KEI warihini lidan arütíkulu le lubaragiñebei le, gasuuniti meha libagari Hesusu. Anhein busén wabéi ítara lan wabagari, súdiniti lun wáyeihani lani hénpulu ani sigí wameime ladundehan.

Kei larufuduni bérusu le íñubei ariñagati Heowá woun lun wawinwandun kei lawinwandun Hesusu, mini lan le, wáyeihani lani hénpulu luma larufudahan lidan sun le wadügübei. Anhein wadüga, lagundaaruba Bungiu wau ani gasuunibei wabagari.

Arufudahati Hesusu fiú inarüni méiniti le íderagubaliwa lun wasigiruni lémeri, saragu lídangiñe dariwati lidan Serumu luagu Wübü. Akutiha wamá ǘrüwa lídangiñe ani ariha waméi ida luba lan wagunfuliruni lidan wabagari.

IDA LIÑA LÍDERAGUNIWA INARÜNI MÉINITI LE?:

Ariñagati Hesusu luagu sun lan gürigia megei hamuti lídehan Bungiu. Ligía busén wabéi wasubudiruni óunabagülei lun álügüdahani kéiburi: Ka uagu awanhan lubéi ya? Ka uagu líbebei asusufuriruni? Súdinitiwa san lun Bungiu? Anihein san ibagari lárigiñe óunweni? Lun gasuuni lan wabagari mégeitiwa wasubudiruni óunabagülei. Subudi lumuti meha Hesusu ábanrügüñein lan fulasu le ñein lubéi ladarirúa óunabagülei le chóuruti: Lererun Bungiu. Lidan aban furíei le ladügübei lun Lúguchi, ariñagati: “Bererun [...] inarünibei” (Huan 17:17). Gayarati san wadariruni sun le wemegeirubei lun wasubudiruni Bungiu tidan Bíbülia?

SÜGǗ INARÜNITI:

Aban nibureinti gíriti Esa, ligía meha eremuhati le súdinitimabei lidan aban sétanu áfaruti músika ani yarafaali meha lun libihin aban ubaraü súdiniti lidan leremuhóun rock. Ani íbini ítara, aniheinha dan lasandirun megei lan somu katei. Aba lariñagun: “Íbini meha hínsiñe lan nun lidan nan sétanu ligía, busentina meha gasuunitima lan nibagari”. Lau lásügürün dan aba lasubudirun aban gefenti luagu Heowá. Aba lasigirun ariñaga: “Aba nadügün saragu álügüdahani lun. Sun lubuidun burí óunabagülei le líchugubei nun tídangiñe Bíbülia adügati lun nabusenrun nafurendeirun lanwoun, aba lubéi nagumeserun aturiahoun Bíbülia luma. Chülüti le lafurendeirubei tidoun lanigi ani ligía ínchahabalin lun lederegeruni libagari lun Heowá. Ábaya lariñagun: “Yagüroun yaroun niña meha, furihadina meha lídangiñe aban turóbuli, beluyadina lidoun amu. Guentó gasuunihali nibagari”.

IDA LIÑA LÍDERAGUNIWA INARÜNI MÉINITI LE?:

Ínchaha lumutiwa gudemehabu lun wóuseruniña ha híbiri lau ínsiñeni luma lubuidun igaburi. Gudemehabuti meha Hesusu houn ha mégeibaña. Ínchaha lumuti lanarime lugudemehabu lun lawalidaguagüdüni hagarigu saragu gürigia sin hamuriahani luma (Matéu 14:14; 20:30-34). Dan le wóuserun kei Hesusu, gúndaatimatiwa ani gasuunitimati wabagari (Adügaü 20:35). Gayarati warufudun gudemehabu lau le wariñagubei luma le wadügübei dan le wíderaguniña sun ha mégeibaña ídemuei. Gama lumoun, gayarati lariñagun somu gürigia: “Inarüni san buídutimabei lan nasandiragun nungua ánhana arufuda gudemehabu?”.

SÜGǗ INARÜNITI:

Maria luma Karlos aban feru maríeitiña gudemehabutiña. Kei le hilá lubéi lani túguchi weiriou ani lidan lagumuhóun burí irumu róuñudügaali gabanarugu, aba hanügüni hábiñoun lun hóunigiruni buidu. Sügühaña saragu áriebu marumugunga, ani gíbeli wéiyaasu héibaagun lau haspitalirugun ladüga lǘnabudun o liñurun lisugaran.  Íbini ariñaga hamá anihein lan dan labuchadun hawagu, gúndaatiña, lugundun kei lariñaguni Hesusu, subudi hamuti híchuguñein lan le lemegeirubei túguchi Maria lun.

IDA LIÑA LÍDERAGUNIWA INARÜNI MÉINITI LE?:

Ida liña lídehan wawadigimaridun luagu darangilaü lun gasuuni lan wabagari? Íderagua lumutiwa saragu, ídehati lun buídutima lan wanaagun woungua hama ha geyegubaña wau. Ligía buidu lubéi wasigiruni adundehani le: “Adüga huméi sun le huáraati lun habagaridun lidan darangilaü hama súngubei” (Rómana 12:18). Dimurei “hama súngubei” layanuhaña hawagu waduheñu hama amu gürigia, íbini ha ámubei hafiñen wawéi. Inarüni san gasuuni lan wabagari dan le lidan wamá darangilaü “hama súngubei”?

SÜGǗ INARÜNITI:

Wayanuha tuagu Nair, aba würi to unboun hénrengu lan takipuruni darangilaü, lugundun súfuriharu saragu, hámatima lílana tufamilian. Lúmagiñebei lígirunu tani weiriei keinsi irumu guentó, aba tetenirun agüriahaña tisaanigu tábugua. Héiguati aban hádangiñe lidoun tayusurún duroga, súnwandanha lagañidun ani ariñaga ligíaha tun ladügüba lan dañu tun luma tun litu. Chóuru tumuti Nair íderagua tanu Bíbülia lun darangilu tan íbini lidan lénrengunga. Lubaragiñe terederun ageindagua o asigeneha luagu katei le úati súdini lan, áfaaguatu lun gunfuranda tániña gürigia ani óusera tuguya buidu hama (Éfesuna 4:31, 32). Tafurendeirun akipura darangilaü íderagua lumutu lun buidu lan tanaagun tungua hama tiduheñu luma hama amu gürigia.

Anhein wasigira lubuidun ladundehan Hesusu, wadariruba ugundani lidan wabagari. Gama lumoun, lun gasuuni lan wabagari, mégeitiwa wasubudiruni kaba lan asusereda ámuñegü. Lau sun luwuyeri, kaba lisuuni wabagari anhein masubudirun wabéi amu katei luéidigia luagu lachülürüba lan dan lun waweiyadun, wasandirun ani hilagua wagía? Híruti ligía lan wawinwandubei guentó.

Gama lumoun, anihein uganu buiti. Anihein saragu abinirúni luma Heowá houn ha áfaagubaña lun “[h]abagaridun kei meha labagaridun Hesukrístu”. Füramaseti Heowá aban iseri ubóu richati lun hawinwandun gürigia kei meha labusenruni: lun súnwandan ani lau lubuidun átuadi. Ariñagatu Lererun: “Arihabá, aganawati Bungiu hadan gürigia guentó. Laganóuba hama ani hagíaba lumutuniña; Búngiumemeba hama lun ligía lan Habungiute. Laragahabei sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (Arufudúni 21:3, 4).

Maria, würi barüharu 84 irumu to uáguboun layanuhóua lidan furumiñeti arütíkulu tidan garüdia to, gúndaatu dan le tasaminarun tarihibei lan lagunfulirun dimurei burí le. Agia hugía? Busentün san haganwoundagüdüni hisubudin luagu ibagari inarüniti le lunbei wibihini lábugiñe Larúeihan Bungiu? (1 Timotéu 6:19.) Anhein ítara liña lubéi, amisuraha wamutün lun hayanuhan hama gefentiña luagu Heowá ha lídanbaña fulasu le ñein lubéi hawinwanda o habürühan houn ha adügübarun garüdia to. *