1. Ka uagu mosu lubéi hayusurun abugahatiña awión aban lísüta lun hachekürünu awión lubaragiñe táhamachun?

SAGÜ lubaragiñe táhamachun aban tídangiñe awión to chóurutimaboun ubouagu, aba layusurun abugahati aban lísüta lau lóugiñe darandi katei le lunbei lachekürüni tuagu awión tuguya. Lun hamuga madügün hamani, hanarimetimabei hamuga pelíguru lun lasuseredun somu danaguaü le hanarimeti. Subudi humuti san ka lan hawuyeri abugahatiña awión óunahoubaña adügei echekühani ligía? Ha subuditimabei luáguti houn! Ka uagu? Ladüga ha abugahabaña awión luagu saragu oura gayarati machekürün hamani sun katei lau duari.

2. Ka lunbei hadügüni sun kristiánugu súnwandan?

² Ítara kei aban abugahati awión, gayarati giñe hayusurun aban lísüta lun hachekürüni hafiñen lun hachoururuni macharabei lan danme le hemegeiruni. Dandu anhein málügili lubéi wabadiseirun o barühadiwa lan saragu irumu, súdiniti wakutihani anhein derebugu lubéi wafiñen luma wederegeragun woungua lun Heowá tau sun wanigi. Anhein madügün wamá, gayarati weferidiruni wamadagua luma Heowá. Ítara liña kei teweridihan Bíbülia: “Le lubeiti haritaguabei luagu deregüdagua lan léibugun luma Bungiu, góunigila, ábürühadügüliñein” (1 Ko. 10:12).

3. Ka meha lunbei hadügüni kristiánugu galasiana?

³ Mégeitiña meha kristiánugu galasiana hachoururuni anhein derebugu lubéi hafiñen arufuda hameime gebegi lan houn halíbürerun luéi afiñeni le mama inarüniti. Lau lani Hesusu sákürifisiu, dará lumuti üma lun sun lan ha afiñerutiña luagu ábame hasubudiruni Bungiu lidan aban igaburi espechaliti: gayarati meha lisaanigu hamá Bungiu! (Gal. 4:9.) Lun meferidirun hamani lubuidun chansi ligía, mosu meha hamahadun galasiana lun harufudahan huríu, ha meha busenbaña lun lagunfulirúniwa lilurudun Moisesi. Gama lumoun, sun meha lílana damuriguaü  ha mámabaña huríu magunfulirunñaha hamagili Lúrudu ligía. Dandu huríu kei mama huríu mégeitiña meha hawanserun lidan heseriwidun lun Bungiu, ligía mosu lubéi meha gunfuranda hamani mama lan lagunfulirúniwa lilurudun Moisesi adügübei lun richá hamá ligibugiñe Bungiu.

4, 5. Ka adundehani líchugubei Pábulu houn galasiana, ani ka uagu súdini lubéi woun?

⁴ Eweridihani le líchugubei apostolu Pábulu houn galasiana rédeiti tidan Bíbülia lun aban katei: lun sun lan kristiánugu inarünitiña ha awinwandutiña lidan furumiñeguarügü dan lun míchugun hamani hanagan luagu inarüni le tídanbei Bíbülia lúnrügü hagiribudun lidoun katei le hígirubei hárigiñegua. Ruti Heowá sífiri sandu lun apostolu lun líchugun dǘgüdaguaü houn sun lubúeingu Bungiu lun hakipurun úaraguni, mámarügü ha meha lídanbaña damuriguaü le Galasiabei.

⁵ Sun wagía, huuti woun waritaguni ida liña lan wesefurún lídangiñe libidiñen Bungiu woun ani aba wabadiseirun kei gefentiña luagu Heowá. Lun hadügüni, samina humá luagun bián álügüdahani le: Haritagua humagili ka lan meha hadügübei lun gayara lan habadiseirun? Haritagua humagili ida liña lan hasubudiruni Bungiu luma ida liña lan lasubudirunün kei lumada, lun gayarabei lan meha hasandiragun hungua líbüre humá lidan heseriwidun lun?

6. Katoun san lísüta to lunboun wakutihanu?

⁶ Sun wagía adügatiwa nefu katei, dariwati katei burí ligía lidan rekuaduru  “Pasu burí le anügübei lidoun badisei luma awanseruni le magumuchaditi” lun wachekürüni ida liña lan wawanserun lidan wamadagua luma Bungiu. Waritaguni nefu pasu le ruti erei woun lun wawanduni óuchawaguni lun wagiribudun lidoun ubóu le. Ítara kei lau lan ichouruni láhamaha aban abugahati awión le wéiriti lisubudin ani duariti lárigiñe lachekürünu awión, gayarabei giñe hakipuragun hungua lidan heseriwidun lun Heowá lau úaraguni anhein hacheküha ida liña lan lawanserun humadagua luma Bungiu.

7. Ka hénpulu lunbei wasigiruni, ani ka uagu?

⁷ Seriwitu lísüta lánina echekühani lun abugahati awión lun laritaguni mosu lan ladügün somu katei lau duari lubaragiñe kada wéiyaasu. Wagía, gayarati giñe wachoururuni, o wakutihani ida liña lan wamadagua luma Bungiu luma katei le wadügübei lúmagiñe wabadiseirun. Abürühati Pábulu lun Timotéu: “Mígirabei luwuyeri arufudahani harumati le níchugubei bun, abagaridabá lau bafiñen luagu Kristu, arufudeina ínsiñeni le wibihibei lúmagiñe Hesukrístu” (2 Tim. 1:13). “Arufudahani harumati” ligía dariwati tidan Lererun Bungiu (1 Tim. 6:3). Ítara kei seriwi lan aban dibuhu le ladügübei aban adibuhati lau lóufudagun lun larufuduni ida luba lan lerederun kuaduru, íderagua lumutiwa giñe inarüni le tídanbei Bíbülia asubudirei ka lan lagurabahabei Bungiu wámagiñe. Ligíati, akutihaya waméi katei burí le wadügübei lun gayara lan wabadiseirun ani ariha waméi anhein wasigiruñein lubéi inarüni.

8, 9. a) Ka uagu mosu lubéi wasigirun awansera lidan afiñeni luma subudi? b) Ka uagu súdini lubéi wawanserun lidan wafiñen ani ida liña genegegua lan luma taweiridun aban tídibu wewe?

⁸ Furumiñeti puntu le tídanbei wani lísüta, libihín subudi. Lárigiñe, aba liabin afiñeni. Gama lumoun lunti wasigirun awansera lidan bián katei le (2 Tesa. 1:3). Dan le lawanserun aban gürigia, adügeina liña asansiruni lidan libagari. Abuidureinatima liña lóuserun. Ligíati, lárigiñe wabadiseirun lunti abuidureinatima lan wamadagua luma Bungiu sin lararamagun.

⁹ Gayarati konpararü wamani wamadagua luma Heowá luma aban tídibu wewe. Gayarati laweiridun tídibu wewe saragu, dántima le hulili lan lílagüle o miginagu lan. Kéiburi aban luwuyeri tídibu wewe le gíribei hibúari  líwanuna gayarati iñu lan kei tiñun aban muna to duusutu fuló, héreti lílagüle ani huliliti ani garanati lugudina lóugiñe 12 méturu (40 ugudi) (Ure. 5:15). Dan le lásurun furumiñeti lachawaragun, sigiti aweirida, gama lumoun manarimeli larihín. Sagü irumu, aba agaranadeina lan lugudina ani ábatima amigifedeina lan lílagüle, ábati derebugutima lan tídibu wewe. Ítara liña giñe lasuseredun lun aban kristiánu. Gayarati wawanserun furese dan le wagumeserun aturiahoun Bíbülia ani badisei wagía; háfuga gayarati wawanserun darí lun prekursoru wamá o wibihin amu wadagimanu lidan damuriguaü. Ariha hamuti lílana damuriguaü wawanserun ani gúndaatiña. Gama lumoun, lidan burí irumu le lárigiñebei háfuga manarimebei larihín wawanserun. Gama lumoun, mosu wasigirun awansera lidan wafiñen luma subudi darí lun “wachülürün lumoun lubunwari Kristu” (Efe. 4:13). Ítara liña wawanserun lúmagiñe wagumeserun lan afurendeira darí lun kristiánugu wamá ha awanseeña.

10. Ka uagu íbini lubéi kristiánugu ha derebuguhaña lidan hafiñen mosu hasigirun awansera?

¹⁰ Gama lumoun, moun lumuti werederun ñein. Mégeitiwa waganwoundagüdüni wasubudin luma wafiñen lun héretima wamá o badüleñu wamá luagu le tariñagubei Lererun Bungiu (Ari. 12:3). Ligía hadügübei saragu lílana damuriguaü. Kéiburi aban íbiri le barühalibei lóugiñe darandi irumu eseriwida kei wéiyaali lidan afiñeni, aba larihin luagu anihamémegua lan awansera lidan lafiñen. Aba lariñagun: “Gánwountimahali ínsiñeni le nasandirubei tuagu Bíbülia. Súnwandan nadarirun iseri chansi lun nawinwandun según lúrudu luma adundehani le tídanbei. Ani eibu dan hínsiñetimati giñe nani ministeriu nun”.

11. Ida liña gayara lan wasubudiruni Heowá buidu lau lásügürün dan?

¹¹ Wawanserun lidan wafiñen mini lan giñe wayarafadun lun Heowá keisi Wamada ani Wáguchi. Busenti lun wasandiruni resibi lániwa, hínsiñe wamá lun ani góunigi lániwa, kei lasandiragun aban irahü lungua larünarugu lúguchi o kei wasandiragun woungua dan le lúmañadiwa lan aban umadaü le úaraguati. Furanguti mama lan lidan murusun oura ladügǘwa umadaguaü luma Heowá. Mosu lásügürün dan lun wasubudiruni buidu ani hínsiñe ligíame woun. Ligíati, desidírü humá hígirun murusun dan sagü weyu lun haliihanu Lererun. Ani aliiha humóun giñe sun Garüdia Atalaya tuma ¡Despertad! to áfuridutu, tuma amu burí agumeiraguagüdüni.

12. Ka lunbei wadügüni lun aheredeinatima lan wamadagua luma Heowá?

¹² Ha lumadagu Bungiu awansetiña lidan hafiñen lau lídehan hafurieidun tídangiñe  sun hanigi luma háluahan umadagu buítiña (aliihoualá Malakíasi 3:16). ‘Aganba lumuti Bungiu hafurieidun’ (1 Fe. 3:12). Kei aban úguchili hínsiñehabuti, aranseñu liña Heowá lun laganbuni wayumuragun. Ligía lunti lubéi ‘wafurieidun eteingirei Bungiu súnwandan’ (Rom. 12:12). Siñati kristiánugu wamá ha héretiña sin lídehan Bungiu. Wéinamuyati óuchawaguni le lídanbei ubóu le lun wawanduni lau wabafu guánarügü. Ánhawa mafurieidun, wadiseduba luéi erei le labusenrubei Bungiu líchugun woun súnwandan ani gayarati líchuguni woun. Gúndaatün san lau hafurieidun, o arihatün megei humá hadügün somu asansiruni lun buídutima lan? (Her. 16:19.)

13. Ka uagu súdini lubéi wadügün umadaguaü hama amu kristiánugu lun wawanserun lidan wafiñen?

¹³ Gúndaati Heowá hau ha “afiñebaña luagu”. Ligíati, íbini lárigiñe wasubudiruni Bungiu, lunti wasigirun adamuridagua lidan damuriguaü le ñein habéi ha giñe subudihabúbaña lun (Naún 1:7). Lidan aban ubóu le ñein lubéi saragu maguraasuni, buídubei wadüga ánhawa eredera hadan íbirigu ha gíchigaditiña gurasu. Kaba wibiha? Lidan damuriguaü wadariruba gürigia ha lúntiña hínchahaniwa lun warufudun ínsiñeni luma lun wadügün katei buiti (Ebü. 10:24, 25). Lun ñein lan ínsiñeni le uágubei labürüha Pábulu houn ebüréu, mosu ñeinbei lan úarani hadan íbirigu. Lun warufuduni ínsiñeni le, mosu úara wamá hama amu kristiánugu. Tidan hani lísüta, makü huméi átiriñein lan wéiyaasu hidin adamuridagua, óunabagülei le híchugubei lidan luma anhein gani hubéi somu fánreinti lidan adamuridaguni.

14. Ida liña mararamagun lan wasakürihan luma wasansirun?

¹⁴ Lun kristiánugu wamá, mosu meha wasakürihan luagu wafigoun ani sansi wagía. Gama lumoun, másuti hasakürihan gürigia. Kei le gafigoun wabéi, ítara liña figóu kei aban hewe to gougu tiña aranseñu lun tachubarun luagu furumiñeguarügü (Rom. 3:9, 10; 6:12-14). Fegé waméi wagu buidu ani marufuda wamá mebereseni dan le wachararun. Gúndaatiwa luagu gaguraasun lan Heowá wabá dan le wáfaagun kóntüra wadebilin ani adüga waméi asansiruni le wemegeirubei (Fili. 2:12; 2 Fe. 3:9). Buiti lun wayusuruni wadaani luma wemegen o waseinsun buidu, ígira wameime furumiñeguarügü katei le wasaminarubei wadügün ladüga wawouguounrügü lan wasaminara. Ariñagatu aban íbiri: “Lidan inarüni naweirida, gama lumoun ámuti meha nisaminan luagun Heowá hawéi ha híbiri gürigia. Ruti meha anufudei nun nasaminarun luagun, ani saminatina siñabei lan nagundaaragüdüni”. Lau lásügürün dan, aba ledebilidun tumadagua íbiri to luma Heowá ladüga saragu turóbuli lidan tibagari. Aba tasigirun ariñaga: “Mama meha ladüga mínsiñe lan Heowá nun, ibidiñerügü liña nun buidu. Gama lumoun, lárigiñe nafurieidun lun saragu wéiyaasu tídangiñe sun nanigi, aba lagumeserun katei asansira. Aba nasandirun lanügüñadina lan Heowá luéigiñe narüna kei aban irahü, íderaguana ásügüra lídangiñe kada turóbuli, súnwandan ladügüni lau saragu ínsiñeni lun larufuduni nun ka lan lunbei nadügüni”.

15. Ka un letenira Hesusu luma Lúguchi?

¹⁵ Sigí humá ‘abahüdagua houn gürigia’ luagu uganu buiti. Aban lani Bungiu ánheli ariñagubalin dimurei le lun Féduru luma houn ha híbiri apostolugu lárigiñebei hasagarún furisunrugugiñe lau aban milaguru (Adü. 5:19-21). Wáfuridun apurichiha íbini aban wéiyaasu lidan dimaasu ligía ábanya puntu tídangiñe wani lísüta lun warihini ida liña lan wamadagua luma Heowá. Dandu Hesusu kei Lúguchi ténitiña lun wafiñen luma lun wani ministeriu (Aruf. 2:19). Ariñagati wéiyaali lidan afiñeni le buga uágubei wayanuha: “Apurichihani wabagaribei”.

16. Ka uagu lunti lubéi wasaminarun luagun wederegeragun woungua lun Heowá?

¹⁶ Samina humá luagu hederegeragun hungua lun Heowá. Wamadagua luma Heowá ligía katei gebegitimati le wámabei. Subudi  lumutiña Bungiu lánigu (aliihoualá Isaíasi 44:5). Akutiha huméi lábugiñe furíei ida liña lan humadagua luma Heowá. Ani úara luma katei le, haritagua huméi weyu súdiniti le lánina habadiseirun; ítara luba mabulieidun humani aban lan sínbolu lani katei súdinitimati le desidírü humaalibei lidan hibagari.

17. Ka uagu megei wabéi awanduni lun werederun yarafa lun Heowá?

¹⁷ Tidan ligaradan Pábulu houn galasiana, ayanuhati luagu mégeiwa lan awanduni (Gal. 6:9). Uguñe weyu, súdiniti giñe igaburi le lun kristiánu. Hadunraguba luma lénrengunga, gama lumoun líderagubadün Heowá. Sigí humá amuriaha sífiri sandu luma. Hasandiruba awalidaguni danme le lagidaruni higarigu ábame líchugun ugundani hun, gidaleime idiheri lun líchugun darangilaü (Mat. 7:7-11). Samina humá luagun le: anhein góunigi lubaliña Heowá dunuru, ma súdinitimatün lun, huguya le hínsiñehabubei lun ani derege humaali hibagari lun? (Mat. 10:29-31.) Meberesenga ka lan burí turóbuli lunbei hawanduni, magiribuda humá hárigoun mabuchadun ligíame huagu. Ma libe irisini buíduburiti weresibirun ladüga lumadagu wamá Heowá!

18. Lárigiñe “subudi humaali lan Bungiu”, ka lunbei hadügüni guentó?

¹⁸ Anhein málügili lubéi hasubudiruni Bungiu ani badiseihadün, ka lunbei hadügüni guentó? Hasigirun asubudirei Heowá, hasigirun awansera lun derebugu humá lidan hafiñen. Ani ánheinti lüha lubéi habadiseirun? Mosu giñe hasigirun aganwoundagüdei hisubudin luagu. Masaminara humá mámaali lan mosu hasigirun abuíduragüdei humadagua luma Heowá. Lubaragiñe lira, águyuguagüda humóun hani lísüta lun hachoururuni anhein hawanseruña lubéi lidan humadagua luma Heowá, Wáguchi le hínsiñehabubei, Wamada ani Wabungiute (aliihoualá 2 Korintuna 13:5, 6).