 10:11). Wafurendeirun lídangiñe lídehaba lun méiguadun wamá lidoun somu charati. Chóuruti súngubei lan wagía gayarati wadügüni katei le.

Amuriaha wamá ídemuei lidan furíei.

Akutiha lumutu Heowá anigi (1 Kro. 29:17). “Wéiritimati Bungiu sügǘ tau wanigi, lugundun subudi lan sun katei lun” (1 Huan 3:20). Ligía siñati lubéi weyeeduni. Anhein wabahüdagua sun wadiheri lun furangu, le wasandirubei luma le wayumahabei, líderagubadiwa arihei ka lan tídanbei wanigi. Gayarati íbini wariñagun lun lun líchugun “aban anigi to harumatu” woun (Sal. 51:10). Huuti furíei saragu lun wasubudiruni haliñoun lan tabalacha wanigi.

Ru wamá arigei lidan adamuridaguni.

Anhein wadüga ítara, gayarabei wakutihani buidu ka lan tídanbei wanigi. Íbini inarüni lan luagu ua lan ariñahani iseriti lidan kada adamuridaguni, súdiniti lun waganbuni buidu. Ka uagu? Ladüga íderagua lumutiwa adamuridaguni lun gunfuranda wamani adundehani le tídanbei Bíbülia buidu, ani resibitiwa giñe adundehani le íderagubadiwa lun wadügün aban egüsámini wóuniwagua ani adüga wagíame asansiruni lidan wabagari. Wéiriti giñe lebegi óunabagülei burí le híchugubei wíbirigu (Ari. 27:17). Ánhawa midin adamuridagua hama wíbirigu, gayarabei wadiheridun saragu luagu waturóbulin ani desidírü wagíame wuriba (Ari. 18:1). Ligía buidu lubéi wálügüdagun woungua: “Héchutina san ñüdün lidan sun adamuridaguni ani sagá nuguya buiti lídangiñe?” (Ebü. 10:24, 25).

Kei geyeedaguadi tubéi wanigi, gayarati teferidiraguagüdüniwa lidan saragu katei. Akutiha wamá gádürü: laluahóun seinsu, átaguni, hanuadahóun umadagu luma dan le wásügürübei lidan isebáhari.

Laluahóun seinsu.

Maribanti wawadigimaridun lun wibihini le wemegeirubei. Gama lumoun, ayanuhati Hesusu luagu peliguru lan wíchuguni umegeguni lubaragiñe sun le líbiri katei. Lidan aban hénpulu, ayanuhati luagu aban wügüri rísiti le abuinchagüdübalun sun lareidaagüle ilaü to lúmaboun ani ibidiñeeli lun halíaba lan lareidei le lunbei lalubahani. Ábati desidírü lan lagünrinchagunu lun ladügün fiú to wéinamutimatu. Aba lariñagun: “Ábame nareiduni nalubahan luma sun le númabei tidan. Ábameti nariñagun núniwagua: ‘Anihein saragu katei areidañu buma lun saragu dan; emeraaguabá, houba, guraba, gundaaguabá’”. Masaminarunti wügüri rísiti le gayara lan lounwen áriebumeme ligía (Luk. 12:16-20).

Eibu aweiyadeina wamá, háfuga wadiheridun luagu wareidahan seinsu lubá waweiyadun. Kei resultóu, gayarabei wáluahan lébuna wawadigimaridun lárigiñe lóurate wadagimanu lidan luéyuri adamuridaguni, o magunfulirun wamá buidu lau wani buligasion keisi kristiánugu. Chóuruti peliguru lan igaburi le. Kábati wadüga anhein nibureingidiwa lubéi ani subudi wamuti eseriwiduni lan lidan dan dayarüti katei buítimati le gayarabei wadügüni lidan wabagari? Wígirubei san eseriwiduni kei prekursoru lubá amu dan ladüga wasaminarun mosu lan wawadigimaridun ani areidaha wagíame seinsu furumiñe? Ma lunti yebe wáfaagun guentó lun wíchuguni le buídutimabei  wámagiñe lun Heowá? Lau sun luwuyeri, ibidiñeti woun anhein wínwangidiwa lubéime haruga.

Átaguni.

Ariñagati Ariñawagúni 23:20: “Móundaraguaba hama gátaditiña”. Gürigia le wéiribei layumahan latun binu, gayarati lagumeserun ata yarafagua ani ábame lariñagun mabusenrun lan labacharuadun, busenrügüti lan lásügürüni buidu. Anhein megei wabéi binu lun wásügürüni buidu, háfuga anihán lóurate wakutihani buidu ka lan tayumahabei wanigi.

Hanuadahóun umadagu.

Siñati mayarafadun wamá houn gürigia ha meseriwiduntiña lun Heowá, kéiburi wánigu paaná leskuelarugu, lidan wadagimanu o gürigia ha únbaña wapurichiha. Ámuhaliti katei ánhawa áfurida hama o wadügün umadaguaü hama. Dan le lasuseredun ítara, gayarati wagumeserun ariñaga gürigia hamá buítiña. Gama lumoun, furanguti eweridihani le tídanbei Bíbülia: “Meyeedúa humá. [...] Féridigüda hamuti hagübüri umadagu lubuidun igaburi” (1 Ko. 15:33). Ítara kei gayara lan ladügün murusun iwiyei lun lawiyedun aban búngidu lau duna le harumati, dan le wadügün umadaguaü hama gürigia ha meseriwiduntiña lun Heowá lau úaraguni, gayarati hadügün lun weferidiruni wamadagua luma Heowá. Lau lásügürün dan, gayarabei wáyeihani ligaburi hasaminarun, hasansiragun, hayanuhan luma hóuserun.

Dan le wásügürübei lidan isebáhari.

Sun burí tuwuyerigu máhina to anuheinboun uguñe weyu rutu sun luwuyerigu isebáhari woun, ani saragu lídangiñe mabuidunti houn kristiánugu. Ariñagati apostolu Pábulu moun lumuti lan nírügü wayanuhan luagu katei wíyeti (Efe. 5:3). Ánheinti sandí wabéi tidan wanigi busén wamá waganbahan o waríagun katei le wíyeti? Háfuga wariñagun sun lan gürigia mégeitiña hemeraagun o háluahan somu isebáhari ani kada lan gürigia lun hadügüni kei auti habusenra. Gama lumoun, buítimati gaganbadi wamá lun adundehani le líchugubei Pábulu ani lun mígirun wamá lun lebelurun ni kata wíyeti ni wágurugugiñe ni warigeirugugiñe.

Íbini yeeda táadiwa lan wanigi to geyeedaguadiboun ani héchutiwa áluaha manera lun warufuduni luriban wóuserun kamá buiti, gayarati wasansirun (Efe. 4:22-24). Ariha wamá bián hénpulu.

Mosu meha lasansiruni Migeli * lisaminan luagu umegeguni. Abahüdaguati: “Au, nani weiriou luma nisaani lídangiñetiwa aban ageiraü le ñein lubéi súdini lan houn gürigia hibihini katei burí le buídutimabei, le lídangiñeti lagumuhóun estaili ani buidu ligía hawinwandun. Busentina yebe nasagaruni sun le niyaraati lídangiñe ubóu le, afiñetina yebe gayara lan nadügüni sin nasaminarun saragu luagun seinsu. Fiú dan lárigiñe, aba níchugun fe luagu ítara liña lan laluahóun seinsu luma umegeguni kei baweiyasuhan lidan aban üma le mébehati. Aba namuriahan luma Heowá lun líderagunina asansirei ligaburi nisaminan luma tayumahan nanigi, ani ariñagatina giñe lun luagu busén wamá wadügüni sun wayaraati lidan weseriwidun lun. Aba desidírü wamá wawinwandun aban ibagari le sensiyutimati ani águya wagía lidoun aban fulasu le ñein lumuti mégeiwa hamá apurichihatiña. Murusun dan lárigiñe, aba weseriwidun kei prekursorugu, ani ariha wamaali woungua luagu memegeirúniwa lan saragu katei lun gunda lan wabagari”.

Arufuda lumuti lásügürün Leo súdini lan wadügün egüsámini wóuniwagua lau sun taruman wanigi. Ligía ladügübei Leo ani ígira lumutiña hagübüri umadagu. Abahüdaguati: “Ladüga nuadigimari, mosu meha nadamuridagun hama alugurahatiña ha lídangiñetiña amu burí ageiraü. Íbini subudi lan nun weiri lan hátagun gürigia lidan burí adamuridaguni ligía, hínsiñeti meha nun nidin. Gíbeti dan yarafa nan lun nabacharuadun, lárigiñe ábaha nasakürihan. Óuraali meha lun nakutihanu nanigi buidu. Íderagua lumutina eweridihani burí le tídanbei Bíbülia luma adundehani le híchugubei wéiyaaña lidan afiñeni lun narihini ka lan lébunabei turóbuli le: náluahaña meha umadagu ha mínsiñeti Heowá houn. Guentó, adüga numuti libe-agei nani bísinisi luagu gágamuru ani ñǘdüntina adunragua hama híbiri alugurahatiña dánrügü le megei nan nadügüni”.

Mosu furangu wamá wámagua lun wasubudiruni ka lan tayumahabei wanigi. Lun wibihini, mosu wamuriahani lídehan Heowá “ladüga subudi [l]umuti sun katei, íbini le aramudaguabei” (Sal. 44:21). Anuhein giñe Lererun Bungiu wama, to ítaraboun kei aban isubusei to íderagubadiwa lun warihini ka lan hawuyeri gürigia wagía múnadagiñe wabiti (Sant. 1:22-25). Ruti giñe Heowá saragu adundehani le huuti woun tidan burí agumeiraguagüdüni luma lidan adamuridaguni kristiánu. Lau sun burí katei le, gayarabei wóunigirunu wanigi ani adüga wameime le hínsiñebei lun Bungiu.