Aban katei le wasandirubei tidan wanigi luagu somu gürigia. Aban gürigia hínsiñehabuti arufuda lumuti lau lererun luma lau le ladügübei, íbini mosu lan ladügün somu sákürifisiu.

Arufuda lumuti Moisesi hínsiñe lan Bungiu lun. Ida? Lau gaganbadi lan lun súnwandan. Ítara kei larufuduni 1 Huan 5:3: “Ladügǘniwa le lubeibei Bungiu, ligía ínsiñehabunibei lun”. Meberesenga ka lan gumadi líchugubei Bungiu lun —aban yebe katei hénrenguti kei lararamun ligibugiñe faraón le lurúeite Ehiptu o aban katei sensiyuti kei línchuni lubadun luagun barana Funati—, súnwandan meha ladügüni Moisesi le amuriahóubei luma (Áfuriduni 40:16).

Arufudati giñe Moisesi hínsiñe hamá ísüraelina lun. Subudi hamuti meha layusuruñein lan Heowá lun ladundehaniña, ligía meha hanügünbalin sun haturobulin lun. Ariñagatu Bíbülia ‘aba lan meha herederun ísüraelina rara ñein sun weyu ligibugiñe Moisesi’ (Áfuriduni 18:13-16). Samina humá luagu lanarime funa lubucha luagu Moisesi lárigi lerederun ñein sun weyu aganbahaña. Gama lumoun, adüga lumuti lau ugundani ladüga hínsiñe hamá lun.

Lárigiñe laganbuniña Moisesi, furíeiti meha giñe hawagu. Furíeiti íbini hawagu ha óuserubalin wuriba. Kéiburi dan le tachuragunbalin María (Míriam) to litu, aba ladügün Heowá lun ladagarun lépüra tuagu. Lubaragiñe hamuga lagundaarun Moisesi, aba layumuragun lun Heowá: “Ayumuraguatina bun lun bareidaguagüdünu” (1 Lúrudu 12:13). Chóuruti anihein lan meha ínsiñeni lanagangiñe furíei ligía.

Mosu lan línsiñedun Bungiu woun tídangiñe sun wanigi, aban ínsiñeni le lunti línchahaniwa lun gaganbadi wamá lun lugumadin “tau sun [w]anigi” (Rómana 6:17). Gúndaati Heowá lau luwuyeri gaganbadi le (Ariñawagúni 27:11). Dan le weseriwidun lun Heowá lau ugundani, gániti giñe aban efekütu buiti wawagu, ladüga dan le wadügüni katei le hínsiñebei lun, gúndaatiwa giñe (Sálumu 100:2).

Mosu giñe warufuduni wínsiñehabu lau wadügün sákürifisiu luagu hafulesein amu. Dan le liabin aban wamada o waduhe abahüdahei liturobulin woun, línchahabadiwa luwuyeri ínsiñeni le lun 1) waganbuni 2) wíchaagun woungua lidan lilugaarun luma 3) lun warufuduni lun luagu berese wamá lau.

Ítara kei Moisesi, gayarati wafurieidun hawagu gürigia ha hínsiñebaña woun. Aniheinbei dan ibidiñe lan woun kaba lan wadüga lun wíderaguniña ani háfuga wamuriahan ferudun hama lau wariñagun: “Sarí numuti, ábanrügüñein katei gayarati nadügüni buagu, nafurieidun”. Ani mabulieida waméi “wéiriti [lan] lubafu afurieidúni le ladügübei gürigia le richaguabei tau sun lanigi” (Santiagu 5:16). Gayarati lánhingichunu wafurieidun lanigi Heowá lun ladügün somu katei luagu gürigia le uágubei wafurieida íbini masaminarun lan yebe ladügüni. Ka amu katei buítimati gayarabei wadügüni hawagu waduheñu luéi wafurieidun hawagu? *

Ma inarüni gayara lan wafurendeirun saragu katei lúmagiñe Moisesi? Íbini gafigoun lan kei sun wagía, ruti aban óunwenbu hénpulu lánina afiñeni, ǘnabuguni luma ínsiñeni. Adüga waméi sun wayaraati lun wáyeihani Moisesi, ábame wibihin saragu abinirúni woungua luma houn ha geyegubaña wau (Rómana 15:4).