1, 2. a) Ka mini lubéi dimurei le ásügürawagüdübei tidan Bíbülia kei “uéiriguni”? b) Kaba burí álügüdahani ounabúa lidan arütíkulu le?

Dan le haganbuni dimurei uéiriguni, ka ñǘbuinbei lidoun hisaminan? Lubuidun burí san katei le ladügübei Bungiu? (Sal. 19:1.) Alawahóuni le hibihibei ha rísitimabaña, ha chútimabaña aau o ha adügaañabaña katei wéinamuti? Tidan Bíbülia, dimurei ebüréu lun “uéiriguni” adügati lun hasaminarun gürigia luagun aban katei hǘrüti. Lidan meha binadu dan, lau meha katei gebegiti ladügǘwa seinsu, ani según meha lihürü ítara liña lebegi. Ligía lagumeserunbei dimurei “uéiriguni” ayusurúa lun layanuhóun luagu katei le gebegiti, o le adügüti lun taweiridun hanigi gürigia.

² Háfuga rútiña gürigia uéiriguni o inebesei lun somu gürigia luagu lubafu, lubara o igaburi le uágubei lasubudirúa. Agia Heowá? Afuranguagüda tumuti Bíbülia ka lan hawuyeri gürigia únbaña líchiga uéiriguni. Ariñagati Ariñawagúni 22:4: “Barüti ǘnabuguni luma inebehabu lun Bungiu, irisini, uéiriguni luma ibagari kei afayeiruahaü”. Abürühati giñe disipulu Santiagu: “Ǘnabuguagüda humá hungua ligibugiñe Bungiu, ábame líchugunün lidan aban ubaraü lánina uéiriguni” (Sant. 4:10). Ka san luwuyeri uéiriguni líchugubei Heowá woun? Ka gayarabei ladügün lun meresibirun wamani? Ka gayarabei wadügüni lun gayara lan giñe hibihini amu gürigia?

3-5. Ida liña líchugun Heowá uéiriguni woun?

³ Chouru lumuti meha abürühati Sálumu 73 luagu lárügüdübei lan Heowá luéigiñe larüna lun ladundehani ani ru ligíame uéiriguni lun (aliihoualá Sálumu 73:23, 24). Ida liña líchugun Heowá uéiriguni houn lubúeingu ha ǘnabugubaña? Lidan saragu manera. Kei hénpulu, biní lumutiwa lau lígirun lun wasubudiruni ka lan lugundanbei (1 Ko. 2:7). Ánhawa gaganbadi lun lererun, ruti chansi woun lun lumadagu wamá (Sant. 4:8).

 ⁴ Rúhali giñe Bungiu aban katei wéiriti lebegi labun waríaahan: ministeriu kristiánu (2 Ko. 4:1, 7). Dan le wapurichihan lun wíchugun uéiriguni lun Wáguchi le siélubei luma lun wíderagun amu, ruti uéiriguni woun. Füramaseti Heowá: “Níchuguba uéiriguni houn ha íchugutiña uéiriguni nun” (1 Sam. 2:30). Lidan amu dimurei, gachansintiwa lun wagundaarun lau aban lubuidun iri ligibugiñe Heowá luma lidan damuriguaü (Ari. 11:16; 22:1).

⁵ Ani ánhawa agurabaha luagu Heowá ani éibuga wagía lidan lémeri, líchuguba saragu katei buiti woun ámuñegü, lugundun füramasetu Bíbülia: “Liñuragubadibu [Bungiu], ruleime ageiraü bun balaganteme, barihubei hagünrinchawagun wuribatiña lau bagu!” (Sal. 37:34). Hemenigitiwa lubeiti wibihiba lan ibagari magumuchaditi (Sal. 37:29).

6, 7. Ka uagu mafiñerun habéi saragu gürigia luagu Hesusu?

⁶ Kei aubei warihei, busenti Heowá líchugun uéiriguni woun. Gama lumoun, ka gayarabei ladügün lun meresibirun wamani? Webereserun saragu luagu le lunbei hariñaguni ha meseriwidunbaña lun Bungiu. Ligía asuseredubei houn saragu gumadimatiña lidan lidaani Hesusu. Ariha waméi le labürühabei apostolu Huan hawagu: “Saragu haña hádangiñe huríu afiñerutiña luagu Hesusu íbini hádangiñe ábutigu; ani mariñagun hamuti bóugudi, le hanufude hawéi fariséugu, luéi habuguniña tídangiñe haligilisin. Ladüga gúndaatimatiña lau uéiriguni le híchugubei gürigia sügǘ lau le líchugubei Bungiu” (Huan 12:42, 43). Chóuruti buídutimabei lan hamuga meha lidin houn lun hamuga masaminarun hamá saragu luagu le lunbei hariñaguni fariséugu.

⁷ Lidan lani ministeriu, ariñaga lumuti Hesusu ka lan uagu meresibirun habalin saragu ani mafiñerun hagía luagu (aliihoualá Huan 5:39-44). Barühaña meha ísüraelina saragu sígulu agurabahei Mesíasi o Kristu. Ayanuhaali meha Danieli lidan aban profesía luagu ídaba lan lachülüra ani háfuga samina hamá fiú luagu chülühali lan meha dan ligía. Dan le harihinbalin Huan le Abadiseihabei apurichiha, háfuga ligía hálügüdagunbei houngua anhein ligía lubéi funa “Krístubei” (Luk. 3:15). Fiú hati lárigiñe, aba lagumeserun Hesusu apurichiha; aniheinhali meha Mesíasi ñein arufudaha houn. Híruti meresibirun hamani ha subudihabubaña lun Lilurudun Bungiu. Afuranguagüda lumuti Hesusu ka lan uagu héiguada lidoun charati ligía, ariñagati: “Ida luba san hafiñerun nuagu, resibitünga uéiriguni húmagiñegua, máluahan humuti uéiriguni le lúmagiñeti Bungiu le ábanrügüti?”.

8, 9. Ida luba gayara lan laburigadagüdün haweirigun wügüriña lau luéirigun Bungiu? Ru humá aban hénpulu.

⁸ Gayarati laburigadagüdün haweirigun gürigia lau luéirigun Bungiu. Ida liña gayara lan lasuseredun le? Lun gunfuranda wamani, konpararü waméi uéiriguni luma leiti. Buin liña sielu lau leiti. Haritagua humaali lagumuhóun guñoun le harihinbei sielun aba harihin saragu milu míñunu waruguma? Adügati ‘luenden sielu’ lun taweiridun wanigi (1 Ko. 15:40, 41). Gama lumoun, dan le warihini sielu lidan aban uburugu le anihein saragu leiti ñein, aba san labu larihín? Uá. Mígirunti lileitin uburugu lun warihini lubuidun támirihan waruguma. Ani mama ladüga héretima lan o buídutima lan leiti le ǘmadarugubei, le burí fílirugubei o tileitin óunwenbu burí muna luéi le siélubei, le suserebei yarafatimati lan woun ani adügati lun hénrengu lan warihini luadigimari Heowá. Lun warihini lubuidun sielu guñoun, mosu hamuga wéñeguchuni sun leiti o woudin lidan aban fulasu le búrigati ñein.

⁹ Ítarameme, gayarati yarafatima lan haweirigun wügüriña tun wanigi darí lun ladügün lun marihin wamani uéiriguni le  líchugubei Heowá woun kei aban katei gebegiti. Gíbetiña gürigia meresibirun hamuti uganu luáguti Larúeihan Bungiu ladüga hanufude luéi le lunbei hariñaguni haduheñu o hamadagu. Kábati wariñaga hawagu ha deregeguañabaña houngua lun Bungiu? Gayarati san lawamaadun haweirigun amu houn? Samina wamá luagun aban nibureinti le lunbei lapurichihan lidan aban fulasu le ñein lubéi subudi hamani sun gürigia ani ibidiñeti houn gürigia hagía gefenti lan luagu Heowá. Hanufudebei san luéi harihini? Samina humá luagun aban kristiánu le busenbei laganwoundagüdüni leseriwidun, ani aba hadügün amu bula lau. Kaba san ladüga? Lasansiruba san lisaminan ladüga lígirun lun gani hamá ha lóuguabaña afiñen luagu Bungiu efekütu luagu? Ani anhein adügaali lubéi aban íbiri aban figóu wéiriti, laramudubei san ladüga lanufude luéi leferidiruni lubuidun liri lidan damuriguaü o luéi ladügün dañu houn liduheñu hama lumadagu? Anhein súdinitima lubéi lun larandarun luma Heowá, lagúaruba “houn tábutigu ligilisi” o wéiyaaña lidan afiñeni lun lamuriahan ídemuei (aliihoualá Santiagu 5:14-16).

10. a) Ka gayarabei lasuseredun ánhawa adiherida saragu luagun le hasaminarubei amu wawagu? b) Kaba wibiha anhein ǘnabugu wabéi?

¹⁰ Anhein busén wabéi buídutima wamá kei kristiánu ani aba líchugun somu íbiri somu adundehani woun, kaba wadüga? Dimurei le lariñagubei woun gayarabei líderaguniwa anhein ǘnabugu wabéi. Ligíati, móunaba wamá wuriba, máluaha wamá lébuna wachara o wafamurun. Ánheinti mosu lubéi wíderagun somu íbiri adüga somu wadagimanu, wayumahaba san wibihini sun uéiriguni luagu lubuidun wadagimanu luma áfaaguni ligía? Ánhawa adariragua woungua lidan sügǘ libe burí le, haritagua waméi ‘ibihatiña lan ha ǘnabugubaña uéiriguni’ (Ari. 29:23).

11. Ka lunbei wasandiruni dan le lariñawagun woun buidu lan wadüga, ani ka uagu?

¹¹ Ha busenbaña alidihati hamá lidan damuriguaü o ibiha hamaali lan, moun lumuti háluahan lun wéirigu hamá hagibugiñe amu (1 Tesa. 2:6; 1 Tim. 3:1). Ida lubati lóunabun aban íbiri dan le harufuduni íbirigu hínsiñehabu luagu somu katei le ladügübei? Mídinbei ábunagua aba aritaguagülei kei ladüga Saulu (1 Sam. 15:12). Gama lumoun, ariha lumuti san luagu ladüga lan lareini Heowá libihinbalin ani furumiñeguarügü lan katei libihin ámuñegü ladüga lan labiniruni Bungiu ani íderagualei? (1 Fe. 4:11.) Le wasandirubei dan le hariñagun amu woun buidu lan wadüga ligía arufudubalin ka lan luwuyeri uéiriguni wabusenrubei wibihin (Ari. 27:21).

12. Ka meha uagu maganbun habalin fiú huríu Hesusu?

¹² Gayarati giñe ladügün luriban wayumahan lun meresibirun wamani luéirigun Bungiu, lugundun ánhawa lagumadira wayumahan, háfuga mabusenrunbadiwa waganbuni inarüni (aliihoualá Huan 8:43-47). Ariñagati Hesusu añahein lan meha fiú huríu maganbun hamuti luganute ladüga busén hamá hadügüni lugundan Mafia. Ariñagati houn: “Busentün hadügüni lugundan [húguchi]”.

13, 14. a) Ka asubudirúabei luagu wani sesu luma luagu hamalali gürigia? b) Ka desidírübalin kaba lan waganba?

¹³ Libe-agei dan, lérügüñein wabusenrubei waganbun waganba (2 Fe. 3:5). Adüga lumutiwa Heowá lau ubafu lun meberesegun wamá lau somu burí amuri le mabusenruntiwa waganbuni. Adüga humá aban katei: houcha humá habahüdüni átiriñein lan amuri gayarati haganbuni oura le. Háfuga madügüntün buga gasu lau fiú lídangiñe. Susereti le ladüga líderaguñadiwa lan buga wani sesu lun lúnrügü lan aban katei wetenira, íbini gabafu lan lun ladügün lun waganbun saragu amuri lidan aban. Gama lumoun, subudiwaali hénrengutima lan wíchugun arigei lun  hamalali saragu gürigia lidan aban. Dan le waganbun biama gürigia ayanuha, mosu wanúadahan aban, lugundun siñati waganbuniña buidu biángubei lidan aban. Wanúadahaba según le wabusenrubei waganbun. Huríu ha meha busenbaña hagunfuliruni layumahan Mafia, desidírütiña maganbun hamani Hesusu.

¹⁴ Ayanuhatu líburu to gíriboun Ariñawagúni tuagu bián muna, ani yusu tumutu kei sínbolu: luban lichú aau luma luban libidiounigan aau (Ari. 9:1-5, 13-17). Biángubei ayanuhatu woun lidan aban lun wetenirun tun. Kaba san tídangiñe waganba? Según ka lan wabusenrubei wagundaaragüdün. Ariñagati Hesusu aganba hamani lilügüniña mudún lumalali (Huan 10:16). ‘Gaganbaditiña lun inarüni’ ani “ibidiñeti hamalali amu gürigia houn” (Huan 10:5; 18:37). Gürigia ha óuserubaña lau ǘnabuguni, ruti Bungiu uéiriguni houn (Ari. 3:13, 16; 8:1, 18).

15. Ka uagu uéiriguni lubéi houn amu sun lasufurirun Pábulu?

¹⁵ Awanduni le warufudubei lidan wadügüni lugundan Heowá ídehati lun habihini amu gürigia luéirigun Bungiu. Abürühati apostolu Pábulu houn kristiánugu éfesuna: “Ligía nayumuragunbei hun lun mábürühan lan harüna luéigiñe le nasufurirubei huagu, lugundun uéirigunirügüñein katei lira hun” (Efe. 3:13). Ka meha labusenrubei lariñagun? Ka uagu uéiriguni lubéi lanügübei lasufurirun houn? Ladüga sigiti íderaguaña líbirigu íbini lidan lénrengunga; ítara liña larufuduni houn eseriwiduni lan lun Bungiu chansi le buídutimabei. Lun hamuga aba lan lígiruni Pábulu leseriwidun ladüga lénrengunga, ma larufuduña hamuga ítara mebegi lan lumadagua luma Heowá, lani ministeriu luma lemenigin? Lau lawandun, ru lumuti áhuduraguni kristiánu lidan ubaraü le yuubei lun ani arufudati furumiñeguarügü lan sákürifisiu le wadügün lun lani wamá Kristu disipulugu, buiti lun wadügüni.

16. Ka burí turóbuli úmabei lagagibudagua Pábulu Lístüra?

¹⁶ Háfuga ruti ubebeni luma awanduni le larufudubei Pábulu saragu erei houn kristiánugu. Lidan Adügaü 14:19, 20 ariñagati: “Ábati hachülürün huríu Antiokíagiñe luma Ikoniugiñe, aba hagañeiruni haritagun gürigia lun hachamuragun dübü luagun Pábulu. Lárigiñe, aba haduruguduni bóugudin luéi fulasu [Lístüra], sun hariñagun luagu hilaali lan. Dan le hóundaragunbei afiñetiña geyegua lau Pábulu, aba lásaarun, ábaya lebelurun fulasurugún. Larugan, ligía lidin luma Berünawé uburugun Dérübe”. Ma lubuidun hénpulu! Adüga hamuti kei hilaali aban weyu ani larugan aba laweiyasuhan 100 kilometuru (60 maili), ani úatu meha ugunei tibe to guentoboun.

17, 18. a) Ka uagu lariñawagúa sigí lani Timotéu lasufurirun Pábulu “buidu”? b) Ka efekütu lánibei lawandun Pábulu luagu Timotéu?

 ¹⁷ Íbini mariñawagún lan lidan Adügaü, háfuga Timotéu aban hádangiñe disipulugu ha íderagubalin Pábulu. Ariha huméi le labürühabei lun: “Anhein buguya, falá baali narufudahan buidu, [...] [katei] kei burí le násügürübei uburugu Antiokía [bugawati uburugugiñe], Ikoniu [álugatiña háfaruni hilagubei], luma Lístüra [chamuguatiña dübü luagu]. Mama meha lanarime néibaahoun! Gama lumoun, sefu lumutina Wabureme Bungiu lídangiñe burí sun katei le” (2 Tim. 3:10, 11; Adü. 13:50; 14:5, 19).

¹⁸ Sigí lumuti meha Timotéu lasufurirun Pábulu “buidu” ani subudi lumuti meha buidu ida liña lan lawanduni. Wéiriti lani katei le efekütu luagu. Dan le lagiribudunbei Pábulu Lístüra, ábanhali meha buiti kristiánu Timotéu, ani “buiti hadimurehan afiñetiña ha aganóubaña Lístüra luma Ikoniu luagu” (Adü. 16:1, 2). Lau lásügürün dan, gúnfuliti Timotéu lau sun le mégeiwabei lun libihin amu burí buligasion le wéinamuti (Fili. 2:19, 20; 1 Tim. 1:3).

19. Ida liña gani lan awanduni le warufudubei aban buiti efekütu hawagu amu?

¹⁹ Anhein wadüga lugundan Heowá sin labuchadun wawagu, gayarati giñe gani wamá aban buiti efekütu hawagu amu, hawagutima nibureintiña. Gayarati líderaguniña wani hénpulu lun lubúeingu hamá Bungiu ha gebegitiña. Ténitiña lun ligaburi wayanuhan, ida liña lan wapurichihan luma ida liña lan wararamun lun turóbuli. Ligíati, kei Pábulu, sigí wamá ‘awandei sun katei’ lun wíderagun amu lun hakipurun úaraguni ani ibiha hameime “asalbaruni luma uéiriguni magumuchaditi” (2 Tim. 2:10).

20. Ka uagu lunti lubéi wasigirun áluahei uéiriguni le líchugubei Bungiu?

²⁰ Ma lunti wasigirun áluahei “uéiriguni le lúmagiñeti Bungiu le ábanrügüti”? (Huan 5:44; 7:18; aliihoualá Rómana 2:6, 7.) Ruti Heowá “ibagari magumuchaditi houn ha áluahabalin uéiriguni”. Gayarati giñe ladügün wani hénpulu lun hakipurun amu úaraguni ani winwan hagíame lun súnwandan. Ligíati, mígira wamá lun ñein lan adügüti lun mibihin wamani uéiriguni le líchugubei Bungiu.