Ligía lagarabaagunbei barüguaü unguaü. Aban gürigia ǘnabuguti masandiragunti lungua wéirigu lan hawéi ha híbiri. Ani gunfuranda lumuti giñe anihein lan katei siñá lumuti adüga.

Mígirunti Moisesi lun lawarirun ubafu lidoun lichügü. Dan le libihin aban gürigia ubafu luagu somu katei, málüti anhein arufuda lan anhein ǘnabugu lubéi. Ítara liña lariñaguni aban íchuguti yanu lidan sígulu XIX gíriti Robert G. Ingersoll: “Anhein busén bubéi basubudiruni kátima lan ligaburibei aban gürigia, ruba ubafu lun”. Lidan katei le, ruti Moisesi aban buiti hénpulu lánina ǘnabuguni.

Ruti meha Heowá saragu ubafu lun Moisesi, lugundun írida lumuti lun lalidihaniña ísüraelina. Ani manaagunti Moisesi lungua. Akutiha waméi ǘnabuguni le larufudubei dan le laransehan aban turóbuli hénrenguti luáguti alagan (1 Lúrudu 27:1-11). Aban meha kesi súdiniti, ladüga le lunbei desidírua lan lidan dan ligía ligíaba adügǘwa lúmagiñe dan ligía lun lubaruaguóun.

Ka ladügübei Moisesi? Saminati san kei lan ligía lan alidihatibei houn ísüraelina, subudi lani kaba lan ladüga? Afiñeti san luagu le liyaraabei adüga, luma luagu dan le winwan láalibei o luagu subudi lani ligaburi lisaminan Heowá?

Aban wügüri le barüguati lungua ítara liña hamuga ladüga, ánheinti Moisesi madügün lumuti. Ariñagatu Bíbülia aba lan “líchuguni [...] hakesin würiña ha ligibugiñoun Wabureme” (1 Lúrudu 27:5). Ariha humá san! Lárigiñe lalidihaniña lumutuniña Bungiu luagu bián-wein irumu, sigiti íchigei lafiñen luagu Heowá, mafiñerunti luougua. Ma lanarime ǘnabuguni!

Masaminarunti meha Moisesi ligíarügüñein lan lun libihin ubafu. Dan le lígirunbei Heowá lun profetagu hamá giñe amu ísüraelina, memeidihanti Moisesi, gúndaarügüti (1 Lúrudu 11:24-29). Dan le lariñagunbei límedamuru Moisesi lun lun líchugun lídangiñe wadagimanu houn amu gürigia, resibi lumuti adundehani ligía lau ǘnabuguni (Áfuriduni 18:13-24). Ani dan le yarafaali lun lounwen, íbini héregili lan meha, amuriahati luma Heowá lun líridun amu wügüri leweñeguame. Aba liridún Hosué, ani íderagua lumuti Moisesi Hosué tídangiñe sun lanigi. Ariñagati giñe houn ísüraelina lun hasigiruni alidihati nibureingili ligía le lunbei ladundehaniña lidoun Fulasu Füramasewati (1 Lúrudu 27:15-18; 2 Lúrudu 31:3-6; 34:7). Chóuruti ariha lani Moisesi hadundehóun ísüraelina lidan háhuduragun lun Bungiu keisi aban óunwenbu chansi. Gama lumoun, mama lubara Moisesi súdinitimabei lun, le súdinitimabei lun lun buidu lan lidin houn.

Maweiyasun wamá ígira lun líñudun wasandiragun woungua ladüga wibihin ubafu, o ladüga gibe lan katei wayaraati adüga. Le láluahabei Heowá hawagu lumutuniña, mama habafu lun hadügün aban katei, ǘnabuguni láluahabei (1 Samueli 15:17). Anhein inarüni lubéi luagu ǘnabugu wamá, wasigirubei adundehani sábiuti le: “Afiñebá luagu Bungiu tau sun banigi, mamalá luagu lualin bichügü” (Ariñawagúni 3:5, 6).

Arufudahati giñe lani Moisesi hénpulu woun lun miñuragun wamá saragu luagu wabara o luagu ubafu le wibihibei.

Buiti san lun wasigiruni hénpulu lánina ǘnabuguni le larufudubei Moisesi? Anha. Dan le warufudun ǘnabuguni le inarüniti, adügatiwa lun buidu lan hasandiragun gürigia ha geyegubaña wau houngua ani hínsiñetimatiwa giñe houn. Ani le súdinitimabei, hínsiñetimatiwa lun Heowá, le giñe arufudubalin lubuidun igaburi le (Sálumu 18:35). “Magundanti Bungiu hau ha barüguabaña houngua, gama lumoun íderagua lumutiña ha ǘnabugubaña.” (1 Féduru 5:5.) Chóuruti anihán lan aban resun súdiniti lun wáyeihani ǘnabuguni le larufudubei Moisesi.