1, 2. Ida liña hasandiragun lubúeingu Bungiu houngua lidan ubóu le, ani ka haramudaguagülebei?

 SANDIGUATÜN san hungua kamá le húbiñeñadün lidan ubóu le? Anhein mítaran lubéi, mama hábuguañadün. Lidan sun dan le sügühalibei, sun ha hínsiñehabubaña lun Heowá tau sun hanigi, sandiguatiña houngua kamá terencha lidan ubóu le. Kei hénpulu, añahein meha lubúeingu Bungiu úaraguatiña ha águyahabaña tídangiñe aban kianpu tidoun amu Kanán, ani dan le hadügüni aba hariñagun “mama lan hageira ubóu le, hayabinrügüña lan ebeluha keisi terencha ya ubouagu” (Ebü. 11:13).

² Ítara kei hagía, sun lánigu Hesusu disipulu ha anúadiruaaña, ha “siéluna”, sandiguatiña houngua “keisi terencha lidan ubóu le” (Fili. 3:20; 1 Fe. 2:11). Ani “amu mudún” ha lánigu Kristu “mama giñe lani ubóu” hagía, ítara kei Kristu (Huan 10:16; 17:16). Gama lumoun, meredebaña lubúeingu Bungiu “mábanga”. Lubaragiñe lira, lídanñanu aramudaguagülei chóurutimati le gayarabei wasaminarun luagun, aban aramudaguagülei le gayarabei warihini lau agu lánina afiñeni. Abürühati Moisesi: “Aburemei, buguya waramudaguagülebei súnwandan” (Sal. 90:1). Ida liña san aban lan ‘aramudaguagülei’ buiti Heowá houn lubúeingu ha úaraguatiña lidan binadu dan? Ida liña aban lan aramudaguagülei uguñe weyu houn lubúeingu ha anügübalin liri? Ani ida luba ligíarügübei lan aramudaguagülei chóuruti ámuñegü?

3. Ka uagu layanuhóua lidan Sálumu 90:1, ka uma konpararua lan, ani ka uagu?

³ Ítara kei lasuseredun lidan amu burí hénpulu le tídanbei Bíbülia, lidan Sálumu 90:1 anihein aban gürigia le uágubei layanuhóua, aban katei le úmabei konpararua lan luma saragu puntu le uágubei konpararua lan ítara. Heowá gürigia le uágubei layanuhóua. Konpararuati luma aban aramudaguagülei. Ani ítara liña Heowá  kei aban aramudaguagülei. Kei hénpulu, daruguati hau lumutuniña lugundun ínsiñeni ligía (1 Huan 4:8). Aban giñe Bungiu lánina darangilaü le íchugubei “achoururuni” houn ha úaraguabaña lun (Sal. 4:8). Anhein samina hubéi mítaran lan, samina humá luagun ligaburi lóuseruniña binadu lichügüdina familia ha úaraguabaña, kéiburi Abüraámü.

4, 5. Ida liña aban lan ‘aramudaguagülei’ chóuruti Bungiu lun Abüraámü?

⁴ Gayarati wasaminarun ida liña lan meha lasandiragun Abüraámü o Abürámü lungua dan le lariñagunbei Heowá lun: “Ígirabei bufulasun, biduheñu tuma luban búguchi, ñüdün báamuga lidoun fulasu le lunbei narufuduni bun”. Anhein sandí lubéi meha Abüraámü murusun anufudei, háfuga aba lagalumarun dan le laganbuni le lasigirubei Heowá ariñaga: “Nadügüba aban óunwenbu néchani hau badügawagun; nabinirubadibu, naganbahagüdüba buagu [...]. Nabinirubaña ha abinirutibu, íñaraguanañame ha íñaragutibu” (Agu. 12:1-3).

⁵ Lau dimurei le, füramaseti Heowá ábanbei lan aramudaguagülei le chóuruti lun Abüraámü luma houn ladügawagun (Agu. 26:1-6). Ani gúnfuli lumuti lani füramasei. Kei hénpulu, mígirunti lun láguragunu lurúeite Ehiptu luma Abimélekü le lurúeite Gerarü Sara ani áfara haméi Abüraámü. Ani góunigi lumuti giñe Isaakü tuma Rebeka luéi lasuseredun ligiaméme houn (Agu. 12:14-20; 20:1-14; 26:6-11). Ani “mígirunti Bungiu lun hóuserawagun; ariñagagubeiti houn urúeigu: ‘Maguura humatia hawagu nanúadirun, móuseragun humañame nani profetagu’” (Sal. 105:14, 15).

6. Ka lariñagubei Isaakü lun Hakobu lun ladügüni, ani ida liña funa lasandiragun Hakobu lungua?

⁶ Haganagua profetagu hagía anihein meha Hakobu, le libari Abüraámü. Dan le lachülürünbei oura lun lamarieidun, aba lariñagun Isaakü le lúguchi lun: “Mamarieidabá tuma ni aban würi to yaana Kanán. Beiba Padán-aramü, lúbiñe báruguti Betueli, ábame bamarieidun ñein tuma aban hádangiñe lirahüñü biyaurite Lawán” (Agu. 28:1, 2). Gaganbaditi Hakobu. Ígira lumuti ichouruni le híchugubei liduheñu lun Kanán, aweiyasuhati saragu san kilometuru, háfuga lábugua, darí lachülürün Arán (Agu. 28:10). Háfuga álügüdaguati meha lungua: “Átiribei funa san dan nau bóugudi? Leresibirubadina funa san niyaurite buidu ani ru ligíame aban würi to inebeti Bungiu tun nun lun númarime?”. Sun lidiheri gumuguati dan le lachülürünbei uburugun Lusu, san kilometuru (60 maili) lidise luéi Bérüsewa. Ka asuseredubei uburugu Lusu?

7. Ka ichouruni líchugubei Heowá lun Hakobu lidan aban uénedü?

⁷ Uburugu Lusu, aba lasaliragun Heowá lun Hakobu lidan aban uénedü, aba lariñagun lun: “Anahein buma; nóunigirubadibu  ñein lumuti bidin, ani nagiribudagüdübadibu lidoun múa le. Mígirun nubadibu magunfulirunganei le füramase náalibei bun” (Agu. 28:15). Ma funa lanarime awalidaguni luma dǘgüdaguaü le lasandirubei Hakobu dan le laganbuni dimurei burí ligía! Gayarati san hasaminarun luagun Hakobu éibugeina lau ichouruni lárigiñe sügǘ ligía, ani memeniha lanigi larihini ida luba lan lagunfuliruni Bungiu füramasei ligía? Anhein ígira humaaru lubéi huban lun hidin ídeha lidan apurichihani lidan amu ageiraü, chóurutimati gunfuranda hubéi lan le lasandirubei Hakobu. Ani chóuruti giñe ariha humaali lan lúhabu Heowá lidan hibagari.

8, 9. Ida liña meha aban lan ‘aramudaguagülei’ chóuruti Heowá lun Hakobu, ani ka wafurendeirubei lídangiñe?

⁸ Dan le lachülürünbei Hakobu Arán, buiti leresibiruni Lawán le liyaurite, ani dan lárigiñe aba líchugunu Lía tuma Rakeli lun lun lánigume weiriou. Gama lumoun, lau lásügürün dan, aba lálugun Lawán lamudiraguni Hakobu, ani sansi lumuti lafayeiruáha diisi wéiyaasu (Agu. 31:41, 42). Awanda lumuti meha Hakobu sun marichaü ligía, lau lemenigin luagu lasigiruba lan Heowá óunigirei. Ani ítara liña, dan le lagiribudunbei Kanáun barüina liña saragu “lilügüniña mudún, lidamun, lilügüniña kameyu hama burigü” (Agu. 30:43). Lau lanarime eteingiruni, aba lariñagun lun Heowá: “Madüna numuti areini le aubei bóuserana. Hiñugua numuti duna Hordán le, manügünga ni kata luéidigia nubadun, guentó biánguaru nikianpun-agei” (Agu. 32:10).

⁹ Arufuda lumuti hénpulu burí le woun ka lan uagu lariñaga Moisesi lau ichouruni: “Aburemei, buguya waramudaguagülebei súnwandan” (Sal. 90:1). Gebegimémegili dimurei le uguñe weyu, lugundun Heowá, “úati sánsiguaü lidan, mamuñoungadun ligía”, seriwimémegili kei aban aramudaguagülei houn ha úaraguabaña lun (Sant. 1:17). Ariha waméi ida liña lan ladügüni.

10. Ka uagu gayara lubéi wachoururuni ábanmemegili lan aramudaguagülei chóuruti Heowá houn lubúeingu?

¹⁰ Samina humá ligibugiñeñadün lan liñun-agei lúrudu ayanuha kóntüra aban óundaruni hani gürigia wuribatiña ha gabafubaña lidan sun ubóu, ani aban lan gürigia yeeti, gáfarahati, chuti lau, gabafuti ani magudemehabuti ábutibei. Chóurubei hamuga san hasandiragun hungua dan le háfuridun tídangiñe liñun-agei lúrudu? Hénrengubei! Le linarün katei, buídubei hadüga ánhadün amuriaha kaba lan óunigiraün. Arufuda lumuti le ida liña lan hasandiragun lubúeingu Heowá houngua, wagía le ayanuhabei luagu lufulesein Heowá ani afuranguagüda waméi sun wuribani le ladügübei Satanási, le lágani Bungiu (aliihoualá Arufudúni 12:17). Ibihaali san Satanási lámanichagüdüniwa? Uá! Le linarün katei, awanheingua awansera, ani ábanrügüñein lébuna: aniheingua Heowá óunigirawa, ligía ábanbei ‘aramudaguagülei’ chóuruti woun, lídantima lagumuhóun dan le (aliihoualá Isaíasi 54:14, 17). Ani íbini ítara, siñabei aban lan aramudaguagülei chóuruti Heowá woun ánhawa ígira lun lasagaruniwa Satanási lídangiñe aramudaguagülei.

11. Ka amu leksióun wafurendeirubei hámagiñe binadu lichügüdina familia?

¹¹ Anihán ábanya leksióun le wafurendeirubei hámagiñe binadu lichügüdina familia. Íbini Kanán lan meha hawinwanda, díseñaha haña hawéi lílana ageiraü, ladüga iyereeguti meha liwiye habagari luma luriban hóuserun houn (Agu. 27:46). Úaraguatiña meha wügüriña hagía ani mayusutiña meha aban lísüta lau katei burí le gayarabei luma le siñabei hadügüni. Buídurügüti meha houn le hasubudirubei luagu Heowá luma luagu lusan. Kei le ligía lan meha haramudaguagülebei, mabusenruntiña meha hayarafadun lun ubóu darí ñein lumuti gayara lan hadügüni. Adüga hamuti sun hayaraati lun hadisedun luéi. Ma lubuidun hénpulu woun! Áfaaguatün san  háyeihaniña lichügüdina familia úaraguatiña hagía dan le hanúadahaniña humadagu luma hisebáhari? Híruti añahein lan hádangiñe lílana damuriguaü kristiánu arufudutiña luagu buidu lan hasandiragun houngua lidan ubóu lani Satanási, íbini murusun. Anhein ítara liña lubéi hasandiragun hungua, furíei humá lun Heowá. Mabulieida huméi lani lan Satanási ubóu le, ani arihúati luriban lusan lidan (2 Ko. 4:4; Efe. 2:1, 2).

12. a) Ida liña lóunigiruniña Heowá lumutuniña? b) Ida liña hasandiragun hungua dan le hasaminarun luagun sun ídemuei le líchugubei Heowá woun?

¹² Lun méiguadun wamá tidoun lisadaran Mafia, mosu wayusuruni sun le líchugubei Heowá houn lubúeingu ha áluahabalin haramudaguagüleme. Laganagua idewesei burí ligía anihein adamuridaguni kristiánu luma áhuduraguni lidan familia, añahein giñe “wügüriña keisi idewesei” o hóuniri mudún ha líridubaña Bungiu lun híchugun gurasu woun ani íderagua hamawa lidan wáfaagun kóntüra lénrengunga lidan ibagari (Efes. 4:8-12, TNM). Ariñagati íbiri George Gangas, aban meha hádangiñe íbirigu ha arihibaña lau hawadigimari gefentiña luagu Heowá lidan sun ubóu: “Dan le hadan nan [lubúeingu Bungiu] sanditina núbiñeñadina lan hama niduheñu”. Ítara liña giñe san hasandiragun hungua?

13. Ka leksióun súdiniti wafurendeirubei dan le wakutihani Ebüréu 11:13?

¹³ Ábanya katei le wafurendeirubei hámagiñe binadu lichügüdina familia ha, desidírütiña lun mítaran hamá kei gürigia ha meha geyegubaña hau. Kei warihini lidan  párafu 1, ariñagatiña “luagu mama lan hageira ubóu le, hayabinrügüña lan ebeluha keisi terencha ya ubouagu” (Ebü. 11:13). Desidírühadün san lun amu humá hawéi híbiri gürigia? Mama sun dan lun ménrengunbei lan. Gama lumoun lau lídehan Bungiu luma hídehan híbiri kristiánugu, gayarati hadügüni. Haritagua huméi añahein lan saragu amu kristiánugu lidan áfaaguni le. Le linarün katei, sun ha busenbaña heseriwidun lun Heowá, háfaaguña giñe (Efe. 6:12). Ani gayarati wagañeirun ánhawa afiñera luagu Heowá ani áluaha wameime waramudaguagüleme.

14. Katei san “uburugu” le meha hagurabahabei lubúeingu Bungiu?

¹⁴ Súdiniti giñe lun wáyeihani Abüraámü lau wakipuruni warihin luagun afayeiruahaü (2 Ko. 4:18). Abürühati apostolu Pábulu luagu “agurabaha lan [Abüraámü] lebelurun lidoun lubuidun uburugu le derebugubei ebu, uburugu le ladügübei Bungiu” (Ebü. 11:10). “Uburugu” ligía, ligía Larúeihanbei Mesíasi, ani mosu meha lagurabahan Abüraámü lun lachülürün. Ánheinti wagía, lidan somu manera, mama mosu wagurabahan, lugundun aniheinhali Mesíasi arúeiha sielu. Ani gíbeti katei arufuduti luagu málühali lan agumadiha ubouagu. Inarüniti san Arúeihani hun? Gániti san  efekütu lidan ligaburi harihini ibagari, lidan le hasaminarubei luagun ubóu le luma lidan katei le híchugubei lidan furumiñeti lúgaaru? (Aliihoualá 2 Féduru 3:11, 12.)

15. Ida luba lidin houn ha afiñebaña luagu ubóu le ámuñegü?

¹⁵ Eibu layarafadun lagumuchagüle ubóu le lani Satanási, gánwountimarügübei “le lunbei lasufurirúniwa” (Mat. 24:7, 8). Ani hénrengutimabei katei lidan lanarime asufuriruni. Sun ídemuei le líchugubei ageiraü houn gürigia luma burí amu aransehani le lídanbei ubóu le ábame liabin ǘnabun, ani ábame hanufudedun gürigia lau habagari (Abak. 3:16-18). Lídanme lanarime hadiheri, gayarati wariñagun háluahaba lan haramudagun “lidan huyu luma burí labadinagua dübü le luágubei wübü” (Aruf. 6:15-17). Gama lumoun, ni dübü le burí luágubei wübü ni óundaruni lánina polítika ni lánina bísinisi to héreburiboun tarihín guentó kamá wübü, meseriwidunboun kei aramudaguagülei houn.

16. Ka uagu lunti lubéi gebegi lan damuriguaü woun?

¹⁶ Ánhañati lubúeingu Heowá, hasigiruba agundaara lidan ‘aramudaguagülei’ chóuruti, Heowá Bungiu. Hasandiraguba houngua kei Abakúku, le ariñagubei: “Ábameti nabuinchun lau ugundani ladüga Nabureme le nesefuragüle” (Abak. 3:17, 18). Ida luba aban lan ‘aramudaguagülei’ chóuruti Heowá lídanme dan hénrenguti ligía? Mosu wagurabahan lun warihini. Gama lumoun, anihein aban katei inarüniti: ítara kei ísüraelina lidan lidaani áfuriduni, óundaragu haba “saragu gürigia”, agagudúañu lun heresibirun adundehani lúmagiñe Bungiu (Aruf. 7:9; aliihoualá Áfuriduni 13:18). Tídangiñeba lóundarun Heowá liabin adundehani ligía, háfuga lídangiñe damuriguaü. Le linarün katei, genegeti sun lan saragu milu damuriguaü le lídanbei sun ubóu ligía lan mini lubéi dimurei “húbiñoun” o hirumunrugun le uágubei layanuhóua lidan Isaíasi 26:20 (aliihoualá). Ariha humuti san adamuridaguni kei aban katei gebegiti? Gaganbaditün san lun adundehani le líchugubei Heowá woun lidan damuriguaü sin hasaminaruni bián wéiyaasu? (Ebü. 13:17.)

17. Ida liña aban lan ‘aramudaguagülei’ chóuruti Heowá íbini houn lubúeingu ha hilaañabaña?

¹⁷ Íbini ha óunwegutiña lubaragiñe lagumeserun lanarime asufuriruni chóurubaña luma Heowá, ‘haramudaguagüle’ le chóurubei. Saragu dan lárigiñe hóunwegun binadu lichügüdina familia úaraguatiña ha, ariñagati Heowá lun Moisesi: “Au Habungiutebei [...] Abüraámü, Isaakü luma Hakobu” (Afu. 3:6). Lárigiñe layanuhan luagu dimurei le, ariñagati Hesusu: “Mama Habungiute hilaaña Bungiu, Habungiute ha wínwangiñabaña. Wínwangiña lanügüniña Bungiu sun gürigia!” (Luk. 20:38). Ítara liña kamá hamuga wínwangiña lubúeingu Bungiu ha hilaañabaña, lugundun chóuruti láguyuguagüdübaña lan (Apur. 7:1).

18. Lidan iseri ubóu, ida luba aban lan ‘aramudaguagülei’ chóuruti Heowá houn lumutuniña lidan aban igaburi espechaliti?

¹⁸ Lidan iseri ubóu le yarafaalibei, ábanbei ‘aramudaguagülei’ chóuruti Heowá houn lumutuniña lidan ábanya igaburi. Ariñagati Arufudúni 21:3 woun: “Arihabá, aganawati Bungiu hadan gürigia guentó. Laganóuba hama”. Laganóuba Bungiu hadan gürigia ladüga layusurubei lan Heowá Hesukrístu lun larúeihani Ubóu luagu milu irumu. Dánmeti le lagumuchun furumiñeti milu irumu, ábame lederegeruni Hesusu Arúeihani lun Lúguchi lárigiñeme lagunfuliruni lisuuni Bungiu lun Ubóu (1 Ko. 15:28). Lúmagiñeme dan ligía, sun gürigia ha mafigounhañabaña, memegeirun hamaalime Hesusu lun hachülürün lumoun Heowá, ñeinbei Heowá hama. Ma lubuidun emenigini lubá ámuñegü! Lidan awanha lan agurabaha lachülürün dan ligía, sigí wamá áfaagua lun wáyeihaniña binadu lubúeingu Heowá ha úaraguabaña lau wáluahani Heowá ‘waramudaguagüleme’.