Según tarufuduni Bíbülia, mini lan dimurei le afiñeni sunsuinagubei luagu somu katei ladüga anihein lan somu katei le arufudubalin luagu ítara liña lan. Gürigia le afiñebei luagu Bungiu chouru lumuti luagu lagunfulirubei lan sun lani füramasei.

Lau sun le desidírü lubéi lidan libagari arufuda lumuti afiñe lan luagu lani Bungiu füramasei (Agumesehani 22:15-18). Íbini gayara lan yebe meha lawinwandun aban ibagari lau saragu irisini Ehiptu, “himei lumuti lasufurirun hama lumutuniña Bungiu lubaragiñe laganóun buidu tidan luban urúei, to lánina figóu” (Ebüréu 11:25). Desidírüti san ítara sin lasaminaruni buidu, lárigiñe aba lasakürihan? Uá, ariñagatu Bíbülia luagu “rédeiti [lan] deregüdagu lidan laritagun kamá hamuga aríagu liña lun Bungiu le marihínbei” (Ebüréu 11:27). Masakürihanti luagu le desidírü lubéi según lafiñen.

Áfaaguati giñe Moisesi lun lederebudagüdüni hafiñen ha geyegubaña lau. Kei hénpulu, haritagua waméi le asuseredubei houn ísüraelina dan le aniten lubéi faraón hama lisudaranigu hárigi ani anihán barana Funati hagibugiñe. Dan le lidan habéi lanarime lamiselu ligía, aba hagúarun lun Heowá luma lun Moisesi. Ka ladügübei Moisesi?

Háfuga masaminarunti yebe Moisesi lafanreinragubei lan Heowá barana Funati lun gayara lan hásügürün lamidanguagiñe luéigiñe sagoun mábeiti. Gama lumoun, chouru lumuti lesefurubaña lan meha Heowá, ani busenti lun giñe hachoururuni sun ha híbiri. Lidan Áfuriduni 14:13, ariñagati Moisesi houn: “Manufudeda humá, deregüdagua humá, harihaali le lunbei ladügüni Bungiu uguñe lun lasalbarunün”. Íderagua lumutiña san ísüraelina lun lederebugudun hafiñen? Anha, lugundun ariñagatu Bíbülia dandu lan Moisesi kei ísüraelina “ladüga hafiñen [...] sügǘ hamuti Barana Funati éibugeina kamá hamuga múa le mábeiti” (Ebüréu 11:29). Barüti lafiñen Moisesi buiti lun luma houn ha áyeihabalin.

Luagu mosu lan wafiñerun luagu lani Bungiu füramasei ani arufuda wameime dan le desidírü wamá. Aban lídangiñe lani füramasei luagu líchugubei lan le wemegeirubei woun anhein wíchiga lidan furumiñeti lúgaaru lidan wabagari (Matéu 6:33). Hénrenguti méiguadun wamá lidoun laluahóun umegeguni furumiñe, lugundun ligía hadügübei gürigia ubouagu. Gama lumoun, gayarati wachoururuni líchugubei lan Heowá le wemegeirubei woun ánhawa áfaagua lun sensiyu lan wabagari ani seriwi wagíame lun. Füramaseti woun: “Nóunigirubadibu; mígirun nubadibu” (Ebüréu 13:5).

Gayarati giñe wáfaagun lun wéredagüdüni hafiñen ha geyegubaña wau. Kéiburi agübürigu, mosu hasubudiruni lubuidun chansi le hibihibei lun híderaguniña hasaanigu afiñera luagu Bungiu. Lúmagiñe ñǘbürigiña irahüñü, mégeitiña hasubudiruni anihein lan aban Bungiu ani galurudun lan luagu le buídubei luma le wuribabei. Ani mosu giñe hachoururuni buídutimabei lan lidin houn ánhaña gaganbadi lun lilurudun Bungiu (Isaíasi 48:17, 18). Wéiriti buiti le hadügübei houn dan le híderaguniña asubudirei “anihein lan [Bungiu] ani líchuguba lan hafayeiruáha ha áluahabalin” (Ebüréu 11:6).