1. Ida liña tarufuduni aban éibaagutu luagu mabusenrun tan tígiruni éibaaguni?

DAN le nibureingiru Mary Decker, tuguya meha aban hádangiñe éibaagutiña ha buídutimabaña lidan sun ubóu. Lidan irumu 1984, lidan áhureruni le subudiwabei kei olimpiadas saminatiña yebe gürigia tugíaba lan agañeirei iñari golu lidan téibaagun 3,000 méturu. Gama lumoun, weyu ligía, mánhiñuragun tumuti laini. Ka uagu? Aba tabuguchun luagu túruna ábanya éibaagutu aba téiguadun. Kei aba lubéi tabuleseirun, mosu meha hasagarunu ñéingiñe. Ma lanarime tayahuahan. Gama lumoun, mábürühanti tarüna. Lidan irumu 1985 —magunfulirungiru ni aban irumu lúmagiñe éiguaduni ligía— ábaya tachülaagun buíduñu ábaya takipuruni tubara hadan würiña éibaagutiña ha buídutimabaña.

2. Ka luwuyeri éibaaguni gádanbadiwa keisi kristiánugu, ani ka wabusenrubei wibihin?

² Wagía kristiánugu, lídanñadiwa amu luwuyeri éibaaguni, ani busentiwa wánhiñuraguni laini lánina lébeha éibaaguni íbini laganagua lénrengunga. Lidan óuchawaguni le, úati súdini lan ka lan furesetimabei. Gama lumoun, mama luéigiñe le lun wasaminarun gayara lan wéibaagun lau darangilaü ani ráramagua wagía emeraagua labadinagua. Gayarati konpararua lan éibaaguni le luma aban maratón, le ídanbei súdini lan awanduni lun gayara lan wagañeirun. Ayanuhati apostolu Pábulu luagu éibaaguni le tidan furumiñetu ligaradan houn kristiánugu ha korintubaña, aban uburugu subudiwati luagu ásügüraguni lidan éibaaguni. Abürühati: “Subudi humuti luagu gibe hamá éibaagutiña lidan aban éibaaguni, ani ábanrügüñein hádangiñe agañeira. Éibaagua humá lubeiti lidan ibagari le lidan aban luwuyeri lun gayaraabei lan hagañeiruni ledewehan Bungiu hun” (1 Ko. 9:24).

3. Kátaña gayarabei hibihini afayeiruahaü lánina ibagari magumuchaditi?

³ Amisuraha tumutiwa Bíbülia lun lidan wamá éibaaguni  le (aliihoualá 1 Korintuna 9:25-27). Ibagari magumuchaditi afayeiruáhaübei; ibagari sielu houn kristiánugu anúadiruaña, luma ibagari ubouagu houn ha híbiri éibaagutiña. Gama lumoun, éibaaguni le mítaranti kei le líbiri, lugundun sun ha éibaagubaña, ha áfaagutiña lun hagumuchuni hibihibei afayeiruahaü (Mat. 24:13). Hárügübaña masigirunbalin lúrudu lánina éibaaguni le eferidira o ha méibaagunbaña darí lagumuhóun. Ábanya katei: lídanrügüñein éibaaguni le gayara lan wibihin ibagari magumuchaditi.

4. Ka uagu hénrengu lubéi lidan wamá éibaaguni luagu ibagari magumuchaditi?

⁴ Hénrenguti lachülürǘniwa lidoun lébeha éibaaguni, lugundun lun wadügüni mégeiwati gurasu luma ichouruni. Lidan sun dan, ábanrügügili gürigia adügüti sin lachugeragun ni aban wéiyaasu: Hesukrístu. Abürühati disipulu Santiagu luagu sun lan lani Kristu disipulugu “charatiwa” (Sant. 3:2). Aban óunwenbu inarüni! Úati lunti lariñagun machara lan ani mani lan hachara amu efekütu luagu. Anihein dan gayarati wachugeragun, wateiteidagun, weferidiruni were o wéiguadun, gama lumoun, aba wiñuragun aba wasigirun éibaagua. Añahein kristiánugu éiguadutiña ani wéiriti dañu le hadügübei hóuniwagua darí lun megei hamá ídemuei lun hiñuragun lun hasigirun éibaagua. Gayarati lubeiti wachugeragun o íbini wéiguadun lidan somu dan o saragu wéiyaasu (1 Uru. 8:46).

5, 6. a) Ida liña ua lan ábürügüdütiña kristiánugu? b) Ida luba gayara lan wiñuragun ánhawa éiguada? c) Ka uagu añahein lubéi fiú miñuraguntiña lárigiñe héiguadun?

⁵ Dan le wayanuhan luagu lumadagua aban kristiánu luma Heowá, háfuga yusu wamuti dimurei burí chugeguaü luma éiguaduni lun ligiaméme katei. Ani inarüni gayara lan ábanmeme lan lila dimurei tídangiñe Bíbülia le, gama lumoun mama súnwandan. Kei hénpulu, teni wamá lun le lariñagubei Ariñawagúni 24:16: “Ladüga íbini héiguadun sedü wéiyaasu, hásaarayaba sedü wéiyaasu, ánhaña ha salufuribaña hábürühaba lidan günringuaü”.

⁶ Mígirunbei Heowá lun hachugeragun ha afiñebaña luagu o lun héiguadun —ladüga somu turóbuli o somu charati— ani lun siñá lan hiñuragun ñéingiñe. Chouru wamuti “liñuragubadiwa”  lan lun wasigirun eseriwida lun tau sun wanigi. Chóuruti aban lan óunwenbu gurasu le houn ha hínsiñehabubaña lun Heowá tau sun hanigi. Ánhañati ha wuribabaña, mabusenruntiña hiñuragun, máluahan hamuti giñe meresibirun haméi ídemuei le líchugubei houn lau lani sífiri sandu tuma lóundarun. Ma ámutiña ha hínsiñehabubaña lun lilurudun Bungiu? “Úati lunti léiguadagüdüniña”, lidan amu dimurei, úati ni kata lunti lasagaruniña sunsuinagubei lídangiñe éibaaguni luagu ibagari (aliihoualá Sálumu 119:165).

7, 8. Ida liña san gayara lan léiguadun aban gürigia ani sigí ligía eresibirei lugundan Bungiu?

⁷ Ladüga débili hamá, añahein fiú íbirigu adügaaña figóu le manarimeti lueirin, ani anihein dan adüga hamuti saragu wéiyaasu. Gama lumoun, gayaragili lagundaarun Heowá hau ánhaña iñuragua o ánhaña asaküriha tídangiñe sun hanigi ani áfaagua hagía lunya heseriwidun lun lau úaraguni. Ariha wamuti ítara liña lan dan le wakutihani lóuserun Heowá hama binadu ísüraelina (Isa. 41:9, 10). Lidan Ariñawagúni 24:16, le buga uágubei wayanuha, mayanuhóunti luagu wéiguadun, ayanuhati luagu gayara lan wiñuragun lau lídehan Wabungiute le gudemehabubei (aliihoualá Isaíasi 55:7). Dandu Heowá kei Hesukrístu ariñagatiña woun lun wararamun, arufudei ítara afiñe hamá wawagu (Sal. 86:5; Huan 5:19).

⁸ Íbini anhein achugeragua aban éibaaguti ani heigua ligía, háfuga gayarabei liñuragun ani sigí ligía awansera anhein iñuragua lau lóufudagun. Wagía le éibaagubei luagu ibagari magumuchaditi, ibidiñeti woun kaba lan “weyu luma oura” lagumucha (Mat. 24:36). Íbini ítara, éibu murusunrügü lan wachugeragun, chóurutimabei wasigirun awansera, sigí wamá lubeiti éibaagua ani chülǘ wamá luagu lébeha. Kábati wadüga lun machugeragun wamá?

9. Ka burí katei lunbei wakutihani lídangiñe le gayarabei ladügün lun wachugeragun?

⁹ Akutiha wamá seingü katei le gayarabei ladügün lun wachugeragun: wadebilin, layumahan ǘgürügü, marichaü le hadügün wíbirigu woun, óuchawaguni o éibaahouni luma hachara amu. Anhein chugeguadiwa lubéi, haritagua wamá gaguraasun lan Heowá. Mafuresehanti asaminara luagu múaragun wamá.

10, 11. Ka lidebilin Dawidi úmabei lageindagua?

¹⁰ Gayarati konpararua lan wadebilin luma dübü le gayarabei ladeiruni aban éibaaguti lidan lémeri. Ánhawa etenira lun libagari urúei Dawidi luma apostolu Féduru, arihatiwa biama lídangiñe “dübü” ligía: luan árügüdaguni unguaü luma anufudei hawéi gürigia.

¹¹ Hénrenguti meha lun Dawidi lárügüdagun lungua, ítara liña larufuduni figóu le ladügübei tuma Betüsawé o ligaburi lóunabun dan le lóuserunbalin Nawali wuriba. Ani íbini anihein lan meha débili le luagu, sigiti áfaagua lun ladügüni lugundan Heowá. Lau hídehan amu gürigia, aranse lumuti lumadagua luma Heowá (1 Sam. 25:5-13, 32, 33; 2 Sam. 12:1-13).

12. Ida liña meha lasigirun Féduru lidan éibaaguni lárigiñe lachugeragun?

¹² Hanufudeti meha Féduru luéi le gayarabei hadügüni amu gürigia lun, ani íbini kipu lan úaraguni lun Hesusu luma lun Heowá, lidan fiú ókaasion adügati charati wéinamuti. Kéiburi dan le lariñagunbei ibidiñe lan Lumaisturun lun, ani mámarügüñein aban wéiyaasu, ǘrüwañein wéiyaasu ladügüni (Luk. 22:54-62). Dan lárigiñe, móuserunti Féduru kei aban buiti kristiánu lugundun óusera lumutiña íbirigu huríu kamá hamuga buítimatiña hawéi ha mámabaña huríu. Ánheinti Pábulu, subudi lumuti meha moun lumuti lan ñein lan fánreinguaü lidan damuriguaü. Chóuruti chará lan meha Féduru ñein. Ligíati, lubaragiñe lagadeiruni damuriguaü lau lusan, aba líchugun Pábulu eweridihani lun furangu (Gal. 2:11-14). Gáriti san katei le lun Féduru darí lun lígiruni léibaagun luagu ibagari? Uá; aba lasaminarun luagun leweridihan Pábulu, aba lasansirun ani aba lasigirun lidan éibaaguni.

13. Ida liña gayara lan lachugeraguagüdüniwa aban sandi?

¹³ Ábanya katei le gayarabei lachugeraguagüdüniwa, sandi. Gayarati ladügün sandi lun siñá  lan weseriwidun kei furumiñe, lun labuchadun wawagu o lun lásiñarun wadügün ni kata. Kei hénpulu, anuhein aban íbiri haponna aba tasandirun disedü irumu lárigiñe tabadiseirun. Wéiriti tadiheridun luagu tisandi darí lun aba lan ledebilidun tumadagua luma Heowá darí lun tígiruni tapurichihan. Aba bisida hamanu bián wéiyaaña lidan afiñeni, ani seremei gurasu le tibihibei, ábaya tagumeserun adamuridagua. Guentó aba tariñagun: “Wéiriti ugundani le nasandirubei luagu ligaburi heresibirunina íbirigu”. Guentó anuheinyaaru íbiri to lidan éibaaguni.

14, 15. Ka burí katei lunbei wadügüni dan le liabin luriban ayumahani lidoun wasaminan? Ru humá aban hénpulu.

¹⁴ Adügaali layumahan ǘgürügü lun héiguadun saragu kristiánugu. Dan le lóuchaguniwa luriban wayumahan, mosu wadügün somu katei lun wakipuruni wasaminan harumañu, haruma ligíame wabagari luma wamadagua luma Heowá. Ariñagati Hesusu furumiñeguarügü lan katei le gayarati ladügün lun wachugeragun, lun lan wagidaruni wawariua, íbini aban wagu o aban warüna. Ma lunti giñe wagidarun furumiñeguarügü igaburi wíyeti wawariua le gayarati lasagaruniwa lídangiñe éibaaguni? (Aliihoualá Matéu 5:29, 30.)

¹⁵ Lúmagiñe nibureintimagili aban íbiri láfaaguña kóntüra hínsiñedun wügüriña líledigu lun. Abahüdaguati íbini lan lidan lan aban familia kristiánu lagüriahóua, súnwandan wuriba lan lasandiragun lungua ladüga masandiragun lan lungua buidu lidan ni aban fulasu. Dan le lagunfulirunbei 20 irumu, prekursoru meha ligía hádangiñe ha adügübaña 70 oura luagu hati ani ábanhali meha giñe ídehati lidan damuriguaü. Gama lumoun, aba léiguadun lidoun aban figóu wéiriti, resibiti ererehóuni ani resibiti giñe ídemuei hámagiñe wéiyaaña lidan afiñeni. Ida liña san liñuragun lunya lárügüdüni lémeri lidan leseriwidun lun Heowá? Lau furíei, laturiahanu Lererun Bungiu luma letenirun lun leseriwidun houn amu. Fiú irumu lárigiñe, ariñagati: “Anihein dan lagiribudun ayumahani le, gama lumoun, mígiruntina lun lagumadirunina. Furendeihadina mígirun lan Heowá lun wouchawagún lóugiñe le gayara wabéi awanda. Ligíati, afiñetina samina lan luagu gayara lan nawandun”. Ariñagati giñe: “Sun áfaaguni le adüga náalibei nibihibei nafayeiruáha luagu lidan iseri ubóu. Ligía nabusenrubei! Ani darime lachülürün weyu ligía, nasigiruba áfaagua”. Chóuruti mabusenrun lan lígiruni éibaaguni.

16, 17. a) Ka íderagubalin aban íbiri le afiñebei lasufuriruña lan ladüga somu marichaü? b) Kaba uagun wíchigei warihin anhein mabusenrun wabéi wachugeragun?

¹⁶ Marichaü le hadügübei wíbirigu woun gayarati giñe ladügün lun wachugeragun. Anihein aban íbiri faransu le seriwihalibei keisi wéiyaali lidan afiñeni, aba lírudun tidan lanigi ladüga lasaminarun adügǘwaali lan aban marichaü lun. Kei resultóu, aba mídinhali lan adamuridagua ni apurichiha. Aba habisidahani bián wéiyaaña lidan afiñeni, aba haganbuni ani gunfuranda hamuti. Meredehan hamuti dan le labahüdaguni houn ida liña lan lasuseredun katei según ligía. Aba hariñagun lun lun lígiruni katei lúhaburugu Heowá ani aba hafuranguagüdüni ladügǘn lan lugundan Heowá súdinitimabei. Resibi lumuti íbiri le adundehani ani fiú dan lárigiñe aba lagiribudun lidoun éibaaguni. Beresegu yaali lidan damuriguaü.

¹⁷ Sun kristiánugu mosu wíchuguni warihin luagun Hesukrístu, le lanúadirubei Bungiu Lichügüdiname damuriguaü, mama hawagun gürigia gafigountiña. Hesusu, le ítarabei agu kei “watu gemeti”, akutiha lumuti katei lau irichaü ani arihati darí ñein lubéi siñabei lan warihin (Aruf. 1:13-16). Subudi lumuti anhein le lubéi warihibei kei aban marichaü, anhein marichaü lubéi o anhein úarügü liña lubéi gunfuranda wamani katei buidu, ani téniti lun turóbuli le lídanbei damuriguaü lidan dan ani lau igaburi le buídutimabei. Ligíati, maweiyasun wamá ígira lun ladügün lóuserun o le desidírü lubéi somu íbiri lun weferidiruni wafiñen.

18. Ida luba gayara lan wawanduni lénrengunga le úmabei wagagibudagua?

¹⁸ Aniheingua biama katei le gayarabei ladügün lun wachugeragun: óuchawaguni o éibaahouni luma hachara amu. Lidan hénpulu luáguti  ábunaguti, ariñagati Hesusu dan le lan “hóuchawagun luma héibaahoun luéigiñe uganu ligía, aba hachugeragun”. Meberesenga halíagiñe lan liabin éibaahouni —hámagiñe iduheñu, besinagu o lúrudugu— gayarati ladügün dañu houn ha ‘málagülebaña’, lidan amu dimurei, ha débilibaña afiñen (Mat. 13:21). Gama lumoun, anhein desidírühadiwa lubéi lun werederun yarafa lun Heowá, ladügüba uganu luáguti Larúeihan lun here lan wafiñen ani derebugu wagíame kei aban tídibu wewe to huliliti tílagüle. Danme le lidan wamá turóbuli, furíei wamá ani samina wagíame luagun “sun le gadünabei uéiriguni” (aliihoualá Filipuna 4:6-9). Lau erei le líchugubei Heowá woun, gayarabei wawanduni óuchawaguni ani mígirunbadiwa lun ladügün lénrengunga lun wachugeragun.

19. Kaba wadüga lun machugeragun wamá ladüga hadügün amu somu katei le mínsiñeti woun?

¹⁹ Híruti añahein lan fiú ígiruti éibaaguni kristiánu ladüga hachara amu. Luagu burí ámuñegueinarügü lan saminaü, o luagu katei le lunti desidírü hamani kada gürigia (1 Ko. 8:12, 13). Anhein ariñaga o adüga somu gürigia katei le adügüti lun wasandiragun woungua wuriba, waweiridaguagüdübei san katei? Wéridi tumutiña Bíbülia kristiánugu lun maguseragüdün hamá amu ani mafuudun hagía luagu le habusenrubei, lubaragiñe lira, lun aranseñu hamá lun híchugun ferudun (Luk. 6:37). Danme le mínsiñe lan lóuserun somu gürigia woun, álügüdagua wamá woungua: “Busenrügütina san lun hóuserun kei nugía? Kei subudi nubalin luagu chará hamá níbirigu, nígiruba san lun ladügün lichara aban hádangiñe lun masigirun nan éibaagua luagu ibagari?”. Ínsiñeni le wasandirubei luagu Heowá ladügüba lun desidírü wamá wachülürün lidoun lagumuha éibaaguni meberesenga ka lan hadügübei amu.

20, 21. Ka desidírü hubéi hadügün lidan éibaaguni luagu ibagari?

²⁰ Desidírühadün san héibaaguni éibaaguni “chülǘ lumoun lébeha”? (2 Tim. 4:7, 8.) Anhein ítara liña lubéi, aturiaha humóun Bíbülia tuma burí amu agumeiraguagüdüni to tíchuguboun lóundarun Heowá lun hakutihan, hasaminarun luma lun hasubudirun amu burí lébuna achugeraguni. Amuriaha humá sífiri sandu luma Bungiu, lugundun ligíaba íchigei erei le hemegeirubei lun hasigirun. Haritagua huméi úati lan ni aban éibaaguti asiadirúti lun súnwandan ladüga lachugeragun o léiguadun somu wéiyaasu. Gayarati liñuragun ani giribu ligía lidoun éibaaguni. Gayarati íbini ladügün lun leseriwidun lénrengunga lun keisi arufudahani.

²¹ Arufuda tumuti Bíbülia siñati lan werederun chagu warüna anhein busén wabéi lidan wamá éibaaguni luagu ibagari. Mosu wáfaagun. Mítaranti kei wawarirun tidoun aban karü lun tanügüniwa lidoun agañeiruni. Kada aban wádangiñe mosu wéibaaguni éibaaguni darí lagumuhóun. Ani éibume wawanserun, ítara luba ‘lidarangilan’ Bungiu kei garabali le íderagubaliwa awansera (Sal. 119:165). Gayarati wachoururuni labinirubadiwa lan Heowá súnwandan ánhawa éibaagua chülǘ lumoun lagumuhóun (Sant. 1:12).